Mugikortasunaren Foroak garraio elektrikoa aztertuko du Kursaal jauregian urtarrilaren 29an
2015.eko abenduak 23
- Eusko Jaurlaritzako Ingurumen eta Lurralde Politika Sailak antolatuko du
- Marko Boronat: «Donostiako eta Tolosako kasuak azalduko dituzte»
Vitoria-Gasteiz, 2015/12/23
Eusko Jaurlaritzaren Ingurumen eta Lurralde Politika Sailak Mugikortasunaren Foroaren hirugarren edizioa egingo du urtarrilaren 29an, ostirala, Donostiako Kursaal jauregian, garraioaren eta hirigintzaren arloetako adituek hainbat hiritako ibilgailu elektrikoen bidezko mugikortasun-esperientziak aztertzeko.
Eusko Jaurlaritzako Garraio Plangintzaren zuzendari Marko Boronatek adierazi du jardunaldian Tolosako eta Donostiako esperientziak aztertuko dituztela. «Bi hilean behin egiten diren bilera hauetan, mugikortasunarekin lotutako gaiak jorratzen dituzte bi orduz. Donostiako saioan lehen mailako enpresek hartuko dute parte, CAFek, Irizarrek eta Oronak, eta mugikortasun elektrikoaren gaineko esperientzien eta produktuen berri emango dute», esan du.
«Saio hau, gainera, eragile profesionalei eta adituei ez ezik, herritarrei ere ireki zaie», gehitu du. Donostiako Udaleko ordezkaria Pilar Arana zinegotzia izango da.
Azaroan Gasteizen egin zuten Mugikortasunaren Foroan webguneek mugikortasunari ematen dioten balioa eta sektore turistiko zein kulturalarekin duten harremana landu zituzten. Garraioaren, kulturaren eta turismoaren kudeaketako sektoreko ehun profesional inguruk hartu zuten parte.
Horren aurretik, irailean, Mugikortasun Jasangarriaren Europako Astearekin bat etorriz, Mugikortasunaren Foroaren lehen edizioa egin zuten. Horretan, Euskadiko udaletako, Foru Aldundietako, Eusko Jaurlaritzako, klusterretako eta garraio publiko eta pribatuko enpresetako ordezkariek eta agintariek mugikortasunarekin lotutako jarduerak eta ideiak landu zituzten.
«Foroaren helburua Euskadiko herrien eta hirien mugikortasuna hobetzea da, ezagutza partekatuz eta balizko neurriak adostuz», adierazi du Marko Boronat Eusko Jaurlaritzako Garraioen zuzendariak.
