RSS
38. zk., 2001eko otsailaren 22a, osteguna
- Bestelako formatuak:
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
Xedapen Orokorrak
Gipuzkoako Batzar Nagusiak
987
9/2000 FORU ARAUA, abenduaren 29koa, Pertsona Fisikoen errentaren gaineko Zergaren abenduaren 24ko 8/1998 foru araua aldatzen duena.
Gipuzkoako Diputatu Nagusiak
Jakinarazten dut Gipuzkoako Batzar Nagusiek onartu dutela "Pertsona Fisikoen errentaren gaineko Zergaren abenduaren 24ko 8/1998 Foru Araua aldatzen duen abenduaren 29ko 9/2000 Foru Araua", eta nik aldarrikatu eta argitara dadin agintzen dut, aplikagarria zaien herritar guztiek, partikularrek nahiz agintariek, bete eta betearazi dezaten.
Donostia-San Sebastián, 2000ko abenduaren 29a.
Diputatu nagusia,
ROMAN SUDUPE OLAIZOLA.
HITZAURREA
Foru arau honen xedea Pertsona Fisikoen Errentaren gaineko Zergaren araudian zenbait aldaketa sartzea da lan errenten gaineko presio fiskala murriztu eta seme-alabekin nahiz pertsona ezinduekin bizi diren familien kargak arintzeko.
Sartu diren neurrien artean, lan etekinei aplikagarri zaizkien hobariek duten gehikuntza aipa daiteke lehen-lehenik, 70.000 pezeta gehitu baitira izaera orokorrez (420,71 Euro).
Bestalde, eta Euskal Autonomia Erkidegoko hiru lurralde historikoetan aplikatzen den tarifa harmonizatzearren, Zergaren tarifa berria onartu da.
Ondorengo ahaideengatik egiten diren kenkariak gehitu egin dira, eta beste kenkari tarte bat sartu da laugarren seme-alabarentzat eta hurrengo bakoitzarentzat. Aipatzekoa da zentzu horretan, %16tik %84ra bitarteko gehikuntzak sartu direla. Ikus daitekeenez, tamainakoa da gehikuntza hori, beti ere Gipuzkoako Lurralde Historikoko familiei laguntzearren. Era berean, guraso batek eta bere seme-alabek osaturiko famili unitateek batera tributatzeagatik egiten den murrizpena 500.000 pezetaraino (3.005,06 Euroraino) igo da.
Aurreko neurriarekin lotuta, pertsona ezinduen kenkariak ere hobetu dira. Izan ere, horien zenbatekoak gehitu ez ezik, minusbaliotasun mailari hobeto egokitzen zaion graduazioa ere ezarri da, eta horrez gain, zabaldu egin da bai kenkari horren aplikazio eremua bai eta hura aplikatzeko kasuak ere. Aurreko araudian ez bezala, orain ezkontideak eta laugarren mailarainoko zeharkako ahaideak, hauek barne, sartu dira kenkarirako eskubidea ematen duten pertsona ezinduen artean, beti ere zergadunaren menpe daudenean. Era berean, kenkarirako eskubidea emateko ezinduak gehienez izan ditzakeen errenten muga igo egin da, eta horrela, muga hori lanbidearteko gutxieneko soldata izatetik soldata hori bi halakoa izatera pasa da dagokion zergaldian.
Foru arau honekin konpondu nahi den beste arazo bat biztanleriaren sektorerik gazteenek etxebizitza eskuratzearena da. Horretan laguntzeko, bi kenkari datoz berrituak: ohiko etxebizitza alokatzea eta ohiko etxebizitzan inbertitzea.
Ohiko etxebizitzan alokatzeagatik egiten den kenkariari dagokionez, esan behar da 35 urtetik beherako zergadunek egin dezaketen kenkaria izaera orokorrez aplikatzen dena baino handiagoa dela.
Ohiko etxebizitzan inbertitzeagatik aplika daitekeen kenkaria ere berritua dator. Horrela, 35 urtetik beherako zergadunek oraingoaren aldean egin dezaketen kenkaria %25ekoa izango da inbertsio kontzeptuagatik eta %30ekoa finantzazio kontzeptuagatik.
Azkenik, aitortzeko obligazioan ere aldaketa bat sartu da, beste tributazio era dakarrena. Helburua zera da: aitortzeko obligazioa sortzen duen kopurutik beherako lan errentak jasotzen dituzten zergadunak ez gelditzea diskriminatuta aitorpena aurkeztera behartuta daudenean errenta horiek ordaintzaile batengandik baino gehiagorengandik jasotzeagatik edo lan errentekin zer ikusia duten bestelako kasuetan egoteagatik.
Ondorio horietarako, ordaindu beharreko kuota kalkulatzeko, atxikipenen taula zergaldian lortzen diren lan errenta guztiei aplikatuko zaie, salbuetsiak sartu gabe, eta emaitzari jasan diren atxikipenak eta konturako sarrerak kenduko zaizkio. Bestelako sarrerak ez dira inoiz kontuan izango eta ezingo da inolaz ere hobari, murrizpen, kenkari edo zerga onurarik egin.
Aitorpen hori egitea hautazkoa da beti eta, beraz, horretarako bide ematen duten kasuetan sartzen den zergadunak bi aukera izango ditu: aitorpena zergaren arau orokorrei jarraiki egitea edo, bestela, sistema honen arabera aurkeztea aitorpena, hau da, lan etekinak bakarrik kontuan hartuz.
1. artikulua.– Lan etekinei aplikagarri zaizkien hobariak aldatzea.
Aldaketak sartu dira Pertsona Fisikoen Errentaren gaineko Zergari buruzko abenduaren 24ko 8/1998 Foru Arauaren 19. artikuluan, eta honela geratu da idatzita:
"19. artikulua.– Hobariak.
1.– Etekin osoen eta gastu kengarrien arteko diferentzia positiboak honako hobariak izango ditu:
a) Diferentzia 1.250.000 pezetakoa edo hortik beherakoa bada (7.512,65 Euro edo gutxiago), 695.000 pezetako hobaria aplikatuko da (4.177,03 Euro).
b) Diferentzia 1.250.001 eta 2.500.000 pezeta bitartekoa bada (7.512,66 eta 15.025,30 Euro bitartekoa), honako hobaria aplikatuko da: 695.000 pezeta (4.177,03 Euro) ken aipatu diferentziari 1.250.000 pezeta (7.512, 65 Euro) gutxitu ondoren ateratzen den emaitza 0,22rekin biderkatuz ateratzen den zenbatekoa.
c) Diferentzia 2.500.000 pezetatik (15.025,30 Eurotik) gorakoa bada, 420.000 pezetako hobaria aplikatuko da (2.524,25 Euro).
2.– Oinarri ezargarrian lanetik ez datozen errentak konputatzen direnean, eta horiek 1.250.000 pezetatik (7.512,65 Eurotik) gorakoak badira, hobaria 420.000 pezetakoa izango da (2.524,25 Euro).
3.– Aurreko apartatuetan aipatu diren hobariak era honetara gehituko dira:
a) 100eko 100a, aktiboan dauden langile ezinduentzat, baldin eta beren minusbaliotasun maila 100eko 33koa edo handiagoa izanik eta 100eko 65era iritsi gabe, behar bezala frogatzen badute beren lanpostura joateko edo lana burutzeko beste norbaiten laguntza behar dutela edo mugikortasun mugatuko egoeran daudela.
b) 100eko 150a, aktiboan dauden langile ezinduentzat, beren minusbaliotasun maila 100eko 65ekoa edo handiagoa bada.
4.– Artikulu honetan aurreikusitako hobaria aplikatzearen ondorioz ateratzen den etekin garbia ezingo da negatiboa izan."
2. artikulua.– Batera tributatzeagatik egiten den murrizpena aldatzea.
Aldaketak sartu dira 63. artikuluan, eta honela geratu da idatzita:
"63. artikulua.– Murrizpena batera tributatzeagatik.
Foru arau honek 90. artikuluan xedatutakoari jarraiki batera tributatzea aukeratzen denean, oinarri ezargarri orokorrari 572.200 pezetako (3.438,99 Euroko) murrizpena egingo zaio urtean aitorpen bakoitzeko.
Foru arau honek 91. artikuluaren 2. apartatuan aipatzen dituen famili unitateen kasuan, aurreko paragrafoan adierazitako murrizpena 500.000 pezetakoa izango da (3.005,06 Euro)."
3. artikulua.– Zergaren eskala aldatzea.
Aldaketak sartu dira Pertsona Fisikoen Errentaren gaineko Zergari buruzko abenduaren 24ko 8/1998 Foru Arauaren 68.1 artikuluan, eta honela geratu da idatzita:
"1. Oinarri likidagarri orokorrari ondoko eskalan adierazten diren karga tasak aplikatuko zaizkio:
Oinarri likidagarri orokorra Kuota osoa Oinarri likidagarriaren gainerakoa Tasa aplikagarria
kopuru honetaraino kopuru honetaraino (portzentajea)
Base liquidable general hasta Cuota íntegra Resto base liquidable hasta Tipo aplicable
(porcentaje)
Pezetak Euroak Pezetak Euroak Pezetak Euroak
PTA Euros PTA Euros PTA Euros
578.000 3.473,85 0 0,00 525.500 3.158, 32 17,00
1.103.500 6.632,17 89.335 536,91 1.891.000 11.365,14 25,00
2.994.500 17.997,31 562.085 3.378,20 2.206.500 13.261,33 30,00
5.201.000 31.258,64 1.224.035 7.356,60 2.206.500 13.261,33 38,00
7.407.500 44.519,97 2.062.505 12.395,90 4.150.000 24.942,00 44,00
11.557.500 69.461,97 3.888.505 23.370,39 hortik gora hortik gora 50,00"
en adelante en adelante
4. artikulua.– Ondorengo ahaideen kenkaria aldatzea.
Aldaketak sartu dira Pertsona Fisikoen Errentaren gaineko Zergari buruzko abenduaren 24ko 8/1998 Foru Arauaren 71.1 artikuluan, eta honela geratu da idatzita:
"71. artikulua.– Kenkaria ondorengo ahaideengatik.
1.– Zergadunarekin bizi den ondorengo ahaide bakoitzagatik honako kenkari hau egingo da:
a) 65.000 pezeta urtean (390,66 Euro), lehenengoagatik.
b) 80.000 pezeta urtean (480,81 Euro), bigarrenagatik.
c) 120.000 pezeta urtean (721,21 Euro), hirugarrenagatik.
d) 150.000 pezeta urtean (901,52 Euro), laugarrenagatik eta hurrengo bakoitzagatik.
Ondorengo ahaidearen adina 3 urtetik beherakoa denean, aurreko paragrafoan adierazitako kenkariaren zenbatekoak 35.000 pezeta (210,35 Euro) gehituko dira urtean."
5. artikulua.– Pertsona ezinduen kenkaria aldatzea.
Aldaketak sartu dira Pertsona Fisikoen Errentaren gaineko Zergari buruzko abenduaren 24ko 8/1998 Foru Arauaren 74. artikuluan, eta honela geratu da idatzita:
"74. artikulua.– Kenkaria minusbaliotasunagatik.
1.– Jaiotzez edo geroago itsu, mutilatu edo elbarri fisiko nahiz psikikoa den zergadun bakoitzeko, aurreko artikuluetan esandakoari jarraiki egin beharreko kenkariez gain, jarraian zehazten den kenkaria ere aplikatuko da erregelamenduz ezartzen den minusbaliotasun mailaren arabera:
Minusbaliotasun maila / Grado de discapacidad Kenkaria (pezetak) Kenkaria (Euroak)
Deducción (pesetas) Deducción (Euros)
%33koa edo handiagoa eta %65etik beherakoa 65.000 390,66
Igual o superior al 33% e inferior al 65%
%65ekoa edo handiagoa eta %75etik beherakoa 100.000 601,01
Igual o superior al 65% e inferior al 75%
%75ekoa edo handiagoa 150.000 901,52
Igual o superior al 75%
Kenkari hori bera aplikatuko da, halaber, ondorengo edo aurreko ahaide bakoitzagatik, ezkontidearengatik edo laugarren mailarainoko zeharkako ahaide bakoitzagatik, hau barne, euren adina edozein dela ere, baldin eta zergadunaren menpe egonik, eta horien urteko errentak lanbidearteko gutxieneko soldata bi halakoa izan gabe, jaiotzez edo geroago itsu, mutilatu edo elbarri fisiko edo psikikoak badira. Kenkari hau bateragarria izango da aurreko artikuluetan esandakoaren arabera egin litezkeen beste kenkariekin.
Era berean, kenkari hau aplikatu ahal izango da baldin eta pertsona minusbaliatua zergadunari lotuta badago tutoretza arrazoiak direla medio edo etxean diru-trukerik gabe hartua izateagatik, eta aurreko paragrafoan adierazitako errenta maila betetzen bada. Tutoretza edo etxean hartze hori adin gabekoak babesteko gaietan eskudun den Entitate Publikoarekin hitzartua egongo da.
2.– Aurreko 1. apartatuan aipatu diren ahaide edo asimilatuen artean ageri ez den 65 urteko edo hortik gorako pertsona bakoitzagatik 100.000 pezetako kenkaria egingo da (601,52 Euro), baldin eta bere diru-sarrerak lanbidearteko gutxieneko soldata bi halakoa baino txikiagoak badira eta beste pertsona batzuen laguntza behar duela edo erregelamenduz jasotakoaren araberako mugikortasun murriztua duela frogatzen badu. Kenkari hau bateraezina izango da artikulu honetako 1. apartatuak minusbaliotasun kasurako jasotzen duen kenkariarekin.
3.– Pertsona ezinduak aitorpena aurkezten badu Zerga honengatik, bi aukera izango ditu: kenkari osoa berak aplikatzea edo, bestela, bera zaintzen duen zergadunak osorik aplika dezan uztea. Bigarrena aukeratzen bada eta pertsona ezindua zergadun baten baino gehiagoren mende badago, kenkaria zati berdinetan hainbanatuko da zergadun bakoitzaren artean."
6. artikulua.– Ohiko etxebizitzaren kenkariak aldatzea.
Pertsona Fisikoen Errentaren gaineko Zergari buruzko abenduaren 24ko 8/1998 Foru Arauaren VII. tituluaren III. kapitulua aldatu egin da. Hona hemen bere eduki berria:
"III. KAPITULUA
KENKARIAK OHIKO ETXEBIZITZAGATIK
76. artikulua.– Kenkaria ohiko etxebizitza errentan hartzeagatik.
1.– Izaera orokorrez ondoko hauek izango dira kengarriak:
a) Zergadunaren ohiko etxebizitza errentan hartzeagatik zergaldian ordaindu diren zenbatekoen 100eko 20a, 200.000 pezetako mugarekin urtean (1.202,02 Euro), baldin eta bere oinarri ezargarria, foru arau honek 61. artikuluan aipatzen duen murrizpenarekin gutxitua, 2.000.000 pezetatik (12.020, 24 Eurotik) gorakoa ez bada.
b) Zergadunaren ohiko etxebizitza errentan hartzeagatik zergaldian ordaindu diren zenbatekoen 100eko 15a, 150.000 pezetako mugarekin urtean (901,52 Euro), baldin eta bere oinarri ezargarria, foru arau honek 61. artikuluan aipatzen duen murrizpenarekin gutxitua, 2.000.001 eta 3,500.000 pezeta bitartekoa bada (12.020,24 eta 21.035,42 Euro bitartekoa).
c) Zergadunaren ohiko etxebizitza errentan hartzeagatik zergaldian ordaindu diren zenbatekoen 100eko 10a, 100.000 pezetako mugarekin urtean (601,01 Euro), baldin eta bere oinarri ezargarria, foru arau honek 61. artikuluan aipatzen duen murrizpenarekin gutxitua, 3.500.001 eta 5.000.000 pezeta bitartekoa bada (21.035,42 eta 30.050,61 Euro bitartekoa).
2.– Aurreko apartatuan adierazitakoa adierazita ere, 35 urtetik beherako zergadunek ondoko kenkaria egin ahal izango dute:
a) Zergadunaren ohiko etxebizitza errentan hartzeagatik zergaldian ordaindu diren zenbatekoen 100eko 25a, 250.000 pezetako mugarekin urtean (1.502,53 Euro), baldin eta bere oinarri ezargarria, foru arau honek 61. artikuluan aipatzen duen murrizpenarekin gutxitua, 2.000.000 pezetatik (12.020, 24 Eurotik) gorakoa ez bada.
b) Zergadunaren ohiko etxebizitza errentan hartzeagatik zergaldian ordaindu diren zenbatekoen 100eko 20a, 200.000 pezetako mugarekin urtean (1.202.02 Euro), baldin eta bere oinarri ezargarria, foru arau honek 61. artikuluan aipatzen duen murrizpenarekin gutxitua, 2.000.001 eta 3,500.000 pezeta bitartekoa bada (12.020,24 eta 21.035,42 Euro bitartekoa).
c) Zergadunaren ohiko etxebizitza errentan hartzeagatik zergaldian ordaindu diren zenbatekoen 100eko 15a, 150.000 pezetako mugarekin urtean (901,52 Euro), baldin eta bere oinarri ezargarria, foru arau honek 61. artikuluan aipatzen duen murrizpenarekin gutxitua, 3.500.001 eta 4.500.000 pezeta bitartekoa bada (21.035,42 eta 27.045,54 Euro bitartekoa).
d) Zergadunaren ohiko etxebizitza errentan hartzeagatik zergaldian ordaindu diren zenbatekoen 100eko 10a, 100.000 pezetako mugarekin urtean (601,01 Euro), baldin eta bere oinarri ezargarria, foru arau honek 61. artikuluan aipatzen duen murrizpenarekin gutxitua, 4.500.001 eta 5.000.000 pezeta bitartekoa bada (27.045,54 eta 30.050,61 Euro bitartekoa).
3.– Artikulu honen ondorioetarako, zergadunaren adina zein den zehazteko zergaldiko lehen egunean dagoen egoerari begiratuko zaio.
4.– Baterako tributazioan, aurreko 1. eta 2. apartatuetan aipatu diren oinarri mugak 1.000.000 pezeta (6.010,12 Euro) gehituko dira bertan adierazi diren kasuetako bakoitzean.
5.– Batera tributatzea aukeratzen bada eta kenkari horretarako eskubidea dutenak pertsona bat baino gehiago badira, batzuk 35 urtetik beherakoak eta beste batzuk adin horretatik gorakoak, artikulu honetako 1. eta 2. apartatuetan ezarritakoaren arabera aplikatuko ditu bakoitzak norberari dagozkion
portzentaje eta muga. Kenkariaren portzentajea eta muga zehazteko, famili unitatearen oinarri ezargarri osoa hartuko da kontuan, beti ere, foru arau honek 61. artikuluan aipatzen duen murrizpenarekin gutxitu ondoren.
6.– Kode Zibilean ezarritakoari jarraiki ezkontzaren baliogabetzea, bereizketa edo dibortzioa erabakitzen den kasuetan, baldin eta judizialki edo epailearen ebazpenez onartutako hitzarmenean famili etxebizitzaren alokairua zergadunak bakarrik ordaintzeko obligazioa jaso bada, zergadun horrek egin ahal izango du bere aitorpenean artikulu honetan aipatzen den kenkaria. Obligazio hori bi zergadunei jarri bazaie, kenkariaren portzentajea eta muga aplikagarria zein diren jakiteko, kontuan hartu beharko da zein zergadun den, kenkarirako eskubidea edukita, oinarri ezargarri handiagoa izan duena, foru arau honek 61. artikuluan aipatzen duen murrizpena aplikatu ondoren. Kenkaria bien artean hainbanatuko da, eta bakoitzaren aitorpenean egingo da norberari dagokion proportzioan, artikulu honetan ezarritako muga eta baldintzak aplikatuz.
77. artikulua.– Kenkaria ohiko etxebizitzan inbertitzeagatik.
1.– Zergadunek kenkaria aplikatu ahal izango dute ohiko etxebizitzan inbertitzeagatik eta, hala balegokio, hura finantzatzeagatik.
2.– Ohiko etxebizitzan egindako inbertsiotzat hartuko dira:
a) Ohiko etxebizitza erosteko erabiltzen diren diru kopuruak.
b) Ohiko etxebizitza birgaitzeko erabiltzen diren diru kopuruak.
c) Arauzko eran ezarritako formalizazio eta erabilera baldintzak betez, kreditu entitateetako kontuetan gordailatzen diren kopuruak, baldin eta kenkarirako eskubidea sortu duten kopuruak bakar-bakarrik ohiko etxebizitza erosi edo birgaitzeko erabiltzen badira kontua ireki denetik hasi eta 5 urteko epean.
3.– Ondorio horietarako:
a) Birgaikuntza izango da, Eusko Jaurlaritzak ondare hiritartu eta eraikia birgaitzeko jarduera babestuei buruzko uztailaren 17ko 189/1990 Dekretuan finkaturiko baldintzak betetzen dituena edo, kasua balitz, ekainaren 12ko 1186/1998 Errege Dekretuak edo berau estatu mailan ordezkatzen duten arauek ezarritakoaren arabera jarduera babesgarri gisa kalifikatzen dena.
b) Ohiko etxebizitza izango da foru arau honetako 30.2.b) artikuluan definitzen dena.
4.– Kenkaria honako era honetan kalkulatuko da:
a) Inbertsio gisa, ekitaldian inbertitutako kopuruei 100eko 15a aplikatuko zaie, zergadunaren kontura izan diren gastuak barne.
Zergadunak 35 urte baino gutxiago baditu eta, gainera, bere oinarri ezargarria, foru arau honetako 61. artikuluan aipatzen den murrizpenarekin gutxitua, 4.500.000 pezetatik (27.045,54 Eurotik) gorakoa ez bada, portzentaje hori 100eko 25ekoa izango da artikulu honetako 2.c) apartatuan aipatzen diren kasuetan izan ezik. Bai portzentaje hori eta bai hurrengo letran aipatzen den 100eko 30ekoa zergadunaren eskariz aplikatuko dira, bien operagarritasuna aukeratzea beharrezkoa izango delarik.
Aurreko paragrafoan xedatutakoaren ondorioetarako eta, orobat, hurrengo letran aipatzen den 100eko 30eko portzentajearen aplikaziorako, adinaren zehaztapena zergaldiko lehen egunean dagoen egoerari begiratuaz egingo da.
Zergadunak inbertsio kontzeptuagatik zergaldi jarraituetan egiten dituen kenkarien batura ezingo da 4.500.000 pezetatik (27.045,54 Eurotik) gorakoa izan. Hala badagokio, kopuru hori foru arau honen 46. artikuluan jasotakoari jarraiki berrinbertsioagatik salbuesten den ondare irabaziaren zenbatekoari 100eko 15a aplikatu ondoren ateratzen den emaitzarekin gutxituko da.
Bigarren edo hirugarren ohiko etxebizitza bat erosten denean, kenkaria aplikatu ahal izateko ezinbestekoa izango da inbertitutako zenbatekoa ohiko etxebizitzaren kenkarirako eskubidea ematen duen zenbatekoa baino handiagoa izatea. Halakorik egonez gero, soberakinaren zenbatekoak emango du hurrengo zergaldietan kenkaria egiteko eskubidea.
b) Finantzaketa gisa, ohiko etxebizitzan inbertitzeko besteren kapitalak erabiltzeagatik ekitaldian ordaindutako interesei 100eko 20a aplikatuko zaie, beti ere eta bakar-bakarrik, aurreko letran jasotako kenkaria dagokion ekitaldian edo hurrengoetan aplikatzeko eskubidea sor dezaketen zenbatekoak badira.
Aurreko portzentajea 100eko 30ekoa izango da zergadunak 35 urte baino gutxiago dituenean eta, gainera, bere oinarri ezargarria, foru arau honetako 61. artikuluan aipatzen den murrizpenarekin gutxitua, 4.500.000 pezetatik (27.045,54 Eurotik) gorakoa ez denean.
5.– Ohiko etxebizitza pertsona batena baino gehiagorena denean, aurreko apartatuan adierazitako mugak pertsona guztiak batera harturik aplikatuko dira, oinarri ezargarriarenak izan ezik, hauek banaka konputatuko baitira, eta kenkaria erregelamenduz finkatuko den eran egingo da. Kenkaria egitean, erosle guztiek aurretik egin dituzten kenkarien zenbatekoak hartuko dira kontuan.
Famili unitateko kideetako batek edo batzuek ohiko etxebizitza bat erosten badute famili unitateko edozein kidek aurretik kenkaria izan duenean beste ohiko etxebizitza batengatik edo batzuengatik, aurreko apartatuan adierazitako mugak famili unitateko kide guztiek inbertsio kontzeptuagatik egin dituzten kenkarien zenbatekoak konputatuz aplikatuko dira.
Kode Zibilean ezarritakoari jarraiki ezkontzaren baliogabetzea, bereizketa edo dibortzioa erabakitzen den kasuetan, baldin eta judizialki edo epailearen ebazpenez onartutako hitzarmenean famili etxebizitzaren finantzaketa eta inbertsioa zergadunak bakarrik ordaintzeko obligazioa jaso bada, zergadun horrek egin ahal izango du bere aitorpenean artikulu honetan aipatzen den kenkaria. Obligazio hori bi zergadunei jarri bazaie, kenkaria bien artean hainbanatuko da, eta bakoitzaren aitorpenean egingo da norberari dagokion proportzioan.
6.– Kenkari hau aplikatzeko eskubidea ematen duten kopuruen zenbatekoak ezin du gainditu oinarri ezargarria foru arau honen 61. eta 62. artikuluetan jasotzen diren murrizpenekin gutxitu ondoren ateratzen denaren 100ko 60a. Ondorio horietarako, lehendabizi aurreko 4. apartatuko a) letran aipatzen den inbertsio kontzeptuari dagokion kenkaria aplikatuko da.
7.– Kenkari hau egin ahal izateko ezinbestekoa izango da zergaldiaren amaieran zergadunak duen ondarearen zenbateko egiaztatua zergaldiaren hasieran egiaztatutako balioarena baino handiagoa izatea, eta gehikuntza horrek, gainera, ohiko etxebizitzan inbertitu diren eta kontzeptu horregatik kenkaridunak izan diren zenbatekoen adinakoa izan beharko du gutxienez. Ondorio horietarako, zergaldiaren amaieran zergadunaren ondarean jarraitzen duten ondasunen balioak izandako aldaketak ez dira kontuan hartuko.
8.– Ohiko etxebizitzaren erosketarekin pareka daitezkeen bestelako kasuak erregelamendu bidez zehaztu ahal izango dira."
7. artikulua.– Aitortzeko obligazioa.
Pertsona Fisikoen Errentaren gaineko Zergari buruzko abenduaren 24ko 8/1998 Foru Arauaren 95.3 artikulua honela berridatzi da:
"3. Aurreko apartatuko a) letran xedatzen dena xedatzen dela ere, zerga honen aitorpena derrigorrez aurkeztu beharko dute ekitaldi berean ordaintzaile batengandik baino gehiagorengandik lan etekinak jasotzen dituztenek edo lan kontratu bat baino gehiago, laborala nahiz administratiboa, sinatu edo luzatzen dutenek. Halaber, zerga honen aitorpena aurkeztu beharko dute ezkontidearengandik pentsio konpentsagarriak jasotzen dituztenek edo foru arau honetako 8.b) artikuluan aurreikusitakoak ez diren urteko mantenuak eskuratzen dituztenek.
Era berean, eta aurreko 2. apartatuan xedatutakoa xedatu ere, aitorpena zein beste kasutan aurkeztu beharko den erregelamendu bidez finkatu ahal izango da.
Gertatzen bada, zergadunak jasotzen dituen lan etekinak aurreko apartatuko a) letran aipatzen den mugatik beherakoak izan arren, derrigorrez aurkeztu behar duela aitorpena aurreko lehen paragrafoan xedatutakoak horretara behartzen duelako edo erregelamenduz hala ezartzen delako, non eta azken kasu horretan obligazio hori ez den sortzen lan etekinak jasotzearekin zer ikusirik ez duten arrazoiengatik, zergadun horrek bi aukera izango ditu:
a.– Zerga honen xedapen orokorrei jarraiki tributatzea, edo
b.– lan etekinak bakarrik kontuan hartuz tributatzea, ondoko erregela hauen arabera:
a´) Lan etekinetarako ezarritako atxikipen taulak mota honetako etekinen zenbateko osoari aplikatuko zaizkio, beti ere foru arau honek 9. artikuluan salbuesten dituen etekinak sartu gabe. Ondorio horietarako, zergaren sortzapen egunean indarrean dauden ondoko erregelak aplikatuko dira, hau da, atxikipenari lotutako etekinen zenbatekoa kalkulatzekoak eta atxikipen taulak finkatu eta aplikatzekoak.
b´) Aurreko a´) letran ezarritakoa aplikatu ondoren ateratzen den kopuruari lan etekinei egindako atxikipenen eta konturako sarreren zenbatekoa gutxituko zaio. Hortik ateratzen den kopurua izango da Foru Aldundian sartuko dena eta erregelamenduz finkatzen den eran zatikatu ahal izango da. Tributatzeko prozedura hau erabiliz gero, ez da inoiz itzulketarik egingo.
c´) Gastu kengarriak, hobariak, murrizpenak, kenkariak, baterako tributazioaren erregelak edo Pertsona Fisikoen Errentaren gaineko Zergaren araudian jasota dauden bestelako onurak ez dira ezein kasutan aplikatuko."
AMAIERAKO XEDAPENA
Foru arau hau Gipuzkoako Aldizkari Ofizialean argitaratu ondorengo egunean sartuko da indarrean eta 2001eko urtarrilaren 1etik aurrera sortuko ditu ondorioak.
Aldiz, Foru Arau honen 7. artikuluak Pertsona Fisikoen Errentaren gaineko Zergari buruzko abenduaren 24ko 8/1998 Foru Arauaren 95.3 artikuluari eman dion idazkerak 2000ko urtarrilaren 1etik aurrerako ondorioak izango ditu; era berean, Foru Arau honetako 6. artikuluaren bitartez abenduaren 24ko 8/1998 Foru Arauko 76. eta 77. artikuluei emandako idazkerak ere 2000ko urtarrilaren 1etik aurrerako ondorioak izango ditu.
