Euskararen tresnak

Lur hiztegi entziklopedikoa

Kultura eta Hizkuntza Politika Saila

Athletic Club de Bilbao

1898. urtean Bilbon sortutako euskal futbol taldea. Espainiako futbol lehiaketetan garaipen gehien lortu duen euskal taldea da: zortzi liga txapelketa (aurrenekoa 1929-30 denboraldian eta azkeneko biak, jarraian, 1982-83 eta 83-84 denboraldietan) eta zazpi bigarren postu; hogeita lau Kopa (aurrenekoa 1902an eta azkenekoa, 1984an) eta hamaika bigarren postu; Espainiako Supercoparen irabazle 1985-85 denboraldian eta txapeldun hurrengo 1983-84 denboraldian), eta UEFA Kopan txapeldun hurrengo 1976-77 denboraldian). Jokalari euskaldunak baino onartzen ez dituen lehen mailako euskal futbol talde bakarra da egun Athletic. Zuri-gorriek Bilboko San Mames zelaian jokatzen dituzte etxeko partidak, baina Lezamako instalazioetan du bihotza klubak. Talde profesionalen entrenamenduetarako zein jokalari gazteak prestatzeko erabiltzen diren instalazio hauek 1971-72 denboraldian inauguratu ziren. Azken urteetan, Athletic Clubek Lezama kanpora ere zabaldu du, Bizkaiko hainbat herritan dauden 7 "Lezama-txiki"ko egitasmoaren bitartez. Lezamak oinarrizko futboleko bederatzi talde biltzen ditu, Athleticen lehen taldera iristeko jokalari orok goititu beharreko maila guztiak. Bilbao Athletic (Bigarren B maila), Gazteen Ohorezko maila, Gazteen Nazio Maila, kadete talde bi (Euskal Liga eta Gorena), Haurren talde bi (Lehena eta Bigarrena) eta Kimuen talde bi (Kimuak A eta Kimuak B). 1994tik aurrera José María Arrate da Athletic Cluben lehendakaria. Taldea, lau urtez (1996-2000) Luis Fernándezen ardurapean egon ondoren, Txetxu Rojo jokalari ohiaren esku gelditu da 2000-2001 denboraldian