Liburutegi Zerbitzua

Agindu honen bidez, Mikrobiologia Informazioko Sistemarako datuen bidalketa arautu nahi da, Euskal Autonomia Erkidegoko Mikrobiologia Informazioko Sistemaren barruan, abenduaren 24ko 312/1996 Dekre­tuan ezarritakoaren eremuan.

Mikrobiologia Informazioko Sistemak datuak biltzen ditu Euskal Autonomia Erkidegoan atzemandako patologia kutsagarriei buruz. Sistema horrek helburu hauek ditu:

1. Eragile etiologikoen ibilia atzematea, eta beren ezaugarriak eta agerpen-ereduak jasotzea.

2. Epidemien sorreren ezaugarriak eskuratzea.

3. Eragile berriak eta goranzko patologiak identifikatzea.

4. Mikrobioen kontrako erresistentziak monitorizatzea.

Diagnostiko Mikrobiologikoko Laborategia duten Euskal Autonomia Erkidegoko osasun-zentro guztiek, publiko zein pribatu izan, informazioa eman beharko diote nahitaez Mikrobiologia Informazioko Sistemari.

1. Infekzioen berri emateko orduan honako hauek hartuko dira kontuan: larritasuna, arriskua eta kutsagarritasuna, baita transmisioa ez gertatzeko neurri eraginkorrak ere.

2. Lehentasunezkotzat jotzen da agindu honen 1. eranskineko zerrendan dauden mikroorganismoen berri jakinaraztea. Jakinaraziko da, orobat:

   1. Etiologia bat sortu dela pentsarazten digun edozein egoera.

   2. Agindu honen 2. eranskinean dauden kutsadura nosokomialaren kasuak.

   3. Gure erkidegoko ohiko eredu mikrobiologikoetan aldaketaren bat gertatu dela pentsarazten digun edozein egoera.

   4. Osasun Publikoaren aldetik garrantzitsua izan daitekeen edozein informazio.

   5. Osasun-alertako edozein egoera.

3. Osasun Publikoko Zuzendaritzak gidalerroak onetsiko ditu, eta hor jasota egongo dira jakinarazpen-irizpideak. Gidalerro horiek urtero berrikusiko ditu Batzorde Teknikoak.

1. Mikrobiologia Informazioko Sistemari eman beharreko datuen artean gutxienez aldagai hauek aipatuko dira:

   Identifikazio Korporatiboko Kodea (IKK).

   Historia-zenbakia.

   Izena.

   Deiturak.

   Jaioteguna:

   Adina.

   Sexua.

   Herria.

   Sorburua.

   Jomuga.

   Eskaria egin duen sendagilea.

   Diagnostikoa.

   Oharrak.

   Lagina erregistratu zen eguna.

   Emaitza balidatu den eguna.

   Eskari-zenbakia.

   Lagina.

   Mikroorganismoa.

   Proba/emaitza.

2. Infekzio gertatu berria den kasuetan, atzematen den aurreneko aldian baino ez dira halakotzat joko, salbu eta geroko identifikazio bat bestelako infekzio-mota batekin batera gertatzen bada.

1. Datuak euskarri elektronikoan bidaliko dira, otsailaren 18ko 35/1997 Dekretuaren esparruan Euskal Autonomia Erkidegoko Administrazio Orokorrerako onartutako estandar teknologikoen arabera.

2. Datuak astean behin bidaliko dira; asteroko emaitzak hurrengo asteko astelehenean edo lehenengo egun baliodunean helaraziko dira.

3. Maiztasuna Osasun Publikoko Zuzendaritzak aldatu ahal izango du.

Aitorpena egiten duen laborategiaren gainean dagoen osasun-zentroaren zuzendaritzak aitorpena behar bezala betetzeko ardura izango du.

Erreferentziako laborategiak ezartzen dira honako hauek zehazteko: Legionella, Mycobacterium tuberculosia, Neisseria meningitidia, poliobirusa eta elgorriaren birusa.

1. Mikrobiologia Informazioko Sistemaren Batzorde Teknikoa sortu da. Osasun Sailari atxikitako aholku-emaile gisara sortu da, gaiaren inguruko gaietan aholku teknikoak emateko, Osasun Saileko aholku-kontseiluen araubidea ezartzen duen maiatzaren 24ko 121/2005 Dekretuan xedatutakoa betez.

2. Batzorde Teknikoaren eginkizun nagusia honako hau izango da: Mikrobiologia Informazioko Sistemarekin lotutako osasun-helburuak lortzea eta horretarako estrategiak garatzea.

2. Eginkizun horren jarduera-esparruan, honakoak dagozkio Batzorde Teknikoari:

   1. Mikrobiologia Informazioko Sistemaren helburuak betetzerakoan aholkuak eman eta beharrezkoak diren jarduerak proposatzea.

   2. Urtero gidalerroak aztertu eta proposatzea, jakinarazpen-irizpideez lagundurik.

   3. Aitorpen mikrobiologikoaren esparruan ikerketa-azterlanak eta -lanak proposatzea.

3. Batzorde Teknikoa lehendakariak, idazkariak eta 8 kidek osatuko dute. Osasun sailburuordeak izendatuko ditu guztiak.

   Batzorde Tekniko bakoitzak erabakiko du, aztertu beharreko gaietan ospe handia duten eta beren ekarpen zientifikoak eta lanak interesgarritzat jotzen diren beste pertsona batzuk, egingo diren bileretara etorri eta beren jardueren garapenean lankide izan ahal izatea.

4. Batzorde Teknikoak, halaber, bidezkotzat jotako lan-batzordeak edo -taldeak sor ditzake, bere esku utzitako jardueren garapen eraginkorra bermatze aldera.

5. Kideak honako banaketaren arabera izendatuko dira:

   4 kide, Osakidetzaren sareko mikrobiologia-laborategien ordezkari.

   1. Kide bat, Gaixotasun Kutsagarri eta Mikrobiologia Klinikoaren Espainiako Elkartearen ordezkari.

   2. Kide bat, Infekzioen Kontrolerako Zerbitzuen ordezkari.

   3. Kide bat, Osakidetza-Euskal Osasun Zerbitzuko Asistentzia Sanitarioko Zuzendaritzaren ordezkari.

   4. Kide bat, Osasun Saileko Osasun Publikoko Zuzendaritzaren ordezkari.

1. Mikrobiologia Informazioko Sistemaren xedeak osasun arlokoak baino ez dira izango.

2. Datu pertsonalen tratamendua Datu pertsonalak babesteko abenduaren 13ko 15/1999 Lege Organikoan eta honen garapen-araudian ezarritakoari jarraiki egingo da, betiere informazioaren konfidentzialtasuna, segurtasuna eta osotasuna bermatuz.

3. Euren egitekoak betetzeko, Mikrobiologia Informazioko Sistemaren datuak eskuratzen dituzten langileak sekretuaren betebeharraren menpe egongo dira, baita jarduera profesionalari uzten diotenean ere.