Boletín Oficial del País Vasco

192. zk., 2024ko urriaren 2a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

EUSKAL HERRIKO UNIBERTSITATEA

4540

ERABAKIA, 2024ko uztailaren 18ko Universidad del País Vasco / Euskal Herriko Unibertsitateko Gobernu Kontseiluarena: UPV/EHUko 2024ko uztailaren 9ko Batzorde Intersektorialaren Akordioa berrestea onartzeko dena.

UPV/EHUko Berdintasunerako Batzorde Intersektoriala 2014ko apirilaren 3an sortu zen, irakasle-ikertzaile eta AZPko funtzionarioen, eta lan kontratudun irakasle-ikertzaile eta AZPkoen negoziazio batzordeen akordio bidez. Akordio horren arabera, UPV/EHUren zerbitzura dauden pertsonen lan baldintzak arautzen dituzten tresnek berdintasunaren arloko erreferentzia jakin batzuk ere jasotzen dituzte. Horrela, UPV/EHUko administrazio eta zerbitzuetako lan kontratudun langileen III. Hitzarmen Kolektiboak, UPV/EHUko lan kontratudun irakasle-ikertzaileen II. Hitzarmen Kolektiboak eta UPV/EHUko langile funtzionarioen lan baldintzak arautzen dituen Akordioak adierazten dute unibertsitateak zaindu egin behar duela ez dagoela diskriminaziorik, ez zuzenik ez zeharkakorik, langileen lan baldintzetan, prestakuntzan edo sustapenean, eta jartzen dute haien helburuetako bat dela emakumeen eta gizonen lana, familia eta bizitza pertsonala uztartzeko politikak ezartzea, zaintzaren erantzukizunek ibilbide profesionalean duten eragina murrizteko.

Era berean, aipatutako akordioan adierazten denez, ez dirudi egokia denik gai horien analisia UPV/EHUren zerbitzura dauden langileen kolektiboei buruzko Akordio eta Hitzarmenetatik eratorritako batzordeetan zatitzea. Aitzitik, aberasgarriagoa izango da kolektibo horietako bakoitzean gerta daitezkeen egoerak batera aztertzea eta aplikazio orokorreko baterako proposamenak egitea.

Azken hilabeteetan, Batzorde Intersektorialak, aurreko eskumenak baliatuz, eta III. Berdintasun Planaren 4.3 atalean jasotako zenbait ekintza betetzeko: «Gizarte eta lan harremanetan emakumeen eta gizonen berdintasuna sustatuko duten neurriak aztertu, adostu eta ezartzea», UPV/EHUko Kontziliazio Gida egiten aritu du eta baita kontziliazio hori erraztuko duten zenbait neurri hobetzen ere. Ondorioz, berretsi nahi den akordiora iritsi da.

Hori guztia kontuan hartuta, gerenteak proposatuta, batzorde intersektorialaren presidente bezala, sindikatuen negoziatu eta akordioa lortu ondoren, eta aplikatu beharreko araudiarekin bat etorriz, Gobernu Kontseiluak

ERABAKI DU:

Lehenengoa.– UPV/EHUko Berdintasunerako Batzorde Intersektorialaren 2024ko uztailaren 9ko Akordioa berrestea.

Bigarrena.– Euskal Herriko Agintaritzaren Aldizkarian argitaratzea, eta argitaratzen den egunean bertan jarriko da indarrean.

Leioa, 2024ko uztailaren 18a.

Errektorea,

EVA FERREIRA GARCÍA.

Idazkari nagusia,

AITOR ZURIMENDI ISLA.

UPV/EHUKO BERDINTASUNERAKO BATZORDE INTERSEKTORIALAREN AKORDIOA. LEIOA, 2024KO UZTAILAREN 9A

ATARIKOA

UPV/EHUko Berdintasunerako Batzorde Intersektoriala 2014ko apirilaren 3an sortu zen, irakasle-ikertzaile eta TEKAZELeko funtzionarioen, eta lan kontratudun irakasle-ikertzaile eta TEKAZELekoen negoziazio batzordeen akordio bidez. Akordio horren arabera, UPV/EHUren zerbitzura dauden pertsonen lan baldintzak arautzen dituzten tresnek berdintasunaren arloko erreferentzia jakin batzuk ere jasotzen dituzte. Horrela, UPV/EHUko administrazio eta zerbitzuetako lan kontratudun langileen III. Hitzarmen Kolektiboak, UPV/EHUko lan kontratudun irakasle-ikertzaileen II. Hitzarmen Kolektiboak eta UPV/EHUko langile funtzionarioen lan baldintzak arautzen dituen Akordioak adierazten dute unibertsitateak zaindu egin behar duela ez dagoela diskriminaziorik, ez zuzenik ez zeharkakorik, langileen lan baldintzetan, prestakuntzan edo sustapenean, eta jartzen dute haien helburuetako bat dela emakumeen eta gizonen lana, familia eta bizitza pertsonala uztartzeko politikak ezartzea, zaintzaren erantzukizunek ibilbide profesionalean duten eragina murrizteko.

Era berean, aipatutako akordioan adierazten denez, ez dirudi egokia denik gai horien analisia UPV/EHUren zerbitzura dauden langileen kolektiboei buruzko Akordio eta Hitzarmenetatik eratorritako batzordeetan zatitzea. Aitzitik, aberasgarriagoa izango da kolektibo horietako bakoitzean gerta daitezkeen egoerak batera aztertzea eta aplikazio orokorreko baterako proposamenak egitea.

Azken hilabeteetan, Batzorde Intersektorialak, aurreko eskumenak baliatuz, UPV/EHUko Kontziliazioa eguneratu du eta baita kontziliazio hori erraztuko eta hobetuko duten zenbait neurri ere bai. Ondorioz, honako erabakia hartu du:

1 artikulua.– Haurdunaldia eteteagatiko baimena.

Artikulu berri bat eransten zaio, 32 bis, UPV/EHUko administrazio eta zerbitzuetako lan kontratudun langileen III. Hitzarmen Kolektiboari; artikulu berri bat, 67 bis, UPV/EHUko Lan Kontratudun Irakasle eta Ikertzaileen II. Hitzarmen Kolektiboari, eta artikulu berri bat, 19 bis, UPV/EHUko funtzionarioen lan-baldintzak arautzen dituen 1996ko urriaren 10eko Akordioari, honako eduki honekin:

«Haurdunaldia eteteagatiko baimena.

1.– Haurdunaldia 6. astearen eta 179. egunaren artean eteten zaien emakumeek hiru egun balioduneko baimena hartu ahal izango dute, umekia galdu eta berehala.

2.– Umekia galtzen bada haurdunaldiaren 180. egunetik aurrera, hau da, haurdunaldia sei hilabete baino gehiagokoa izan bada, ama biologikoak jaiotzagatiko baimenari dagokion baimen berbera hartzeko eskubidea izango du».

2. artikulua.– TEKAZELentzat lanaldira pixkana egokitzeko baimena.

Artikulu berri bat eransten zaio, 53 bis, UPV/EHUko administrazio eta zerbitzuetako lan kontratudun langileen III. Hitzarmen Kolektiboari; eta artikulu berri bat, 32 bis, UPV/EHUko funtzionarioen lan-baldintzak arautzen dituen 1996ko urriaren 10eko Akordioari. Artikulu horrek honako eduki hau izango du:

«Lanaldira pixkana egokitzeko baimena.

Erradioterapia edo kimioterapia tratamendua amaitu ondoren lanera itzuli behar diren TEKAZELeko langile publikoek lanaldira pixkanaka egokitzea eskatu ahal izango dute.

Unibertsitateak egokitze hori onartu ahal izango du, horrek pertsonari guztiz osatzen laguntzen badio, edo horrek eragozten badu langileari egoera bereziki nekagarriak edo zailak sortzea bere lana egitean.

Egokitze aldia hilabetekoa izango da, medikuak langileari alta ematen dionetik hasita, eta eguneko lanaldiaren % 25 gehienez. Ahal dela, lanaldiaren malgutasun tartean hartuko da baimena, eta lanaldiaren zati hori lan egindako tartetzat hartuko da.

Eskariarekin batera, kasuan kasuko, egiaztagiriak aurkeztu beharko ditu interesdunak, eta unibertsitateak hiru eguneko epea izango du eskaria onartu ala ezesteko. Edonola ere, egokitze hori bidezkoa den egiaztatzeko, Administrazioak txostenak eskatu ahal izango dizkio Prebentzio Zerbitzuari edo egokitzat jotzen duen beste edozein organori, jasotako tratamenduari edo agindutako errehabilitazio jarduerei buruzkoak.

Goian aipatutako egokitze aldia beste hilabete batez luzatu ahal izango da interesdunak justifikatzen badu erradioterapia edo kimioterapia tratamenduak bere osasunean eragiten segitzen duela.

Salbuespenez, beste tratamendu bereziki larri batzuen ondoren ere eskatu ahal izango da lanaldia egokitzea, gorago aipatu den moduan. Halakoetan, egoera bakoitza aztertuko da.

Eskaria egitean:

• Zehaztu beharko dira egokitze aldia eta ehunekoa.

• Egiaztagiriak erantsi beharko dira, langilearen egoera frogatzen dutenak eta lanaldia egokitzeko beharra edo komenigarritasuna adierazten dutenak».

3. artikulua.– IIPrentzat irakaskuntza-obligazioetara pixkana egokitzeko baimena.

Artikulu berri bat eransten zaio, 83 bis artikulua, UPV/EHUko irakasle eta ikertzaileen lan-kontratuko langileen hitzarmen kolektiboari, eta artikulu berri bat, 32 ter artikulua, UPV/EHUko funtzionarioen lan-baldintzak arautzeko 1996ko urriaren 10eko akordioari. Bi artikulu horiek honela idatzita geldituko dira:

«Erradioterapiako edo kimioterapiako tratamendua amaitu ondoren lanpostura itzuli behar duten irakasle eta ikertzaileek lanaldia pixkanaka egokitzeko eskatu ahal izango dute.

Egokitzapena aldi baterako izango da, medikuaren alta jaso ondoren, eta irakaskuntza-gaitasuna % 25 murriztuko da, eta, oro har, lauhilekora egokituta.

Eskaerarekin batera dagokion egiaztagiriak aurkeztuko dira, eta unibertsitateak astebeteko epea izango du eskaerari erantzuteko. Langilearen egoera eta lanaldia egokitzeko beharra edo egokitasuna egiaztatzen duten egiaztagiriak erantsi beharko dira.

Nolanahi ere, eta egokitzapen egokia egiaztatzeko, Administrazioak txostenak eskatu ahal izango dizkio UPV/EHUko Prebentzio Zerbitzuari edo egokitzat jotzen duen beste edozein organori, jasotako tratamenduari edo agindutako errehabilitazio-jarduerei buruz.

Salbuespen gisa, lanaldia egokitzea eskatu ahal izango da, bereziki larriak diren beste tratamendu batzuen ondoren. Kasu honetan, egoera bakoitza aztertuko da.

Eskatzaileak eskaeran zehaztu beharko du murrizketa baliatzeko epea eta eskatutako ehunekoa».

AZKEN XEDAPENA

Akordio hau, eraginkorra izan dadin, UPV/EHUko Gobernu Kontseiluak berretsi beharko du, eta Euskal Herriko Agintarien Aldizkarian argitaratu beharko da, eta hitzarmen kolektibo bakoitzaren (lan kontratudun IRIak eta TEKAZELekoak) edo lan baldintzak arautzeko hitzarmenaren (langile funtzionarioak) esparrura eramango da.

Adostasun horren erakusgarri, dokumentu hau sinatzen dute, Leioan, 2024ko uztailaren 9an.

Azterketa dokumentala