1. Euskal Zibersegurtasun Agentzia sortu da. Euskal Autonomia Erkidegoko sektore publikoko zuzenbide pribatuko ente publikoa da, nortasun juridiko propioa duena eta bere jarduera ordenamendu juridiko pribatura egokitzen duena. Bere helburuak lortzeko jardute-gaitasun osoa du, autonomia organiko eta funtzionala du, eta segurtasunaren arloan eskumena duen sailera atxikita dago Segurtasun Sailordetzako titularraren bidez.

2. Agentziak Vitoria-Gasteizen izango du egoitza. Bere eginkizunak betetzeko, Agentziak ordezkaritzen laguntza izan dezake Euskal Autonomia Erkidegoko lurralde historiko bakoitzean.

3. Lege honek, zuzenbide pribatuko ente publikoei aplika dakizkiekeen lege-xedapenek eta bere estatutuek arautzen dute Agentzia. Estatutu horiek Eusko Jaurlaritzaren dekretu bidez onartuko dira, segurtasunaren arloan eskumenak dituen Eusko Jaurlaritzako sailak proposatuta.

4. Agentziaren jarduera aplikatu beharreko zuzenbide zibileko, merkataritza-zuzenbideko eta lan-zuzenbideko arauetara egokitzen da kanpo-harremanetan, ahal publikoak baliatzea dakarten egintzetan izan ezik, egintza horiek administrazio-zuzenbidearen mende baitaude. Agentziak, atxikita dagoen sailarekiko harremanetan, administrazio-zuzenbidea bete beharko du. Hala egin beharko du, zehazki, kontua denean 2.2 artikuluko d), e), f), g), h), j), o), p), q), r), s) eta u) letretan agindu zaizkion eginkizunak betetzea euskal sektore publikoari dagokionez.

5. Euskal Zibersegurtasun Agentziaren ordezkaritza eta defentsa epaiketetan, Eusko Jaurlaritzaren Zerbitzu Juridikoaren esku egongo da, azken horren arau erregulatzaileetan xedatutakoaren arabera.

1. Agentziaren xedea da zibersegurtasuna sustatzea eta koordinatzea Euskal Sektore Publikoaren maiatzaren 12ko 3/2022 Legeak mugatutako euskal sektore publikoan, sektore horren eskumeneko informazio-sistemen segurtasunaren eta sare elektronikoen segurtasunaren esparruan; eta Euskal Autonomia Erkidegoa, bertako Administrazio publikoa, herritarrak eta enpresa-sarea zibersegurtasunean eta garapen digital seguruan treba daitezen babestea eta bultzatzea.

2. Xede hori betetzeko, Agentziari eginkizun hauek dagozkio:

   1. Euskal Autonomia Erkidegoko administrazio publiko guztientzat zibersegurtasun-estrategia bat sustatzea, eta administrazio horiek zibersegurtasunarekin lerroka daitezen bultzatzea eta koordinatzea.

   2. Euskal sektore publikoarentzat gomendagarriak diren segurtasun-estandar, -gidalerro eta -arau teknikoen esparrua bultzatzea.

   3. Euskal Autonomia Erkidegoko Administrazioak zibersegurtasunaren arloan izapidetutako arau-xedapenak egiteko prozeduretan nahitaezko txostenak egitea.

   4. Euskal Autonomia Erkidegoko sektore publikoaren esparruan hedatutako zibersegurtasun-gaietako politika publikoen urteko ebaluazioak egitea.

   5. Euskal Autonomia Erkidegoan zibersegurtasun-gertakariei aurrea hartzea, antzematea eta haiei erantzutea. Horretarako, irizpideak finkatuko dira, eta babes-neurri egokiak sustatuko dira zibermehatxuei eta berezko arriskuei aurre egiteko azpiegitura teknologikoetan, informazio-sistemetan, informazioaren eta komunikazioaren teknologien zerbitzuetan eta horiek tratatzen duten informazioaren eremuan. Hori guztia, aplikatu beharreko eskumen-esparrua errespetatuta.

   6. Euskal Autonomia Erkidegoko zerbitzu publikoak edo funtsezkoak kudeatzen dituzten entitateei buruzko datu egokiak biltzea informazioaren segurtasun-egoerari dagokionez, arreta berezia jarrita zerbitzu publikoen funtzionamendurako edo pertsonen segurtasunerako kritikoak diren sistemetan, Eusko Jaurlaritzari eta zerbitzu kritiko eta funtsezko horiek ematen esku hartzen duten lurraldeko administrazio publikoei haren berri emateko, eta neurri egokiak proposatzeko zibersegurtasunaren inguruko arriskuen kudeaketa eginez.

   7. Larrialdiei erantzuteko taldearen (CERT) eginkizunak betetzea Euskal Autonomia Erkidegoaren eskumenen barruan. Mugaz gaindiko fenomeno bat denez, beste lurraldeetako administrazio eta agentziekin elkarlana beharrezkoa da zibereraso bat gertatuz gero kalteak eta berreskuratze-denbora minimizatzeko.

   8. Bere jardun-eremuan diharduten zibersegurtasuneko intzidentziei erantzuteko taldeak (CSIRT) eta larrialdiei erantzuteko taldeak edo entitate baliokideak koordinatzea, indarrean dagoen legeriarekin bat etorriz, eta Estatuko eta nazioarteko beste CSIRT batzuekin lankidetzan aritzeko ereduak ezarriz. Era berean, Agentziak alerta goiztiarreko eginkizunak eta segurtasun-mehatxuei, -ahultasunei, -erasoei eta -intzidentziei erantzuteko laguntza-eginkizunak beteko ditu euskal sektore publikoaren esparruan.

   9. Unibertsitateekin eta ikerketa-organismoekin lankidetza estuagoaren alde lan egitea planteamendu estrategiko bat egiten laguntze aldera, zeinaren helburua izango baita Europar Batasunetik kanpoko zibersegurtasun-produktuen eta -zerbitzuen mendekotasuna murriztea eta Europar Batasunaren barruko hornidurarako kateak indartzea.

   10. Azpiegitura teknologikoen, informazio-sistemen eta informazioaren teknologien zerbitzuen gaineko ziberintzidenteak eta zibererasoak teknologikoki ikertzea eta aztertzea.

   11. Baliabide elektronikoen erabileran zibersegurtasun-maila egokia bermatzea.

   12. Zibersegurtasunaren arloko hedapen, sustapen, prestakuntza eta kontzientziazioko jarduerak antolatzea.

   13. Zibersegurtasunaren arloko talentua sustatzeko jarduerak antolatu eta zibersegurtasuneko jardueretan parte hartzea, erreferenteak ezagutaraziaz, bereziki nabarmenduz zibersegurtasunaren arloko emakume profesionalak.

   14. Zibersegurtasuneko neurri teknikoak proposatzea dauden baliabide informatikoak eta komunikazioak erabiltzerakoan, eta neurri horiei buruzko prestakuntza proposatzea Euskal Autonomia Erkidegoko Administrazioko langileei eta Agentziako langileei.

   16. Laguntza ematea, zibersegurtasunaren arloan, eskumena duen edozein agintariri, bere eginkizun publikoak betetzeko eta, batez ere, legez kanpoko jokabideen aurkako borrokan, barne hartuta zuzeneko esku-hartzea eta proba elektronikoak lortzea.

   17. Euskal Autonomia Erkidegoko sektore publikoa koordinatzea dagozkion zibersegurtasun-planak egiteko, baita plan horietan ezarritako helburuak lortzeko ere.

   18. Bere zibersegurtasuneko zerbitzu materialak eta teknikoak euskal sektore publikoaren esku jartzea.

   19. Euskal sektore publikoaren koordinazioa bultzatzea zibersegurtasun-planetan zehaztutako helburuak lortzeko beharrezkotzat jotzen den guztian. Horretarako, beharrezkotzat jotzen diren lankidetza-ildoak ezarriko dira.

   20. Euskal sektore publikoaren ordezkari ofiziala izatea zibersegurtasunaren arloko nazioarteko, Estatuko eta eskualdeko organismoetan.

   21. Zibersegurtasunaren eta garapen digital seguruaren arloko trebakuntza laguntzea eta bultzatzea Euskal Autonomia Erkidegoko enpresen esparruan eta funtsezko sektoreetan, hala nola osasuna, larrialdiak eta segurtasuna, gizarte-zerbitzuak eta esku-hartze soziala, hezkuntza, garraioa, energia eta telekomunikazioak, edota sentikortzat jo daitekeen beste edozein sektoretan.

   22. Indarrean dagoen legeriak ematen dion edo espresuki eskuordetzen edo esleitzen zaion beste edozein eskumen.

3. Bere xedea lortzeko, enpresa-sareari dagokionez, ekonomia sustapeneko eskumena duen Eusko Jaurlaritzako sailarekin koordinatuta beteko ditu bere eginkizunak Agentziak, eta beharrezkoa den lankidetza ezarriko du Euskal Autonomia Erkidegoan diharduten edo azpiegitura duten informazioaren gizartearen eta komunikazio elektronikoetako zerbitzu-emaileekin, baita funtsezko sektoreekin ere.

4. Agentziak organismo judizial eta polizialekin lankidetzan jardungo du, indarrean dagoen araudian ezarritakoaren arabera. Bere eginkizunak betetzerakoan, Agentziak polizia eta segurtasun publikoko kidegoekin koordinatu behar du, hargatik eragotzi gabe arlo horretan eskumena duen sailaren berezko eginkizunak. Bereziki, laguntza eman eta koordinazioa erraztu behar du Agentziak baldin eta hala eskatzen badiote polizia-kidegoek poliziaren informazio-sistemen zibersegurtasunerako eta babeserako, kidego horiek arlo horretan aitortuta dituzten eskumenen arabera.

5. Agentziak lankidetza-ildoak ezarri behar ditu zibersegurtasunaren arloan Euskal Autonomia Erkidegoko foru-aldundiekin eta toki-erakundeekin.

Administrazio Kontseilua eta Zuzendaritza Nagusia dira Agentziaren gobernu-organoak.

Administrazio Kontseilua Agentziaren kide anitzeko gobernu-organo gorena da, eta hamasei kide hauez osatuta egongo da:

1. Lehendakaria. Kargu hori segurtasunaren arloan eskumena duen sailburuak beteko du eta kalitateko botoa izango du.

2. Lehendakariordea. Kargu hori ekonomia-garapenaren arloan eskumena duen sailburuak beteko du.

3. Segurtasunaren, gobernantza publikoaren eta ekonomia-garapenaren arloan eskumena duten sailetako kide bana. Kide horiek sail horietako sailburuorde kargua izan beharko dute.

4. Foru-aldundi bakoitzeko kide bat. Aldundi bakoitzean, legez horretarako eskumena duen organoak izendatuko du, askatasunez.

5. Euskal Autonomia Erkidegoko hiru lurralde historikoetako hiriburuetako udal bakoitzeko kide bat. Udal bakoitzean, legez horretarako eskumena duen organoak izendatuko du, askatasunez.

6. Kide bat, Eudel Euskadiko Udalen Elkartearen ordezkari gisa, elkarteak berak izendatuta.

7. Kide bat, Eusko Jaurlaritzaren Informatika Elkarteko (EJIE) gerentziaren titularra dena.

8. Kide bat, Agentziaren zuzendari nagusia dena.

9. Kide bat, Eusko Jaurlaritzan informazioaren eta komunikazioaren teknologien arloko eskumena duen zuzendaria dena.

10. Idazkari bat. Hitza izango du, baina botorik ez, eta Agentziaren Administrazio Kontseiluak izendatuko du.

Hauek dira Administrazio Kontseiluari dagozkion eginkizunak:

1. Agentziaren jardueren plan orokorrak onartzea.

2. Agentziaren urteko aurrekontuaren aurreproiektua onartzea.

3. Agentziaren jardueren urteko memoria onartzea.

4. Aplikatzekoak diren legezko baldintzen arabera, Agentziaren plantillen eta langileen ordainsari-araubidearen proposamena egitea. Proposamen hori, betiere, Eusko Jaurlaritzak onartu beharko du.

5. Agentziaren estatutuak eta haren antolaketari eta funtzionamenduari buruzko gainerako arauak onartzeko eta aldatzeko proposamena egitea, Eusko Jaurlaritzari helarazteko.

6. Eusko Jaurlaritzaren onespena eskatzen duten beste erabaki-proposamen batzuk hari helarazteko proposatzea.

7. Agentziaren jardunaren jarraipena, gainbegiratzea eta ebaluazioa egitea, eta, bereziki, Agentziako Zuzendaritzaren kudeaketa kontrolatzea eta zuzendaritzari dagozkion erantzukizunak eskatzea.

8. Beste entitate edo pertsonifikazio juridiko batzuetan parte hartzeko baimena ematea, aplikatu beharreko araudia betez, kasuan kasu Euskal Zibersegurtasun Agentziari dagozkion eskubideak haietan egikaritzeko.

9. Bidezko diren hitzarmen, akordio, protokolo edo ekintzak onartzea.

10. Agentziaren jardueraren berri ematea Eusko Jaurlaritzari, aldian-aldian.

11. Legeek edo Agentziaren estatutuek ematen dizkioten gainerako eginkizunak betetzea, bai eta, Agentziarenak izan arren, Agentziaren beste organo bati esleitu ez zaizkion gainerakoak ere.

1. Agentziako Zuzendaritza Nagusia Eusko Jaurlaritzak izendatuko du bere kasa, Administrazio Kontseiluko Lehendakaritzak proposamena eginda.

2. Agentziaren Zuzendaritza Nagusia pertsona bakarrekoa izango da. Izendatutako pertsonak Eusko Jaurlaritzako sailburuorde kargua izan beharko du.

3. Zuzendariaren eginkizunak honako hauek dira:

   1. Agentziaren eta haren langileen zuzendaritza arrunta.

   2. Administrazio Kontseiluaren erabakiak proposatzea eta egikaritzea.

   3. Agentziaren ordezkaritza arrunta.

   4. Bidezko diren hitzarmen, akordio, protokolo edo ekintzak formalizatzea Agentziaren izenean.

   5. Kontratazioak egitea Agentziaren izenean, bai eta gastuak xedatzea eta ordainketak agintzea ere, indarrean dagoen legerian ezarritakoaren arabera.

   6. Administrazio Kontseiluari aurkeztea Agentziaren jarduera-plangintzaren nondik norako nagusiak, plan zuzentzailearen eta urteroko planen nondik norako nagusiak, emaitzak ebaluatzeko proposamena, eta urteroko ebaluaketa-agiria, Euskal Sektore Publikoaren maiatzaren 12ko 3/2022 Legeko 52. artikuluan arautua.

   7. Administrazio Kontseiluari honakoak proposatzea: Agentziaren urteko aurrekontuaren aurreproiektua, plantillak eta haien ordainsari-araubidea, bai eta urteko memoria ere.

   8. Agentziako Administrazio Kontseiluak edo estatutuek agintzen dioten beste edozein eginkizun.

1. Agentziak Aholku Kontseilua izango du. Agentziaren zuzendaria izango da Kontseilu horren buru eta kide hauez osatua egongo da:

   1. Hezkuntza eta osasun arloko eskumenak dituzten sailetako ordezkari bana, sailetako titularrek izendatuak.

   2. Unibertsitatearen edo ebaluazioaren esparruan zibersegurtasun-gaietan prestigio aitortua duen aditu bat, Euskal Autonomia Erkidegoan egoitza duten unibertsitateek izendatua txandaka.

   3. Teknologiaren esparruan prestigio aitortua duen aditu bat, BRTA Teknologia Zentroen Aliantzak izendatua txandaka.

   4. Euskal Autonomia Erkidegoko zibersegurtasun-enpresak biltzen dituen Cybasque enpresa-elkartearen ordezkari bat, Cybasquek izendatua.

   5. Datuak Babesteko Euskal Agintaritzako zuzendari nagusia.

   6. Informatika-delituetan eskumena duen Ertzaintzaren dibisioko burua.

   7. Ziurtapen eta Zerbitzu Enpresa, Izenpe SAren Administrazio Kontseiluko lehendakaria.

   8. SPRI-Enpresen Garapenerako Euskal Agentziaren zuzendari nagusia.

   9. Zibersegurtasunaren esparruan nazioartean proiekzioa eta prestigio aitortua duten bi pertsonalitate, Administrazio Kontseiluko lehendakariak proposatuta.

2. Aholku Kontseiluaren eginkizunak dira:

   1. Agentziaren gobernu-organoei aholkularitza ematea.

   2. Agentziaren gobernu-organoek eskatzen dizkioten gai guztiei buruzko txostenak egitea eta Agentziaren eskumeneko materiekin zerikusia duten gaiei buruzko proposamenak egitea.

3. Aholku Kontseiluak berak onartuko ditu bere antolaketako eta funtzionamenduko arauak. Arau horietan lehendakari-kargua eta idazkari-kargua xedatuko dira, eta haiek hautatu edo izendatzeko sistema ere bai.

4. Ahal dela, Aholku Kontseiluaren osaera orekatua izango da emakumeen eta gizonen artean, eta trebakuntza, gaitasun eta prestakuntza egokia izango dute. Ondorio horietarako, ordezkaritza orekatutzat joko da sexu biek gutxienez % 40ko ordezkaritza dutenean.

5. Aholku Kontseiluaren kide hautetsiak izendatzerakoan, kontuan hartuko da Euskal Autonomia Erkidegoko bi hizkuntza ofizialetan behar besteko hizkuntza-gaitasuna izatea.

Agentziaren Zuzendaritzak eta Administrazio Kontseiluak beren eginkizun publikoak betetzeko emandako ebazpenen aurka, administrazioarekiko auzi-errekurtsoa jarri ahal izango da. Aldez aurretik, berraztertze-errekurtsoa jarri ahal izango da, nahi izanez gero.

Agentziaren estatutuak Eusko Jaurlaritzak onartu behar ditu, dekretu bidez. Estatutuetan zehaztuko eta arautuko dira gobernu-organoen eginkizunak, Administrazio Kontseiluaren funtzionamendua, Agentziaren barruko egitura organikoa eta funtzionamendu-erregimena, bai eta Euskal Sektore Publikoaren maiatzaren 12ko 3/2022 Legeko 44.3 artikuluan jorratzen diren gainerako edukiak ere.

1. Agentziak bere langileak bere kabuz kontratatzeko, kudeatzeko eta prestatzeko ardura dauka.

2. Hauek dira Agentziako langileak:

   1. Agentziako bertako langileak, lan-zuzenbidearen arabera kontratatutakoak, berdintasun-, merezimendu- eta gaitasun-printzipioak errespetatuz.

   2. Euskal Autonomia Erkidegoko Administrazio publikoko langileak. Ahal publikoak erabiltzea dakarten lanpostuak funtzionarioentzat gorderik egongo dira, eta langile horiei Euskal Autonomia Erkidegoko Administrazioaren funtzio publikoa arautzen duen araudia aplikatuko zaie.

1. Agentziak finantza-autonomia du, Euskal Autonomia Erkidegoko Administrazioaren finantzei buruzko araudiak ezarritakoa.

2. Agentziak aurrekontuaren aurreproiektua egin eta onartu beharko du urtero. Horren ondoren, Eusko Jaurlaritzara bidali beharko du, Euskal Autonomia Erkidegoko aurrekontu orokorretan sar dezan, haiek onetsi aurretik, behar bezain ondo bereizita, bere aurrekontu-araubideak ezarritakoarekin bat etorrita.

3. Agentziari titular gisa dagozkion ondasun eta eskubideen multzoak osatzen du Euskal Zibersegurtasun Agentziaren ondarea, Euskal Autonomia Erkidegoko ondarean sartua, Euskadiko Ondareari buruzko Legearen testu bategina onartzeko azaroaren 6ko 2/2007 Legegintzako Dekretuak ezarritakoarekin bat etorriz.

   Euskal Zibersegurtasun Agentzia zuzenbide pribatuko ente publikoari dagozkio bere titulartasuneko ondasun eta eskubideen gaineko ahalak, bai eta atxikita dituen haien gainekoak ere, Euskadiko Ondareari buruzko Legearen testu bateginean ezarritakoarekin bat etorriz.

   Atxikita dituen ondasun eta eskubideen gainean jarraipena egingo da, ondare-kontabilitatearen bitartez. Era berean, ente publikoak Euskadiko Ondareko Ondasunen eta Eskubideen Inbentario Orokorra egiteak eskatzen duen laguntza emango du.

4. Hauek dira Agentziaren baliabideak:

   1. Bere ondareko eta atxikita dituen ondasunetako produktuak eta errentak, edo esleipenaren ondorioz administratu eta ustiatu behar dituen haienak.

   2. Euskal Autonomia Erkidegoaren aurrekontu orokorretan urtero esleitzen zaizkion diru-izendapenak eta transferentziak.

   3. Indarren dagoen legerian xedatutakoarekin bat etorriz jasotzea egokituko litzaizkiokeen diru-sarrerak eta beraren jardueren ondorioz sortzen direnak.

   4. Legeen arabera dohaintza edo oinordetza-titulu bidez jaso ditzakeen dirulaguntzak, ekarpenak eta baliabide ekonomikoak.

   5. Lege- edo erregelamendu-xedapenen arabera dagokion beste edozein baliabide.

5. Kontrol ekonomikoa, ekonomia-, finantza- eta kudeaketa-kontrol etengabearen modalitatean egingo da, Euskal Autonomia Erkidegoko Ekonomia Kontrolari eta Kontabilitateari buruzko Legearen testu bategina onartzen duen urriaren 19ko 2/2017 Legegintzako Dekretuan ezarritakoaren arabera, hargatik eragotzi gabe Herri Kontuen Euskal Epaitegiari dagokiona.

6. Agentziak jardueren memoria onartuko du urtero. Memoria hori, Eusko Jaurlaritzari eta Legebiltzarrari helarazi beharko die, eta Agentziaren zuzendariak segurtasun arloan eskumena duen Eusko Legebiltzarreko batzordeari aurkeztu beharko dio.

1. Agentziaren kontratazioa kontratazio publikoaren arloko legeriak eta hura garatzeko araudiak arautzen dute.

2. Zuzendaritza Nagusia da Agentziaren kontratazio-organoa.

1. Aplika daitekeen legedian ezarrita dauden prozedura eta baldintzak betez egingo da Agentziaren azkentzea eta kitapena.

2. Agentziaren azkentze edo desegite kasuan, Euskal Autonomia Erkidegoko aurrekontu orokorren legean ezarritako baldintzetan integratuko dira langileak.