maltusianismo
edo malthusianismo. iz. Biztanle kopurua eta biztanleen beharrizanak asetzeko elikadura bat etor daitezen, biztanleen kopuruaren hazkundea mantsotzea proposatzen duen dotrina. v Thomas Malthus (1766-1834) ekonomista britainiarraren arabera, biztanleria progresio geometrikoan hazten den bitartean, elikadura baliabideen produkzioa progresio aritmetikoan emendatzen da; ondorioz, elikagaien kopuruak biztanleriaren hazkundeari muga ezartzen dio. Biztanle kopuruaren eta elikaduraren arteko oreka lortzeko biztanleriaren jaiotza kopurua mugaturik mantendu behar da sexu harremanak mugatuz eta ezkontza adina atzeratuz; bestalde, hilkortasuna handiagoa denean (goseteak, gerrak, izurriteak...) hazkundea moteldu egiten da. Maltusianismotik sortutako neomaltusianismoak antisorgailuak erabiltzea gomendatzen du oreka hori lortzearren. v Maltusianismo ekonomikoa. Produkzioaren berariazko murrizketa edo erabateko suntsipena. Gehienbat nekazaritza alorreko gaiei edo produkzio baliabideei dagokie eta haren helburu nagusia neurriz gaindiko produkzioa saihestea, eskaera eta eskaintza orekatzea eta prezioen beherakada geratzea da.
