Euskal Herriko Agintaritzaren Aldizkaria

68. zk., 2001eko apirilaren 6a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Bestelako Xedapenak

Justizia, Lan eta Gizarte Segurantza Saila

1880

AGINDUA, 2001eko apirilaren 4koa, Justizia, Lan eta Gizarte Segurantza sailburuarena. Agindu horren bidez, Euskal Autonomia Erkidegoan EQUAL Europako Batasunaren Ekimenari dagozkion laguntzak eskuratzeko lehenengo deialdia arautzen da.

Fondo Estrukturalei buruzko xedapen orokorrak ezartzeko ekainaren 21ean Kontseiluak (EE) emandako 1260/1999 Araudiaren 20 eta 21. artikuluetan eta Europako Gizarte Fondoaren inguruan Europako Parlamentuak eta Kontseiluak uztailaren 12an emandako 1784/1999 Araudiaren (EE) 5. artikuluan ezarritakoa betez, fondo horrek balio beharko du EQUAL Europako Batasunaren Ekimena abian jartzeko; ekimen horren helburua ondokoa da: lan merkatuan eta nazioz gaindiko lankidetzaren inguruan, mota guztietako bazterketa eta desberdintasunen kontrako metodo berriak sustatu eta bultzatzea.

Europako Batzordeak Estatu kideei 2000ko apirilaren 14an igorritako eta urte bereko maiatzaren 5ean argitaratutako komunikazioan, dagozkion programak lantzeko Europako Batasunaren Ekimenaren inguruko orientabideak ezartzen dira.

EQUAL Ekimena, Amsterdamgo Itunaren enpleguari buruzko Tituluan jasota dagoen eta Luxenburgon 1997ko azaroan bildutako Europako Kontseiluan abian jarri zen Europako Enplegurako Estrategiaren barruan kokatzen da, bai eta Europako Batasunean bazterketa sozialaren kontra borrokatzeko estrategia integratuaren barruan ere.

Estrategia hauen aplikazioari dagokionez, Giza Baliabideen aldeko Europako Batasunaren aurreko Ekimenetan (ADAPT eta EMPLEO) lortutako esperientziarekin eta enpleguaren esparruko politika nazionalekiko osagarritasunaren ikuspegitik, Espainiak Europako Batzordeak 2001ean onartutako Europako Batasunaren Ekimenaren Programa aurkeztu zuen.

Europako Batzordeak 515 milioi euroko zuzkidura ekonomikoa onartu zuen EQUAL Europako Batasunaren Espainiako Ekimenerako eta 2001-2006 aldirako.

Europako Batzordeak eta Estatu Kideek hitzartutakoaren arabera, laguntza hauek eskuratzeko bi proiektu-deialditan parte hartu ahal izango da (lehen deialdia Agindu honen bidez batera finantzatzen da).

Lan eta Gizarte Gaietarako Ministerioaren menpeko Europako Gizarte Fondoaren Unitate Administratzailea, kudeaketa-agintaritza gisa eta EQUAL Europako Batzordearen Ekimenaren Programan ezarritakoari jarraiki, Europako Batzordearen Ekimen berri honen laguntzetarako deialdia egiteko eta ebazteko ardura duen organoa da; horren ondorioz, EQUAL Europako Batasunaren Espainiako Ekimenari dagozkion laguntzak eskuratzeko lehen deialdia argitaratu du.

Europako Batasunaren Ekimenek Europako Gizarte Fondoaren finantzaketaz gain erakunde publikoen baterako finantzaketa behar dutenez gero eta Eusko Jaurlaritzak bultzatutako gizarte eta lan politika osoaren oinarri den enpleguaren lehentasunaren esparruan, Justizia, Lan eta Gizarte Segurantza Sailak proiektu berritzaile ugari finantzatu ditu aurreko Europako Batasunaren Enplegurako Ekimenen programazioaldietan. Proiektu horiek izan duten burutzapen egokiak gaur egungo enplegu eta prestakuntzarako programei erantsi zaizkie.

302/2000 Dekretuak aldatutako Lanerako Prestakuntzako programa arautzen duen maiatzaren 16ko 83/2000 Dekretuko 1.1 artikuluak ezartzen duenez, arauzko esparru horretara EQUAL Europako Batasunaren Ekimenaren ondoriozko jarduerak bildu ahal izango dira. Era berean, bigarren Azken Xedapenak ahalmena ematen dio Justizia, Lan eta Gizarte Segurantza sailburuari Europako Batasunaren enplegu eta giza baliabideen aldeko Ekimenak garatu eta burutzeko beharrezkoak diren xedapenak har ditzan.

Agindu hau enplegu eta prestakuntzarako programak berritzeko eta, bereziki, lan-merkatuan izaten den bazterketa eta desberdintasun ororen kontrako metodo berriak sustatzeko zereginarekin jarraitzeko argitaratzen da eta finantza-estaldura emango die Europako Gizarte Fondoak onartzen dituen EQUAL Ekimenaren etorkizuneko proiektuei.

Europako Enplegurako Estrategiaren eta Autonomia Erkidego honetako enplegu eta prestakuntzarako politika aktiboen helburua gizarte-talde guztietan enplegu-tasaren gehikuntza esanguratsu bat lortzea da. Horretarako, beharrezkoa da lan-merkatutik kanpo dauden pertsonen kualifikazioak eta lan-munduratzeko gaitasuna garatzea, Eusko Jaurlaritzak, hiru Foru Aldundiek eta EUDELek 2000ko maiatzaren 26an izenpetutako Enplegurako Erakundearteko Planaren esparruan hain zuzen ere. Halaber, lanpostua duten pertsonen (sektore arriskutsu edo ahulekoak bereziki) kualifikazioak berritu eta eguneratu behar dira. Gainera, beharrezkoa da enpresa-izpiritua sendotzea eta emakumezkoek eta gizonezkoek lan-merkatuan berdintasun-baldintzetan parte hartuko dutela bermatzea. Horrek guztiak, langabetuek zein lanpostu bat dutenek jasaten dituzten desberdintasunen eta bazterketaren kontrako neurriak hartzea eskatzen du. Estrategia guztiz eraginkorra izan dadin, toki eta eskualde mailako ekintzak burutu behar dira hiri-eremuetan zein landa-eremuetan, hau da, toki-lankidetza bat sortzeko aukera eskaintzen duten lurraldeetan. Horretarako, lehentasun partekatuei buruzko planteamendu berriak eta arrakasta duten ideien hedapen eraginkorra behar dira.

Europako Gizarte Fondoak finantzatutako eta Agindu honen bitartez Eusko Jaurlaritzak batera finantzatutako EQUAL Ekimenaren asmoa estrategia honetan parte hartzea da eta, horretarako, lan-merkatuan agertzen diren bazterketa guztien (arrazak, jatorri etnikoak, sexuak, erlijio edo sinesmenek, ezintasunak, adinak edo sexu-orientabideak eragindakoak nagusiki) kontrako borrokan oinarrituko da bereziki.

Abenduaren 26ko 302/2000 Dekretuaren bidez aldatutako maiatzaren 16ko 83/2000 Dekretuaren 12. artikuluak xedatzen duenez, aipatutako helburua betetzeko baliabide ekonomikoak Euskal Autonomia Erkidegoko Aurrekontu Orokorretan ezarritako aurrekontu-kredituen bidez lortuko dira.

Euskal Autonomia Erkidegoko Ogasun Nagusiaren Antolamendu Printzipioei buruzko Legearen Testu Bategina onartzen duen azaroaren 11ko 1/1997 Legegintzako Dekretuaren 49.5 artikuluak ezartzen duenez, Euskal Autonomia Erkidegoko ekitaldi ekonomiko bakoitzeko Aurrekontu Orokorrak indarrean sartu ondoren programetarako dirulaguntzen emakidari lotutako arauak eguneratu, berrikusi edo, hala badagokio, ezarriko dira eta bere garaian indarraldi mugagabe baterako arautu ziren dirulaguntzetarako deialdia egingo da.

Bestalde, Euskadiko Aurrekontu Erregimenari buruzko legezko xedapenen Testu Bategina onartzen duen irailaren 27ko 1/1994 Legegintzako Dekretuaren 128 b) artikuluak ezartzen duenez, aurrekontu-luzapenetan gobernuak dirulaguntza arruntak edo kapital-eragiketetarako dirulaguntzak eman ahal izango ditu, betiere indarrean dauden xedapen eta hitzarmenei jarraiki emakida onartuta badute eta xedapen eta hitzarmen horietan finkatutako zenbateko eta baldintzetan.

Hori guztia dela eta, abenduaren 26ko 302/2000 Dekretuak aldatutako maiatzaren 16ko 83/2000 Dekretua indarrean egonik, Dekretu horren bigarren azken xedapenean aurreikusitako gaikuntza burutu eta Lan Harremanen Kontseiluari, Euskal Ekonomia eta Gizarte Kontseiluari eta interesatuta dauden gainerako kontsulta-organoei entzun ondoren,

XEDATU DUT:

1. artikulua.– Xedea

1.– Deialdi honen xedea, Euskal Autonomia Erkidegoak EQUAL Europako Batasunaren Ekimenaren Programan parte har dezan sustatzea da. Horrela, Eusko Jaurlaritzaren laguntzak –Justizia, Lan eta Gizarte Segurantza Sailaren bitartez– lortzeko baldintzak eta oinarriak ezarriko dira eta Europako Gizarte Fondoaren laguntzak eskuratzeko aukera emango da (Europako Gizarte Fondoaren Unitate Administratzailearen Espainiarako deialdiaren esparruan eta lehiakortasunaren arabera).

2.– Ekimen horren asmoa ondokoa da: lan-merkatuan eta nazioz gaindiko lankidetzaren inguruan, mota guztietako bazterketa eta desberdintasunen kontrako metodo berriak sustatzea (asiloa eskatzen dutenen gizarteratzea eta lan-munduratzea ere kontuan hartuta).

3.– Europako Batasunaren aurreko Ekimenetan (EMPLEO eta ADAPT) ikasitakoa abiapuntutzat hartuta, EQUAL proba-eremu bihurtuko da, helburua lan-merkatuan sartu nahi duten pertsonek eta sartuta daudenek jasaten duten bazterketa eta desberdintasun orori aurre egiteko enplegu-politikak aplikatzeko modu berriak garatzea eta zabaltzea izanik.

2. artikulua.– Eskaeren aurkezpena

Aurreikusitako bi deialdietako 2001-2004ko lehen honetarako eskaerak aurkezteko epea 2001eko maiatzaren 18an bukatuko da.

3. artikulua.– Finantza-zuzkidura.

Eusko Jaurlaritzak lehen deialdi honetarako emango duen laguntza, Europako Gizarte Fondoak onartutako baterako finantzaketaren zenbatekoa finkatu ondoren, 690.000.000 pezetakoa izango da gehienez (4.146.983, 52 euro). Kopuru hori horrela banatuko da: 200.000.000 pezetako (1.202.024,21 euro) ordainketa-kreditu bat 2001eko ekitaldirako; 400.000.000 pezetako (2.404.048,42 euro) konpromiso-kreditu bat 2002ko ekitaldirako; eta 90.000.000 pezetako (540.910,89 euro) konpromiso-kreditu bat 2003ko ekitaldirako. Artikulu honetan ezarritako osoko zenbatekoa aldatzea egongo da, eskatutako laguntzen zenbateko osoa kontuan hartuta; beti ere, Justizia, Lan eta Gizarte Segurantza sailak beste laguntza programetan agortu ez duen aurrekontuaren baliabideen arabera eta eskabideei buruzko ebazpena eman baino lehen. Aldaketa horren berri Lan eta Gizarte Segurantza sailburuordearen ebazpen batek emango du.

4. artikulua.– Arlo tematikoak.

1.– EQUAL Ekimeneko proiektuak arlo tematiko baten barruan garatuko dira. Arlo hauek Europako Batasunaren Ekimenaren Programan agertzen direnen artean Espainiako Estatuak hautatutakoetatik aukeratutakoak dira. Ondokoak, alegia:

a) Guztiontzat zabalik egon behar duen lan-merkatuan sartzeko edo bertara itzultzeko zailtasunak dituzten pertsonei lan-merkaturako sarbidea eta itzulera erraztea.

b) Lan-merkatuan agertzen den arrazakeriari eta xenofobiari aurre egitea.

c) Enpresak sortzeko prozesua guztiei zabaltzea eta, horrela, enpresak sortzeko eta hiri-eremuetan zein landa-eremuetan enplegurako aukera berriak identifikatu eta ustiatzeko beharrezkoak diren tresnak eskaintzea.

d) Enpresak eta langileak aldaketa ekonomiko estrukturalei eta informazioaren eta komunikazioaren teknologia berrien erabilerari egokitzeko aukera bultzatzea.

e) Etxeko bizitza eta bizitza profesionala bateragarri egitea eta lan-merkatua utzi duten gizon eta emakumeei itzultzeko aukera ematea. Horretarako, lana antolatzeko modu malgu eta eraginkorragoak eta laguntza-zerbitzuak garatuko dira.

f) Gizonezkoen eta emakumezkoen arteko desorekak murriztea eta laneko segregazioaren deuseztea bultzatzea.

2.– Aldi berean, arlo tematiko bakoitzaren barruan, proiektuetako lan-programak Europako Batasunaren Ekimenaren Programan agertzen direnen artean aukera daitezkeen jardueretara mugatuko dira.

5. artikulua.– EQUAL Ekimenak finantzatutako ekintzak

1.– Deialdi honen esparruan, ondoko ekintzen inguruko proiektuen gastuak batera finantzatu ahal izango dira:

a) 1. Ekintza: Garapen Taldeak eta nazioz gaindiko lankidetzari lotutako hitzarmenak ezartzea. Ekintza hori gehienez 6 hilabeteko epean gauzatu beharko da, Europako Gizarte Fondoaren onarpena jakinarazten denetik kontatzen hasita.

Ekintza hau amaitu ondoren, Europako Batasunaren Ekimenaren Programan eta bere Programa Osagarrian ezarritako baldintzak betetzen dituzten proiektuek 2. Ekintza garatuko dute.

b) 2. Ekintza: Garapen Taldeen lan-programak burutzea. Gehieneko iraupena 24 hilabetekoa izango da, ekintza honetan parte hartzeko onarpen-ebazpena jakinarazten denetik kontatzen hasita.

2.– Elementu osagarri gisa eta 2. Ekintza hasi ondoren, proiektuek 3. Ekintzaren kargura finantzatutako jardueretan parte hartzeko finantzaketa gehigarria eskatu ahal izango dute ekimen propio bidez eta ezarriko diren baldintzetan. 3. Ekintza horren helburua sare tematikoak sortzea, jardunbide onak hedatzea eta nazioko politikan eragitea izango da.

3.– Era berean, kudeaketa-agintaritzak eta Jarraipen Batzordeak horretarako beharrezkotzat hartzen dituzten Garapen Taldeek 3. Ekintza horretan parte hartu beharko dute. Horretarako, proiektuek posibilitate horretarako erreserba bat ezarri beharko dute aurrekontuan. Erreserba horren kopurua, 2. Ekintzarako aurreikusitako guztizko kostuaren %1en baliokidea izango da.

6. artikulua.– Entitate onuradunak

1.– EQUAL proiektuak geografi edo arlo-mailako akordioen bitartez burutuko dira, berauek, izaera juridikoa dutenak zein izaera juridikorik gabekoek, Garapen Talde izena hartuko dute.

2.– 1. Europako Gizarte Fondoaren Unitate Administratzaileak onartutako eskabide guztien aurkezleak izango dira 1. Ekintzaren entitate onuradunak, fondo publikoak kudeatzeko ahalbidea duen bat guztien ordezkari izango delarik. Entitateek Garapen Taldeetan izan nahi duten partaidetza-potzentajea eratzeko proiektuan bertan adieraziko dute eta Agindu honetan zehazten diren laguntzak eskuratzeko eskabidean aipatu.

3.– 1. Ekintza amaitu ondoren, Europako Gizarte Fondoaren Unitate Administratzaileak baiezko Ebazpena emanda, legez eratuta dauden eta 2. Ekintza egin behar duten Garapen Taldeak hartuko dira onuraduntzat, eta, hala badagokio, 3. Ekintza, baldin eta izaera juridiko propioa hartu badute. Garapen Taldea izaera juridikorik gabekoa bada, onuradunak aurreko puntuan aipatzen diren entitateak izango dira.

4.– Autonomia Erkidegoan, Agindu honetan ezarritako onurak, Lanerako Prestakuntza Egitaraua arautzen duen maiatzaren 16ko 83/2000 Dekretuaren 5. Artikuluan, aurreikusitako edozein entitatek eskuratu ahal izango ditu, a) idatz-zatian adierazitakoak izan ezik eta betiere:

a) Dimentsio anitzeko arazoei buruzko ikuspegi integratu baten garapenean lankidetzan aritzeko bidezko eskuduntzak dituzten eragile interesatuak biltzen baditu eta Garapen Taldeak eratzeko gaitasuna erakusten badu.

b) EQUAL Ekimenaren bitartez dirulaguntza jasotzeko moduko proiektu bat barne hartuko duen eskaera bat aurkeztu badu.

5.– Garapen Taldetzat lan-merkatuan agertzen diren desberdintasunak eta bazterketa dakartzaten faktoreak zehazteko lankidetzan diharduten eragileen elkarte estrategikoak -izaera juridikoa dutenak zein izaera juridikorik gabekoak- hartzen dira. Beraiek aukeratutako arlo tematikoaren barruan aritzen dira, adostasunez definitutako arazoentzako irtenbide berritzaileen bilaketan ahaleginak eta baliabideak banatzeko konpromisoa dute eta, azken batean, proiektuan definitutako helburu berberak lortu nahi dituzte. Garapen Taldeek bazkide-talde bat izan beharko dute hasieratik eta bidezko eragileen (hala nola agintari publikoak, enplegu-zerbitzu publikoak, gobernuz kanpoko erakundeak, aukera-berdintasunerako erakunde eta/edo eragileak, enpresa-sektorea -enpresa txiki eta ertainak bereziki- eta lan-munduko ordezkariak) parte-hartzea bermatuko dute. Eragileetako bat dirulaguntza publikoa kudeatzeko eta dirulaguntza horrez eta administrazio eta finantza betebeharrez arduratzeko gaitasuna izango suen eskatzaile bihurtzen da.

6.– Laguntzen azken onuradunek, oro har, Euskal Autonomia Erkidegoko Foru Ogasunaren Antolamendu Printzipioei buruzko Legearen 50.2 artikuluan ezartzen diren betebeharrak bere gain hartuko dituzte eta, bereziki, Kontrol Ekonomikoko Bulegoari eta Herri Kontuen Euskal Epaitegiari beren funtzioez baliatuz xedapen honen kargura jasotako laguntzei buruz eskatzen duten informazioa emateko betebeharra.

7. artikulua.– Dirulaguntza jaso dezaketen jarduerak.

1.– Dirulaguntza jaso dezaketen jarduera gehienak 1784/99 Araudiaren (EE) 3. artikuluan ezarritako hautagarritasun-esparrukoak izango dira.

2.– Horrez gain, 1260/99 Araudiaren (EE) 21.2 artikuluari eta 1784/99 Araudiaren (EE) 5.2 artikuluari jarraiki, gainerako fondo estrukturalen hautagarritasun-esparruko jarduera jakin batzuk onartu ahal izango dira.

Jarduera hauen helburua, proiektu benetan integratuak (fondoen prozedura desberdinek euren araudietan ezartzen dituzten mugak alde batera utzita) burutzeko aukera eskaintzea da.

Daukaten izaera osagarria dela eta, programaren zuzkidura ekonomikoaren %15eko finantzaketa-muga ezartzen da FEDER, FEOGA eta IFOPi lotutako jardueretarako.

8. artikulua.– Proiektuen baldintzak

1.– EQUAL Europako Batasunaren Ekimenaren esparruan garatu beharreko proiektuek oinarri geografiko bat izango dute edota, behar bezala justifikatutako kasuetan, sektore ekonomiko jakin batzuk hartuko dituzte. Bakoitza Garapen Talde geografiko edo sektorial batek sustatuko du. Halaber, zirkunstantziek hala justifikatuz gero, lan-merkatuari dagokionez bazterketa edo desberdintasuna jasaten duten berariazko taldeetako bat edo gehiago eduki ahal izango ditu xede nagusi.

2.– Proiektuek Europako Batasunaren Ekimen honen funtsezko printzipioak bete beharko dituzte, honako hauek hain zuzen ere:

a) Lan-programaren osagai izan behar duen nazioz gaindiko lankidetza. Helburuak eta lehentasunak identifikatu beharko dira.

b) Proiektuaren barruko jardueren eta toki, eskualde, nazio edo Europako Batasunaren mailan garatutako politiken osagarritasuna.

c) Lurralde edo sektoreko dimentsio anitzeko arazoen tratamenduaren ikuspegi integratua. Jarduerak desberdintasunak edo bazterketak gehien kaltetutako taldeetan oinarrituko dira.

d) Trebakuntza-printzipioa, erabakiak hartzean inplikatutako erakundeen parte-hartze aktiboa bermatzen duena (proiektuaren etapa guztietan) eta antzemandako arazoetan esku hartzeko egokitzapena eta lankidetza-konpromisoa ziurtatzen dituena.

e) Berrikuntza, ikuspegi berriak proposatzearen eta metodo eta tresna berritzaileak garatzearen bidez, edota beste esparru batzuetan dauden eta politiken aplikazioan eraginkortasun handiagoa izango duten elementuak transferitzearen bidez.

f) Politika orokorretara transferitzeko gaitasuna, praktika onak hedatu eta trukatzeko eta jarreren aldaketari begira sentsibilizatzeko berariazko neurriak kontuan hartuta eta informazioa erabaki politikoen erantzuleengana iristeko beharrezkoak diren egiturak, baliabideak eta metodoak erabilita.

g) Genero-ikuspegia, proiektuaren fase guztietan (programaziotik hasi eta jarduera guztiak burutzeraino) zeharka aplikatua.

9. artikulua.– Eskaeren eta dokumentazioaren aurkezpena.

1.– EQUAL Europako Batasunaren Ekimeneko proiektu bat garatu nahi duten erakundeek Eusko Jaurlaritzako Justizia, Lan eta Gizarte Segurantza Saileko Lurralde Ordezkaritzen aurrean aurkeztu beharko dute beren eskaera. Nolanahi ere, 4/99 Legeak aldatutako azaroaren 26ko 30/1992 Legearen (Herri Administrazioen Araubide Juridikoa eta Administrazio Prozedura Erkidea arautzen duena) 38.4 artikuluan aurreikusitakoa aplikatuko da.

Eskaerak erakunde eskatzaile baten titulartasuna izango du eta eskatzaile-multzo batek izenpetuko du. Eskatzaile hauen artean, gutxienez bi bazkide-mota egongo dira (Administrazio Publikoetako ordezkariak, gizarte-eragileak, irabazi asmorik gabeko erakundeak eta/edo enpresak). Eskaeran berariaz aipatuko dute Garapen Talde bat eratzeko asmoa (proiektua onartuz gero) eta argi eta garbi zehaztu beharko dituzte ordezkatutako erakundeak, beren izaera juridikoa, entitate eragile bakoitzaren partaidetza-portzentajea, jarduteko lurralde-esparrua eta/edo sektoriala eta sinatzaileen nortasuna, kargua eta gaitasun juridikoa. Halaber, eremu edo sektoreko eragile egokiak biltzen dituztela adierazi beharko dute.

Finantzaketa eskatzean, proiektu bakoitzak erakunde ordezkari bat izan beharko du izendatuta eskatzaile titular gisa. Erakunde horrek dirulaguntza publikoak kudeatzeko gaitasuna izango du, administrazio eta finantza betebeharrak bere gain hartuko ditu eta lan-munduko ordezkari moduan jardungo du Justizia, Lan eta Gizarte Segurantza Sailaren eta, hala badagokio, Europako Gizarte Fondoaren Unitate Administratzailearen aurrean.

Proiektuak hautaketa-prozesuan sartuko dira, Agindu honen 4. artikuluan definitutako arlo tematiko baten barruan. Halaber, entitate onuradunek Europako Gizarte Fondotik zein Justizia, Lan eta Gizarte Segurantza Sailetik laguntza jasotzeko eskaera (zifra jakin batean eta ekarpen publiko edo pribatuaren zenbatespen batean zehaztua) formalizatuko dute. Europako Gizarte Fondoaren baterako finantzaketaren tasa %50ekoa da 2. helburuko eremuetan –Euskal Autonomia Erkidegoa tartean– burutzen diren neurrien kasuan.

2.– Eskaerak bi zati izango ditu: lehena egiteko, formulario/inprimaki baten 2 kopia –beteta– paperean eta beste 2 kopia euskarri informatikoan aurkeztu beharko dira (Europako Gizarte Fondoaren Unitate Administratzaileko Zuzendariordetza Nagusiak emandakoaren ildo berean); bigarrena berriz, erakunde eskatzaileak sinatu beharko du eta Lanerako Prestakuntzari buruzko maiatzaren 16ko 83/2000 Dekretuaren 6. artikuluko 1.b) idatz-zatian eta 1.c) idatz-zatiko lehenengo paragrafoan zehazten diren alderdien zinpeko deklarazioa barne hartuko du.

3.– Eskaerari Lanerako Prestakuntzako Programa arautzen duen maiatzaren 16ko 83/2000 Dekretuaren 6. artikuluko 1.d) idatz-zatian deskribatutako dokumentazioa eta jarraian zehaztuko ditugun dokumentuak erantsi beharko zaizkio:

a) Eskaera izenpetzen duten erakundeen konpromisoa 1. Ekintza amaitu aurretik Garapen Talde baterako hitzarmen bat formalizatzeko. Hitzarmen honek:

– Ordezkatutako erakundeak, beren izaera juridikoa eta jarduteko lurralde-esparrua edo sektoriala behar bezala identifikatuko ditu eta sinatzaileei erakunde horien izenean konpromiso bat izenpetzea ahalbidetuko dien tresna juridikoa (ahalordea, izendapena, hitzarmena) jasoko du.

– Garapen Taldearen lurralde-esparrua mugatuko du. Salbuespen gisa, formula hau arazo jakin batzuei aurre egiteko modurik eraginkorrena ez denean, zehaztasunez definitu beharreko sektoreak hartuko dituzten elkartzeko moduak planteatu ahal izango dira.

– Garapen Taldearen helburuak deskribatuko ditu. Horrela, bazkide bakoitzaren funtzioa, erabakiak hartzeko sistema, finantza-zirkuitua eta Europako Gizarte Fondoaren Unitate Administratzailearen aurrean jarduteko izendatutako ordezkaria definituko ditu.

b) Nazioz gaindiko lankidetzarako hitzarmen bat formalizatzeko konpromisoa. Hitzarmen honek:

– Ondokoak identifikatuko ditu: Lankidetzan aritu nahi duten Garapen Taldea, jarduteko lurralde-esparrua eta/edo sektoriala, lan egingo duteneko arlo tematiko edo jarduera-ildo komuna, lankidetzaren helburuak eta burutzapen-aurreikuspenak.

– Nazioz gaindiko bazkideekin harremanik ezarri ezean, elkarrekin lan egiteko nahi den erakunde-motaren eta lankidetza-arloaren ezaugarriak deskribatu beharko dira.

c) Proiektua azalduko duen memoria. Ondoko datuak islatuko ditu gutxienez:

– Proiektuari dagokion jarduteko lurralde edo sektorean agertzen den desberdintasun eta/edo bereizketari lotutako problematikaren azterketa. Egoera horri buruzko azterlanak edo azterketak, deskribatutako problematikaren agerpena bermatuko duten informazio-iturri fidagarrietan oinarrituta egon beharko du eta kolektiborik ahulenak identifikatu beharko ditu. Abiapuntu gisa, genero-ikuspegia hartuko da kontuan.

– 1. Ekintzarako lan-programa:

Eskualde-programa: Garapen Taldearen hitzarmenak formalizatzeko prozesuaren azalpena, garatu beharreko ekintzak, beren egutegia eta aurrekontua barne hartuko dituena.

Nazioz gaindiko programa: nazioz gaindiko elkartea, bere egutegia eta aurrekontua finkatzeko edo, hala badagokio, elkarte berri bat sortzeko beharrezkoak diren jardueren deskribapena.

– 2. Ekintzarako lan-programa:

Eskualde-programa. Ondokoak barne hartuko ditu:

– Garatu beharreko ekintza-mota, jardueren izaera eta garatuko dituzten erakundeak.

– Aurkeztutako ekintzen araberako aurrekontuaren azterketa xehatua.

– Proiektuaren barruan garatutako jardueren azken hartzaileak.

– Jarduerak burutzeko egutegia.

– Barne kontrol, jarraipen eta ebaluaziorako sistema.

Nazioz gaindiko programa. Ondokoak barne hartuko ditu:

– Garatu beharreko jarduerak.

– Aurrekontu zehaztua.

– Ekintzen deskribapena.

– Talde teknikoa (hizkuntzak jakingo dituena).

– Egutegia.

– Aurreikusitako trukeak eta produktuak.

– Lan-metodologia.

– Jarraipena eta ebaluazioa.

d) Erakundeen baterako finantzaketarako konpromisoa, gastu hautagarriei buruzko Europako Batasuneko araudia kontuan hartuta.

Atal honetan, Justizia, Lan eta Gizarte Segurantza Sailaz kanpoko erakunde finantzatzaileekin lortutako konpromisoak eta Sailari baterako finantzaketa egiteko eskatzen zaion kopurua jasoko dira.

10. artikulua.– Eskaeren azterketa

1.– Eskaerak Justizia, Lan eta Gizarte Segurantza Sailean jaso ondoren, aurkeztutako proiektuen datu nagusiak baliozkotze-prozesu baten menpe jarriko dira ondoko baztertze-kausaren bat agertzen den egiaztatzeko:

a) Eskaera aurreikusitako epetik kanpo aurkezten denean

b) Inprimaki normalizatua paperean aurkezten ez denean

c) Formulario informatikoa aurkezten ez denean

d) Garapen Taldea eratzeko asmoa duten bazkideak identifikatzen ez direnean.

e) Etorkizuneko bazkide guztiek izaera juridiko berbera dutenean.

f) Proiektua 4. artikuluan definitutako arlo tematiko baten barruan kokatuta ez dagoenean.

g) Garapen Taldearen aurreikusitako helburuak, aurre egin nahi zaion arazoaren diagnostikoa, aurreikusitakoaren arabera egingo diren ekintzen izaera, lan-programa edo nazioz kanpoko lankidetzaren iguripenak identifikatuta ez daudenean.

h) Eusko Jaurlaritzari eta Europako Gizarte Fondoari eskatzen ez zaion zatiaren baterako finantzaketa bermatuta ez dagoenean.

2.– Aurreko atalean zehazten den balidazio-prozesuari Enplegu eta Prestakuntza zuzendariaren ebazpen batek emango dio amaiera proiektuak onartuak izango diren ala ez esanez. Eskabideak 30/1992 Legearen (Herri Administrazioen Araubide Juridikoa eta Administrazio Prozedura Erkidea arautzen duena) 70. artikuluan arautzen diren baldintzak, baita Agindu honetan ezartzen direnak ere, beteko ez balitu, eskatzaileei errekerimendua egingo zaie hamar eguneko epean –jakinarazi eta hurrengo egunetik kontatzen hasita– akatsak zuzen ditzaten. Halaber, hala egin ezean eskaera artxibatu egingo dela ohartaraziko zaie.

11. artikulua.– Eskaeren balorazioa eta hautaketa.

1.– Aurreko atalean zehazten den balidazioa egin ondoren aurkeztutako laguntza-eskaeren hautaketa egingo da.

2.– EQUAL Europako Batasunaren Ekimeneko proiektuen balorazioa Ebaluazio Batzorde batek egingo du Lanerako Prestakuntzako Programa arautzen duen maiatzaren 16ko 83/2000 Dekretuaren 9. artikuluan ezarri bezala. Proiektuen hautaketa, funtsean, aurkeztutako lan-programari buruzko azterketan oinarrituko da. Aipatutako lan-programak Europako Gizarte Fondoaren Unitate Administratzaileak programak laguntzeko ezarritako baremoaren arabera hautatuko dira. Dena den, proiektuek Agindu honen 12. artikuluaren 1. atalean zehazten diren printzipio guztiak bete beharko ditu; berauek eta 2. atalekoak Estatu mailako deialdiak ezarritako baremoen arabera baloratuak izango dira.

3.– Baterako finantzaketarako hautatzen diren proiektuak Europako Gizarte Fondoaren Unitate Administratzaileari igorriko zaizkio, erakunde horrek EQUAL Europako Batasunaren Espainiako Ekimenari dagozkion laguntzak eskuratzeko argitaratutako deialdian parte hartu ahal izateko. Proiektuetan –Europako Gizarte Fondoaren Unitate Administratzaileak onartuz gero–, Justizia, Lan eta Gizarte Segurantza Sailaren baterako finantzaketarako konpromisoa jaso beharko da.

12. artikulua.– Hautaketa-irizpide orokorrak.

1.– Eskaerak ondoko elementuak zein neurritan betetzen dituzten kontuan hartuta baloratuko dira:

a) Nazioz gaindiko lankidetza: nazioz gaindiko lan-programak proiektuan behar bezala integratuta egon beharko du eta berariazko aurrekontu bat eta plangintza xehatu bat eduki beharko ditu.

b) Osagarritasuna: jarduerek dagokien lurralde edo sektorean aplikatutako politiken osagarri izan beharko dute. Ekintzen eta dirulaguntzen gainjartzea saihesteko neurriak barne hartuko dira. Beraz, euren jarduera-esparruan beste programa batzuekin (toki, eskualde, nazio edo Europako Batasunekoak) duten osagarritasuna adieraziko da eta, bereziki, Enplegurako Ekintza Plan Nazionalean ezarritakoa hartuko da kontuan.

c) Ikuspegi integratua dimentsio anitzeko arazoen tratamenduan. Horrela, jarduerak desberdintasun edo bazterketa arazoak gehien jasaten dituzten pertsonengan eta taldeetan oinarrituko dira.

d) Trebakuntza: Garapen Taldeko kideen eta, ahal den neurrian, proiektuaren onuradunen parte-hartze aktiboa erabakiak hartzeko prozesuan, proiektuaren etapa guztietan. Halaber, erakundeen laguntza eta bazkideen egokitzapena ziurtatuko duten mekanismoak hartuko dira.

e) Berrikuntza: ereduzko proiektuak metodologia berriak garatzeko edo jarduera-esparru berrietan aplikatzeko; lana antolatzeko edo lan-merkatuan bitarteko gisa jarduteko modu berriekin egindako probak.

f) Politika orokorretarako transferentzia: toki, sektore, eskualde edo nazio mailan edo Europako Batasunean aplikatzeko moduko praktika berritzaile eta ereduzkoak hedatzeko plan bat lantzea.

g) Aukera-berdintasuna: programazioaren diseinuan eta programaren burutzapen osoan gizonezkoen eta emakumezkoen arteko berdintasunaren ikuspegia hartzea.

2.– Horrez gain, ondoko alderdiak baloratuko dira:

a) Teknologia berrien sustapena: bereziki, informazioaren gizarteko teknologien sarrera eta orokortzea.

b) 94/99 aldian indarrean zeuden Europako Batasunaren Ekimenetan (EMPLEO eta ADAPT bereziki) ikasitako ikasgaiak aplikatzea.

c) Kalitate-kontroleko sistema bat aplikatzea proiektuaren fase guztietan (diseinutik hasita).

d) Proposatutako ekintzetan parte hartu ahal izateko mota orotako oztopoak deuseztea.

e) Ingurumena babestu eta hobetzeko neurriak gaineratzea.

f) Proiektuaren barneko koherentzia.

g) Aukeratutako arlo tematikoari proiektua egokitzea.

13. artikulua.– Ebazpena

1.– Enplegu eta Prestakuntza Zuzendaritzak lau fase desberdinetan ebatziko du deialdi honetarako laguntzen emakida:

a) Lehen ebazpena. Agindu honen 11. 1 artikuluak aipatzen duen hautatutako proiektuen zerrenda egin ondoren, Enplegu eta Prestakuntza Zuzendaritzak ondokoa jakinaraziko die, idatziz, titularrak diren erakunde eskatzaileei:

– Proiektuen onarpena EQUAL Europako Batasunaren Espainiako Ekimenari dagozkion laguntzak eskuratzeko Europako Gizarte Fondoaren Unitate Administratzaileak egindako deialdian parte har dezaten. Onarpena Enplegu eta Prestakuntza zuzendariaren ebazpen indibidualizatu bidez emango da eta, bertan, besteak beste, hartutako konpromisoaren arabera batera finantzatuko duen aurrekontua (Europako Gizarte Fondoaren Unitate Administratzaileak proiektua onartuz gero) barne hartuko da.

– Proiektuen baztertzea, kausak adieraziko dituen ebazpen arrazoitu bidez.

Ebazpena emateko eta proiektuen hautaketa jakinarazteko epea hilabetekoa izango da, Agindu honen 2. artikuluan adierazitako laguntza-eskaerak aurkezteko epea amaitzen denetik kontatzen hasita.

b) Bigarren ebazpena. Europako Gizarte Fondoaren Unitate Administratzaileak proiektua onartu duela jakin ondoren eta unitate horrek proiektu osorako eta, xehatuta, 1. Ekintzarako esleitutako aurrekontuari jarraiki, Enplegu eta Prestakuntza zuzendariaren ebazpen bidez proiektu osoaren baterako finantzaketarako dirulaguntza (1. Ekintzako nazioko eta nazioz gaindiko hitzarmen guztiak gauzatzen badira) eta, xehatuta, 1. Ekintzari dagokion dirulaguntza emango da. Halaber, gehieneko burutzapen-epea finkatuko da.

1. Ekintzarako laguntzaren emakida ebazteko eta jakinarazteko epea hilabete batekoa izango da, Europako Gizarte Fondoaren Unitate Administratzaileak emakidaren ebazpena ematen duenetik kontatzen hasita.

c) Hirugarren ebazpena. 1. Ekintza amaitu eta Europako Gizarte Fondoaren Unitate Administratzaileak Garapen Taldeei 2. Ekintza gauzatzea onartu zaiela (bere aurrekontua, egutegia eta burutzeko baldintza zehaztuz) jakinarazi ondoren, Enplegu eta Prestakuntza zuzendariak, Europako Gizarte Fondoaren Unitate Administratzaileak 2. Ekintza garatzeko onartutako aurrekontuaren arabera dagokion dirulaguntzaren emakida berretsiko duen ebazpena (dirulaguntza honen eta 1. Ekintzarako emandakoaren artean ezingo da gainditu ebazpenean konprometitutako baterako finantzaketaren guztizko zenbatekoa) edota 2. Ekintza garatzeko aurreikusitako dirulaguntza ukatuko duen ebazpena emango du.

2. Ekintzarako laguntzaren emakida edo ukapena ebazteko eta jakinarazteko epea hilabete batekoa izango da, Europako Gizarte Fondoaren Unitate Administratzaileak emakidaren edo ukapenaren ebazpena ematen duenetik kontatzen hasita.

d) Laugarren ebazpena. 2. Ekintza garatzen den bitartean, Europako Gizarte Fondoaren Unitate Administratzaileak, 3. Ekintzaren barruan jarduerak garatzeko finantzaketa gehigarria eskatzen duten proiektuei, eskaera horren onarpenari edo ukapenari buruzko ebazpena jakinaraziko die. Ebazpenak onarpena ematen badu, Enplegu eta Prestakuntza Zuzendaritzak, EQUAL proiektuen titularrek aldez aurretik eskaera egin ondoren, 3. Ekintzaren baterako finantzaketarako laguntzen emakida onartu ahal izango du horretarako emandako ebazpen bidez.

3. Ekintzarako laguntzaren emakida edo ukapena ebazteko eta jakinarazteko epea hilabete batekoa izango da, Europako Gizarte Fondoaren Unitate Administratzaileak emakidaren edo ukapenaren ebazpena ematen duenetik kontatzen hasita.

2.– Ebazpen hauek ez dute administrazio-bidea amaitzen eta beraien aurka gorako errekurtsoa jarri ahal izango da Justizia, Lan eta Gizarte Segurantza sailburuordearen aurrean; errekurtsoa jartzeko epea hilabetekoa izango da, jakinarazpena eman eta hurrengo egunetik kontatzen hasita, azaroaren 26ko 30/1992 Legeko (Herri Administrazioen Araubide Juridikoa eta Administrazio Prozedura Erkidea arautzen duena) 107. artikuluan eta hurrengoetan ezarritakoa betez.

14. artikulua.– Gastuen justifikazioa

1.– Laguntza jasoko duen erakunde titular onuradunak, proiektuak direla eta egindako gastuak justifikatuko dituzten dokumentuak aurkeztu beharko ditu Enplegu eta Prestakuntza Zuzendaritzaren aurrean eta honek, bere aldetik, Europako Gizarte Fondoaren Unitate Administratzaileari. Dokumentazioa ziurtagiri moduan aurkeztuko da eta, bertan, proiektuaren azken onuradunek ordaindutako fakturen zerrenda edo frogatzeko baliokideak izango diren kontabilitate-liburuak (Europako Gizarte Fondoaren Unitate Administratzaileak onartutako aurrekontu osoari buruzkoak, banakatuak eta xehatuak, gastuaren kontzeptua eta zenbatekoa adieraziko dutenak) barne hartuko dira.

2.– Egindako gastuek bat etorri beharko dute Batzordearen 1685/2000 Araudian (EE) Fondo Estrukturalek batera finantzatutako eragiketen ondoriozko gastuen finantzaketari buruzko Europako Batasunaren araudiarekin.

3.– 1. Ekintzarako egindako gastuen hautagarritasuna, Europako Gizarte Fondoaren Unitate Administratzaileak Espainiako EQUAL Ekimenari dagozkion laguntzak eskuratzeko egindako deialdia argitaratzen den egunean hasiko da eta bere 6 hilabeteko burutzapen-epea igarotzean amaituko da. 1. Ekintza amaitu ondoren, laguntzaren erakunde titular onuradunek ordaindutako gastuen likidazioa aurkeztu ahal izango dute (aurrekontu-esleipenaren mugarekin).

4.– Proiektuaren amaiera-dataren edo Europako Gizarte Fondoaren Unitate Administratzaileak ezarritako mugako burutzapendataren hurrengo 3 hilabeteen barruan, laguntzaren erakunde titular onuradunek, hala badagokio, hiru Ekintzen gastuen azken likidazioa aurkeztuko dute.

15. artikulua.– Ordainketa-sistema.

Justizia, Lan eta Gizarte Segurantza Sailaren baterako finantzaketaren ordainketa ondoko prozeduraren bidez egingo da:

a) Enplegu eta Prestakuntza zuzendariak 1. Ekintza finantzatzeko emandako bigarren ebazpenaren ondoren, ekintza burutzeko emandako dirulaguntzaren %70 ordainduko da. 1. Ekintza amaitu eta gastuen likidazioa aurkeztu ondoren, gainerako kopurua (%30) ordainketa bakar batean ordainduko da Europako Gizarte Fondoaren Unitate Administratzaileak ekintza hau garatzeko hasiera batean onartutako aurrekontuaren arabera, azken onuradunek egindako gastua egiaztatzen duten dokumentuen (aurreko artikuluan zehazten direnak) aurkezpenean oinarrituta.

b) Enplegu eta Prestakuntza zuzendariak 2. Ekintzaren finantzaketarako emandako hirugarren ebazpenaren eta, hala badagokio, 3. Ekintzaren finantzaketarako laugarren ebazpenaren ondoren, ekintza burutzeko emandako dirulaguntzaren %70 ordainduko da. Proiektuetarako gainerako laguntzaren ordainketa, Enplegu eta Prestakuntza Zuzendaritzak azken likidazioa (laguntzaren erakunde titular onuradunek 14. artikuluan adierazitako epeetan aurkeztutakoa) egiaztatu ondoren egingo da.

AZKEN XEDAPENAK

Lehenengoa.– Administrazio prozedurari dagokionez, agindu honetan agertu ez denerako, Herri Administrazioen Araubide Juridikoa eta Administrazio Prozedura Erkidea arautzeko azaroaren 26an emandako 30/1992 Legea (urtarrilaren 13ko 4/1999 Legeak aldatu zuen) aplikatuko da.

Bigarrena.– Agindu honek administrazio-bidea amaitzen duenez, interesdunek aukerako berraztertzeko errekurtsoa aurkez diezaiokete Justizia, Lan eta Gizarte Segurantza sailburuari; berraztertzeko errekurtsoa jartzeko epea hilabetekoa izango da, agindu hau Euskal Herriko Agintaritzaren Aldizkarian argitaratu eta hurrengo egunetik kontatzen hasita, azaroaren 26ko 30/1992 Legeko (Herri Administrazioen Araubide Juridikoa eta Administrazio Prozedura Erkidea arautzen duena) 107. artikuluan eta hurrengoetan ezarritakoa betez. Bestela, administrazioarekiko auzi-errekurtsoa aurkez daiteke EAEko Auzitegi Nagusiko Administrazioarekiko Auzietako Salan; administrazioarekiko auzi-errekurtsoa aurkezteko epea bi hilabetekoa izango da, agindua Euskal Herriko Agintaritzaren Aldizkarian argitaratu eta hurrengo egunetik kontatzen hasita, uztailaren 13ko 29/1998 Legeko 10.1 a) eta 46. artikuluetan ezarritakoa betez (29/1998 Legeak Administrazioarekiko Auzien Jurisdikzioa arautzen du).

Hirugarrena.– Agindu hau Euskal Herriko Agintaritzaren Aldizkarian argitaratzen den egunaren biharamunean jarriko da indarrean.

Vitoria-Gasteiz, 2001eko apirilaren 4a.

Justizia, Lan eta Gizarte Segurantza sailburua,

SABIN INTXAURRAGA MENDIBIL.

Azterketa dokumentala