- Garapenerako lankidetzako proiektuetarako laguntzek sei milioi euro gehiago izango dituzte iazkoarekin alderatuta
eLankidetza-Lankidetzarako eta Elkartasunerako Euskal Agentziak, Berdintasun, Justizia eta Gizarte Politiketako saila, garapenerako lankidetzako proiektuetarako dirulaguntzen deialdia argitaratu du. Guztira, 40 milioi euro bideratuko ditu, aurreko urtean baino sei milioi gehiago. Dirulaguntzek lagunduko dute desberdintasunei aurre egiten eta herrialde pobretuetako biztanleen bizi baldintzak hobetuko dituzten ekimen solidarioak sustatzen.
Deialdia Euskadin egoitza duten GGKEei zuzenduta dago, eta hiru modalitatetan banatzen da: garapenerako lankidetzako proiektuak; garapen produktiboko, prestakuntzako eta laguntza teknologikoko proiektuak, eta gizartea eraldatzeko hezkuntza proiektuak.
eLankidetzak funtsen %20 Saharaz hegoaldeko Afrikan gauzatutako proiektuetarako gordeko ditu eta %10 emakumeen ahalduntzerako ekimenetarako. GGKEek hilabeteko epea izango dute proiektuak aurkezteko bihartik aurrera.
Lankidetzarako hiru lan-ildo
Garapenerako lankidetzako proiektuetarako lan-ildorako 31,7 milioi euro bideratuko dira guztira. Proiektuek balioko dute pobreziaren eta desberdintasunen aurka borrokatzeko eta Hegoko herrialdeetan ahalduntze prozesuak indartzeko.
2023an, eLankidetzak 27,6 milioi euro bideratu zituen 23 herrialdetako tokiko erakundeekin lan egiten duten Euskadiko GGKEen 53 proiektuetara. Horien artean, nagusiak honako hauek izan ziren: emakumeen ahalduntzerako eta horiek jasaten dituzten indarkeria anitzen aurkako borrokarako; pertsonen eta komunitateen eta lurraldeen giza eskubideen babeserako, bereziki, jatorrizko herrienak, edo juntu eta produkzio jasangarria garatzeko Peru, Kolonbia, El Salvador, Guatemala, India, Senegal edo Mali bezalako herrialdeetan.
Garapen produktiboko, prestakuntzako eta laguntza teknologikoko proiektuei dagokionez, 1,6 milioi euro bideratuko dira. Iaz, 1,2 milioi euro jaso zuten lau proiektuk Kuban eta Kolonbian gauzatzeko.
Azkenik, aurten gizarte-eraldaketarako hezkuntzako proiektuetarako aurrekontua handitu da. Laguntzek 6,7 milioi euroko aurrekontua izango dute, iaz 5,2 milioi euroen aldean. Ekimen horiek Euskadin egingo dira, eta euskal herritarren elkartasuna bultzatzeko eta baita Hegoko errealitateak Euskadikoekin konektatzeko balioko dute.
2023an, eLankidetzak 20 proiektu onartu zituen. Laguntzei esker, GGKEek hainbat gai jorratzen ari dira herritarren artean, hala nola kontsumo arduratsua, feminismoak, sexu eta genero aniztasuna edo giza eskubideak.
eLankidetzako bestelako laguntzak
Lankidetzako proiektuetarako laguntzetarako deialdiaz gain, 2024an, eLankidetzak beste 14 milioi euro bideratuko ditu beste 7 lan-ildoetara. Horien artean, berriki argitaratu den ekintza humanitarioko bi deialdiak daude. 10,4 milioi euro gatazka eta beste indarkeria-egoera batzuen ondorioz krisian dauden biztanleei laguntzekoi izango dira, eta 500.000 euro, berriz, nazioarteko larrialdiei erantzuteko deiei; tartean, Gazakoari.
Era berean, laguntzak bideratuko dira Iparreko eta Hegoko erakundeen arteko lankidetza sustatzeko ekimenak identifikatzeko; euskal GGKEetan genero-berdintasuna bultzatzeko; eLankidetzaren egoitzan lankidetzan espezializatzeko bekei edo Ignacio Ellacuria Sariari.
