Joko eta Ikuskizunak

1. Dekretu honen helburua zera da, bitarteko elektronikoak erabiliz lan-hitzarmen eta -akordio kolektiboen Erregistroa eta gordailua sortzea eta arautzea Euskal Autonomia Erkidegoan.

2. Erregistroaren izena honako hau da: «Euskadiko Lan Hitzarmen eta Akordio Kolektiboen Erregistroa / Registro de Convenios y Acuerdos Colectivos de Trabajo del País Vasco».

3. Erregistroaren helburua da Langileen Estatutuaren III. tituluaren arabera sinatzen diren eta Euskal Autonomia Erkidegoko lurralde-eremua duten laneko hitzarmen eta akordio kolektiboak inskribatu, erregistratu eta gordailatzea, baita horiek Aldizkari Ofizialean argitaratzeko agintzea ere, dagokion lurralde-eremuaren arabera.

1. Erregistroa administratiboa da eta zerbitzu publiko gisa egituratzen da, eta dagokion funtzionamendua bitarteko elektronikoen bidez gauzatzen da, baina ez dauka herritarrek zerbitzu publikoetarako sarbide elektronikoa izateari buruzko ekainaren 22ko 11/2007 Legean aipatzen den erregistro elektronikoaren izaera.

2. Erregistroko datuak sarbide publikokoak dira, pertsonen intimitateari buruzkoak izan ezik, hain zuzen ere Datu Pertsonalak Babesteari buruzko legedian aurreikusitako bermeak eta babesa dutelako.

1. Erregistroa unitarioa da Euskal Autonomia Erkidego osorako, alde batera utzita bere funtzionamenduan, eta lurralde-eremuaren arabera, alde batetik, Erregistroaren Organo Zentralak eta, bestetik, Enplegu eta Gizarte Gaietako Sailaren Lurralde Ordezkaritzei atxikitako hiru Lurralde Bulegoek jarduten duten. Erregistroaren Organo Zentrala laneko zuzendariaren mende dago organikoki, eta horren Lurralde Bulegoak dagokion lurralde-ordezkariaren mende.

2. Erregistroaren Organo Zentralean inskribatuko dira Lurralde Historikoaz gaindiko lurralde-eremua duten laneko hitzarmen edo akordio kolektiboak. Lurralde Historiko batera mugatutako eremua dutenak, aldiz, dagokion Lurralde Bulegoan inskribatuko dira.

Erregistroak honako zeregin hauek ditu:

1. Eskabideekin lotutako prozedurak izapidetzea, eta inskripzio-egintzen inskripzioa, erregistroa eta gordailua agintzea, indarreko legediaren arabera.

2. Erregistro-inskripzioei buruzko ziurtagiriak egitea, edozein pertsona fisikok edo juridikok eta edozein erakunde edo organismo publikok edo pribatuk eskatuta.

3. Erregistroan agertzen diren datuak jendearentzat eskuragarri jartzea, pertsonen intimitateari buruzko datuak izan ezik.

4. Gordailatutako dokumentazioaren zaintza eta kontserbazioa.

5. Esleitzen zaion beste edozein zeregin.

Euskadiko Lan Hitzarmen eta Akordio Kolektiboen Erregistroan inskribatuko dira laneko hitzarmen eta akordio kolektiboen erregistro eta gordailuari buruzko maiatzaren 28ko 713/2010 Errege Dekretuaren 2. artikuluan jasotako egintzak.

1. Inskripzioa egiteko eskaera Euskadiko Lan Hitzarmen eta Akordio Kolektiboen Erregistrora igorriko da, Enplegu eta Gizarte Zerbitzuen Sailaren lan-harremanen arloko egoitza elektronikoan ezarritako konexio telematikoaren bitartez (http://www.gizartelan.ejgv.euskadi.net), horretarako aplikazioan espezifikoki diseinatuak agertzen diren txantiloi automatikoak erabiliz.

2. Eskaera hamabost eguneko epean egingo da hitzarmen edo akordio kolektiboa sinatzen denetik edo negoziazio-ekimenak jakinarazten diren egunetik edo batzorde negoziatzaileak edo behar bezala egiaztatutako pertsonak amaiera iragartzen duenetik aurrera zenbatzen hasita, betiere lan-hitzarmen eta -akordio kolektiboen erregistroari eta gordailuari buruzko maiatzaren 28ko 713/2010 Errege Dekretuaren 6. artikuluan ezarritakoaren arabera. Horretarako, batzorde negoziatzaileak edo paritarioak sinatutako egiaztagiria aurkeztu beharko da; horren bitartez eskabidearen aurkezpen telematikoa egiteko ez ezik administrazio-jakinarazpenak jasotzeko ere legitimatuta dagoen pertsonaren izena egiaztatuko da.

3. Adierazitako eskabidean, inskribatzeko baimena eskatzeko xede den akordioaren edo egintzaren alderdi sinatzaileei buruzko datu guztiak eman beharko dira eta sinaduraren eguna, baita, hala badagokio, pertsona-, funtzio-, lurralde- eta denbora-eremuei buruzkoak ere eta horiek estaltzen dituzten jarduera ekonomikoak; horretarako, eredu ofizialetan biltzen diren estatistika-datu guztiak bete beharko dira, maiatzaren 28ko 713/2010 Errege Dekretuaren 1. eta 2. eranskinetan ezartzen denaren arabera.

4. Inskribatzeko eskabidearekin batera, bitarteko elektronikoak erabiliz, maiatzaren 28ko 713/2010 Errege Dekretuaren 7. artikuluan aipatzen den dokumentazioa aurkeztu beharko da, baita inskribatu beharreko hitzarmenaren, akordioaren edo jakinarazpenaren testua ere, argitaratzeko moduko formatuan. Testu horrek, gainera, bat etorri beharko du batzorde negoziatzailea edo eskabidea egin duen alderdia osatzen dutenek sinatutako testuarekin.

5. Dekretu honetan arautzen diren izapideekin zerikusirik ez duten eta interesdunek Erregistroan aurkezten dituzten eskabideek eta komunikazioek ez dute ondoriorik izango, eta ez aurkeztutzat joko dira. Horren berri emango zaio aurkezpena egin duen pertsonari.

1. Eskabidea lan-arloko agintari eskudunari aurkeztu ondoren, Erregistroko funtzionario arduradunak aurkeztutako dokumentazioa aztertuko du aplikatu beharreko araudiak horri dagokionez eskatzen dituen baldintza formalak eskatzaileak betetzen ote dituen egiaztatzeko.

2. Eskabidea aurkeztu ondoren, egiaztatzen bada eskabide horrek ez dituela aipatutako baldintzak betetzen, bitarteko elektronikoen bitartez eskatzaileari eskatuko zaio hamar egun balioduneko epean akatsa zuzen dezala edo aginduzko dokumentuak aurkez ditzala. Halaber, hala egin ezean, bere eskaerari uko egiten diola adieraziko zaio, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 42. artikuluan aurreikusi bezala eman beharreko ebazpenaren ondoren.

1. Erregistroaren organo arduradunak laneko hitzarmen edo akordio kolektiboan indarreko legediaren urraketak edo hirugarrenen interesentzako kalte larriak ikusten baditu, horren berri emango dio batzorde negoziatzaileari, hori zuzentzeko hamabost laneguneko epea emanez eta urratutzat jotzen diren arauak edo ustez kaltetuak dauden hirugarrenen interesak jasoz.

2. Zuzenketa hori egiten ez bada, horren ofiziozko aurkaratzea egingo da, horren berri jasoz dagokion idazpen elektronikoan, urratutzat jotzen diren arauak edo ustez kaltetuak dauden hirugarrenen interesak ere aipatuz, eta behin betiko erregistroa emango da eta organo judizialaren epaiak xedatzen duenaren arabera argitaratuko da.

Eskabideak eta erantsitako dokumentazioak legez eskatutako datuak, agiriak eta gainerako eskakizunak biltzen dituela egiaztatu ondoren, eta laneko hitzarmen edo akordio kolektiboak indarreko legedia urratzen ez duela eta hirugarrenen interesak kaltetzen ez dituela egiaztatu ondoren, lan-agintaritza eskudunak ebazpena emango du, erregistratzea, gordailatzea eta dagokion Aldizkari Ofizialean argitaratzea aginduz.

Lan-agintaritza eskudunak hitzarmen edo akordio kolektiboa inskribatzeko eta argitaratzeko agindua eman ondoren, kode bat esleituko dio, laneko hitzarmen eta akordio kolektiboen erregistro eta gordailuari buruzko maiatzaren 28ko 713/2010 Errege Dekretuaren 3. eranskinean ezarritakoari jarraiki.

Kode hori hitzarmen edo akordio kolektiboaren identifikagarri gisa jasoko da hitzarmen edo akordio kolektiboa Euskal Herriko Agintaritzaren Aldizkarian edo dagokion Lurralde Historikoaren aldizkarian argitaratzen denean.

1. Eskabidea aurkeztutakoan, interesdunak espedientea kontsulta dezake eta hari jarraipena egin diezaioke, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 35.a) artikuluari dagokionez Herritarrek Zerbitzu Publikoetarako Sarbide Elektronikoa izateari buruzko ekainaren 22ko 11/2007 Legearen 6.2.d) artikuluan ezarritakoaren arabera. Nolanahi ere, honako honi buruzko informazioa emango da:

   1. Eskabide-data.

   2. Eskabidearekin lotutako administrazio-espedientearen egoera.

   3. Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 42.4 artikuluan ezarritakoa.

2. Honako hauek hartuko dira interesduntzat: Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 31. artikuluan aurreikusitako baldintzak betetzen dituztenak.

1. Batzorde negoziatzaileak edo paritarioak izendatutako pertsonak, edo, hala badagokio, idazkia behar bezala egiaztatuta aurkezten duenak, Dekretu honen 6. artikuluan aipatzen den dokumentazioa igorriko du, bere sinadura elektronikoarekin batera, Sinadura Elektronikoari buruzko abenduaren 19ko 59/2003 Legean eta administrazio-prozeduretan bitarteko elektronikoen, informatikoen eta telematikoen erabilera arautzen duen abenduaren 18ko 232/2007 Dekretuaren III. kapituluan ezarritakoari jarraiki.

2. Dagokion sinadura elektronikoa kautotzen duten ziurtagiriek UIT X. 509 3. edo goragoko bertsioaren gomendioari jarraitu beharko diote, baita abenduaren 19ko 59/2003 Legearen 4. artikuluan aipatzen diren arau gehigarriei ere.

Lan-arloko agintari eskudunak euskarri informatikoan egindako dokumentuak jatorrizko dokumentutzat hartzen dira, eta prozeduraren programetan eta aplikazioetan behar bezala erregistratuta daude, formatu elektronikoan.

Interesdunek lan-agintaritza eskudunari euskarri informatikoan ematen dizkioten agiri elektronikoak inprimatu eta informatikoki artxibatu ahal izan beharko dira, beti sinadura elektronikoa jasoz, edo erregistroak erabilgarri duen baliozkotzearen bitartez.

Pertsona fisikoek eta pertsona juridikoen ordezkariek euskara eta gaztelania (hitzez nahiz idazki bidez) erabiltzeko duten eskubidea bermatuko da, baita Euskadiko Lan Hitzarmen eta Akordio Kolektiboen Erregistroarekin (Registro de Convenios y Acuerdos Colectivos de Trabajo del País Vasco) dituzten harremanetan hizkuntza bera erabiliz artatzeko duten eskubidea ere. Era berean, erregistroaren funtzionamenduari dagokionez, estatistika-orrien ereduak barne, Euskararen erabilera normalizatzeko azaroaren 24ko 10/1982 Oinarrizko Legearen 7. artikuluan ezarritakoa beteko da.