Toki Araubidea

Lehenengoa. Etxebizitza eta lurzoru arloko finantza-neurriak.

Babes ofizialeko etxebizitzen araubideari eta etxebizitzaren eta lurzoruaren inguruko finantza-neurriei buruzko araudian agindutakoa betetze aldera, deskontuen bidez 2017. urtean zehar egingo dituen finantza-eragiketen zenbatekoak ezin izango du 44.260.000 eurotik gora egin.

Bigarrena. Sustapenerako neurriak.

1. Euskal Autonomia Erkidegoko Administrazioaren sailek hainbat egitasmo finantzatzeko laguntzak eman ahal izango dituzte, mailegu eta aurrerakin itzulgarri modura, ekonomia bultzatzeko proiektuak finantzatzeko, ikus-entzunezko produkzio-sektoreak sustatzeko, bai eta ikerketa, garapen eta berrikuntza sustatzeko ere.

   Kontuan hartu beharreko arauetan jartzen duen moduan eman beharko dira laguntza horiek. Eta maiatzaren 24ko 1/2011 Legegintzako Dekretuak onetsi zuen Euskadiko aurrekontu-erregimenari buruzko indarreko lege-xedapenen testu bateginean ezarritakoa gorabehera, hartarako eskumena duen erakundeak gastu-konpromisoak hartu ahal izango ditu halako laguntzak eman ahal izateko, baldin eta konpromiso horiek berekin dakarten finantzaketa-kostua eta aurreikusitakoaren arabera Administrazioak aurre egin beharreko arriskua dagozkien aurrekontu-kredituek babestuta badaude.

2. Laguntzen finantzaketa-kudeaketa Finantzen Euskal Institutuaren bidez egingo da edo, dagokionean, aplikatu beharreko arauetan zehaztutako kaudimen- eta eraginkortasun-baldintzak betetzen dituzten pertsona juridikoen bidez, eta arau horietan eta entitate horiekiko lankidetza-akordioetan xedatzen den moduan. Entitate horiek, halaber, entitate laguntzaile gisa jardun ahal izango dute, azaroaren 11ko 1/1997 Legegintza Dekretuak onetsi zuen Euskadiko Ogasun Nagusiaren Antolarauei buruzko Legearen testu bategineko 52. artikuluan eta hura garatzen duten arauetan ezarritakoaren ondorioetarako.

3. Xedapen gehigarri honen eraginez aurrekontuetako gastuen eta sarreren egoera-orrietan egin beharreko egokitzapen teknikoak egiteko baimena ematen zaio Ogasun eta Ekonomia Sailari.

   Hirugarrena. Zenbait ondare-sarreraren erregimena.

1. Euskal Autonomia Erkidegoko Administrazio publikoak eta haren sozietate publikoek merkataritza-sozietate batzuetako partaidetzak besterendu ondoren horiek eskuratzea eragin zuen xede estrategikoa jada betea dutela irizten delako lortzen dituzten aurreikusi gabeko diru-sarrera eta finantza-baliabideak beste finantza-eragiketa batzuk egiteko aplikatu ahal izango dira, eta eragiketok Finantzen Euskal Institutuaren bidez egin ahal izango dira.

   Ondorio horietarako, baimena ematen zaio Jaurlaritzari, 2017ko ekitaldian eta aurrekontu- eta ondare-araubideari buruzko indarreko lege-xedapenetako baldintzetan, bidezko ondare-eragiketak egin ditzan eta eragiketa horietatik lortutako funtsak aurreko paragrafoan azaldutako jardueretara aplikatu ditzan.

2. Xedapen honetan aurreikusitakoa betetzeko garatzen diren jarduerak, dena dela, Euskal Autonomia Erkidegoko sektore publikoaren finantza-politikaren zerbitzuan ezar daitezkeen gastu arloko baliabide, tresna eta beste ekimen batzuk arrazionalizatzeko eta optimizatzeko Ogasun eta Ekonomia Sailak ezartzen dituen jarraibideei atxiki beharko zaizkie.

   Laugarrena. Azpiegituretako proiektuak onura publikoko deklaratzea.

1. Euskal Autonomia Erkidegoak irratiaren, telebistaren eta, oro har, gizarte-komunikabideen arloan dituen eskumenez baliatzeko beharrezko diren azpiegitura-proiektuak onartzeak, bai eta babes zibileko eta segurtasun publikoko zerbitzuen arloan dituenez baliatzeko beharrezko direnak onartzeak ere, inbertsioetarako kredituen kontura finantzatutako proiektuak baldin badira, berekin ekarriko du kasuan kasuko ondasunen onura publikoko deklarazioa eta urgentziazko okupazioaren beharra nahiz ondasun horiei dagozkien eskubideak eskuratu beharra, desjabetzeari, aldi baterako okupazioari edo zortasunak ezarri edo aldatzeari ekin ahal izateko.

2. Onura publikoko deklarazioak, era berean, erreferentzia egingo die proiektuaren zuinketan eta ondoren onartu daitezkeen aldaketetan bilduta dauden ondasun eta eskubideei.

3. Ondorio horietarako, azpiegituretako proiektuek eta proiektu horien aldaketek proiektuon definizioa eta proiektuok gauzatzeko okupatzea eta eskuratzea beharrezko irizten diren lur-sailak, eraikuntzak edo beste ondasun edo eskubide batzuk bildu beharko dituzte.

   Bosgarrena. Sektore publikoko kontratuak aldatzea.

1. Sektore publikoko kontratuen legeriak xedatutakoaren ondorioetarako, 2017ko aurrekontu-ekitaldi honetan zehar kontratu administratiboetan egindako edozein aldaketa interes publikoko arrazoiengatik egiten dela ulertuko da, baldin eta haren xedea bada aurrekontu egonkortasunaren helburua lortzea.

2. Aurrekontu-egonkortasuneko neurriak aplikatu behar direnean, kontratu-aldaketarik egin beharra badago, administrazio-klausula orokorren agirietan edo kontratazio berrien iragarpenean jaso beharko dira sektore publikoko kontratuen legerian era horretako aldaketei buruz aurreikusitakoak.

   Seigarrena. Laguntza, diru-laguntza eta prestazio ekonomikoen zenbatekoa murriztea.

1. Sektore publikoko entitateek, izaera orokorreko xedapenetan jasotako erregulazioaren babesean, 2017ko ekitaldian ematen, errekonozitzen edo ordaintzen dituzten laguntza, diru-laguntza eta prestazio ekonomikoek, aldez aurreko deialdi publikorik eta, gastu-muga ezartze aldera, gastuaren finantzaketari lotutako aurrekontu-baliabideen aurretiazko publizitaterik egin behar ez dutenek, % 7ko murrizketa izango dute haien zenbatekoan, lege honetan ezarritako laguntzak, diru-laguntzak eta prestazio ekonomikoak salbu.

2. Nolanahi ere, aurreko paragrafoan sartutakotzat hartuko dira familia eta lana bateragarri egiteko laguntzei buruzko ekainaren 29ko 177/2010 Dekretuan eta hori garatzeko araudian ezarritako prestazioak.

   Zazpigarrena. Diru Sarrerak Bermatzeko Errentari buruzko maiatzaren 25eko 147/2010 Dekretuan ezarritako prestazioen zenbatekoa.

   2017ko ekitaldian, diru-sarrerak bermatzeko errentaren zenbatekoa, edozein modalitatetan, eta orobat guraso bakarreko bizikidetza-unitateentzako hileko subsidio osagarriarena, 2016ko ekitaldian aplikatutakoa izango da % 1,5eko portzentajean gehituta.

   Zortzigarrena. Etxebizitzako prestazio osagarria.

1. 2017ko ekitaldian zehar, etxebizitza-alokairurako edo ohiko bizitokirako gastuak estaltzea xede duen etxebizitzako prestazio osagarriaren gehieneko zenbatekoa, hilean, 250 eurokoa izango da, errentamendu, azpierrentamendu, baterako errentamendu, ostatu-emate edo logela-alokairuaren modalitateetan, eta ez da gehikuntzarako aukerarik izango inolako gorabehera dela eta.

2. Gizarteratzeko eta Diru Sarrerak Bermatzeko abenduaren 23ko 18/2008 Legean etxebizitzarako prestazio osagarrirako aurreikusitako araubidea indarrean egongo da Etxebizitzari buruzko ekainaren 18ko 3/2015 Legearen 9. artikuluan aurreikusitako arautegi-xedapenak, modu subsidiarioan prestazio ekonomikoen sistema bat ezartzeari buruzkoak, indarrean sartu arte. Araubide eta prozedura hori ezarriko zaie, aldi baterako, prestazio ekonomiko baten onuradun izan daitezkeen pertsonei, Etxebizitzari buruzko ekainaren 18ko 3/2015 Legearen laugarren xedapen iragankorrean aurreikusitakoarekin bat etorriz.

3. Aurreko paragrafoan aipatutako arautegi-xedapenak indarrean daudenean, ez da etxebizitzarako prestazio osagarri gehiagorik aitortuko, Gizarteratzeko eta Diru Sarrerak Bermatzeko abenduaren 23ko 18/2008 Legean aurreikusitakoarekin bat etorriz.

4. Edozein modutan, 2017ko ekitaldian, etxebizitzarako prestazio horren zenbatekoa 250 eurokoa izango da hilean.

   Bederatzigarrena. Funtzionarioen nahitaezko erretiroa.

1. Euskal Funtzio Publikoari buruzko uztailaren 6ko 6/1989 Legearen 38. artikuluko 1. apartatuaren lehenengo lerrokadan ezartzen den lege-adina edozein dela ere, Gizarte Segurantzaren araubide orokorrean sartutako funtzionarioen nahitaezko erretirorako adina, betiere, araubide hori arautzen duten arauek erretiro-pentsiorako irispidea izateko aurreikusten dutena izango da adinagatiko koefiziente murriztailerik ez duen kotizaziopeko modalitatean.

2. Etena mantendu egiten da, 2017ko ekitaldian zehar, Euskal Funtzio Publikoari buruzko ekainaren 6ko 6/1989 Legearen 38. artikuluko 1. apartatuaren bigarren lerrokadan jasotzen den aurreikuspenaren arabera, zerbitzu aktiboan luzapena eskatzeari buruzko aplikazioarena.

   Hala ere, eragindako langileak, 65 urte betetzen dituenean, gizarte-aurreikuspeneko araubide bakoitza arautzen duten arauekin bat etorrita, ez baditu egiaztatzen egoera bakoitzari dagokion erretiro-pentsioa osoa sortzeko beharrezko den zerbitzu- edo kotizazio-urteak, zerbitzu aktiboan irautea eskatu ahal izango dio bere erretiroa erabakitzeko eskumena duen organoari. Dena den, ezingo da inolaz ere zerbitzu aktiboa luzatu 70 urtetik aurrera, edota interesatuak urtero dagokion erretiro-pentsio maximoa jasotzeko beharrezko baldintzak betetzen dituenean, baldin eta interesduna zerbitzurako gai dela onartu badute.

   Nolanahi ere, zerbitzu aktiboan egoteko luzapenak Funtzio Publikoko Zuzendaritzaren nahitaezko txostena beharko du, baimena berezia eman baino lehen.

   Hamargarrena. Euskal administrazio publikoetako enplegatuen prestakuntzarako kredituen kudeaketa.

   Euskal administrazio publikoetako enplegatuen enplegurako prestakuntzarako IVAP organismo autonomoaren aurrekontuetan agertzen diren kredituak organismo horrek kudeatuko ditu, kasuan kasuko deialdien bidez.

   Hamaikagarrena. Aldi baterako ezintasunari buruzko ordainsari-osagarriak arautzea.

   Aurreikusitako etena mantendu egiten da, Euskal Autonomia Erkidegoko 2012. urteko Aurrekontu Orokorrak onartzen dituen abenduaren 23ko 6/2011 Legearen 19.11 artikuluko azken paragrafoan jasotzen den moduan. Era berean, aldi baterako ezintasunari buruzko ordainsari-osagarrien erregulazioa mantentzen da urtarrilaren 28ko 3/2014 Dekretuan aurreikusi zen moduan, zeinean onartzen baitira Euskal Autonomia Erkidegoko arlo publikoko langile publikoek aldi baterako ezintasun-egoeran daudenean eta jakineko baimen batzuk dituzten aldietan jasoko dituzten lansariak eta borondatezko hobekuntzak. Nolanahi ere, Gobernuak gaiaren gaineko arau berria ezarri ahal izango du, Ogasun eta Ekonomia, eta Gobernantza Publiko eta Autogobernu sailek proposatuta.

   Hamabigarrena. 2012ko abenduari dagokion aparteko ordainsaria berreskuratzea.

1. Eusko Jaurlaritzak, Euskal Autonomia Erkidegoko 2017ko Aurrekontu Orokorren kontura, eta aplikagarria den araudiarekin bat, ohiz kanpoko ordainsari bat ordainduko die Euskal Autonomia Erkidegoko sektore publikoa osatzen duten entitateetako langileei, Aurrekontu Egonkortasuna eta Lehiakortasuna Bultzatzeko Neurriei buruzko uztailaren 13ko 20/2012 Errege Lege Dekretuak ezarritakoari jarraikiz, 2012ko abenduan aparteko ordainsaria, berariazko osagarriaren ordainsari gehigarria edo ordainsari gehigarriak kendu zirenean jaso ez zituzten zenbatekoen truke. Ohiz kanpoko ordainsari horren zenbatekoa 2012ko abenduan aparteko ordainsariaren, berariazko osagarriaren ordainsari gehigarriaren edo ordainsari gehigarrien sortzapen aldiko 48 eguni dagokien parte proportzionala izango da, eragindako kolektibo bakoitzaren aplikazio-arauen arabera.

2. Horretarako, Gobernu Kontseiluak zehaztuko du, Gobernantza Publiko eta Autogobernu, eta Ogasun eta Ekonomia sailek proposatuta, zein zehaztapen, baldintza eta epetan ordainduko zaien ordainsari hori, aplikatu beharreko araudian ezarritakoaren arabera, hura jasotzeko eskubidea zuten langileei; ordainketa horrek, baina, ez du eragingo 2017ko ekitaldirako ezarritako ordainsariak handitzea.

   Hamahirugarrena. Bizigune programako etxebizitza lagatzearen kontraprestazioaren gehieneko zenbatekoa.

   2017ko urtarrilaren 1etik aurrera, eragin-data horrekin, abenduaren 23ko 466/2013 Dekretuak, «Bizigune» Etxebizitza Hutsen Programa arautzen duenak, 8.2 artikuluan aurreikusitako etxebizitza-lagapenaren kontraprestazioaren gehieneko zenbatekoa hilean 525 eurokoa izango da.

   Hamalaugarrena. Euskal Herriko Unibertsitateko langileei buruzko xedapenak.

   Euskal Autonomia Erkidegoko 2011. urteko Aurrekontu Orokorrak onartzen dituen abenduaren 23ko 5/2010 Legearen bederatzigarren xedapen gehigarrian ezarritako gehieneko epea luzatu egiten da, 2020ko abuztuaren 31ra arte.

   Hamabosgarrena. Ertzaintzako langileen zerbitzu-ondoriozko kalte-ordainak eta ordainsari osagarriak egokitzea.

1. Salbuespen gisa, 2017ko ekitaldian zehar, Segurtasun Sailaren proposamenez, Gobernu Kontseiluak dekretu bidez egokitu ahal izango ditu Ertzaintzako langileen zerbitzu-ondoriozko kalte-ordainak eta ordainsari osagarriak, lanpostu bakoitzari esleitzen zaizkionak lanpostuaren edukiari dagozkionak direla ziurtatzeko, betiere finantzaketa egokia badago eta 2223 programako kredituen gehikuntza eragiten ez bada («Ertzaintza Zerbitzuan»).

2. Aurreko paragrafoan adierazitako ondorioetarako, Ertzaintzako funtzionarioen ordainsarien arloko arautegiak aurreikusi ahal izango du berariazko osagarriak buruzagitza-eginkizun bereziei lotutako alderdi bat ere izango duela. Eginkizun horiek eskala gorenerako eta betearazpen-eskalarako erreserbatutako zuzendaritza-izaerako lanpostuei daude atxikita.

Lehenengoa. Euskal Autonomia Erkidegoko Administrazioaren Tasei eta Prezio Publikoei buruzko Legearen testu bategina aldatzea; testu hori irailaren 11ko 1/2007 Legegintzako Dekretuaren bidez onartu zen.

1. Aldatu egiten da testu bategin horren 8. artikulua, tasen eguneratzeari dagokiona, eta honela idatzita geldituko da:

   Euskal Autonomia Erkidegoko Aurrekontu Orokorren Legean tasen arauketa aldatu ahal izango da.

2. Testu bategin horren 44. artikuluan l) letra berria gehitzen da, administrazio-zerbitzuengatik ordaindu beharreko tasaren salbuespenen ingurukoa, eta honela idatzita geldituko da:

   1. Euskadiko aseguru-bitartekari, berraseguru-artekari eta horietako goi-karguen administrazio-erregistro berezian izena emateak.

3. Aldatu egiten da testu bategin horren 69. artikulua, titulu eta egiaztagiri akademiko eta profesionalak emateagatiko tasaren kuotari dagokiona, eta honela idatzita geldituko da:

   69. artikulua Kuota.

   Tarifa honen arabera eskatuko da tasa (eurotan):

   (Ikus .PDF)

   4. Aldatu egiten da testu bategin horren 78.1 artikulua, unibertsitatez kanpoko irakaskuntzetako atzerriko titulu eta ikasketak homologatu eta baliozkotzeagatiko tasaren kuotari dagokiona, eta honela idatzita geldituko da:

   78. artikulua Kuota.

   1. Tarifa honen arabera eskatuko da tasa (eurotan):

      (Ikus .PDF)

   5. Aldatu egiten da testu bategin horren 86. artikulua, Gazte txartela emateagatik ordaindu beharreko tasaren kuotari dagokiona, eta honela idatzita geldituko da:

      Tasaren zenbatekoa 6,00 euro izango da.

6. Aldatu egiten da testu bategin horren 87. artikulua, Euskal Autonomia Erkidegoan nazioarteko ezagutza duten aterpekide-txartelak emateagatik ordaindu beharreko tasaren zergapeko egitateari dagokiona, eta honela idatzita geldituko da:

   Tasa honen zergapeko egitatea aterpekide-txartel hauek emateko behar diren zerbitzuak ematea da, interesatuak eskatuta ematea, hain zuzen ere:

   1. Aterpekide gazteen nazioarteko txartela.

   2. Aterpekide helduen nazioarteko txartela.

   3. Familientzako nazioarteko aterpekide-txartela.

   4. Taldeentzako nazioarteko aterpekide-txartela.

7. Aldatu egiten da testu bategin horren 90. artikulua, Euskal Autonomia Erkidegoan nazioarteko ezagutza duten aterpekide-txartelak emateagatik ordaindu beharreko tasaren kuotari dagokiona, eta honela idatzita geldituko da:

   Tarifa honen arabera eskatuko da tasa (eurotan):

   1. Aterpekide gazteen nazioarteko txartela: 5,00.

   2. Aterpekide helduen nazioarteko txartela: 10,00.

   3. Familientzako nazioarteko aterpekide-txartela: 18,00.

   4. Taldeentzako nazioarteko aterpekide-txartela: 16,00 .

8. Aldatu egiten da testu bategin horren 95. artikulua, International Student Travel Confederation (ISTC) elkartearen nazioarteko abantailen txartela emateagatik ordaindu beharreko tasaren kuotari dagokiona, eta honela idatzita geldituko da:

   Tarifa honen arabera eskatuko da tasa (eurotan):

   1. Ikaslearen nazioarteko txartela (ISTC): 9,00.

   2. Nazioarteko irakasle-txartela (ITIC): 9,00.

   3. Gazteentzako nazioarteko bidaia-txartela (IYTC/GO25): 9,00.

9. Aldatu egiten da testu bategin horren 123. artikulua, meatzeen arloko zerbitzuak emateagatik ordaindu beharreko tasaren zenbatekoaren osagaien ingurukoa, eta honela idatzita geldituko da:

   Tarifa honen arabera eskatuko da tasa (eurotan):

   1. Meategien antolamendua.

   1. Meatze-baliabideak arakatzeko baimena.

      1. 1.000 lauki arte: 2.253,16.

      2. Lauki gehigarri bakoitzeko, 1.000 laukitik aurrera: 2,13.

   2. Ikertzeko baimena.

      1. Lehenengo laukiarengatik: 2.288,38.

      2. Lauki gehigarri bakoitzeko: 10,57.

   3. Meatzeen legerian aurreikusitako A eta B ataletako baliabide mineralak aprobetxatzeko eta lehengoratze-proiektuak egiteko baimena.

      1. 20 hektarea arte: 3.274,13.

      2. Hektarea gehigarri bakoitzeko, 20 hektareatik aurrera: 42,28.

   4. Meategiak ustiatzeko kontzesioak.

      1. Ikertzeko baimenetatik eratorriak.

      1.1. 50 lauki arte: 2.253,16.

      1.2. Lauki gehigarri bakoitzeko, 50 laukitik aurrera: 42,28.

      2. Zuzenean emandako ustiatzeko kontzesioak.

      2.1. 50 lauki arte: 3.274,13.

      2.2. Lauki gehigarri bakoitzeko, 50 laukitik aurrera: 42,28.

   5. Meatzaritzako eskubide eta baimenen transmisio-, errentamendu- edo karga-eskaera.

      1. Meatzeen legerian aurreikusitako A eta B atalak: artikulu honen 1.3 puntuko tarifaren % 50.

      2. Meatzeen legerian aurreikusitako C eta D atalak: artikulu honen 1.4 puntuko tarifaren % 50.

   6. Meatzaritzako baimen eta kontzesioen iraungitze-eskaera.

      1. Meatzeen legerian aurreikusitako A eta B atalak: artikulu honen 1.3 puntuko tarifaren % 50.

      2. Meatzeen legerian aurreikusitako C eta D atalak: artikulu honen 1.4 puntuko tarifaren % 50.

   7. Meategiak ustiatzeko kontzesioen eta baimenen aldaketak: artikulu honen 1.3. eta 1.4. puntuei dagokien tasaren % 50.

   2. Meatzaritzako baimen eta kontzesioen bitartez jabari publikoko ondasunak nork beretzat erabiltzea (eremu bat erabiltzeagatik ordaindu beharreko saria).

   1. Meatze-baliabideak arakatzeko baimenak.

      1. Lauki bakoitzeko, 1.000 arte: 0,31.

      2. Lauki bakoitzeko, 1.001 eta 2.000 bitarte: 0,36.

      3. Lauki bakoitzeko, 2.000tik aurrera: 0,46.

   2. Ikertzeko baimenak.

      1. Lauki bakoitzeko: 17,23.

   3. Ustiatzeko kontzesioak.

      1. 22/1973 Legea baino lehenagoko legediaren arabera emandakoak.

      1.1. Hamar hektarea bakoitzeko edo zatiki eta urte bakoitzeko, 280 hektarea arte: 248,09.

      1.2. Hamar hektarea bakoitzeko edo zatiki eta urte bakoitzeko, 280 hektareatik aurrera: 62,01.

      2. 22/1973 Legeari jarraituz emandakoak.

      2.1. Lauki eta urte bakoitzeko, 10 lauki arte: 689,13.

      2.2. Lauki eta urte bakoitzeko, 10 laukitik aurrera: 172,28.

   4. A ataleko meategiak ustiatzeko baimenak.

      1. Urte bakoitzeko eta 5 hektarea arte: 3.445,65.

      2. Hektarea gehigarri eta urte bakoitzeko, 5 hektareatik aurrera: 17,22.

   5. B ataleko meategiak ustiatzeko baimenak. Babes-perimetroko:

      1. 20 hektarea arte: 3.445,65.

      2. Hektarea gehigarri eta urte bakoitzeko, 20 hektareatik aurrera eta 70 hektarea arte: 17,22.

      3. Hektarea gehigarri eta urte bakoitzeko, 70 hektareatik aurrera: 8,61.

   3. Meategiekin lotutako beste zerbitzu batzuk.

   1. Meatzaritzako ustiategietan urtebetez kontsumitu beharreko lehergaietarako baimena ematea edo obra zibileko leherketetarako ereduzko proiektua onartzea.

      1. Mila kg. lehergai arte: 28,15.

      2. Hortik gora, 1.000 kg. lehergai bakoitzeko edo zatiki bakoitzeko: 2,81.

   2. Meategietako lan-egitasmoak onartzea: aurreko 115. artikuluaren oinarrizko tarifaren % 50, urteko ustiapen-aurrekontuari aplikatuta, 345,16 euroko mugarekin.

   3. A, B, C eta D ataleko baliabideei buruz, arauek agindutako txostenak, mugaketak, zedarritzeak, ikuskapenak, eta Meatzaritzako Segurtasunaren Oinarrizko Arauei buruzko Erregimen Orokorrean ezarritakoa: aurreko 115. artikuluko 5. tarifa.

10. Aldatu egiten da testu bategin horren 163. artikulua, farmazia-arloko establezimendu eta zerbitzuei buruzko espedienteengatik ordaindu beharreko tasaren zergapeko egitateari dagokiona, eta honela idatzita geldituko da:

    Tasa honen zergapeko egitatea hainbat zerbitzu ematea da, hala Administrazioak bere kabuz ematen dituen zerbitzuak nola interesatuak eskatuta ematen direnak. Hona hemen zerbitzu horiek:

    1. Farmazia-arloko establezimenduak eta zerbitzuak sortu, abiarazi, lekuz aldatu, aldatu, eskualdatu eta ixteko izapidetze- eta baimentze-zerbitzuak ematea, artikulu hauetan aurreikusitakoak: Euskal Autonomia Erkidegoko Ordenazio Farmazeutikorako ekainaren 17ko 11/1994 Legearen 3. artikulua; Giza erabilerarako botiken banaketari buruzko urriaren 11ko 782/2013 Errege Dekretuaren 1. artikulua; eta Euskal Autonomia Erkidegoan albaitari-sendagaiak banatzen eta saltzen dituzten tokiak zabaltzeko, pentsu sendagarriak banatzeko eta ekoizteko eta albaitariek erabiliko dituzten autotxertoak egiteko, baimena ematen duena eta jarduera horiek guztiak kontrolatzen dituen uztailaren 30eko 156/2001 Dekretuaren 2. artikulua.

    2. Giza erabilerarako botiken banaketari buruzko urriaren 11ko 782/2013 Errege Dekretuaren 20. artikuluan aurreikusitako banaketa-praktika onei buruzko ziurtagiria emateko ikuskapena.

    3. Albaitaritzako medikamentuei buruzko urtarrilaren 27ko 109/1995 Errege Dekretuaren 39. artikuluan aurreikusitakoaren arabera, albaitaritzako autotxertoak egoki fabrikatzeko arauen betetze-ziurtagiria emateko ikuskapena.

11. Aldatu egiten da testu bategin horren 165. artikulua, farmazia-arloko establezimendu eta zerbitzuei buruzko espedienteengatik ordaindu beharreko tasaren sortzapenari dagokiona, eta honela idatzita geldituko da:

    Zerbitzua ematen den unean sortuko da tasa ordaintzeko betebeharra. Halere, eskabidea egiten den unean aurretiaz eskatuko da ordainketa.

12. Aldatu egiten da testu bategin horren 166. artikuluko tarifaren 4. apartatua, farmazia-arloko establezimendu eta zerbitzuei buruzko espedienteengatik ordaindu beharreko tasaren kuotari dagokiona, eta honela idatzita geldituko da:

    4. Botikak (gizakientzakoak, albaitaritzakoak), sendagaiak eta bestelako farmazia-gaiak banatzeko erakundeak.

    1. Irekitzeko edo ixteko eskaera: 355,58.

    2. Tokiz aldatzeko edo obrak egiteko eskabidea: 248,89.

    3. Izendatzeak: 56,88.

    4. Banaketa ikuskatzea eta praktika onei lotzen zaiela egiaztatzea: 454,50.

13. Testu bategin horren 166. artikuluko tarifari 8. apartatua gehitzen zaio, farmazia-arloko establezimendu eta zerbitzuei buruzko espedienteengatik ordaindu beharreko tasaren kuotari dagokiona, eta honela idatzita geldituko da:

    8. Albaitaritzan erabiltzeko autotxertoak egiten dituzten zentroak.

    1. Irekitzeko edo ixteko eskaera: 355,58.

    2. Tokiz aldatzeko edo obrak egiteko eskaera: 248,89.

    3. Fabrikazioa ikuskatzea eta ongi fabrikatzeko arauak betetzen direla egiaztatzea: 454,50.

14. Testu bategin horren 192. artikuluko e) letrari bigarren paragrafoa gehitzen zaio, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren zergapeko egitateari dagokiona, T-5 tarifarena (Kirol- eta jolas-ontzietarako zerbitzuak) hain zuzen ere, eta honela idatzita geldituko da:

    Tasa honen zergapeko egitatean sartzen da, bertako baldintzek hala eskatzen duten dartsenetan, portuko langileek emandako zerbitzua (marinel- edo zaintza-lanak eta/edo administrazioa/harrera).

15. Aldatu egiten dira testu bategin horren 193. artikuluko g) eta h) letrak, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren subjektu pasiboari dagokionak, C-1 tarifarena (Kontzesioak) eta A-1 tarifarena (Baimenak) hain zuzen ere, eta honela idatzita geldituko dira:

    g) C-1 tarifan, administrazio-kontzesioaren titularrak. Titulurik gabeko okupazioa izanez gero, okupatzailea.

    h) A-1 tarifan, administrazio-baimenaren titularrak. Titulurik gabeko okupazioa izanez gero, okupatzailea.

16. Aldatu egiten da testu bategin horren 194. artikulua, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren sortzapenari dagokiona, eta honela idatzita geldituko da:

    Noiz sortuko den tasa:

    a) T-1 tarifan, ontzia portura sartzen denean, kaian loturik geratu den edo aingura botatzeko lekua seinalatu zaion berdin diola. Tasaren likidazioa hilabeteak amaitu ondoren egin ahal izango da.

    b) T-2 tarifan, bidaiariak portutik igarotzen hasten direnean. Tasaren likidazioa hilabeteak amaitu ondoren egin ahal izango da.

    c) T-3 tarifan, salgaiak portutik igarotzen hasten direnean. Tasaren likidazioa hilabeteak amaitu ondoren egin ahal izango da.

    d) T-4 tarifan, arrantza ontziratzen, lehorreratzen edo ontziz aldatzen hasten denean. Tasaren likidazioa hilabeteak amaitu ondoren egin ahal izango da.

    e) T-5 tarifan, ontzia portuko uretan sartzen denean. Baimena duten ontziak direnean, gaitzen duen titulua ematen denean gertatuko da sortzapena. Tasaren likidazioa honela egin ahal izango da:

    Portuan pasadizoan dauden ontziei, aldez aurretik egingo zaie likidazioa, portura iristen direnean, deklaratzen dituzten egunen arabera.

    Portuan basea duten ontziei exijitu ahal izango zaie aurretik ordaintzea, ezarritako epealdien arabera, eta ordainketa banku-erakunde batean helbideratzea, Portuko Administrazioak hala eskatuz gero.

    f) T-6, T-7, T-8 eta T-9 tarifetan, dagokien zerbitzua erabiltzailearen eskueran jartzen denean edo, bestela, zerbitzua ematen hasten denean. Tasa ordaindu izanaren justifikazioa ezinbestekoa izango da zerbitzua jaso ahal izateko.

    g) C-1 tarifan, administrazio-kontzesioaren agiria ematen denean. Ordaindu beharra sortzen den unean egin ahal izango da likidazioa. Kontzesioak eta baimenak urteroko edo hortik goragoko aldietarako ematen direnean, aurretik egingo da tasaren likidazioa.

    h) A-1 tarifan, administrazio-baimenaren agiria ematen denean. Ordaindu beharra sortzen den unean egin ahal izango da likidazioa. Baimenak urteroko edo hortik goragoko aldietarako ematen direnean, aurretik egingo da tasaren likidazioa.

17. Aldatu egiten da testu bategin horren 195. artikuluko f) letra, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren zerga-oinarriari dagokiona, T-6 tarifarena (Arku-garabien zerbitzuak) hain zuzen ere, eta honela idatzita geldituko da:

    f) T-6 tarifan, ekipoa eskueran izandako epealdia eta haren jasotze-indarra edo ahalmena, baita egin beharreko maniobra mota, garabia mota eta ontziaren neurriak ere.

18. Aldatu egiten dira testu bategin horren 195. artikuluko j) eta k) letrak, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren zerga-oinarriari dagozkionak, C-1 tarifarena (Kontzesioak) eta A-1 tarifarena (Baimenak) hain zuzen ere, eta honela idatzita geldituko dira:

    j) C-1 tarifan, portuko jabari publikoan okupaturiko eremua (metro karratutan) eta okupazioaren iraupena.

    k) A-1 tarifan, portuko jabari publikoan okupaturiko eremua (metro karratutan) eta okupazioaren iraupena.

19. Aldatu egiten da testu bategin horren 196. artikuluko 1. apartatuaren 1.6 puntua, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren kuotari dagokiona, T-1 tarifarena (Itsasontziak), eta honela idatzita geldituko da:

    6. Badiako edo tokiko barne-trafikorako ontziek (bidaiari-ontziek izan ezik), basea portuetan duten atoiontziek, dragek, ur-tanga ontziek, gangilek, gabarrek eta antzekoek, pontoiek eta abarrek tarifaren % 25 ordainduko dute.

20. Aldatu egiten da testu bategin horren 196. artikuluko 2. apartatuaren 2.1 puntua, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren kuotari dagokiona, T-2 tarifarena (Bidaiariak), eta honela idatzita geldituko da:

    1. Bidaiari bakoitzeko (eurotan):

       Bidaiari-kategoriak

       (Ikus .PDF)

       Badiako edo tokian tokiko trafikoan ontziratzean bakarrik ordainduko da tarifa.

       Lagun bakarrarentzako edo birentzako geletako bidaiariei I. multzoko tarifa ezarriko zaie; II. multzokoa hiru edo gehiagorentzako geletan edo aretoko besaulkietan doazenei, eta III. multzokoa kubiertako bidaiariei.

21. Aldatu egiten da testu bategin horren 196. artikuluko 3. apartatuaren 3.6 puntua, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren kuotari dagokiona, T-3 tarifarena (Salgaiak), eta honela idatzita geldituko da:

    6. Bide laburreko itsas garraio bidez garraiatzen diren siderometalurgiako produktuei % 35eko murrizketarekin aplikatuko zaie T-3 tarifaren kuota.

       Murrizketa hori aplikatzeari dagokionez, bide laburreko itsas garraiotzat (TMCD) hartuko da salgaiak eta/edo bidaiariak batetik bestera eramateko itsasontzi bidezko itsas zerbitzua, Europako uretan soilik egiten dena, geografikoki Europan dauden portu batzuetatik besteetara edo portu horietatik Europakoak izan ez baina Europa inguratzen duten itsaso itxietan itsasertza duten herrialdeetako portuetara, tartean direla leku horietako guztietako irlak edo soberaniapeko lur ez-kontinentalak. Kontzeptu horren barruan sartuko da, era berean, Europar Batasuneko estatu kideen eta Norvegia eta Islandia arteko itsas garraioa, baita Europar Batasuneko estatu kideen eta Baltiko itsasoko, Itsaso Beltzeko eta Mediterraneo Itsasoko beste herrialde batzuen arteko itsas garraioa.

22. Aldatu egiten dira testu bategin horren 196. artikuluko 5. apartatuaren 5.1 eta 5.2 puntuak, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren kuotari dagokionak, T-5 tarifarena (Kirol- eta jolas-ontzietarako zerbitzuak) hain zuzen ere, eta honela idatzita geldituko dira:

    1. Aisialdiko azpiegitura nautiko hauek katalogatzen dira kontuan hartuz nola egiten den kirol-amarratzeen kudeaketa, T-5 tarifa aplikatzeko.

    1. taldea: Portuko zerbitzu partekatua duten aisialdiko azpiegitura nautikoak.

    2. taldea: Portuko zerbitzu esklusiboa duten aisialdiko azpiegitura nautikoak, 24 ordutik beherako txandetan, zerbitzu-orduak astean bi edo hiru lanaldi osoren parekoak direnean, goi-denboraldian salbu, orduan egunero emango baitira.

    3. taldea: Portuko zerbitzu esklusiboa duten aisialdiko azpiegitura nautikoak, egunero, 24 ordutik beherako txandetan, igande eta jaiegunetan salbu, eta goi-denboraldian salbu, egunero emango baitira.

    4. taldea: Urtean 365 egunetan eta 24 orduetan portuko zerbitzu esklusiboa duten aisialdiko azpiegitura nautikoak.

    2. Aisialdiko azpiegitura nautikoen taldearen arabera, honako hau izango da T-5 tarifaren zenbatekoa:

       1. taldea:

       (Ikus .PDF)

       2. taldea:

       (Ikus .PDF)

       3. taldea:

       (Ikus .PDF)

       4. taldea:

       (Ikus .PDF)

       4. Iragaitzaz dauden itsasontzietarako atrakalekuak:

          (Ikus .PDF)

          23. Aldatu egiten da testu bategin horren 196. artikuluko 5. apartatuaren 5.10 puntua, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren kuotari dagokiona, T-5 tarifarena (Kirol- eta jolas-ontzietarako zerbitzuak) hain zuzen ere, eta honela idatzita geldituko da:

          10. Pantalanean amarratutako ontzien jabeek eta baimenen titularrek T-5 tarifa honi buruzko aurreko zenbakietan zehazten diren arauak aplikatzetik ateratzen den zenbatekoaren % 75 ordainduko dute, baldin eta ontziaren jabe bakarrak badira, erretiro-egoeran badaude, dagokion erakunde ofizialaren ziurtagiri bidez frogatuta, eta urtero dituzten diru-sarrerak Lanbide Arteko Gutxieneko Soldata 1,5 bider baino txikiagoak direla egiaztatzen badute, Pertsona Fisikoen Errentaren gaineko Zergaren aitorpenaren azken agiriaren kopia erakutsita. Era berean, legez eskatzen den titulua aurkeztu beharko dute amarratzeko baimena eman zaion ontzian nabigatzeko.

              Salbuespen hori ez zaie aplikatuko zazpigarren zerrendan erregistraturiko ontzi bat baino gehiagoren jabeei, ez sei metrotik gorako luzerako ontzienei, ez eta, beren luzera dena dela, pantalanei lotuta dauden bestelako ontzienei ere.

24. Testu bategin horren 196. artikuluko 5. apartatuari 5.12 puntua gehitzen zaio, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren kuotari dagokiona, T-5 tarifarena (Kirol- eta jolas-ontzietarako zerbitzuak) hain zuzen ere, eta honela idatzita geldituko da:

    12. Baimenaren titularrak Portuko Administrazioari jakinarazten badio epe jakin batean ez duela okupatuko bere amarratze-lekua, Portuko Administrazioak baimena eman ahal izango du plaza hori beste batek okupa dezan aldi batez.

        Kasu horretan, amarratze-baimenaren titularrari hobari bat aplikatu ahal izango zaio hurrengo tasaren likidazioan. Hobariaren zenbatekoa izango da amarratze-lekua aldi baterako okupatzeagatik ordaindutako tasaren % 60koa.

25. Aldatu egiten da testu bategin horren 196. artikuluko 6. apartatua, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren kuotari dagokiona, T-6 tarifarena (Arku-garabien zerbitzuak) hain zuzen ere, eta honela idatzita geldituko da:

    6. T-6 arku-garabien tarifaren zenbatekoa honako hau izango da.

    Arku garabi automotorra, altxatzea eta uretaratzea, luzera-metro bakoitzeko:

    8 metro arteko ontziak: 10,27 euro.

    8 eta 12 metro bitarteko ontziak: 13,20 euro.

    12 metrotik gorako ontziak: 16,16 euro.

    Beso-garabia, altxatzea eta uretaratzea: 40,40 euro.

    Murrizketa hauek aplikatu ahal izango dira tasaren kuotaren zenbatekoan:

    1. Maniobra azkarrak, oinarritu gabe eta 30 minutu baino gutxiago erabilita, % 50eko murrizketa izango du.

    2. Altxatzea edo uretaratzea bakarrik egiten bada, % 50eko murrizketa izango da.

    3. Arku-garabi automotorraren maniobra bi hilabetetik laura bitarteko negualdirako egiten bada, % 20ko murrizketa izango da.

    4. Arku-garabi automotorraren maniobra lau hilabetetik zortzira bitarteko negualdirako egiten bada, % 40ko murrizketa izango da.

26. Aldatu egiten da testu bategin horren 196. artikuluko 9. apartatua, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren kuotari dagokiona, T-9 tarifarena (Askotariko zerbitzuak) hain zuzen ere, eta honela idatzita geldituko da:

    9. T-9 tarifaren zenbatekoa hauxe izango da (eurotan):

    1. Arranpa-karroak:

       1. Altxatzeagatik edo jaisteagatik.

       50 EGTraino. Luzera-metro bakoitzeko: 18,38.

       51 eta 150 EGT bitartekoa. Tona bakoitzeko: 2,12.

       150 EGTtik gora. Tona bakoitzeko: 1,62.

       2. Egonaldia, eguneko.

       50 EGTraino. Luzera-metro bakoitzeko: 0,54.

       51 eta 150 EGT bitartekoa. Tona bakoitzeko: 0,30.

       150 EGTtik gora. Tona bakoitzeko: 0,48.

       Seigarren eta zazpigarren zerrendetako ontziak direnean, zenbateko hauek ordainduko dituzte egunean, luzerako metro bakoitzeko, egonaldi-egunen arabera:

       0 egunetik 7 egunera arte: 0,45.

       8 egunetik 10 egunera arte: 0,70.

       11 egunetik 20 egunera arte: 1,07.

       21 egunetik 60 egunera arte: 2,41.

       61 egunetik aurrera: 2,41.

       Irailaren 1etik apirilaren 30era egiten diren egonaldietan, bi egun horiek barne, murrizketa hauek egingo dira 61. egunetik:

       61 egunetik 120 egunera arteko egonaldia: % 20.

       121 egunetik 240 egunera arteko egonaldia: % 40.

       3. Lehorreratze-arrapalak; erabiltzen diren bakoitzean: 12,00 euro.

       4. Sehaska-jokoa.

       Txikiak: 1,34 euro eguneko.

       Ertainak: 2,47 euro eguneko.

       Handiak: 3,60 euro eguneko.

    2. Aparkalekuak.

       Euskal Autonomia Erkidegoaren eskumen diren portuetan, ibilgailuen aparkamendua antolatuta eta araututa badago, zenbateko hauek ordainduko dira:

       Portuen arloko zuzendaritza eskudunak ezarritakoaren arabera, portuaren eragin-esparruan bizi direnek: 20,87 euro urtean.

       Donostiako portuan: 61,22 euro urtean.

       Mugatutako eremuak dituzten portuetan:

       • Autoek: 0,89 euro orduko.

       • Kamioiek: 1,15 euro orduko.

       • Gainerako kasuetan: 3,47 euro eguneko edo zatikiko.

         Portuko amarratzaileek lehentasunez erabiltzeko aparkalekuak dituzten kirol-portuetan, honako diru kopuru hauek ordainduko dira aparkatzeagatik:

         Donostia, Getaria, Bermeo eta Mutrikuko portuetan: 63,68 euro urtean.

         Hondarribiko eta Orioko portuetan: 89,39 euro urtean.

         Iragaitzaz dauden edo joan-etorrian dabiltzan amarratzaileen ibilgailuetarako: 5,00 euro eguneko.

         Portura sartzeko txartela egiteagatik edo, galdu edo hondatuz gero, berria egiteagatik:

         Txartel magnetikoa: 38,68 euro.

         Txartel ez-magnetikoa: 6,82 euro.

         Portuko eremuan gaizki aparkatuta dauden ibilgailuak kentzeagatik: 53,78 euro.

    3. Pisagailua, pisaldi bakoitzeko: 1,62 euro.

    4. Garbitzeko makinak.

       1. Ontzia harea-zorrotadarekin garbitzea. Eguneko edo zatikiko tasa: 74,69 euro.

       2. Presioz garbitzeko makina. Ordu erdiko edo frakzioko tasa: 7,07 euro.

       3. Makina hidrogarbitzailea. 3,03 euro 12 minutuko tarte bakoitzeko.

27. Aldatu egiten da testu bategin horren 196. artikuluko 10. apartatua, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren kuotari dagokiona, C-1 tarifarena (Kontzesioak) hain zuzen ere, eta honela idatzita geldituko da:

    10. C-1 tarifaren zenbatekoa hauxe izango da.

    1. Oro har:

       (Ikus .PDF)

       Hala eta guztiz ere, baldin eta Administrazioak lehiaketak antolatzen baditu portuko jabari publikoa okupatzeko edo modu pribatuan erabiltzeko kontzesioak esleitzeko, lehen aipaturiko zenbateko horiek baino hobeak aurkeztu ahal izango dira lizitatzaileek egindako eskaintzetan, betiere lege honen 17. artikuluan ezarritakoa kontuan hartuz eta ogasun-arloan eskumena duen sailak txostena egin ondoren Gobernu Kontseiluak onartuta.

    2. Kontzesio bidez esleitzen diren instalazioak lurpean daudenean, eta lurrazalean ibiltzeko eragozpenik ez badago, aplikatu beharreko tarifa eraiki gabeko eremuak okupatzeko tarifaren % 50ekoa izango da. Lurpeko kanalizazioetan metro lineal bakoitzeko gutxienez metro karratu bat zenbatuko da.

    3. Okupazioaren xedea merkataritza edo industriako jarduerak garatzea denean, eta ez badute zuzeneko loturarik portuko eginkizunekin, aurreko taulean aplikatu behar zaion tarifari % 50 gehituko zaio.

       Hala ere, igoera hori % 20koa izango da Hondarribiko portuan nautika- eta kirol-erabilera duten eremuetan merkataritza-erabilerako eraikitako azalerak direnean.

    4. Kontzesioaren xedea ur-eremu jakin bat erabiltzea denean, tarifa eraiki gabeko azalerari dagokiona izango da.

    5. Administrazio-kontzesioen zenbatekoak urtero berrikusiko dira, eginkizun hori duen legearen bidez egingo den portu-zerbitzuen tasen eguneratzearen arabera.

       Lehenago esleitutako kontzesioak, kontzesio-tituluan prezioak berrikusteko klausula daukatenak, aurreko paragrafoan ezarritakoaren arabera berrikusiko dira, baldin eta klausula horrek lege hau aipatzen badu edo kontsumo-prezioaren indizea ez beste adierazle bat aipatzen badu. Kontsumo-prezioen indizea aipatzen badu, indize horrek izandako gorabeheren arabera berrikusiko dira.

    6. Kontzesioaren xedea izotz-fabrikak, arrainak jaso, erakutsi, maneiatu edo saltzeko lonjak edota izozteko plantak badira, tarifaren zenbatekoa eraikitako eremuaren okupaziorako ezarritakoaren % 50 izango da.

    7. Kontzesioaren helburu den lokala ekipatuta dagoenean eta bertan gauzatuko den merkataritza- edo industria-jarduera gauzatzeko behar diren tresnak eta makinak barne hartzen dituenean, 10.1 apartatuan ezarritako kuota aplikatuko da, % 80 areagotuta.

    8. Kontzesioaren lehenbiziko urtean, honako hau izango da tasaren zenbatekoa: kontzesioak urte horretan indarrean egin duen denboraren proportziokoa izango da tasa, eta dagokion hainbanaketa aplikatuko zaio artikulu honen aurreko zenbakien arabera ateratako emaitzari. Era berean, kontzesioaren azkeneko urtean ere aplikatuko da hainbanatzeko irizpide hori.

28. Aldatu egiten da testu bategin horren 196. artikuluko 11. apartatua, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren kuotari dagokiona, A-1 tarifarena (Baimenak) hain zuzen ere, eta honela idatzita geldituko da:

    11. A-1 tarifaren zenbatekoa honako hau izango da:

    1. Azalera bat urtebetez edo epe laburrago batez okupatzeko baimena ematen denean, tarifa hauek aplikatuko dira:

       Merkataritza- edo industria-jarduera baterako denean:

       1. Portuko jarduerekin zerikusia badu: 0,224865 euro, m2-ko eta eguneko.

       2. Portuko jarduerekin zerikusirik ez badu: 0,442482 euro, m2-ko eta eguneko.

          Merkataritza- edo industria-jarduera baterako ez denean: 0,224865 euro, m2-ko eta eguneko.

          Baimendutako lursaila edo azaleraren okupazioa urtebetetik gora luzatzen bada, urtetik gora jotzen duen zatiari C-1 tarifako zenbatekoak aplikatuko zaizkio, baita horri dagozkion gainerako arauak ere.

          Portuko jabari publikoa titulurik gabe okupatuz edo erabiliz gero, aplikatu beharreko kuota baimenei dagokiena % 100ean gehituta izango da.

          Hala eta guztiz ere, baldin eta Administrazioak lehiaketak antolatzen baditu portuko jabari publikoa okupatzeko edo modu pribatuan erabiltzeko baimenak emateko, lehen aipaturiko zenbateko horiek baino hobeak aurkeztu ahal izango dira lizitatzaileek egindako eskaintzetan, betiere lege honen 17. artikuluan ezarritakoa kontuan hartuz eta ogasun-arloan eskumena duen sailak txostena egin ondoren Gobernu Kontseiluak onartuta.

    2. Baimenaren xedea kirol- eta jolas-ekitaldiak egitea denean, honako hau izango da tasaren zenbatekoa: ekitaldiak egiten diren egunean izandako benetako okupazio-orduei eta artikulu honen aurreko zenbakien arabera ateratako emaitzari proportzioan dagokiena. Ondorio horietarako, lurralde-zerbitzuko langileek emandako aktak benetan egin den okupazioaren hasiera-ordua eta amaiera-ordua zehaztuko ditu.

29. Aldatu egiten da testu bategin horren 197. artikulua, Euskal Autonomia Erkidegoaren portuetan ematen diren zerbitzu orokor eta bereziengatik ordaindu beharreko tasaren salbuespenei dagokiona, eta honela idatzita geldituko da:

    1. Baimenen titular eta ontzien jabe direnak salbuetsita egongo dira T-5 tarifatik, baldin eta ontziaren jabe bakarrak badira, erretiro-egoeran badaude, dagokion erakunde ofizialaren ziurtagiri bidez frogatuta, eta urtero dituzten diru-sarrerak Lanbide Arteko Gutxieneko Soldataren 1,5 bider baino txikiagoak direla egiaztatzen badute, Pertsona Fisikoen Errentaren gaineko Zergaren aitorpenaren azken agiriaren kopia erakutsita. Era berean, legez eskatzen den titulua aurkeztu beharko dute amarratzeko baimena eman zaion ontzian nabigatzeko.

       Salbuespen hau ez zaie aplikatuko zazpigarren zerrendan erregistraturiko ontzi baten baino gehiagoren jabe direnei, ez sei metrotik gorako luzerako ontzien jabeei, ez eta, beren luzera dena dela, pantalanei lotuta dauden beste ontzien jabeei ere.

    2. Arrantzale-kofradiek eta produktoreen organizazioek ez dute C-1 tarifa ordainduko, baldin eta portu-jabari publikoko lursailak okupatzeko baimena eskatzen badute eta lursail horietan izotz-fabrikak, arrainak jaso, erakutsi, maneiatu eta/edo saltzeko lonjak, arraina izozteko edo biltegiratzeko plantak edo lanabesak gorde eta konpontzeko sotoak eraiki eta ustiatu nahi badituzte.

       Toki-administrazioko korporazioek ere ez dituzte C-1 eta A-1 tasak ordaindu behar ematen zaizkien kontzesio eta baimenengatik, baldin eta, horien ustiaketatik, ez korporazioek ez bestek irabazirik ateratzen ez badute.

    3. Onura publikokotzat deklaratutako irabazi-asmorik gabeko erakundeek ez dituzte tasak ordaindu beharko, baldin eta ematen zaizkien baimenetan portu-jabari publikoaren okupazioak erabilera ekonomikorik ez badakar.

    Bigarrena. Etxebizitzari buruzko ekainaren 18ko 3/2015 Legea aldatzea.

    Aldatu egiten da Etxebizitzari buruzko ekainaren 18ko 3/2015 Legearen 18. artikuluko 3. apartatua, eta honela idatzita geldituko da:

    3. Kasu guztietan, Gobernu Kontseiluaren baimena beharko da aurretik. Hala ere, 1. apartatuaren e) letraren kasuan, baimen hori beharrezkoa izango da soilik Euskadiren ondareari buruzko legeriak agintzen duenean.

    Hirugarrena. Euskadiko Ogasun Nagusiaren Antolarauei buruzko Legearen testu bategina aldatzea, testu hori azaroaren 11ko 1/1997 Legegintzako Dekretuaren bidez onartu zen.

    Aldatu egiten da testu bategin horren 21. artikulua, eta honela idatzita geldituko da:

    Sozietate publikoak merkataritza-legeen arabera eratuko dira, sortzeaz batera fundatutako sozietate anonimo gisa ahal dela, eta unean-unean sozietate mota bakoitzerako indarrean dagoen araubide juridikoa aplikatuko zaie.

    Laugarrena. Garapena eta gauzatzea.

1. Baimena ematen zaio Jaurlaritzari lege hau garatzeko behar diren xedapenak, Ogasun eta Ekonomiako sailburuak proposatuta, emateko.

2. Organismo autonomoen, zuzenbide pribatuko erakunde publikoen, sozietate publikoen eremuan, bai eta Euskal Autonomia Erkidegoko sektore publikoko fundazio eta partzuergo publikoen eremuan ere, bakoitzaren gobernu-organoaren eginkizuna izango da lege honen 19. artikuluan eta hurrengoetan eta lege hau garatzeko egiten den araudian jasotzen diren neurriak aplikatzea.

3. Jaurlaritzari baimena ematen zaio, sei hilabete baino gutxiagoko epean lege hau indarrean sartzen denetik, Euskal Autonomia Erkidegoko Ekonomia Kontrolari eta Kontabilitateari buruzko ekainaren 30eko 14/1994 Legea testu bakar batean batzeko, bai eta ondorengo beste lege batzuek eragin dizkioten aldaketak batzeko ere. Jaurlaritzari buruzko ekainaren 30eko 7/1981 Legearen 52.4 artikuluarekin bat, baimen horrek bere baitan hartzen du bategin behar diren legezko testuak arautu, argitu eta bateratzeko baimena, bai eta beharrezko diren terminologia-egokitzapenak egitekoa ere.

   Bosgarrena. Indarrean jartzea.

   Lege hau Euskal Herriko Agintaritzaren Aldizkarian argitaratzen den egunaren biharamunean sartuko da indarrean.