Xedea

Manifestu honek biltzen ditu EAEko sektore publikoko datuen bizi-ziklo osoa gidatuko duten printzipioak eta jardunbide egokiak, EAEko sektore publikoko Datuen Gobernantzaren Estrategiaren eremu subjektiboko erakunde guztientzat erreferente iraunkorra izango direnak. Helburua da datuen heldutasuna lortzea, erabakiak hartzerakoan datuak aztertzeko kultura bat lortzea, eta datuetatik eratorritako produktuen sorkuntzan oinarritutako eta herritarrei zuzendutako eraldaketa digital bat lortzea, erabaki publikoen erdigunean pertsonak kokatzen dituena.

Datuetatik lortutako produktuen artean, arreta berezia merezi dute adimen artifizialeko sistemek. Horregatik, manifestu honek atal berezi bat eskaintzen die sistemaren bizi-zikloan zehar gidari izan behar ditugun printzipio etikoei. Adimen artifizialeko sistemak pertsonengan zentratu behar dira eta guztion onerako erabili, ahalik eta onura gehien atera haiengandik eta arriskuei modu egoki eta proportzionatuan aurre egin. Ikuspegiak integrala eta sistemikoa izan behar du, AAren sistemaren eragile eta prozesu guztiak barne hartuta.

Sektoreko araudia

Manifestu honetan xedatutakoak ez die kalterik egingo honako hauei:

• Europako Parlamentuaren eta Kontseiluaren 2016ko apirilaren 27ko 2016/679 (EB) Erregelamenduan jasotako erregulazio berezia, zeina datu pertsonalen tratamenduari dagokionez pertsona fisikoen babesari eta datu horien zirkulazio askeari buruzkoa den eta zeinak 95/46/EE Zuzentaraua (Datuak Babesteko Erregelamendu Orokorra) indargabetzen duen.
• 3/2018 Lege Organikoa, abenduaren 5ekoa, Datu Pertsonalak Babestekoa eta Eskubide Digitalak Bermatzekoa.
• 1/1996 Legegintzako Errege Dekretua, apirilaren 12koa, Jabetza Intelektualari buruzko Legearen testu bategina onartzen duena, gaiari buruz indarrean dauden lege-xedapenak erregularizatu, argitu eta harmonizatuz.
• 37/2007 Legea, azaroaren 16koa, sektore publikoko informazioa berrerabiltzeari buruzkoa.
• 19/2013 Legea, abenduaren 9koa, gardentasunari, informazio publikoa eskuratzeko bideari eta gobernu onari buruzkoa.
• 39/2015 Legea, urriaren 1ekoa, Administrazio Publikoen Administrazio Prozedura Erkidearena.
• 40/2015 Legea, urriaren 1ekoa, Sektore Publikoaren Araubide Juridikoarena.
• Europako Parlamentuaren eta Kontseiluaren Erregelamendu-proposamena, adimen artifizialaren arloan arau harmonizatuak ezartzen dituena (Adimen Artifizialaren Legea) eta Batasunaren legegintzako egintza jakin batzuk aldatzen dituena.
• Beste edozein araudi, bere espezialitate eta edukiagatik datuen tratamenduari dagokionez berariazko betebeharrak garatzen dituena, eta, orobat, horiek garatu edo ordezten dituzten guztiak.