Zertan datza?

Zer balio eta motibaziotatik eusten diete belaunaldi berriek euskararen erabilera sustatzen jarraitzeko ekimenei? Nola egokitu dira enpresak egungo euskararekiko motibazio eta diskurtso berrietara? Azterlan honen xedea galdera horiei erantzuten laguntzeko gakoak aztertzea izan da.

Elhuyar Aholkularitzaren laguntzaz bideratu den proiektu honetan (PDF, 7 MB) lan-munduan euskara txertatzeko eta garatzeko izan ziren eta gaur egun dauden diskurtsoak eta balioak identifikatu dira. Horretarako, azken 15-20 urteotan euskara-planak martxan dituzten EAEko lau enpresa aztertu eta horietako kideak elkarrizketatu ditugu.

Helburuak

• Martxan jarri zirenetik gaur arte euskara-planak garatu dituzten enpresetan, etnografia ikuspegitik, giltzarri izan diren motibazioen eta baliatu dituzten narratiba eta diskurtso berriak jasotzea.
• Hasierako eta egungo belaunaldien artean zer eratako transmisioa eman den aztertzea.
• Aurrera begira, lan-munduan euskararen normalizazioan giltzarri izango diren elementu diskurtsiboak identifikatzea.

Parte hartu duten enpresak

Ikerlan honetan lau enpresa hauek hartu dute parte: CAF, EKIN, MAIER eta ORKLI.

Egitasmo honen bidez, sektore sozioekonomikoan, eta enpresetan bereziki, euskara lan-munduan txertatzeko egin den ahalegina, egon diren balioak eta horien transmisioa nola egin den aztertu da. Halaber, egungo motibazio eta balioekin bat egingo duten diskurtso eguneratuak identifikatu dira, etorkizunean enpresek egiten duten hizkuntzen kudeaketaren barruan euskararen tokia zehazteko asmoz.