1. – Dekretu honen helburua babesgabetasun-egoeran dauden haur eta nerabeentzako egoitza-harrerako baliabideek izan behar dituzten baldintza tekniko-materialak, funtzionalak eta langile-arlokoak arautzea da.

2. – Dekretu honetako xedapenak Euskal Autonomia Erkidegoan dauden egoitza-harrerako babes-baliabide espezifiko guztiei (publikoak, pribatuak, hitzartuak edo adostuak) aplikatuko zaizkie.

3. – Dekretu honen aplikazio-eremutik kanpo egongo da erantzukizun penalaren eremuan ezarritako neurri judizialei lotuta dauden adingabeen zaintza, baldin eta neurri horiek barneratzeak badira, betiere abenduaren 4ko 8/2006 Lege Organikoak aldatzen duen urtarrilaren 12ko 5/2000 Lege Organikoaren -adingabeen erantzukizun penala arautzen du- 7. artikuluaren 1.a), b), c) eta d) idatz-zatietan aurreikusitako baldintzen arabera eta artikulu horretako 1.j) idatz-zatian aurreikusitakoaren arabera; honako azken kasu honetan izan ezik, hots, adingabeen epaileak emandako zigor-epaiaren aurretik adingabea babes-eremuko hezkuntza-talde batekin bizi bazen. Honako hau ez dago Dekretu honen aplikazio-eremutik kanpo: adierazitako Lege Organikoaren 7. artikuluaren 1. i) idatz-zatian aurreikusitakoaren arabera, beren familiako kideren batengana edo batzuengana hurbiltzeko edo kideren batekin edo batzuekin hitz egiteko debeku-neurriren baten xede diren eta neurri hori dela medio beren gurasoekin, tutoreekin edo zaintzaileekin bizi ezin diren adingabeei egoitza-zaintza ematea, betiere babes-alorrean eskumena duen erakundearen iritziz egoitza-harrera hori zirkunstantzietara egokitzen den neurria bada.

4. – Egoitza-harrera bateragarria izango da zaintzeko formula osagarriak aplikatzearekin. Formula horiek honako hauek dira: adingabea asteburuetan edo oporraldietan administrazio-erakunde eskudunarekin lankidetzan jarduten duten familien etxean egotea, eguneko zentroak erabiltzea edo egokitzat hartzen diren eta zaindutako adingabearen interesarekin bat datozen beste alternatiba batzuk. Aurrekoa gorabehera, zaintzeko formula osagarri horiek Dekretu honetako aplikazio-eremutik kanpo geratuko dira.

1. – Dekretu honen ondorioetarako, zaintzako neurri alternatiboa (administratiboa edo judiziala) hartzen da egoitza-harreratzat, eta honako helburu hau du: egoitza-ingurunean zaintza integrala ematea haur eta nerabeei, baldin eta haur eta nerabe horiek dituzten premia materialak, afektiboak eta hezkuntza-arlokoak beren familiek, aldi batean bada ere, bete ezin badituzte.

2. – Dekretu honen ondorioetarako, 6. artikuluan aurreikusita dagoen egoitza-harrerara bideratutako establezimendu oro hartuko da egoitza-harrerako baliabidetzat, edozein izanik ere bere izena, titulartasuna edo ezaugarriak.

3. – Egoitza-harrerako haurren eta nerabeen zaintza babes-zentro ez-espezifikoetan ere gauzatu ahal izango da, salbuespen gisa. Honako hauek dira adierazitako zentroak:

   1. Adingabeentzat erabil daitezkeen sistema normalizatuak.

   2. Minusbaliotasun larriei, toxikomaniei, nahaste psikiatrikoei, gaixotasun kroniko larriei, gizarteratzeko zailtasun larriei edo berariazko bestelako zailtasunei erantzuteko dagozkien sareetan dauden baliabide espezializatuak.

      Kasu horietan, Foru Aldundiek, babesgabetasun-egoeran dauden adingabeei egoitza-harrera emateko eskumena duten Administrazio Publikoak izanik, zainduko dute baldintza orokorrei eta sartzeko baldintzei dagokienez, establezimendu horiek egoitza-harrera gauzatzeko egokiak direla, eta hartutako pertsonei zaintza egokia -beren babesaren zirkunstantziekin eta dituzten premiekin bat datorrena- emateko errekerimenduetara egokitzen direla.

4. – Salbuespen gisa, eta haurren eta nerabeen zirkunstantziek eta interesak eskatzen badute soilik, 3.b) idatz-zatian aurreikusitako baldintzen arabera, beste Lurralde Historiko bateko edo beste Autonomia Erkidego bateko babes-baliabideak edo baliabide espezializatuak erabili ahal izango dira, betiere adingaberen egoitzari jarraiki, kasu bakoitzean eskumena duen Foru Aldundiak edo Erkidegoko Administrazioak behar bezala baimentzen baditu. Azken kasu horretan, zaindutakoen premiei erantzuteko egokia den zentroa Autonomia Erkidego batean baino gehiagotan badago, hurbilen dagoen Autonomia Erkidegoan zaintza bermatzeko ahaleginak egingo dira.

5. – 3. eta 4. idatz-zatietako aurreikuspenak soilik aplikatu ahal izango dira baliabide horietan ematen den zaintzak haurraren edo nerabearen berariazko premiei harrera gauzatzeko eskumena duen Foru Aldundiari dagokion Lurralde Historikoan dauden egoitza-harreren alternatibei baino hobeto erantzun diezaiekeenean.

   Nolanahi ere, zaintzaren premia ezartzen duen administrazio-ebazpenak haurraren zaintzak baliabide horietan bete behar izango dituen funtsezko baldintzak ezarri behar izango ditu; halaber, dagokion Foru Aldundiaren eta dagokion zaintza-baliabidearen artean koordinatzeko bideak nahiz zaintzeko plan indibiduala edo dagokion plana aplikatzeko baldintzak aurreikusi behar izango ditu.

1. – Honako hauek izan daitezke egoitza-harrerako baliabideen hartzaileak:

   1. Babesgabetasun-egoeraren ondorioz, Administrazioaren tutoretzapean geratzen diren haurrak eta nerabeak.

   2. Babes-alorrean eskumena duen Administrazio Publikoak, aldi baterako, bere zaintzapean hartzen dituen haurrak eta nerabeak, horien gurasoek edo tutoreek, zirkunstantzia larriak direla medio, zaindu ezin badituzte.

   3. Epai-erabakia dela medio babes-alorrean eskumena duen Administrazio Publikoari zaintzeko esleitzen dizkioten haurrak eta nerabeak.

2. – Salbuespen gisa, eta zaindutako pertsonak eta Foru Aldundi eskudunak adostu ostean, adin nagusi izan aurretik babes-sareko baliabide batean bizi ziren 18 urtetik gorako gazteak izan daitezke egoitza-harrerako baliabideen erabiltzaileak emantzipazio-programaren esparruan. Gazte horiek gehienez 18 hilabetez egon ahal izango dira babes-zentroen sarean, eta muga horretatik gorako edozein luzapen behar bezala arrazoitu behar izango da pertsona bakoitzaren premia indibidualak eta egonaldi horrek, hala badagokio, baliabide berean bizi diren gainerakoengan izan lezakeen eragina kontuan hartuta.

1. – Egoitza-harrerak zaindutako haurren eta nerabeen premiei erantzun behar izango die, eta, horretarako, atzemandako premien aniztasuna behar bezala eta modu eraginkorrean betetzea ahalbidetuko duten askotariko programak jarri behar izango dira. Nolanahi ere, programa horiek zaindutako egoitza-biztanleriaren gizarte- eta kultura-arloko ezaugarrietara egokitu behar izango dute.

2. – 1. idatz-zatian aurreikusitakoaren ondorioetarako, gutxienez honako programa hauek arautu behar izango dira:

1. – Programa orokorrak:

   1. Premiazko harrera-programa. Beren egoerak berehala esku-hartzea eskatzen duten haurrentzat eta nerabeentzat, edozein izanik ere beren jatorria, izango da; beren esparruan, beren egoera pertsonala, familia- eta gizarte-arlokoa aztertu eta balioetsiko da atzemandako premietarako egokiena den babes-neurria definitzeko. Programa horretako egonaldia 60 egunetik beherakoa izango da, ahal bada.

   2. Oinarrizko programa orokorra. Egoitza-harrerako edozein programaren nukleo nagusia eta oinarrizkoa izango da, eta horri esker, berak erantzun ahal izango die orokorrak izan arren espezifikoagoak diren programen esparruan [idatz-zati honetako c) paragrafoan arautzen diren emantzipaziorako prestatzeko programak, esaterako] nahiz programa espezializatuen esparruan zaindu behar ez diren 4-18 urteko haurren eta nerabeen -edozein izanik ere horien jatorria- premiei. Gutxieneko adinaren mugak malgua izan beharko du anai-arreben taldeak direnean.

   3. Emantzipaziorako prestatzeko programa. 14 urtetik gorako nerabeak, edozein izanik ere beren jatorria, prestatuko ditu bizitza independenterako, nerabe horiek egoitza-harrerako baliabidetik ateratzen direnean familia-nukleo batean txertatzea aurreikusten ez den kasuetan; bizikidetza-testuinguru bat emango zaie, bizitza sozialean gizarteratzea erraztuko dien hezkuntza-arloko, prestakuntza-arloko eta/edo orientaziorako eta laneratzeko laguntza emanez. Adingabearen ezaugarriek zaintza oinarrizko programaren edo programa espezializatu baten esparruan ematea gomendatzen duten kasuak salbuetsita, emantzipaziorako prestatzeko programa horrek programa egokia aukeratuko du babes-sarean oso adin berantiarrean sartu diren nerabeei ez ezik zentrotik ateratzen direnean jatorrizko familia-nukleoan gizarteratzea aurreikusten ez den nerabeei ere laguntzeko.

   4. Emantzipazio-programa. 16 urtetik gorako nerabeak, edozein izanik ere beren jatorria, prestatuko ditu bizitza independenterako, nerabe horiek egoitza-harrerako baliabidetik ateratzen direnean familia-nukleoan gizarteratzea aurreikusten ez den kasuetan; bizitza autonomo arruntaren antzekoa den edo hortik hurbil dagoen bizikidetza-testuingurua emango die. Programa horrek autokudeaketa-erregimenean jardun ahal izango du eta hezkuntza-arloko, prestakuntza-arloko eta/edo lan-arloko orientazioaren edo laneratzearen muga izango du lan- eta gizarte-arloko bizitza modu eraginkorrean txertatzeari begira.

2. – Programa espezializatuak:

   1. Portaera-arazoak dituzten nerabeak zaintzeko programa espezializatua: oinarrizko programa orokorraren esparruan zaintzea bideraezina egiten duten portaera partzialki disruptiboak dituzten 13-18 urteko nerabeentzat izango da, edozein izanik ere beren jatorria. Programa jarrerak aldatzera eta portaera-arazoak gainditzera bideratutako gizarte- eta hezkuntza-arloko esku-hartzea eta/edo esku-hartze terapeutikoa izango da. Ahal bada, aldi baterako aplikatuko da eta bere helburua ondoren oinarrizko programa orokorrean, emantzipaziorako prestatzeko programan edo emantzipazio-programan sartzea izango da.

   2. Portaera-arazo larriak dituzten eta beren buruari edo hirugarrenei min edo kalte larriak eragiteko arrisku nabaria duten eta behin eta berriz gauzatzen dituzten edo beren osoko garapena arrisku larrian jartzen duten eta 2.2.a) idatz-zatian aurreikusitako portaera-arazoak dituzten nerabeak zaintzeko Programa espezializatuaren esparruan haiek zaintzea bideragarri egiten ez duten portaera oso disruptiboak edo antisozialak gauzatzen dituzten 13-18 urteko nerabeei, edozein izanik ere beren jatorria, laguntza intentsiboa emateko programa. Programa esku-hartze intentsiboa eta integrala izango da, batez ere arlo pertsonalean oinarritutako gizarte- eta hezkuntza-arloko orientazioa eta/edo orientazio terapeutikoa emateko, haurren eta nerabeen jarrerak aldatzea eta gizarteratzeko prozesua erraztuko duten bizikidetza-arauak hartzea sustatzeko. Programa horren intentsitatea eta aplikatuko diren baliabide mota kasu bakoitzaren premietara eta larritasunera egokituko dira. Aldi baterako izango da, bere helburua ondoren 2.2.a) idatz-zatian aurreikusitako programa espezializatuan, edo, hala badagokio, oinarrizko programa orokorrean, emantzipaziorako prestatzeko programan edo emantzipazio-programan sartzeko aukera izatea da.

3. – Aurreko idatz-zatian aurreikusitako programak osatzeko, Foru Aldundiek honako programa hauek arautu ahal izango dituzte, baldin eta premiek eta demandak horrelakorik gomendatzen badute:

1. – Programa orokorrak:

   1. Lehen haurtzaroari laguntza emateko oinarrizko programa. 0-3 urteko haurrentzako egoitza-harreraren nukleo nagusia eta oinarrizkoa izango da; nolanahi ere, gehieneko adin-muga horrek malgua izan beharko du anai-arreben taldeen kasuan. Salbuespen gisa aplikatuko da, eta familia-harreraren edo familia-harrera profesionalizatuaren esparruan zaindu ezin den kasuetara mugatu behar izango da, eta alternatiba bat bermatu behar izango da ahalik eta denbora gutxienean.

2. – Programa espezializatuak:

   1. Haurdunaldi-prozesu aurreratuan dauden nerabeak eta ama nerabeak zaintzeko programa.

3. – Artikulu honetan aintzat hartu ez diren adingabeen berariazko premia berrien larritasunari Foru Aldundiek erantzun diezaioketen beste edozein programa; nolanahi ere, programa horiek Dekretu honetako bigarren xedapen gehigarrian zerbitzu esperimentaletarako aurreikusitako esparruan arautu behar dira.

4. – Lurralde Historiko bakoitzean aplikatzen diren egoitza-harrerako programa multzoak Haurrak eta Nerabeak Babesteko Lurralde Zerbitzu Espezializatu bakoitzak babesgabetasun-egoeran dauden adingabeei egoitza-zaintza emateko esparru-programan ezarritako oinarrizko jarraibideetan oinarrituko da.

1. – Haurrak eta Nerabeak Babesteko Lurralde Zerbitzu Espezializatuari dagokio kasu bakoitzean aplikatu behar den egoitza-harrerako programa aukeratzea eta zerbitzuak berak aurretiaz egindako premien ebaluazioan eta/edo premiazko harrera-programaren esparruan egindako ebaluazioan oinarrituko da. Egindako hautaketa idazki bidez arrazoitu behar izango da zaintzeko plan indibidualaren edo dagokion planaren esparruan, otsailaren 18ko Haurrak eta Nerabeak Zaintzeko eta Babesteko 3/2005 Legearen 58. artikuluan araututako baldintzen arabera.

2. – Egoitza-harrerako programa aukeratzerakoan, adingabearen goragoko interesari eman behar izango zaio lehentasuna beti, eta Dekretu honetako 8. artikuluan bildutako printzipioak errespetatu behar izango dira; horretaz gain, haurrak eta nerabeak egoitza-zaintzako programa integratzaileagoetan zaintzea eta anai-arreben taldeak egoitza-harrerako baliabide berean egotea bultzatuko da, baldin eta arestian adierazitako interesari aurka egiten ez badio.

3. – 4. artikuluaren 2.2 idatz-zatian aurreikusitako portaera-arazoak dituzten nerabeak zaintzeko programa espezializatuetako baten hautaketa aplikatu ahal izango den azken alternatiba izango da beti, baldin eta egoitza-harrerako programa orokorrek ez badiete erantzun egokia ematen adingabearen premiei.

   Programa horren aplikazioak honako ezaugarri hauek izango ditu:

   1. Aldi baterakoa eta iragankorra izango da:

      • Portaera-arazoak dituzten nerabeak zaintzeko programa espezializatuan 18 hilabetez egon ahal izango dira gehienez, eta epe hori luzatzen bada, behar bezala arrazoitu behar izango da pertsona bakoitzaren premia indibidualak kontuan hartuta.

      • Portaera-arazo larriak dituzten nerabeei laguntza intentsiboa emateko programa espezializatuko egonaldiaren iraupena 9 hilabetekoa izango da gehienez; epe hori 3 hilabete gehiagoz luzatu ahal izango da, eta luzapen hori behar bezala arrazoitu behar izango da pertsonaren premia indibidualak kontuan hartuta.

   2. Esku-hartzea atzemandako portaera-arazoak tratatzera bideratuko da zehazki, pertsona hori zaintzeko oinarrizko sarean txertatzeko pixkanaka-pixkanaka, aurreko idatz-zatian aurreikusitako baldintzen arabera.

   3. Adingabea programa horietara esleitu dela, eta, hala badagokio, programa horien aplikazioa luzatu dela Fiskaltzari jakinarazi behar izango zaio berariaz, baita programa horiek aplikatzean diren bitartean jazotzen den edozein gertakari ere.

   4. Haurrak eta Nerabeak Babesteko Lurralde Zerbitzuak hilean behin berrikusiko du programa zenbateraino egokitzen den adingabearen premietara.

4. – Egoitza-harrerako baliabideen sareak egoitza-harrerako programa mota bakoitzera bideratuta dauden bezainbeste plaza kopurua eduki behar izango du dauden premiei erantzun egokia emango dela bermatzeko. Kasu bakar batean ezin izango dira erabili portaera-arazoak dituzten nerabeak zaintzeko programa espezializatuak edo portaera-arazo larriak dituzten nerabeei laguntza intentsiboa emateko programa espezializatuak aplikatzera bideratutako plazak ezaugarri horiek ez dituzten haurren edo nerabeen premiei erantzuteko. Halaber, portaera-arazo larriak dituzten nerabeak ezin izango dira inoiz ere zaindu portaera-arazoak dituzten nerabeei laguntza intentsiboa emateko programa ez den programa-esparruan.

1. – Egoitza-harrerako baliabideak honela sailkatuko dira:

   1. Egoitza-zentroak: 11-24 lagunentzako edukiera duten bizikidetza-nukleoak dira, eta zaindutako haurren eta nerabeen kopuruari, adinari eta ezaugarriei egokitutako hezitzaileak dituzte beti.

      Portaera-arazo larriak dituzten nerabeei laguntza intentsiboa emateko programa espezializatua aplikatzeko erabiltzen denean, egoitza-zentroak 10 lagunentzako lekua izango du gehienez ere, eraikin independente batean kokatu behar izango da, etxebizitzekin edo bestelako ekipamenduekin partekatzen ez dena, eta bere egitura arkitektonikoa eta diseinua 4. artikuluko 2.2.b) idatz-zatian esku-hartzeari buruz definitu diren ezaugarrietara egokitu behar izango da. Zehazki, Dekretu honetako 101. artikuluko 5. idatz-zatian azaltzen diren baldintzen arabera, isolamendu-neurri bat aplikatzeko diseinatutako eta bideratutako gune bat eduki ahal izango du.

   2. Harrera-etxebizitzak: etxebizitza arruntetan kokatutako bizikidetza-nukleoak, 10 lagunentzako gehieneko edukierarekin. Etxebizitza funtzional gisa egituratzen dira, zaindutako haurren eta nerabeen kopuruari, adinei eta ezaugarriei egokitutako hezitzaileen etengabeko presentzia eskatzen dute.

   3. Emantzipaziorako prestatzeko zentroak: 9-30 lagunentzako edukiera duten bizikidetza-nukleoak, hezitzaileen etengabeko presentziarekin, 14 urtetik gorako nerabeentzako asistentzia- eta hezkuntza-arloko zerbitzua eskaintzen dute, bizitza autonomoa egiteko beharrezkoak diren trebetasunak eskuratzen laguntzeko eta lanbide-arloko prestakuntza-prozesu bat bultzatzeko nerabe horiek etorkizunean laneratzearren. Zentro horien ezaugarriak direla medio, emantzipaziorako prestatzeko programa aplikatzeko baliabide egokiak izango dira. Baliteke emantzipaziorako prestatzeko zentroak ondorengo idatz-zatian definituko diren emantzipazio-etxebizitzak eskuratzeko aurreko urratsa izatea.

   4. Emantzipazio-etxebizitzak: etxebizitza arruntetan kokatutako egoitza-ekipamenduak, laguntza- eta hezkuntza-arloko zerbitzua eskaintzen dute 16 urtetik gorako adingabeentzat autonomia pertsonala, gizarte-arlokoa eta lan-arlokoa lortzeko prozesua erraztearren. Etxebizitza horiek egoitza-zentroetara lotuta edo haiengandik hurbil egon daitezke, eta laguntza-egitura gisa erabili ahal izango dituzte. 8 lagunentzako gehieneko edukiera izango dute. Autokudeaketa-erregimenean jardun ahal izango dute, hezitzaile baten gainbegiratze teknikoaren pean (etengabekoa izan daiteke). Hezitzaile horren eginkizuna egiturari eta bertan bizi direnei ematen zaien laguntza eta egiten zaien jarraipena antolatzea izango da; zaindutako pertsonen premiek edo emantzipazio-programak horrelakorik gomendatzen badu, egiturak hezkuntza-arloko langile auxiliarrak izango ditu.

2. – Ahal bada, eraikin berean ez da adingabeentzako egoitza-harrerako baliabide bat baino gehiago kokatuko. Aurrekoa gorabehera, kasu hori gertatuko balitz, orokorrean ezin izango dituzte egoitza-harrerako baliabideetarako 1.c) idatz-zatian aurreikusitako gehieneko tamaina baino egoitza-plaza gehiago izan.

3. – Adingabeentzako egoitza-harrerako baliabide bat ezin izango da bere osotasunean inoiz kokatu gizarte-zerbitzu edo beste zerbitzu publiko batzuetara bideratuta dagoen eraikin batean.

1. – Haurrak eta Nerabeak Zaintzeko Lurralde Zerbitzuak aukeratuko du haurra edo nerabea hartuko duen egoitza-harrerako baliabide zehatza, honako irizpide hauek kontuan hartuta:

   1. Haurrari edo nerabeari buruzko irizpideak. Balioetsiko dira: adina; sexua; haien ezaugarriak eta eremu pertsonalean, familia-eremuan eta gizarte-eremuan dituzten premia bereziak; talde berrira egokitzeko aukerak; dituzten premiei erantzuteko eskola-, osasun- eta komunitate-arloan dauzkaten baliabideak; hala badagokio, dituzten portaera-zailtasunak eta egokitzapena; baita egokitzat hartzen diren bestelako alderdi pertsonalak eta familia-arlokoak ere.

   2. Egoitza-harrerako baliabideari buruzko irizpideak. Balioetsiko dira: erabil daitezkeen plazak; baliabidearen ezaugarriak; erabil daitezkeen baliabideen egokitze-maila eta irisgarritasun unibertsalaren maila zentroan sartzen den pertsonaren premiekiko; sartu berriak baliabide horretan zaintzen den taldeko gainerako kideengan izan lezakeen eragina; hezkuntza-taldearen ezaugarriak; baliabide horretan hartutako adingabeen ezaugarriak eta premiak; bizikidetza-taldearen ezaugarriak eta unea; baita egoitza-harrerako baliabideari buruz egokitzat hartzen diren bestelako alderdiak ere.

   3. Egoitza-harrerako sistemen sare osoari buruzko irizpideak. Balioetsiko dira: okupazio-maila orokorra; adingabeen eta problematiken bidezko banaketa; baliabideak berriz egituratzeko planak; sistemak ixtea eta berriak irekitzea; baita egoitza-harrerako sare osoari dagokionez egokitzat hartzen diren bestelako alderdiak ere.

      Irizpide horiek bere osotasunean kontuan hartzea, adingabeen interesari lehentasuna ematen dioten arrazoiak lehenetsiz, egoitza-harrerako baliabidea izendatzerakoan kasu bakoitzean aukerarik egokiena izango da.

2. – Portaera-arazo larriak dituzten nerabeei laguntza intentsiboa emateko programa espezializatua kolektibo horri zerbitzuak eskaintzen dizkioten zentroetan soilik eman behar izango da.

3. – Egoitza-harrerako baliabide bakoitzean 4. artikuluan biltzen diren programetako bat baino gehiago gauzatu ahal izango da aldi berean, portaera-arazo larriak dituzten nerabeei laguntzeko programa intentsiboa izan ezik, betiere baliabidearen egiturak eta bizikidetza-unitateen antolamenduak premiei (aplikatutako programak premia horiek betetzeko dira) modu bereizian erantzuteko aukera ematen badute. Erakunde horrek behar den adina malgutasun-irizpide hartu behar izango ditu kontuan anai-arreben taldeak elkarrekin zentro berean zainduko direla bermatzeko, 8.2.j) artikuluan aurreikusitako baldintzen arabera.

4. – Premiazko harrera-programa berariazko eta bereziki helburu horretara bideratutako egoitza-harrerako baliabide batean ez ezik Lurralde Historiko bakoitzeko egoitza-sare osoan premiazko berariazko plazak prestatuta ere aplikatu ahal izango da. Halaber, modu indibidualean aplikatu ahal izango dira emantzipaziorako prestatzeko programa edo portaera-arazoak dituzten nerabeak, edo, oro har, oinarrizko programa aplikatzen duen egoitza-harrerako baliabideetan zaintzen diren nerabeak zaintzeko programa, betiere baliabide horrek zaintzeko plan indibidualaren edo dagokion planaren esparruan egokiagotzat hartzen bada formula hori erabiltzea.

1. – Oro har, egoitza-harrerak honako hauen araberakoa izan beharko du: Haurrak eta Nerabeak Zaintzeko eta Babesteko otsailaren 18ko 3/2005 Legearen 48. eta 76. artikuluetan administrazio-jardunari buruz biltzen diren printzipio eta irizpide gidarien araberakoa, baita abenduaren 2ko 51/2003 Legean -ezintasunak dituzten pertsonen aukera-berdintasunari, ez-diskriminatzeari eta irisgarritasun unibertsalari buruzkoa- azaltzen diren printzipioen araberakoa ere.

2. – Bereziki, egoitza-harrerak honako printzipio hauek bete behar izango ditu:

   1. Baliabide aukera ugari izango dela bermatzea haurren eta nerabeen askotariko premia aldakorrei behar bezala erantzuteko gaitasuna izateko.

   2. Haurraren edo nerabearen ezaugarriak eta bilakaera-unea kontuan hartuta, dituen premietara hobekien egokitzen den egoitza-harrerako programa aukeratu eta ematea.

   3. Premiak beteko direla bermatzea, banakako zaintza sustatuz.

   4. Indarrean dagoen ordenamendu juridikoan haurrei eta nerabeei aitortzen zaizkien eskubide indibidualak eta kolektiboak errespetatuko direla bermatzea.

   5. Haurrek eta nerabeek dituzten eskubideei buruzko informazioa hitzez eta idazki bidez, beren gaitasun- eta ulermen-mailara egokitutako hizkera argi eta errazean, jasotzeko duten eskubidea bermatzea.

   6. Tratu-berdintasuna, aukera-berdintasuna, aniztasunarekiko eta desberdintasunarekiko errespetua, genero-ikuspegia sartzeko aukera, ekintza positiboa eta sexuaren araberako rolak eta estereotipoak kentzeko aukera bermatzea, Emakumeen eta Gizonen berdintasunari buruzko 4/2005 Legearen 3. artikuluan ezarritakoarekin bat etorriz.

   7. Esku-hartzea batez ere hezkuntza-arlokoa izango dela bermatzea, haurrak eta nerabeak erabat gizarteratzen eta baliabide guztiak antolatzen laguntzeari begira, babesa, konfiantza, segurtasuna eta egonkortasuna emango dien testuingurua sortzearren.

   8. Haurraren edo nerabearen garapenerako familiak duen garrantzia kontuan hartzea, behar duen laguntza ematea eta haurraren eta nerabearen eta horien familiaren gaitasunak aprobetxatzea.

   9. Ahaleginak egitea haurrak eta nerabeak ahalik eta denbora gutxien eman dezaten egoitza-harreran, batez ere lehenengo haurtzaroan, baldin eta haur eta nerabe horien goragoko interesak aurkakoa gomendatzen ez badu.

   10. Anai-arreben taldeak egoitza-harrerako baliabide berean elkarrekin zainduko direla bermatzea, baldin eta beren goragoko interesak kontrakoa gomendatzen ez badu.

   11. Haurren eta nerabeen premia zehatzetarako egokiena den eta beren familia- eta gizarte-ingurunetik hurbilen dagoen egoitza-harrerako baliabidean har ditzaten ahaleginak egitea, pertsona arteko harremana ez kaltetzeko, betiere adingabearen zirkunstantziek eta goragoko interesak aurkakoa gomendatzen ez badute eta erabaki horren aurkako ebazpenik ez badago.

   12. Haurren eta nerabeen eskola-bizitzan eta bizitza sozialean beharrezkoak ez diren interferentziak saihestea, ikasten ari diren ikastetxean jarraitzeko aukera badu eta gomendagarria bada, eta bere inguruneko edo egoitza-harrerako baliabidearen inguruneko ekipamenduak eta zerbitzu publikoak erabil baditzake.

   13. Egoitza-harrerako baliabidea eta hezitzailea ez aldatzeko ahaleginak egitea, ahalik eta egonkortasun-mailarik handiena bermatzeko, betiere hartutako haurren eta nerabeen goragoko interesak aurkakoa gomendatzen ez badu.

1. – Haurrak eta Nerabeak Zaintzeko eta Babesteko otsailaren 18ko 3/2005 Legearen 104. artikuluaren arabera, Foru Aldundiek dute egoitza-harrerako baliabideen kudeaketa (zuzenekoa edo zeharkakoa) gauzatzeko ardura, baita baliabide horiek baimentzeko, erregistratzeko, homologatzeko, ikuskatzeko eta ebaluatzeko ardura ere, baliabide horien izaera publikoaren edo pribatuaren arabera.

   Babesgabetasun-egoeran dauden adingabeen egoitza-harrera erantzukizun publikoko zerbitzu bat denez gero, zerbitzu hori emateko, Foru Aldundiek zuzeneko kudeaketa edo zeharkako kudeaketa aukeratuko dute, bai beste erakunde publiko batzuekin lankidetzan jardunda, bai familia-integraziorako erakunde pribatuekin lankidetzan jardunda, betiere Haurrak eta Nerabeak Zaintzeko eta Babesteko otsailaren 18ko 3/2005 Legearen 76.2 eta 107. artikuluetan aurreikusitakoarekin bat etorriz, eta, horretarako, itunak, hitzarmenak edo kontratuak erabili ahal izango dituzte. Zeharkako kudeaketa eta erakunde pribatuekin lankidetzan aukeratzen badute, Foru Aldundiek lehentasuna eman ahal izango diete irabazi-asmorik gabeko gizarte-ekimeneko erakunde pribatuei, betiere eraginkortasunari, kalitateari eta kostuei dagokienez, antzeko baldintzak badituzte.

2. – Horien mende dauden egoitza-harrerako baliabideak jartzeko -betiere, baliabide horien izaera eta hor aplikatzen diren programen ezaugarriak direla medio etxebizitza arruntetako eraikinetan jar badaitezke- Foru Aldundiek babes ofizialeko etxebizitzak erreserbatu ahal izango dituzte (Eusko Jaurlaritzaren Etxebizitza eta Gizarte Gaietako Sailaren eta beste Administrazio Publiko batzuen zuzeneko sustapenetan tokiko erakundeei besterentzera edo alokatzera bideratutako etxebizitzak, hain zuzen ere) beren eskumenekoak diren gizarte-zerbitzu propioetarako ekipamenduak sortzeko.

3. – Foru Aldundiek, gainera, egoitza-harrerako baliabideak indarrean dauden irisgarritasun-irizpideetara egokitzen direla berma dadin zaindu behar izango dute, Dekretu honetan bildutako baldintzen arabera, eta, horretarako, oztopo arkitektonikoak eta komunikazio-oztopoak ezabatzeko Autonomia Erkidegoan indarrean dagoen araudian aurreikusitako diru-laguntzak eskatu ahal izango dituzte.

4. – Dekretu honetan aurreikusitako baldintzak izan ezik, 6. artikuluan araututako egoitza-harrerako baliabideek beren jarduera gauzatzeko ez dute behar izango etxebizitza arruntera bideratutako beste edozein higiezini eskatzen zaion jarduera-baimen edo- lizentzia ez den besterik.

1. – Haurrak eta Nerabeak Zaintzeko eta Babesteko otsailaren 18ko 3/2005 Legearen 7. artikuluan aurreikusitakoarekin bat etorriz, erakunde publikoek lankidetzan jardun behar izango dute eta beren jardunak koordinatu behar izango dituzte, haurrak eta nerabeak modu koherentean, antolatuan eta integralean zaintzeko, esku-hartzeei eta baliabideak erabiltzeko arrazionalizazioari dagokienez ahalik eta eraginkortasun-maila handiena bermatuko duen zaintza, hain zuzen ere. Lankidetza eta koordinazio hori Administrazio publikoen artean gauzatu behar izango dute, baita Administrazio bereko sailen eta zerbitzuen artean ere.

2. – Aurreko idatz-zatian ezarritakoaren arabera, eta egoitza-harrerako haurrak eta nerabeak zaintzeari dagokionez, lankidetza eta kolaborazio eraginkorra bermatzearren, lankidetzarako eta koordinaziorako honako protokolo hauek ezarriko dira gutxienez:

   1. Haurrak eta nerabeak babesteko Foru Aldundiek dituzten zerbitzu espezializatuek eta osasun-zerbitzuek (buru- gaixotasunak eta/edo buru-nahasteak dituzten hartutako haurrak eta nerabeak zaintzeko buru-osasuneko zerbitzuak bereziki) lankidetzan jarduteko eta koordinatzeko protokoloa, krisi-egoeretan eta krisi-egoeren ondorengo denboraldietan osasun-zentroetan sartzeko eta han egoteko jarraibideak definitzearren.

   2. Haurrak eta nerabeak babesteko Foru Aldundiek dituzten zerbitzu espezializatuek eta hezkuntza-zerbitzuek lankidetzan jarduteko eta koordinatzeko protokoloa, hezkuntza-arloko laguntza haurrak edo nerabeak une bakoitzean dituen premietara egokitzeko, batez ere hezkuntza-premia bereziak dituenean, alde batera utzita egokitze hori nahitaezkoa izatea ikasturtea hasi ondoren.

   3. Haurrak eta nerabeak babesteko Foru Aldundiek dituzten zerbitzu espezializatuek eta ezinduak zaintzeko zerbitzu espezializatuek lankidetzan jarduteko eta koordinatzeko protokoloa, minusbaliotasun- eta mendekotasun-kasuetan egoitza-zaintzarako formularik egokienak definitzearren.

   4. Haurrak eta nerabeak babesteko Foru Aldundiek dituzten zerbitzu espezializatuek eta udal, foru eta autonomia mailan dauden enplegu-zerbitzuek eta gizarteratzeko nahiz laneratzeko zerbitzuek lankidetzan jarduteko eta koordinatzeko protokoloa.

   5. Haurrak eta nerabeak babesteko Foru Aldundiek dituzten zerbitzu espezializatuek eta autonomia-erkidegoko Gazte Justiziaren arloko eskumena duen Sailak lankidetzan jarduteko eta koordinatzeko protokoloa.

   6. Haurrak eta nerabeak babesteko Foru Aldundiek dituzten zerbitzu espezializatuek eta beste gizarte-zerbitzu batzuek lankidetzan jarduteko eta koordinatzeko protokoloa.

   7. Haurrak eta nerabeak babesteko Foru Aldundiek dituzten zerbitzu espezializatuek eta udal, foru eta autonomia mailan dauden gazteria, kultura eta kirola zerbitzuek lankidetzan jarduteko eta koordinatzeko protokoloa.

3. – Egoki irizten badiote, Administrazio publikoek beste edozein lankidetza- eta koordinazio-protokolo ezarriko dute, baldin eta protokolo horiek egoitza-zaintza egokiena bermatzen laguntzen badute.

1. – Haurrak eta Nerabeak Zaintzeko eta Babesteko otsailaren 18ko 3/2005 Legearen 77. artikuluarekin bat etorriz, egoitza-harrerako baliabideak baimena emateko, erregistratzeko, homologatzeko eta ikuskatzeko dagozkien administrazio-jardunei lotuta egongo dira, betiere baliabide horien erakunde titularraren izaera publikoa edo pribatua kontuan izanda, martxoaren 10eko 40/1998 Dekretuan aurreikusitakoarekin bat etorriz. Dekretu horrek Euskal Autonomia Erkidegoko gizarte-zerbitzuen baimena, erregistroa, homologazioa eta ikuskapena arautzen du.

2. – Administrazio eskudunak baimentzeko eta homologatzeko, titulartasun pribatuko baliabideek Dekretu honetan arautzen diren eta baliabideen tipologiaren arabera aplikatu behar zaizkien baldintza materialak, funtzionalak eta langile-arlokoak bete behar izango dituzte.

3. – Titulartasun publikoko baliabideek Dekretu honetan araututako eta baliabide horien tipologiaren arabera aplikatu behar zaizkien baldintza materialak, funtzionalak eta langile-arlokoak izan beharko dituzte.

1. – Dekretu honetan biltzen diren xedapenak Haurrak eta Nerabeak Zaintzeko eta Babesteko otsailaren 18ko 3/2005 Legean, Gizarte Zerbitzuei buruzko urriaren 18ko 5/1996 Legean, Kode Zibila eta Prozedura Zibilaren Legea aldatzen dituen urtarrilaren 15eko Adingabearen Babes Juridikoaren 1/1996 Lege Organikoan bildutako espirituaren, printzipioen eta aginduen arabera ez ezik ordenamendu juridiko osoan haurrak eta nerabeak babesteari buruz indarrean dauden xedapenen arabera ere interpretatuko dira.

2. – Era berean, haurren eskubideak defendatzen dituen nazioarteko araudian biltzen diren xedapenak kontuan hartuko dira, eta, bereziki, Nazio Batuek 1989ko azaroaren 20an Haurren Eskubideei buruz egindako Konbentzioa, Haurren Arazoei buruz Europako Erkidegoan emandako Ebazpena (Europako Parlamentuak 1991ko abenduaren 13an onartu zuen), Haurrak Zaintzeari buruz Europako Erkidegoen Kontseiluak 1992ko martxoaren 31n emandako Gomendioa eta Haurraren Eskubideei buruzko Europako Gutuna (1992ko uztailaren 8an emandako Ebazpen bidez onartu zuen Europako Parlamentuak).

1. – Haurrek edo nerabeek eta horien familiek ondoren azalduko denari buruz beharrezkoa den informazio oro jaso behar izango dute, kaltegarritzat hartzen den kasuetan edo hori gauzatzea debekatzen duen ebazpen judiziala badago izan ezik. Honako honi buruzko informazioa jaso behar izango dute:

   1. familia-nukleoa bereizteko arrazoiak, hala badagokio;

   2. egoitza-sarreraren helburuak;

   3. hautatutako egoitza-programaren ezaugarriak;

   4. hautatutako programa aplikatuko den egoitza-harrerako baliabidean sartu zeneko data;

   5. egoitza-harrerako baliabidearen egonaldiaren gutxi gorabeherako denbora;

   6. egoitza-bizitzari eta dituzten eskubideei eta betebeharrei buruzko oinarrizko jarraibideak;

   7. hala badagokio, familia-ingurunean aldi berean gauzatuko diren esku-hartze neurriak;

   8. Haurrak eta Nerabeak Babesteko Lurralde Zerbitzu Espezializatuko erreferentziako pertsona, edo, hala badagokio, koordinatzailea eta egoitza-harrerako baliabideko erreferentziako pertsona edo hezitzailea edo tutorea.

      Informazio hori ahoz eta idazki bidez eman behar izango da, haurren eta nerabeen ulermen-mailara egokitutako hizkeran. Adingabe atzerritarrak badaude, informazio hori behar bezala ulertzea ahalbidetuko den hizkuntzan eman behar izango da.

2. – Informazio hori Haurrak eta Nerabeak Babesteko Lurralde Zerbitzu Espezializatuak eman behar izango du egoitzan sartu hartu aurretik, premiazko egoitza-harrera gauzatu behar den kasuetan izan ezik, kasu horietan zerbitzu horrek adingabea premiazko harrera-programan dagoen bitartean emango du informazio hori.

3. – Haurrak eta Nerabeak Babesteko Lurralde Zerbitzu Espezializatuak haurra edo nerabea egoitzan sartu aurretik bidali behar izango die haur edo nerabe horren premien ebaluazioa eta banakako zaintza-plana edo adingabeari dagokion plana egoitza-harrerako baliabidearen arduradunei, zentroko hezkuntza-taldeak banakako zaintza-plan horren edo dagokion planaren esparruan banakako esku-hartze plana edo banakako hezkuntza-plana gauza dezan.

4. – Egoitza-harrerako baliabideko profesionalek neurri egokiak hartu behar izango dituzte harrera-prozesua errazteko:

   1. gainerako egoiliarrak prestatu behar izango dituzte harrera-unerako;

   2. haurra edo nerabea egoitzan sartzen denean Haurrak eta Nerabeak Babesteko Lurralde Zerbitzu Espezializatuan erreferente gisa izendatu den profesionalarekin egon dadin laguntzea, eta haurraren edo nerabearen goragoko interesaren aurkakoa ez bada, haren ahaideren batekin edo haren konfiantzako beste pertsona batekin egon dadin laguntzea, betiere, kasuaren zirkunstantziak direla medio Lurralde Zerbitzu Espezializatuak ez badu ezarri beste prozeduraren bat aplikatu behar dela;

   3. objektu pertsonal batzuk ekartzea ahalbidetzea;

   4. iraganari buruzko erreferentzia egitea nortasun-galeraren sentimendua saihesteko;

   5. etorkizuna aipatzea, gogoraraziz egoitza-harrerako baliabidean izango duen egonaldia aldi baterako izango dela;

   6. egokitzeko denbora bat aurreikustea, denbora horretan nahitaezkoa izango da egoera ulertzen eta beren sentimenduak eta gatazkak adierazten laguntzea.

5. – Egoitzan sartzerakoan, nahitaezkoa da haurrari edo nerabeari, baita bere familiari ere, baldin eta nerabearen edo haurraren interesaren aurkakoa ez bada, honako alderdi hauei buruzko informazioa ematea:

   1. dituzten eskubide eta betebeharrei buruzko informazioa, baita profesionalek dituzten eskubide eta betebeharrei buruzkoa ere;

   2. egoitza-harrerako baliabideen funtzionamenduari buruzkoa;

   3. bizikideitza-arauei buruzkoa.

1. – Egoitzan sartu ondoren, egoitza-harrerako baliabideko profesionalek, Haurrak eta Nerabeak Babesteko Lurralde Zerbitzu Espezializatu eskudunarekin koordinatuta, haurraren eta nerabearen egoeraren ebaluazioa egingo dute hilabete natural bateko epean, Haurrak eta Nerabeak Babesteko Lurralde Zerbitzu Espezializatuak egindako ebaluazioa osatzeko, eta haurraren edo nerabearen premiak eta gaitasunak honako alderdi hauetan biltzen ahaleginduko dira:

   1. alderdi fisikoak: garapen fisikoa, garapen psikomotorea eta osasun-egoera;

   2. alderdi kognitiboak eta hizkuntzari buruzkoak;

   3. jokabideari buruzko alderdi emozionalak eta jarrerak;

   4. familia-arloko eta gizarte-arloko alderdiak eta bizikidetza-taldeari buruzkoak;

   5. hezkuntza- eta prestakuntza-arloko alderdiak;

   6. egoitza-harrerako baliabidera eta beren eguneroko bizitzako beste garapen-eremu batzuetara (zonako biko taldea, kirol-taldeak edo zerbitzu komunitarioak) egokitzearekin zerikusia duten alderdiak.

      Idatz-zati honetan aurreikusitako epea salbuetsita geratu ahal izango da zaindutako pertsonaren adingabetasuna oraindik egiaztatuta ez badago; kasu horretan, zirkunstantzia hori egiaztatzen denetik aurrera hasiko da zenbatzen.

2. – Hasierako ebaluazioa oinarri hartuta, egoitza-harrerako baliabideko hezkuntza-taldeak, haurra edo nerabea zentroan sartzen denetik bi hilabetetik gorakoa ez den epean, banakako esku-hartze plana edo banakako hezkuntza-plana egingo du, Haurrak eta Nerabeak Babesteko Lurralde Zerbitzu Espezializatuak egindako banakako zaintza-planaren edo dagokion planaren aurreikuspenekin bat etorriz, eta, ahal bada, haurraren edo nerabearen, eta bere goragoko interesaren aurkakoa ez bada, horren familiaren eta haurra edo nerabea laguntzen duten konfiantzako pertsonaren partaidetza izango du, betiere haurraren edo nerabearen iritziz pertsona hori laguntzeko gauza bada.

   Banakako esku-hartze plana edo banakako hezkuntza-plana premiazko harrera-programaren testuinguruan egiten bada, eta kasuari buruzko ebaluazio integrala oraindik egin gabe badago, plan hori behin-behinekoa izango da eta adierazitako ebaluazioa amaitzen denean osatu eta definitu behar izango da sakon.

3. – Banakako esku-hartze planak edo banakako hezkuntza-planak honako elementu hauek bildu behar izango ditu:

   1. egoitza-harrerako baliabidean zainduko duten aldian familia-arloan, arlo indibidualean, eskola- eta lan-arloan, gizarte-arloan, osasun-arloan eta komunitate-arloan lortu behar diren helburuak; eta hala badagokio, gizarte kulturanitzean txertatzeko ibilbide batekin zerikusia duten berariazko helburuak erantsiko dira;

   2. helburu horiek lortzeko egin behar diren ekintzak edo zereginak;

   3. giza baliabideak edo baliabide materialak, baldin eta horien esku-hartzea nahitaezkoa edo egokia dela irizten bada;

   4. erreferentziazko hezitzaile baten izendapena egoitza-harrerako baliabidearen barruan;

   5. helburu horiek lortzeko aurreikusitako epeak;

   6. hurrengo artikuluan aintzat hartzen den etengabeko ebaluaziorako aurreikusitako epeak;

   7. egoitza-harrerako baliabidetik irtetean gauzatu behar diren esku-hartzeen aurreikuspena;

   8. familiaren eta lagunen bisita-erregimena, baita haurraren eta nerabearen goragoko interesaren mesederako ezartzen diren harreman horien inguruko edozein murrizketa ere, betiere, eta, hala badagokio administrazio-ebazpenean edo ebazpen judizialean adierazitako bisita-erregimena errespetatuz.

1. – Haurraren edo nerabearen premiak etengabe ebaluatu behar dira zer nolako bilakaera izan duten jakiteko eta banakako zaintza-planean edo dagokion planean eta banakako esku-hartze planean edo banakako hezkuntza-planean ezarritako helburuak lortzeari begira orientazioa nahiz esku-hartzea egokienak eta eraginkorrenak ote diren, edo berriz planteatu eta aldatu behar ote diren erabakitzeko. Etengabeko ebaluazioa, ahal bada, banakako esku-hartze plana edo banakako hezkuntza-plana egiteko ardura izan duen taldeak gauzatu behar izango du, Haurrak eta Nerabeak Zaintzeko eta Babesteko Lurralde Zerbitzu Espezializatuarekin koordinatuta. Ebaluazio hori egiterakoan, eta egoeraren ikuspegi integrala izaten laguntzeko, egoki irizten bada haurrak edo nerabeak harremana duen beste eragile komunitario batzuei kontsultatuko zaie, bereziki, eskolari, kaleko hezkuntza-zerbitzuari, kultura- eta kirol-arloko zerbitzuei, edo egokitzat hartzen diren beste batzuei.

2. – Ebaluazio-prozedurek haurraren edo nerabearen partaidetza bermatu behar izango dute. Haurrak edo nerabeak, halaber, eskatu ahal izango du bere konfiantzako pertsona batek parte hartzea eta pertsona horrek laguntzea ebaluazio-prozesuan, betiere pertsona horrekiko harremana haurraren edo nerabearen goragoko interesaren aurkakoa ez bada.

3. – Ebaluazioa etengabea izango dela bermatzeko, lehenengo ebaluazioa banakako esku-hartze plana edo banakako hezkuntza-plana aplikatzen hasten denetik zenbatzen hasita hiru hilabeteko gehieneko epean egin behar izango da eta, hurrengoak sei hilean behin, edo 4 urteko edo hortik beherako haurren kasuan, lau hilean behin. Egoitza-harrerako baliabideko profesionalek aparteko berrikusteak deitu ahal izango dituzte ezarritako epeetatik kanpo, baldin eta hori egitea eskatu edo gomendatzen duen ezusteko zirkunstantziaren bat sortzen bada.

4. – Jarraipen-txostenak denboraldi bati buruz dagoen informazio guztia bilduko du eta denboraldi horretarako jarritako helburuak bete eta gauzatu direla ezartzen duen balioespen bat egin behar izango da, eta txostena normalean erregistratu behar diren alorren arabera egituratu behar izango da. Balioespen hori objektiboa eta balio-judiziorik gabea izango da, eta alderdi positiboak eta negatiboak ez ezik hobetu daitezkeen alderdiak ere azaldu behar izango dira beti.

5. – Adingabe guztiek beren informazio-erregistroa izango dute eta hor adingabea zentroan sartzen denetik atera arte esku-hartze arloetan sortzen den informazio guztia sartuko da pixkanaka-pixkanaka. Nerabea lekuz aldatzen bada, erregistro hori Haurrak eta Nerabeak Babesteko Zerbitzu Espezializatu batera bidali behar izango da.

6. – Erreferentziako profesional bakoitzak berari dagozkion erregistroez arduratuko da, behaketa-erregistroak eta elkarrekin egin behar diren txostenak izan ezik. Erregistro eta txosten horiek egiten dituzten profesionalek irizpideak batu behar izango dituzte eta kasua orokorrean ebaluatu behar izango dute.

1. – Egoitza-harrerako baliabideko egonaldia honako kausa hauengatik bukatu ahal izango da:

   1. adin-nagusitasunera iritsi delako edo emantzipatu delako;

   2. adingabeari adin nagusiaren abantaila eman zaiolako;

   3. neurria eragin zuten zirkunstantziak bukatzearen ondorioz emandako administrazio-ebazpenarengatik;

   4. beste babes-erakunde batera lekuz aldatzearen ondorioz emandako administrazio-ebazpenarengatik;

   5. egoitza-harrerako beste baliabide batera lekuz aldatzearen edo egoitza-harreraren amaiera ekartzen duen familia-harrerako neurri bat edo beste babes-neurri bat hastearen ondorioz emandako administrazio-ebazpenarengatik;

   6. adingabea gazte-justiziako zentro batean edo adingabeen erantzukizun penalaren sistemaren esparruan neurri judizialak gauzatzeko beste zentro mota batean sartzea ekartzen duten ebazpen judizialarengatik;

   7. adopzioa edo tutoretza arrunta edo babesgabetasun- edo zaintza-egoeraren amaiera ematen duen ebazpen judizial irmoarengatik;

   8. egoitza-harrerako baliabidearen erabiltzailearen heriotzagatik.

2. – Egoitza-harrerako baliabidetik irteteko prestakuntza haurren eta nerabeen premietara egokitu behar izango da, familia bateratzeari, familia-harrera, harrera profesionala edo adopzio bidezko beste familia-talde batean txertatzeari, programa espezializatu batean denboraldi batean egon ondoren egoitza-harrerako programa orokor batean txertatzeari, edo emantzipazioari begira egiten ote den kontuan izanda; nolanahi ere, bermatuko dute haurrak edo nerabeak badakiela nori eska diezaiokeen laguntza behar izanez gero, eta beharrezkoak diren laguntzak arautuko dira.

   Aurrekoaren ondorioetarako, haurrak edo nerabeak utziko duen egoitza-harrerako baliabidetik bereizteko eta haurra edo nerabea bideratuko den baliabidean, programan edo sisteman behar bezala sartzeko landu behar diren esku-hartzeak eta helburuak definituko dituen plana egingo da, aldaketetara pixkanaka-pixkanaka egokitzen laguntzeko, erreferentziako profesionalak prozesuan laguntza emateko eta bereizketa lantzen duen baliabidearen eta harrera errazten duenaren artean koordinazio-sistema bat izateko ahaleginak eginez.

Egoitza-zaintzaren esparruan, ondoren azalduko diren eremuetan haurrek eta nerabeek izan ditzaketen premiei behar bezala eta eraginkortasunez erantzuteko ezinbestekoak diren baliabideak lortzen lagundu behar izango da. Adierazitako eremuak honako hauek dira: osasuna; ongizate emozionala; elikadura; higienea eta norberaren itxura; loa; autonomia eta erantzukizuna; familia; gizarte-sarea; gizarte- eta kultura-arloko nortasuna; prestakuntza; lana; aisia; laguntza komunitarioa; eta premia bereziak.

1. – Hartutako haurren eta nerabeen osasun fisikoa eta psikikoa sustatu behar izango da, gaixotasunak prebenituz, bizitza-jarraibide osasuntsuak sustatuz eta osasun-zerbitzuetarako sarbidea erraztuz, egokientzat hartzen diren koordinazio-bideen bitartez eta bide horiek, hala badagokio, jarraitu behar den tratamenduari dagokionez ezartzen dituzten oharrei jarraituz.

2. – Horretarako, nahitaezkoa izango da egoitza-harrerako baliabidean honako baldintza hauek betetzea:

   1. instalazioak osasungarritasun-baldintzetan edukitzea;

   2. egoitza-bizitzako jarraibideak bizitza osasuntsuaren berezko jarraibideetara egokitzea;

   3. ariketa fisikoa bultzatzea eta erraztea;

   4. egoiliarrei osasun-hezkuntzari, hezkuntza sexualari, eta toxikomanien prebentzioari eta gaixotasunei buruzko prestakuntza ematea eta, horretarako, informazio-liburuxkak izatea;

   5. osasun-zerbitzuek gomendatzen dituzten aldizkako kontrol medikoak egitea;

   6. hala badagokio, osasun-zerbitzuetara -haur eta gazteentzako osasun mentaleko zerbitzuak barne- bidaltzea;

   7. behar bezala hornitutako botikin bat izatea haurren eta nerabeen eskueratik kanpo;

   8. lehen laguntzetarako eskuliburu bat eta larrialdiko mediku-zerbitzuen telefonoak eta helbideak izatea bereziki horretarako den eta erraz kontsultatu eta irits daitekeen leku batean;

   9. ahaleginak egitea haurra edo nerabea, ahal bada, bere mediku pediatrak zaintzen jarrai dezan;

   10. haurraren edo nerabearen historia mediko/sanitarioari buruz ezagunak diren datuak eguneratuta edukitzea, izandako gaixotasunak, txertoen egutegiak eta horien jarraipena, eta osasun-azterketen emaitzak eta gomendioak adieraziz;

   11. banakako esku-hartze planean edo banakako hezkuntza-planean jarraipen medikoa egiteko arlo bat sartzea;

   12. legezko egoerak ahalbidetzen badu, eta haurraren edo nerabearen goragoko interesaren aurkakotzat hartzen ez bada, aita eta ama jarraipen medikoan sartzeko ahaleginak egitea.

1. – Harreran hartutako haurren eta nerabeen ongizate emozionala zaindu behar izango da, taldean txerta daitezen sustatzeko ahaleginak eginez eta egoitza-harrerako baliabide barruan nahiz kanpoan beharrezkoak diren laguntzak dituztela bermatuz.

2. – Horretarako, honako hau egin behar izango da:

   1. Egoiliarrek edo egoitza-harrerako baliabideko profesionalek haurrak eta nerabeak marjinatzeko edozein praktika saihestea.

   2. Pertsonaren garapen integrala lortzea sexuaren araberako estereotipo eta rol oro alde batera utzita, baita diskriminazio mota oro arbuiatzea ere.

   3. Taldean adiskidetasun-loturen garapena sustatzea eta dituzten ezaugarri bereziak direla medio taldean integratzeko zailtasun handienak dituzten haurrei eta nerabeei laguntzea.

   4. Haurrek eta nerabeek dituzten kezkak jakinarazteko egoitza-harrerako baliabideko edozein profesionalengana eta/edo Haurrak eta Nerabeak Babesteko Lurralde Zerbitzu Espezializatura jo dezaketela bermatzea.

   5. Haur edo nerabe bakoitzak, egoitza-harrerako baliabidetik eta Haurrak eta Nerabeak Babesteko Lurralde Zerbitzu Espezializatutik kanpo konfiantzako pertsona bat izan dezan laguntzea eta pertsona horrekin zuzenean harremanetan jar dadin laguntzea egoitza-harrerako baliabidean duen edozein kezka edo arazo pertsonal azaltzeko, betiere pertsona horrekiko harremana haurraren edo nerabearen gogoragoko interesaren aurkakoa ez bada.

   6. Ahaleginak egingo dira haurra edo nerabea hezitzailearen edo tutorearen figuraren bitartez antolatzeko. Hezitzaile edo tutore horrek banakako zaintzako guneak izango ditu astean behin gutxienez.

1. – Elikadurarekin zerikusia duten premiak zainduko dira, bai elikaduraren ikuspuntutik, bai hezkuntza- eta kultura-arloko ikuspuntutik.

2. – Horretarako, nahitaezkoa izango da honako baldintza hauek betetzea:

   1. dietak osasungarria eta orekatua izan behar du bai kantitateari dagokionez, bai barietateari dagokionez; nolanahi ere, elikadura-beharrak betetzen direla bermatuko da;

   2. haurrak eta nerabeak janari berriak dasta ditzaten bultzatu behar izango da eta, halaber, kultura- edo erlijio-arloko gustuak, estiloak, ohiturak, edo jarraibideak kontuan izango dira;

   3. haurrek eta nerabeek menuak prestatzen, erosketak egiten, janariak prestatzen eta otorduekin lotutako zereginetan parte har dezaten bultzatu behar izango da, adinaren, ahalmenaren eta ezaugarrien arabera;

   4. ahaleginak egingo dira otorduak harremanetarako eta komunikaziorako une atseginak izan daitezen;

   5. jateko eta janaria prestatzeko leku eta denbora egokiak jarri behar izango dira;

   6. adingabeei erakutsi egin behar izango zaie elikadura-ohitura eta -trebetasun onuragarriak eta beren bilakaera unerako egokiak direnak hartzen.

1. – Haurren eta nerabeen higienearen premiak zaindu behar izango dira, eta, horretarako, beharrezkoak diren zaintzak emango zaizkie lehenengo adinetan eta heziketa egokia emango zaie nork bere burua zaintzeko ohiturak eta trebetasunak har ditzaten.

2. – Horretarako, nahitaezkoa izango da honako baldintza hauek betetzea:

   1. haur txikiek higienearen alorrean dituzten premiak behar bezala zaintzea;

   2. txikitandik sustatzea oinarrizko higiene-ohiturak har ditzaten;

   3. haurrengan eta nerabeengan higienearekiko eta norberaren itxurarekiko gustua sustatzea, autoestimuaren, duintasunaren eta norberaren erantzukizunaren sentimenduarekin lotuz;

   4. garbitzerakoan eta janzterakoan autonomia izan dezaten laguntzea;

   5. haurrengan eta nerabeengan sustatzea garbiketarako beren tresnak pertsonalak izan daitezen, elkarri trukatzea saihestuz;

   6. guztientzako erabilerako komunetan botatzeko materialez egindako garbiketa-elementuak jartzea;

   7. haur eta nerabe guztiek, baliabidean sartzen direnetik, bertan daudenean eta baliabidetik ateratzen direnean arropa eta garbitasunerako ekipo oso bat izan dezaten zaintzea;

   8. arropa hori, estiloari, kalitateari eta kantitateari dagokionez, komunitateko gainerako haurrek eta nerabeek erabiltzen dutenaren antzekoa izan dadin zaintzea;

   9. haurrei eta nerabeei laguntzea arropa garbia eta unerako eta gauzatzen ari diren jarduerarako egokia den arropa erabil dezaten, baita beren fisikoa eta adina kontuan hartuta egokia den estetikaren arabera janzten laguntzea ere, betiere beren zaletasunak errespetatuz;

   10. arropa zaintzen laguntzea;

   11. egoitza-harrerako baliabideko funtzionamendurako eta antolamendurako jarraibideak ezartzea, haurrek eta nerabeek beren higiene pertsonala pribatutasunez zaintzeko aukera izango dutela bermatuko dieten jarraibideak, hain zuzen ere.

1. – Haur edo nerabe bakoitzak loaren inguruan dituen premiak hartuko dira kontuan.

2. – Horretarako, nahitaezkoa izango da honako baldintza hauek betetzea:

   1. errutinak jarraituko dira, bai jaikitzerakoan, bai oheratzerakoan;

   2. lo dauden bitartean ikuskapena bermatzea;

   3. loaren aldaketak dituztenei edo sartu berriak direnei zaintza berezia ematea.

1. – Haurren eta nerabeen autonomia sustatu behar izango da, baita beren portaerari buruzko erantzukizunaren garapena ere.

2. – Horretarako, nahitaezkoa izango da honako baldintza hauek betetzea:

   1. eguneroko bizitza haurrek eta nerabeek ordenaren eta aurreikusgarritasunaren zentzua hartzeko eta beren portaera kontrolatu ahal izateko moduan antolatzea;

   2. helduek egoitza-ingurunean dituzten erantzukizunak eta haurrek eta nerabeek autonomia handiagoz jardun dezaketen eremuak argitzea;

   3. haurrei eta nerabeei laguntzea beren autonomia morala gara dezaten eta beren autonomia pertsonaleko eta gizarte-gaitasuneko mailak hobetuko dituzten portaera-jarraibideak gara ditzaten;

   4. parte har dezaten, lankidetzan jardun dezaten, egoerak eztabaidatu eta azter ditzaten, zentzu kritiko eraikitzailea izan dezaten, elkarrizketa gatazkak konpontzeko tresna bat izan dadin laguntzea, hori ahalbidetuko duten guneak, jarduerak eta denborak antolatuz;

   5. gero eta erantzukizun handiagoak har ditzaten ahalbidetzea eta erraztea, betiere beren gaitasunekin bat etorriz, eta beren bilakaera-unearen arabera; horretarako, norberearen gauzak zaintzeko eta besteen gauzak errespetatzeko sentimendua pizteko eta dirua erabiltzeko zereginak eman behar izango zaizkie;

   6. beren garapen pertsonal eta sozialerako egokiak ez diren portaerak aldatzen lagundu behar izango zaie; horretarako, esku hartzeak bideratuko dituzten eta haurren eta nerabeen eskubideak babestuko direla bermatuko duten prozedura argiak garatuko dira.

1. – Haurren eta nerabeen eskola- eta/edo lanbide-arloko prestakuntza sustatu behar izango da.

2. – Horretarako, honako neurri hauek hartu behar izango dira:

   1. eskolatu daitezen sustatzea, haurrek eta nerabeek dituzten premietara gehien egokitzen den eskola-testuinguruan sartzeko eta, ahal denean, eta haurren eta nerabeen goragoko interesen aurkakoa ez bada, beren ohiko ikastetxeetan egoteko ahaleginak eginez;

   2. koordinazio-loturak ezartzea egoitza-harrerako baliabidearen eta ikastetxearen artean, batez ere eskolako tutorearen eta egoitza-harrerako baliabideko erreferentzia-hezitzailearen artean, eta ahal den neurrian, jardunak bien artean koordinatzea;

   3. ikasteko ohiturak har ditzaten laguntzea;

   4. haur eta nerabe horiek prestatzeko material, gune, denbora eta estimulu egokiak izatea;

   5. haurrei eta nerabeei behar dituzten eskola-arloko eta eskolatik kanpoko laguntzak ematea;

   6. familiak eskola-jarraipenean parte har dezan laguntzea, parte-hartze hori haurraren edo nerabearen interesaren aurkakoa bada izan ezik.

1. – Nerabeak orientazio-zerbitzuetan eta laneratzeko zerbitzuetan sar daitezen lagundu behar izango da.

2. – Horretarako, honako neurri hauek hartu behar izango dira:

   1. 16 urte betetakoan, beren hezkuntzarekin edo prestakuntzarekin jarraitu behar ez duten nerabeei lan-arloko orientaziorako eta laneratzeko sarbidea sustatzea.

   2. Koordinazio-loturak ezarriko dira egoitza-harrerako baliabidearen eta lan-arloko orientazio-zerbitzuen, lana bilatzeko zerbitzuen eta laneratzeko zerbitzuen artean.

   3. Hala badagokio, nerabeei laguntza eskaintzea laneratzeko prozesuan.

1. – Haurrei eta nerabeei beren eguneroko bizitzan txertatutako jolaserako eta aisiarako esperientziak (kultura- eta kirol-arlokoak) eman behar izango zaizkie.

2. – Horretarako, honako neurri hauek hartu behar izango dira:

   1. beren estimulazio-premiei, jarduera fisikoko premiei, miaketa-premiei eta elkarrekintza ludikoen premiei erantzun behar izango zaie;

   2. komunitateko astialdirako jardueretan parte har dezaten sustatu eta lagundu behar izango da, portaera-arazoak dituzten nerabeak zaintzeko programa espezializatuen edo portaera-arazo larriak dituzten nerabeei laguntza intentsiboa emateko programa espezializatuen (parte hartze hori egokia izango ez dela irizten den programak) esparruan izan ezik; eta horretarako, koordinazio-loturak ezarri behar izango dira egoitza-harrerako baliabidearen eta komunitate-eremuko kultura- eta kirol-arloko zerbitzuen eta baliabideen artean.

   3. ahaleginak egin behar izango dira haurrek eta nerabeek adiskidetasun-loturak izan ditzaten beren adineko beste pertsona batzuekin, egoitza-harrerako baliabidean lagunen bisitak onartuz eta egoiliarrek lagunen etxeetara bisitak egin ditzaten onartuz, portaera-arazoak dituzten nerabeak zaintzeko programa espezializatuen edo portaera-arazo larriak dituzten nerabeei laguntza intentsiboa emateko programa espezializatuen (programa horietan ez da egokitzat hartzen bisita horiek sustatzea) esparruan izan ezik. Bisita horiek Banakako Esku Hartze Planean edo Banakako Hezkuntza Planean aurreikusi eta behar bezala baimendu behar izango dira.

   4. norberaren premia, zaletasun eta interesetara egokituak dauden astialdiko jardueretan parte har dezaten lagunduko da eta kultura-arloko jarduerak egin ditzaten sustatuko da;

   5. aisia-jardueretarako aurrekontu bat eduki behar izango da;

   6. beren astialdia modu autonomoan aprobetxatzeko eta antolatzeko gaitasuna hartzen lagunduko da;

   7. komenigarria bada, aisia-jarduerak banakako esku-hartze planaren edo banakako hezkuntza-planaren helburuak lortzen lagunduko duten baliabide terapeutiko gisa erabiliko dira;

   8. zirkunstantzia zehatzak kontuan izango dira, bereziki, haurren eta nerabeen adina bideoak, bideojokoak eta telebista erabiltzerakoan;

   9. haurrek eta nerabeek Interneteko baliabideak behar bezala erabiltzen dituztela bermatzeko beharrezkoak diren segurtasun-sistemak eta arauak aplikatuko dira;

   10. teknologiak beste mota bateko jarduerak egin ditzaten ez eragozten ahaleginduko dira.

1. – Haurraren edo nerabearen familia-identitateari eustea sustatu behar izango da, haurraren edo nerabearen nortasun pertsonalaren eta behar bezalako garapenaren oinarrizko elementu gisa, alde batera utzita egoitza-zaintza familia bateratzea, beste familia batean integratzea, egoitza-harrerako beste programa batera lekuz aldatzea edo emantzipazioa den.

2. – Horretarako, haurraren edo nerabearen goragoko interesak aurkakoa gomendatzen ez badu, honako neurri hauek hartu behar izango dira:

   1. Haurrak eta Nerabeak Babesteko Lurralde Zerbitzu Espezializatuak familiarekin duen esku-hartzea haurraren edo nerabearen premietara eta interesera egokitzea eta familiarekiko esku-hartzean honako alderdi hauek txertatzea: baliabideak sartzeko arrazoiak onartzea, guraso-trebetasunak hartzea edo hobetzea, norberaren gaitasuna eta gizarte-arlokoa hobetzea, familiaren arteko harremanak hobetzea, laguntza sozialeko eta emozionaleko sareetarako sarbidea izatea, komunitate-laguntzetarako sarbidea izatea;

   2. familien partaidetza eta inplikazioa sustatzea;

   3. haurrak edo nerabeak bere familiarekin harremana izan dezan laguntzea eta sustatzea lotura afektiboei eustearren eta bateratzen laguntzearren, familietako harreman motak eta maiztasunak banakako esku-hartze planean edo banakako hezkuntza-planean ezarriz, eta, haurraren edo nerabearen interesaren aurka ez badago, harremanen pribatutasuna bermatuko da;

   4. haurra edo nerabea ez ezik familia ere prestatu behar izango da zentrotik ateratzeko prozesuari aurre egiteko, baldin eta hori bada egoitza-zaintzaren helburua, eta zentrotik ateratzen denean beharrezkoak diren laguntzak eta jarraipenak eman eta egingo zaizkio.

1. – Gizarte- eta kultura-arloko identitateari eusten lagundu behar izango da, identitatearekiko errespetua baita hezkuntza-ereduak izan behar duen printzipioetako bat.

2. – Horretarako, haurraren edo nerabearen goragoko interesaren aurkakoa ez bada, honako neurri hauek hartu behar izango dira:

   1. gizarte- eta kultura-arloko identitateari eusten laguntzea, haurrari edo nerabeari lagunduz hurbiltasun hori ahalbidetuko dioten material didaktikoak edo kultura-arloko materialak eskuratzen eta jardueretarako sarbidea izan dezan;

   2. egoitza-harrerako baliabidearen antolaketari dagokionez, gizarte-eta kultura-arloko identitatea errespetatuko dela bermatzea, eta, zehazki, janarietan, gune indibidualen dekorazioan eta material didaktikoetan.

1. – Haurrak eta nerabeak komunitatean integra daitezen eta bertan parte har dezaten lagundu behar izango da.

2. – Horretarako, haurraren edo nerabearen goragoko interesaren aurkakoa ez bada, honako neurri hauek hartu behar izango dira:

   1. haurraren edo nerabeen premiei hobekien erantzuten dieten komunitate-baliabideen erabilera sustatu eta antolatu behar izango da, portaera-arazoak dituzten nerabeak zaintzeko programa espezializatuen edo portaera-arazo larriak dituzten nerabeei laguntza intentsiboa emateko programa espezializatuen (programa horietan komenigarritzat hartzen da partaidetza hori) esparruan;

   2. egoitza-harrerako baliabidea identifikatzen duten estigmatizazio-zeinuak saihestea egoiliarrei edo hezitzaileei;

   3. hezkuntza-, kultura, edo aisia-arloetan erabilitako komunitate-baliabideak dibertsifikatzea;

   4. haurrari eta nerabeari eta beren familiari laguntzea komunitate-baliabideak behar bezala erabil ditzaten;

   5. erabilitako komunitate-baliabideen profesionalekin koordinazioan lan egitea, baliabide horiek hartutako haurren eta nerabeen premietara nolabait egokitzeko ahaleginak eginez.

1. – Ingurune inklusiboa eta zaintza egokia eman behar izango zaie premia bereziak dituzten haurrei eta nerabeei, bai minusbaliotasunak dituztelako, bai haur edo nerabe horiek jaio diren gizarte- eta familia-arloko ingurunetik eratorritako bestelako mugak dituztelako.

2. – Horretarako, eta haurraren edo nerabearen goragoko interesaren aurkakoa ez bada, honako neurri hauek hartu behar izango dira:

   1. EAEko hizkuntza ofizialetako bakar bat ere ama-hizkuntza ez duten edo komunikatzeko metodo alternatiboak behar dituzten haurrei eta nerabeei laguntza eskainiko zaie, eta ahaleginak egingo dira beren premiak eta nahiak adieraz ditzaten eta egoitza-harrerako baliabideko langileekin eta taldeko gainerako haur eta nerabeekin hitz egin dezaten;

   2. sexu-abusuak pairatu dituzten edo beste pertsona batzuei sexu-abusuak egin dizkieten haurrei eta nerabeei laguntza emango zaie;

   3. haur errefuxiatuei edo babes politiko-egoeran dauden haurrei laguntza emango zaie, betiere kontuan izanda jatorrizko herritik ihes egitea eragin zieten berezitasunak;

   4. nerabe haurdunei eta amak edo aitak diren nerabeei laguntza emango zaie;

   5. premia bereziak dituzten haur eta nerabeek hezkuntza- jolas- eta osasun-arloko kanpoko zerbitzu egokiagoak edo beste mota batekoak baliatuko dituzte; egoitza-harrerako baliabideko langileek kontsultatutako espezialistek ezartzen dituzten jarduerak gauzatzen lagunduko dute.

1. – Egoitza-harrerako baliabideetako profesionalek egoitza-zaintzaren esparruak gauzatu behar dituzten eginkizunak betetzeko egokia den hezkuntza-arloko harremana izateko gaitasuna garatu behar izango dute, haurren eta nerabeen premietara egokitu behar izango dute, baita egoitza aukeratzea eta aplikatutako egoitza-harrerako programa hautatzea ekarri duten arrazoietara ere.

2. – Profesionalek behar bezalako tratu egokia eta bilakaera-unera egokitutako tratua eskaini behar izango diete haurrei eta nerabeei, bai horiekin hitz egiten dutenean, bai kontaktu fisikoan.

3. – Profesionalek irizpide-batasuna dutela erakutsi behar izango dute zaintzaren inguruko jarraibideei eta jarrerei dagokienez, eta gatazkak eta indarkeriazko portaerak edo portaera oldarkorrak prebenitzeari, saihesteari edo tratatzeari dagokionez.

4. – Profesionalek behar bezalako oreka lortu behar dute portaera egokien errefortzu positiboaren eta portaera ez egokiei hezkuntza-neurri zuzentzaileak aplikatzearen artean.

Haurren eta nerabeen babesa bermatzearren, nahitaezkoa izango da honako neurri hauek ezartzea:

• bisita-eskubidea behar bezala gauzatzen dela bermatzeko kontrol-sistema bat;

• praktika profesionalak egokiak ote diren kontrolatzeko sistema bat;

• sexu-abusuko egoerak prebenitzeko eta atzemateko sistema bat;

• baimenik gabeko absentzien kasuetarako jardun-protokolo bat;

• arrisku anitzetarako aseguru-poliza bat.

1. – Bisiten kontrol-sistemak honako ezaugarri hauek ditu:

   1. ahaideen bisitak banakako esku-hartze planean edo banakako hezkuntza-planean ezarritako harreman-araubidera egokitu behar izango dute, eta ebazpen judizialen batek edo administrazio-ebazpenen batek horrelakorik ezartzen badu, edo haurraren edo nerabearen intereserako nahitaezkoa dela irizten bada, behar bezalako gainbegiratzearekin egingo dira;

   2. hurbileko beste pertsona batzuen (haurraren edo nerabearen jatorri-erreferentziaren ingurune sozialekoak hartzen dira halakotzat) bisitak behar bezala baimendu behar izango dira;

      a) eta b) idatz-zatietan azaltzen diren bisita guztiak erregistro batean jaso behar izango ditu, bai iristen direnean, bai alde egiten dutenean, une bakoitzean egoitza-harrerako baliabideko arduradun-lanak egiten ari den langileak;

2. – Halaber, egoitza-harrerako baliabidean hartuta dagoen adingabeak aldi baterako irteerak egin ahal izango ditu bere gurasoekin, beste ahaide batzuekin edo jatorrizko ingurune sozialeko beste pertsona esanguratsu batzuekin denboraldi bat igarotzeko, betiere irteera horiek banakako zaintza-planean edo banakako hezkuntza-arloko esparruan aurreikusita eta baimenduta badaude, eta administrazio-ebazpen batetik edo ebazpen judizial batetik eratorriak badira.

1. – Praktika profesionalek Dekretu honetan, egoitza-harrerako baliabideko hezkuntza-proiektuan eta, oro har, eta, hala badagokio, zaintzan esku hartzen duten lanbideen berezko kode deontologikoetan biltzen diren jarraibideetara egokitu behar izango dute.

2. – Praktika profesionalak egokiak ote diren kontrolatzeko sistemak honako ezaugarri hauek izango ditu:

   1. langileak aukeratzeko aplikatzen den sistema egoitza-eremuan babes-eginkizunak gauzatzeko egokiak diren ezaugarriak dituzten profesionalak kontrolatzera bideratuko da, 110. artikuluan aurreikusitako baldintzen arabera;

   2. hezkuntza-talde osoak bilerak egin behar izango ditu aldizka kasuak berrikusteko eta aplikatzerakoan sortzen diren zalantzak argitzeko;

   3. praktika profesionalak egokiak ote diren aztertu behar izango da 112. artikuluan azaltzen den gainbegiratze-sistemaren esparruan, baita egoitza-harrerako baliabidearen ebaluazioak eta ikuskatze-prozedurak ere egokiak ote diren.

Sexu-abusuko egoerak prebenitzeko eta atzemateko sistemak honako ezaugarri hauek izango ditu:

1. hartutako haurren edo nerabeen (bai egoitza-harrerako baliabidearen menpekoak, bai beste erakunde publiko edo pribatu batzuen menpekoak) zaintzan parte hartzen duten profesionalek berehala jakinarazi behar izango dute administrazio-agintaritza eskudunean edo Fiskaltzan haurrak eta nerabeak babesteko esparruan eginkizunak betetzeko profesionala gaitasunik gabe uzteko kausa izan litezkeen egoerei buruz susmoren bat dago;

2. egoitza-harrerako baliabideek protokolo batzuk eduki behar izango dituzte eta protokolo horiek jardun-prozedurari buruzko jarraibideak emango dituzte haurren edo nerabeen inguruneko helduek edo haurrek edo nerabeek sexu-abusuko portaerak daudelako susmoa badute edo portaera horiek daudela baldin badakite; egoitza-harrerako baliabideko profesional guztiek eta boluntario-lanak egiten dituztenek izango dute ildo horien berri;

3. egoitza-harrerako baliabideko goragokoek edo baliabide horietatik kanpoko profesionalek sexu-abusuak egiten dituztelako susmoa badago aplika litezkeen jarduteko jarraibideak izango dituzte egoitza-harrerako baliabideko profesionalek;

4. nahitaez bermatu behar izango da haurrek eta nerabeek badakitela norengana joan behar duten egoitza-harrerako baliabide barruan edo baliabidetik kanpo, sexu-abusuko egoera dagoela susmatzen badute, baldin badakite edo pairatu badute;

5. argi eta garbi jarri behar izango da larrialdiko telefono bat, baita Eusko Jaurlaritzaren Haur eta Nerabeentzako Informazio eta Orientabide Zerbitzuaren, eta Haurrak eta Nerabeak Babesteko Lurralde Zerbitzu Espezializatu eskudunaren telefonoa ere, haurren eta nerabeen eskura dauden telefono-zenbaki guztien ondoan;

6. behar izanez gero, langileek beren ustez egokiak diren profesionalengana jo ahal izango dute biktimari edo sexu-abusua egin duen haurrari edo nerabeari, baldin eta beste egoiliar bat bada, laguntza psikologikoa emateko; horretarako, beste egoitza-harrerako baliabide batera eraman behar izango da berehala, salbu eta baliabide horretan bertan egotea justifikatzen bada abusua egin duenaren nahiz biktimaren interesa kontuan hartuta;

7. profesionalek laguntza berezia eman behar izango diete sexu-abusuen biktimak edo egileak izan diren haur eta nerabe egoiliarrei, gertakari berriak prebenitzearren;

8. Haurrak eta Nerabeak Babesteko Lurralde Zerbitzu Espezializatuko profesional batek gutxienez hiru hilean behin egingo die bisita egoitza-harrerako haurrei eta nerabeei; programa espezializatuen kasuan bisitak hilean behin egingo dira;

9. Fiskaltzak gutxienez sei hilean behin egingo die bisita egoitza-harrerako haurrei eta nerabeei.

Baimenik gabeko absentziaren bat gertatzen den kasuetarako -bai haurrak edo nerabeak egoitza-harrerako baliabidea utzi duelako baimenik gabe, bai irteteko baimen baten ondoren adierazitako egunean eta orduan itzuli ez delako- jardun-protokoloak honako ezaugarri hauek izango ditu:

1. Egoitza-harrerako baliabideetako profesionalek aplikatu ahal izango dituzten jardun-ildo batzuk ezarriko dira idazki bidez, eta honako eduki hauek izango dituzte:

   • haurra edo nerabea bilatzen hasteko hartu behar diren neurriak;

   • poliziari, haurrentzako zerbitzuari eta, haurraren edo nerabearen goragoko interesaren aurkakoa ez bada, bere amari eta aitari gertaeraren berri emateko hartu behar diren neurriak;

   • haurra edo nerabea egon litekeen lekuari buruzko informazioa (egoiliarren edo ikaskideen bitartez, esaterako) lortzeko eta haren ongizatea bermatzeko, eta, hala badagokio, aurretik poliziari emandako informazioa osatzeko hartu behar diren neurriak;

   • lokalizatu ondoren haurra edo nerabea jasotzeko moduari buruzkoak;

   • egoitza-harrerako baliabidearen erantzuna adingabea itzultzen denean.

     Neurri horiek Eusko Jaurlaritzaren Herrizaingo Sailarekin lankidetzan egindako protokoloa osatuko dute, zazpigarren xedapen gehigarrian aurreikusitakoaren arabera, hango edukiak kasuaren zirkunstantzietara egokituko dira, bereziki haurrak edo nerabeak itzultzeko asmorik ez duelako susmo arrazoituak badaude.

2. Egoitza-harrerako baliabideak behar bezala dokumentatuko ditu baimenik gabeko absentzia-kasu guztiak.

Egoitza-harrerako baliabideek arrisku anitzetarako aseguru-poliza bat izango dute, bereziki, suteen aurkako eta erantzukizun zibileko aseguru bat, erabiltzaileen eta profesionalen alde edo hirugarrenen alde egon litezkeen kalte-ordainak estaliko direla bermatzen duena. Kalte-ordain horiek baliabidean edo baliabidetik kanpo profesionalek edo hartutako haurrek eta nerabeek gauzatutako jardueren esparruan jazotako gertakarien edo zirkunstantzien ondorioz sor litezke.

1. – Egoitza-harrerako baliabideak antolaketarako eta kudeaketarako ezarritako eredu bat eduki behar izango du, eta eredu horretan honako hauek gauzatu behar izango dira:

   1. kudeaketaz eta antolaketaz nor arduratuko den esanbidez definitu behar izango da;

   2. profesional bakoitzaren eginkizunak eta erantzukizunak definitu behar izango dira;

   3. hartutako haur edo nerabe bakoitzaren erreferente izango den hezitzaile- edo profesional-sistema bat ezarri behar izango da, bereziki haur edo nerabe horri jarraipena egiteaz arduratuko dena. Sistema horrek honako ezaugarri hauek izango ditu:

      • erreferentziako hezitzailea izendatzen denean haurrak edo nerabeak izan litzakeen berariazko premietara edo baldintzetara egokitzen dela kontuan hartuko da. Izendapen hori egoitza-harrerako baliabide bakoitzak horretarako ezartzen dituen irizpideen arabera egingo da;

      • izendatutako profesionala egoitza-harrerako baliabideko erreferentziako heldua izango da haurrarentzat edo nerabearentzat; hortaz, pertsona hori egokia dela egiaztatu ondoren, egonkorra izateko ahaleginak egingo dira, eta, ahal den neurrian, eta haurraren edo nerabearen premiek eta zirkunstantziek beste zerbait eskatzen ez duten bitartean, haurra edo nerabea egoitza-harrerako baliabide berean edo unitate berean dagoen bitartean eutsiko zaio izendapen horri;

   4. egoitza-harrerako baliabidean parte hartzeko organoaren osaera eta bere eginkizunak definitu behar izango dira;

   5. egoitza-harrerako baliabidearen eta Haurrak eta Nerabeak Babesteko dagokion Lurralde Zerbitzu Espezializatuaren artean aldizka koordinatzeko bide formalak definitu behar izango dira.

2. – Argi eta garbi ezarri behar izango da txanda-sistema, eta idatzita geratuko da haurren eta nerabeen eskueran.

3. – Gaueko txandan lan egiten duten profesionalek nahitaez esleitu behar izango zaizkie zaintzako eta administrazioko eginkizunak gauzatzeko erabiliko duten beren lan-denbora.

4. – Zaintzaren antolaketak bermatu behar izango du haurrek eta nerabeek dituzten premiak behar bezala beteko direla uneoro, eta zaintza-txanden artean informazioa trukatzeko sistema bat egongo da.

5. – Kexak azaltzeko prozedura (barrukoa eta kanpokoa) argi eta garbi ezarri behar izango da, eta prozedura horren kopia bat haurren eta nerabeen eskueran egongo da, eta idazketa eta diseinua haur eta nerabeek ulertzeko duten gaitasunera egokituko dira.

6. – Dokumentazioa eta administrazio-erregistroak egiteko eta kontserbatzeko sistema eta haietara sarbidea izateko arauak argi eta garbi ezarri behar izango dira.

7. – Patrikako dirua administratzeko sistema bat ezarri behar izango da, baita norberaren balioko objektuak segurtasun-baldintzetan zaintzeko sistema bat ere.

8. – Era berean, eguneroko bizitza antolatzeko eta adingabeen ezaugarriak, adina eta premiak kontuan hartuta adingabe horien gainbegiratzea eta kontrola bermatzeko egutegiak ezarri behar izango dira, betiere hezkuntza-irizpideen pean.

Egoitza-zaintzarako programak garatzeko, egoitza-harrerako baliabideek honako dokumentazio hau eduki behar izango dute gutxienez:

1. egoitza-harrerako baliabidearen hezkuntza-proiektua;

2. jardueren programazioa arloka;

3. barne-erregimenari buruzko arautegia edo bizikidetza-gida;

4. urteko kudeaketa-plana;

5. haurren eta nerabeen banakako espedienteak;

6. administrazio-erregistroak;

7. memoria.

Egoitza-harrerako baliabidearen hezkuntza-proiektua helburuen eta eginkizunen deklarazioa izango da, profesional taldeak adostua eta Haurrak eta Nerabeak zaintzeko Lurralde Zerbitzu Espezializatuak onartua. Honako ezaugarri hauek izango ditu:

1. Bere edukiak argi eta argi definitu behar izango ditu alderdi hauek:

   • egoitza-harrerako baliabideen helburuak eta eginkizunak;

   • zaindutako herritarren ezaugarriak: egoitza-harrerako baliabidean zaintzen direnen adin-tartea; sexua; ezinduak edo premia bereziak dituzten pertsonak hartzen ote dituen adierazi behar izango du; zainduko dela aurreikusten den beste edozein egoera berezi adierazi behar izango da;

   • plaza kopurua;

   • egoitza-harrerako baliabideko zuzendaritzako postua betetzen duen pertsonaren edo arduradunaren izena;

   • antolaketa-egitura eta erantzukizunen banaketa;

   • langileei eskatzen zaien lanbide-kualifikazioa;

   • langileen prestakuntza eta gainbegiraketa;

   • hezkuntza-eredua eta metodologia-ildoak, eta, bereziki, banakako esku-hartze plana edo banakako hezkuntza-plana aipatuko da;

   • aplikatu diren egoitza-zaintzako programen ezaugarriak;

   • proiektua ebaluatzeko metodoa.

2. Helburuen eta eginkizunen deklarazio hau gutxienez urtean behin berrikusiko da Haurrak eta Nerabeak Babesteko dagokion Lurralde Zerbitzu Espezializatuan jakinaraziko da deklarazio horretan egiten den aldaketa esanguratsu oro, onartzeko.

3. Langileen, haurren eta nerabeen, eta horien goragoko interesaren aurkakoa ez bada, horien familien eskueran jarri behar izango da deklarazio horretako alderdi nagusiak biltzen dituen informazio-liburuxka bat, bere idazkera eta diseinua adingabeek ulertzeko duten gaitasunera egokituta.

Barne-erregimenari buruzko arautegiak edo bizikidetza-gidak egoitza-harrerako baliabidean aplika daitezkeen arauak bildu behar izango ditu, eta honako ezaugarri hauek izango ditu:

1. Bere edukiak honako hauek arautuko ditu:

   • haurren eta nerabeen eta profesionalen eskubideak eta betebeharrak;

   • bizikidetza-arauak;

   • funtzionamendurako arauak, onarpenen eta bajen araubidea, egoitza-harrerako baliabideko ordutegiak eta zerbitzuak barne;

   • larrialdiko sarreretarako prozedura-arauak, baldin eta baliabideak larrialdiko harrera-programa eskaintzen badu;

   • haurrek eta nerabeek, eta, hala badagokio, horien familiek parte hartzeko bideak eta eremuak;

   • haurrak eta nerabeak babesteko neurriak;

   • egoitza-harrerako baliabideak izan behar dituen jardun-protokoloak:

   • adingabea egoitza-harrerako baliabidean sartzeko eta hartzeko protokoloa;

   • baimenik gabeko absentzien, ihesen edo desagertzeen kasuan, ospitaleratzeen eta jardun judizialen eta/edo sartze judizialen kasuan gauzatu behar diren jardunak eta komunikazioak biltzen dituen gorabeheren protokoloa;

   • haurrei eta nerabeei zaintza estuak egiteko protokoloa;

   • immobilizazio fisiko pertsonalerako eta isolamendurako neurriak aplikatzeko protokoloa;

   • profesionalei eraso egiten bazaie, jardun-protokoloa;

   • sexu-abusua izan delako susmoa edo ebidentzia badago, jardun-protokoloa;

   • tratu txarra izan delako susmoa edo ebidentzia badago, jardun-protokoloa;

   • larrialdiko egoeretarako jardun-protokoloa.

   • kexetarako eta iradokizunetarako prozedura;

   • administrazio publiko eskudunarekin eta Fiskaltzarekin komunikatzeko araubidea;

   • kudeaketa-organoen funtzionamendua;

   • dokumentazioaren kudeaketa, mantentzea eta horretarako sarbidea.

2. Langile eta haur nahiz nerabe guztiek araubidearen edo bizikidetza-gidaren kopia bana eduki behar izango dute.

3. Araubide hori zaintza-taldeak egin behar izango du, eta ahalbidetuko dute haurrek eta nerabeek parte har dezaten hori egiten; horretaz gain, hizkera errazean idatzi behar izango da, haurrek eta nerabeek erraz ulertuko duten moduan.

Kudeaketarako urteko planak, baliabidean aplikatzen diren egoitza-harrerako programetako bakoitzean, epe laburrean esku hartzeko lehentasunak ezarri behar izango ditu, egin den azken ebaluazioaren emaitzak oinarri hartuta, eta plana garatzeko aurreikusitako aurrekontu ekonomikoa eta jarduera-programa erantsi behar izango dira.

Banakako espedienteak haur eta nerabe bakoitzari buruzko dokumentazioa bildu behar izango du, eta honako ezaugarri hauek izango ditu:

1. Honako dokumentu hauek izan behar izango ditu:

   • Haurrak eta Nerabeak Babesteko dagokion Lurralde Zerbitzu Espezializatuak egindako banakako zaintza-plana edo dagokion plana eta ebaluazioa;

   • hasierako ebaluazioa;

   • banakako esku-hartze plana edo banakako hezkuntza-plana;

   • banakako esku-hartze planari edo banakako hezkuntza-planari jarraipena egiteko edo hura berrikusteko dokumentuak;

   • haurraren edo nerabearen dokumentuak lege-, osasun- edo eskola-arlokoak;

   • administrazio-ebazpenak edo ebazpen judizialak, egoitza-harrerako baliabidean sartzea eta/edo bisita-erregimena onartzen dutenak.

2. Dokumentazio pertsonala bere konfidentzialtasuna bermatuko duten baldintzetan gorde behar izango da, eta zaintzan zuzenean sartuta dauden profesionalek, Haurrak eta Nerabeak Babesteko dagokion Lurralde Zerbitzu Espezializatuak, Ikuskapen Zerbitzuak, Epailetzak, Fiskaltzak, Arartekoak, Haurrentzako Defentsak bakarrik baliatu ahal izango dute dokumentazio hori, eta, egokitzat hartzen bada, haurrek eta nerabeek.

   Nolanahi ere, aurrekoa ulertu behar izango da urtarrilaren 15eko Adingabearen Babes Juridikoaren 1/1996 Legearen -Kode Zibila eta Prozedura Zibilaren Legea partzialki aldatzen duena- 22. artikuluan bere zaintzapean edo tutoretzapean adingabeak dituzten erakunde publikoetarako ezartzen duen obligazioa alde batera utzi gabe. Adierazitako obligazio horren arabera, gurasoei, tutoreei edo zaintza gauzatzen dutenei haurren eta nerabeen egoerari buruzko informazioa eman behar izango zaie, betiere hori debekatzen duen ebazpen juridikorik ez badago, eta, halaber, gurasoek beren seme-alaben egoerari buruzko informazioa eskatzeko duten obligazioa alde batera utzi gabe, betiere Kode Zibilaren 172.2 artikuluan aurreikusitakoarekin bat etorriz.

3. Haurrak eta Nerabeak Babesteko Lurralde Zerbitzuek idazki bidez jaso behar izango dituzte dokumentuak mantentzeari, antolatzeari eta desegiteari buruzko irizpideak.

1. – Egoitza-harrerako baliabideek honako erregistro hauek eduki behar izango dituzte gutxienez:

   1. erabiltzaileen erregistroa;

   2. profesionalen erregistroa;

   3. funtzionamenduari buruzko eguneroko erregistroa;

   4. gorabeheren erregistroa;

   5. kexen erregistroa;

   6. iradokizunen erregistroa;

   7. jarritako neurrien erregistroa;

   8. portaera oso larrien kasuan, hezkuntza-neurri zuzentzaileak aplikatzeko erregistroa;

   9. bisiten erregistroa;

   10. sendagaiak emateko erregistroa;

   11. dirua eta baliozko objektuak gordetzeari buruzko erregistroa;

   12. menuen erregistroa;

   13. miaketa pertsonalen eta gauzen miaketen erregistroa;

   14. Adingabeen Epaitegian irekita dauden espedienteen eta eremu horretan jarritako neurrien erregistroa;

   16. administrazio-eremuko espediente zehatzaileen erregistroa;

   17. baimenik gabeko absentzien erregistroa.

2. – Erregistroak ordenatuta, eguneratuta eta segurtasun-baldintzetan eduki behar izango dira, datuen konfidentzialtasunarekiko errespetua bermatzeko. Haurrak eta Nerabeak Babesteko dagokion Lurralde Zerbitzu Espezializatuaren, Ikuskapen Zerbitzuaren, Epailetzaren, Fiskaltzaren, Arartekoaren eta Haur eta Nerabeentzako Defentsa Bulegoaren eskueran egon behar izango dute.

Egoitza-harreraren kalitatearen etengabeko hobekuntza bermatzearren, egoitza-harrerako baliabideetan aldizkako ebaluazio-sistema bat txertatu behar izango da, eta autoebaluazio-modalitateak kanpoko ebaluazioekin nahasi ahal izango dira. Emaitzak alderatuko direla bermatzearren, Haurrak eta Nerabeak Babesteko Lurralde Zerbitzu Espezializatuek sustatuko dute dagokion Lurralde Historikoko egoitza-sare osoan ebaluazio-sistema bera aplikatzea.

1. – Haurrak eta Nerabeak Zaintzeko eta Babesteko otsailaren 18ko 3/2005 Legearen 79. artikuluan aurreikusitakoarekin bat etorriz, Foru Aldundiek gutxienez sei hilean behin, eta, hala badagokio, zirkunstantziek eskatzen duten guztietan ikuskatuko dituzte egoitza-harrerako baliabideak.

2. – Era berean, Fiskaltzak, Kode Zibilaren 174. artikuluan ezarritakoarekin bat etorriz, haurrak eta nerabeak hartzera bideratutako egoitza-harrerako baliabide guztiak zaindu behar izango ditu.

3. – Egoitza-harrerako baliabideek ikuskapen-txostenetan biltzen diren aginduak erantsi behar izango dizkiote zaintza-sistemari eta, ahal den neurrian, osagarri gisa bertan biltzen diren gomendioetara egokitu behar izango dute.

1. – Bizikidetza-araua Dekretu honetako II. tituluan biltzen diren eskubideek eta betebeharrek ezarriko dute.

2. – Egoitza-harrerako baliabideetako langileek bizikidetza-ereduarekin bat datozen jarrerak bultzatuko dituzte. Portaera horien errefortzu positiboa hezkuntza-neurri zuzentzaileak, haurrek edo nerabeek beren portaera alda dadin sustatzeko tresna gisa, aplikatzeko ahalmenaren gainetik egongo da.

3. – Ondorengo artikuluan arautuko den portaera desegokiren bat badago, egoitza-harrerako baliabideetako langileek 97. artikuluan xedatzen diren hezkuntza-neurri zuzentzaileetara jo behar izango dute eta 98. artikuluan definitzen diren aplikazio-jarraibideetara egokitu behar izango dute.

1. – Egoitza-harrerako baliabideetan hezkuntza-neurri zuzentzaileak aplikatu ahal izango zaizkien portaerak edo ez-betetzeak arinak, larriak edo oso larriak izango dira.

2. – Honako hauek izango dira portaera edo ez-betetze arinak:

   1. Higiene pertsonalaren edo kolektiboaren, elikaduraren ohiturak edo ordutegiak, edo egoitza-harrerako baliabideko funtzionamendu-arauetan zehazten diren beste batzuk ez betetzea, betiere baliabideko bizitzan eta bizikidetza ordenatuan aldaketarik eragiten ez bada.

   2. Egoitza-harrerako baliabideari atxikitako langileek oharrak edo argibideak ez betetzea, baldin eta egoitza-harrerako baliabideko bizitzan eta bizikidetza ordenatuan aldaketarik eragiten ez badu.

   3. Egoitza-harrerako baliabide barruko eta hortik kanpoko edozeini errespetua eta begirunea arinki galtzea.

   4. Egoitza-harrerako baliabideko barne-funtzionamendurako arauek debekatzen ez dituzten gauzen edo substantzien gehiegizko erabilera egitea eta modu kaltegarrian erabiltzea.

   5. Arretarik edo konturik ez izateagatik, egoitza-harrerako baliabideak hartutako haurren edo nerabeen eskura jartzen dituen aretoetan, materialetan edo objektuetan edo beste pertsona batzuen gauzetan kalteak egitea.

   6. Arretarik edo konturik ez izateagatik, egoitza-harrerako baliabidetik kanpo dauden hornikuntzetan kalteak egitea, bai hiri-altzariak badira, bai bestelako higiezinen hornikuntza bada.

   7. Udal-araudia edo indarreko beste arau batzuk arinki ez betetzea.

3. – Honako hauek izango dira portaera edo ez-betetze larriak:

   1. Higiene pertsonalaren edo kolektiboaren, elikaduraren ohiturak edo ordutegiak, edo egoitza-harrerako baliabideko funtzionamendu-arauetan zehazten diren beste batzuk larriki edo behin eta berriz ez betetzea, betiere baliabideko bizitzan eta bizikidetza ordenatuan aldaketarik eragiten bada.

   2. Egoitza-harrerako baliabide barruko eta hortik kanpoko edozeini errespetua eta begirunea larriki eta behin eta berriz galtzea.

   3. Beste haur edo nerabe batzuk zirikatzea gehiegikeria kolektiboak gauzatzeko, horiek parte har dezaten lortu gabe.

   4. Egoitza-harrerako baliabidean barne-funtzionamenduko arauek debekatzen dituzten objektuak edo substantziak sartzea, izatea, erabiltzea, kontsumitzea edo objektu edo substantzia horiek baliabidetik ateratzea lortzea.

   5. Egoitza-harrerako baliabideak hartutako haurren eta nerabeen eskura jartzen dituen aretoetan, materialetan edo objektuetan edo beste pertsona batzuen gauzetan hirurehun eurotik beherako kalteak egitea nahita.

   6. Egoitza-harrerako baliabidetik kanpo dauden hornikuntzetan hirurehun eurotik beherako kalteak egitea nahita, bai hiri-altzariak badira, bai bestelako higiezinen hornikuntza bada.

   7. Udal-araudia edo indarreko beste arau batzuk larriki ez betetzea.

   8. Egoitza-harrerako baliabideari atxikitako langileek, beren eginkizunak betez, emandako oharrak edo argibideak ez betetzea, baldin eta egoitza-harrerako baliabideko bizitzan eta bizikidetza ordenatuan aldaketarik eragiten badu.

   9. Berri edo datu faltsuak zabaltzea egoitza-harrerako baliabidearen martxa egokia hondatzeko asmoz.

   10. Egoitza-harrerako baliabide barruan debekatuta dauden guneetara edo sarbide mugatuko guneetara sartzea dagokion baimenik izan gabe.

   11. Egoitza-harrerako baliabideak hartutako haurrentzat eta nerabeentzat antolatzen dituen jardueretara ez joatea kausa justifikaturik gabe, jarduera horietatik bidaltzea edo jarduera horietatik dagokion baimenik gabe alde egitea.

   12. Egoitza-harrerako baliabidetik modu agerikoan ihes egiteko ahaleginak egitea.

   13. Baimendutako aldi baterako irteera baten ondoren egoitza-harrerako baliabidera ez itzultzea ezarritako egunean eta orduan, eta gau bat baliabidetik kanpo igarotzea.

   14. Egoitza-harrerako baliabidetik ihes egitea, eta gutxienez gau bat edo bi kanpoan ematea.

   16. Hezkuntza-neurri zuzentzaile bat betetzeari uko egitea.

4. – Honako hauek izango dira portaera edo ez-betetze oso larriak:

   1. Egoitza-harrerako baliabide barruko pertsona oro jotzea, mehatxatzea edo beldurraraztea.

   2. Borroketan, erasoetan eta anabas kolektiboetan parte hartzea edo horiek egin ditzaten zirikatzea, baldin eta gertatu badira.

   3. Egoitza-harrerako baliabidetik ihes egitea edo ihes egiten laguntzea, edo baimen baten edo jarduera baten ondoren baimendutako egunean ez itzultzea baliabidera, eta gutxienez 3 gau egoitza-harrerako baliabidetik kanpo ematea.

   4. Egoitza-harrerako baliabideari atxikitako langileek, beren eginkizunak betez, eman dituzten oharrak edo argibideak ez betetzea modu aktiboan eta behin eta berriz.

   5. Egoitza-harrerako baliabideak adigabeen eskura jartzen dituen aretoetan, materialetan edo objektuetan edo beste pertsona batzuen gauzetan hirurehun eurotik gorako kalteak egitea nahita.

   6. Egoitza-harrerako baliabidetik kanpo dauden hornikuntzetan hirurehun eurotik gorako kalteak egitea nahita, bai hiri-altzariak badira, bai bestelako higiezinen hornikuntza bada.

   7. Udal-araudia edo indarreko beste arau batzuk oso larriki ez betetzea.

   8. Egoitza-harrerako baliabidetik objektuak, materialak edo gauzak, edo norberarenak ez diren gauzak kentzea.

   9. Egoitza-harrerako baliabidean edari alkoholdunak, droga toxikoak, gai psikotropikoak edo estupefazienteak sartzea, edukitzea edo kontsumitzea, medikuak aginduta bada izan ezik.

   10. Portaera desegoki larri bat egiteagatik aplikatu zaion hezkuntza-neurri zuzentzailea betetzeari uko egitea.

1. – Aurreko artikuluan araututako portaerek edo ez-betetzeek ekarriko dute hezkuntza-neurri zuzentzaileak aplikatzea; neurri horiek hezkuntza-arloko edukiak eta zereginak izango dituzte funtsean eta ezin izango dute ekarri, zuzenean edo zeharka, gorputz-zigorrik, jaten ez ematea, ahaideek bisitatzeko eskubidea kentzea, hitzezko edo idazki bidezko komunikazioak kentzea, derrigorrezko hezkuntzarako eskubidea kentzea eta ikastetxera joateko eskubidea kentzea edo osasun-laguntza izateko eskubidea kentzea. Halaber, ezin izango da adingabearen duintasuna eraso.

2. – Portaera arinengatik honako hezkuntza-neurri zuzentzaile hauek aplikatu ahal izango dira:

   1. Ohartarazpena.

   2. Ohiko aisia-jarduerak edo jolas-jarduerak egitea galaraztea egun batean gehienez ere.

   3. Taldetik bereiztea ordubetez gehienez ere, baina heldu batekin egongo da eta hark gainbegiratuko du.

3. – Portaera larriengatik honako hezkuntza-neurri zuzentzaile hauek aplikatu ahal izango dira:

   1. Asteburuan gauzatzen diren aisia- edo jolas-jarduerak egitea galaraztea astebetez gehienez ere.

   2. Egoitza-harrerako baliabidean normalean egin behar dituen jarduerez gain, beste jarduera osagarri batzuk egitea, haurraren edo nerabearen interesekoak eta kolektibitatearen interesekoak, astebetez gehienez ere.

   3. Aldizka-aldizka jasotzen duen diru-kopurua ez ematea edo zati bat atxikitzea bi astez gehienez ere.

   4. Aldizka-aldizka jasotzen duen diru-kopuruaren zati batekin egindako kalteak konpontzen edo lapurtutako objektuak itzultzen laguntzea.

   5. Taldetik bereiztea egun batez gehienez ere, baina heldu batekin egongo da eta hark gainbegiratuko du.

4. – Portaera oso larriengatik honako hezkuntza-neurri zuzentzaile hauek aplikatu ahal izango dira:

   1. Asteburuan gauzatzen diren aisia- edo jolas-jarduerak egitea galaraztea hilabetez gehienez ere.

   2. Zentroan bertan normalean egin behar izaten dituzten jarduerez gain, beste jarduera batzuk egitea, adingabearen eta kolektibitatearen interesekoak, hamasei egunetik hilabete batera bitarteko gehieneko epean.

   3. Aldizka-aldizka jasotzen duen diru-kopurua ez ematea edo horren zati bat atxikitzea hiru astez gehienez ere.

   4. Aldizka-aldizka jasotzen duen diru-kopuruaren zati batekin egindako kalteak konpontzen edo lapurtutako objektuak itzultzen laguntzea.

   5. Taldetik bereiztea bi egunez gehienez ere, baina heldu batekin egongo da eta hark gainbegiratuko du.

5. – Taldetik bereizteko neurriak esan nahi du haurrak edo nerabeak bere gelan egon behar izango duela zentroko jarduerak gauzatzen diren ordutegian, honako kasu hauetan izan ezik:

   1. Bere elikadura-premiak betetzea.

   2. Bere premia fisiologikoak betetzea.

   3. Ikastetxera, prestakuntza-zentrora edo lantokira joatea.

   4. Tratamendu medikoko edo terapeutikoko saioetara joatea.

   5. Ahaideen bisitak egiteko ezarritako erregimena betetzea.

6. – Egoiliarrak aldizka-aldizka jasotzen duen diru-kopurua ez emateak edo atxikitzeak, edo diru hori egindako kalteak konpontzen erabiltzeak, edo lapurtutako objektuak itzultzeak ez ditu zenbateko horren hiru laurdenak gaindituko.

7. – Asteburuko aisia- edo jolas-jarduerak galarazteak ezin izango dio kalterik egin banakako esku-hartze programan aurreikusitako jarduerak gauzatzeari.

8. – Hezkuntza-neurri zuzentzaileak mailakatzeko honako irizpide hauek hartuko dira kontuan:

   1. Portaera egin zuenean haurrak edo nerabeak zuen adina eta ezaugarriak, eta zein egoeratan zegoen.

   2. Banakako esku-hartze plana edo banakako hezkuntza-plana.

   3. Asmoaren edo arduragabekeriaren maila.

   4. Portaera behin eta berriz egitea.

   5. Egoitza-harrerako baliabidearen funtzionamenduan eragindako nahaste-maila.

   6. Egoitza-harrerako baliabideko gainerako egoiliarrei, langileei, edo ondasunei edo instalazioei, edo beste pertsona batzuei eragindako kalteak.

9. – Laidoztatutakoari barkamena eskatzen bazaio, ondasunak lehengoratzen badira edo kalteak konpontzen badira, hezkuntza-neurri zuzentzaileak eten daitezke, baldin eta portaera berriz ere errepikatzen ez bada.

1. – Beren izaeraren arabera, neurriak hezkuntza-taldea osatzen duen edozein pertsonak jarri ahal izango ditu, edo portaera edo ez-betetze larriak edo oso larriak badira, egoitza-harrerako baliabidearen zuzendaritza-lanak bere gain dituen pertsonak edo baliabidearen arduradunak aplikatu behar izango ditu. Xedapen hori ulertuko da pertsonei edo gauzei kalterik ez egitearren berehala eta behin-behineko gisa hartu behar diren neurriak alde batera utzi gabe.

2. – Hezkuntza-neurri zuzentzaileak, ahal bada, hitzez aplikatuko dira, idazki bidez nahitaez jasotzeko betebeharra alde batera utzi gabe. Haurrei eta nerabeei honako eskubide hauek bermatuko zaizkie:

   1. Esateko dutena entzun diezaieten, baldin eta 12 urte badituzte, eta behar adinako adimena dutenean, baldin eta adin hori oraindik ez badute.

   2. Probak aurkezteko eskubidea.

   3. Haurrek edo nerabeek izendatzen duten konfiantzako pertsonaren aholkularitza izateko eskubidea, betiere pertsona horrekiko harremana haurraren edo nerabearen goragoko interesaren aurkakoa ez bada.

3. – Egoitza-harrerako baliabidearen zuzendaritza-lanak betetzen dituen pertsonak idazki bidez jakinaraziko ditu, eta gutxienez hilero, eta berehala, baldin eta banakako zaintza-planari edo dagokio planari eragin baliezaioke, Haurrak eta Nerabeak Babesteko Lurralde Zerbitzu Espezializatuan hutsegite larri edo oso larriengatik baliabidean bizi diren haurrei eta nerabeei jartzen zaizkien hezkuntza-neurri zuzentzaileak.

4. – Hezkuntza-neurri zuzentzaileak berehala aplikatuko dira, eta kaltea konpontzea eta biktimarekin adiskidetzea sustatu behar izango da; nolanahi ere, neurri horiek ezin izango dira luzatu haurrarentzat edo nerabearentzat esanahirik ez duen denboralditik haratago, eta haurraren edo nerabearen bilakaera-unera egokitu behar izango dira. Hala eta guztiz ere, portaeraren zuzentasunik eza eta hartutako neurria haurrarekin edo nerabearekin arrazoituko da.

5. – 96. artikuluan azaltzen ez diren portaera desegokiak zentroko hezkuntza-taldeko langileek zuzendu ahal izango dituzte aztertu behar izango diren berariazko metodoen (hezkuntza-arlokoak eta haurren eta nerabeen eskubideak galarazten ez dituztenak edo kaltegarriak direnak) bitartez; ezin izango dute eduki inoiz 97. artikuluan aurreikusitako neurri zuzentzaileen larritasunik.

6. – Profesionalek hezkuntza-neurri zuzentzaileari buruz zalantzak badituzte, taldeko gainerako kideei kontsultatu behar izango diete neurri hori aplikatu behar den ala ez.

7. – Hezkuntza-neurri zuzentzaileak aplikatzen direnean bereziki horretarako den erregistroan idatzi behar da; halaber, haurraren edo nerabearen espediente pertsonalean (neurrien xede den espedientean) jaso behar izango da neurria aplikatzea eragin duen arrazoia eta zer neurri aplikatu den adieraziz.

8. – Hezkuntza-neurri zuzentzaileak ezin izango dira aplikatu haurraren edo nerabearen portaeraren ondorioak talde batera hedatuta.

1. – Egoitza-harrerako baliabideko hezkuntza-langileek, baliabideko zuzendaritza-lanak edo arduradun-zereginak gauzatzen dituen pertsonaren aurretiazko baimenarekin, eusteko neurri bereziak erabili ahal izango dituzte. Neurriak honako hauek dira:

   1. immobilizazio fisiko pertsonala, egoitza-harrerako edozein programa aplikatuz;

   2. isolamendua, portaera-arazo larriak dituzten nerabeei laguntza intentsiboa emateko programa espezializatuen eta premiazko harrera-programen kasuan.

2. – Neurri horiek behin bakarrik aplikatu ahal izango dira, eta soilik ondoren azalduko diren arrazoiengatik, eta egoiliarrek behin eta berriz ez badituzte betetzen egoitza-harrerako baliabideko langileen oharrak:

   1. adingabeak bere buruaren aurka, egoitza-harrerako baliabidean hartutako beste pertsona batzuen aurka, edo baliabideko langileen aurka, edo bisita egitera joan direnen aurka indarkeria-ekintzarik ez egiteko edo lesiorik ez eragiteko.

   2. egoitza-harrerako baliabidearen instalazioetan kalterik ez egiteko;

   3. beren buruari edo beste pertsona batzuei kalterik ez egiteko edo beren buruaren edo beste pertsonen aurkako indarkeria-ekintzarik ez egiteko egoitza-harrerako baliabidetik kanpo.

3. – Premiazko kasuetan, hezkuntza-langileek adierazitako eusteko neurriak erabili ahal izango dituzte, aurretiazko baimenik gabe, eta ondoren horren berri eman behar izango diote egoitza-harrerako baliabidean zuzendaritza-lanak gauzatzen dituenari edo arduradunaren eginkizunak bere gain hartzen dituenari.

4. – Eusteko neurrien erabilera lortu nahi den helbururako proportzionala izango da ez du ezkutuko zigorrik ekarriko inoiz. Lortu nahi den helburua erdiesteko hain gaitza ez den beste modurik ez dagoenean soilik aplikatuko dira neurri horiek, eta haurra edo nerabea bere portaera berriz kontrolatzeko eta pertsona arteko harreman segurua eta gainerako egoiliarren eta langileen eskubideak errespetatzen dituen harremana izateko moduan dagoela bermatzeko nahitaezkoa den denboran bakarrik.

5. – Egoitza-harrerako baliabide batean maiz gertatzen badira immobilizazio fisiko pertsonaleko edo isolamenduko neurriak aplikatzea eskatzen duten gertakariak nahitaezkoa izango da egoitza-harrerako baliabideko giroa, profesionalen jarrerak eta nahiak, profesional horien eta haurren eta nerabeen arteko harremanak ebaluatzea, baita haurrak edo nerabeak egoitza-harrerako baliabideari esleitzeko politikak edo irizpideak eta haur eta nerabe horien taldekatzeak ere.

   100. artikulua.– Immobilizazio fisiko pertsonalaren neurria.

1. – Immobilizazio fisiko pertsonala honako hau izango da: haurra edo nerabea lotu egingo da bere osotasun fisikorako, beste pertsona baten edo instalazioen osotasun fisikorako arriskutsua izan litekeen ekintza bat saihesteko edo geldiarazteko. Neurri horren helburua soilik izango da hainbat egoeratan segurtasun-kontrol fisikoa ematea. Adierazitako egoera horiek honako hauek dira: haurrari edo nerabeari, edo beste pertsona batzuei kalte egiten dieten egoerak, edo instalazioei kalte eragiten dieten egoerak, eta adingabeak ezin badu bere burua kontrolatu, edo kontrolatzeko moduan ez badago.

2. – Erabili ahal izango den immobilizazio modu bakarra honako hau izango da: haurra edo nerabea beste pertsona batzuk edo batzuek zuzenean eustea, ezin izango da inola ere objekturik erabili helburu hori lortzeko. Ezein kasutan ezin izango dira botikak erabili eusteko neurri gisa.

3. – Immobilizazio-neurriak honako baldintza hauek bete behar izango ditu:

   1. immobilizazioa, arrisku hur-hurrekoaren kasuan izan ezik, soilik erabiliko da, baldin eta portaera kontrolatzeko beste modu batzuekin ezin izan bada portaera arriskutsua saihestu edo geldiarazi;

   2. immobilizazioaren arrazoia eta justifikazioa azaldu behar izango zaizkio haurrari edo nerabeari;

   3. immobilizazioa haurraren edo nerabearen osotasun fisikoa eta morala bermatuta egin behar izango da beti, ahalik eta indar gutxienarekin eta ahalik eta denbora-tarte txikienean aplikatu behar izango, eta ahaleginak egingo dira profesional bat baino gehiago aurrean egon dadin immobilizazio-neurria aplikatzen denean.

      101. artikulua.– Isolamendu-neurria.

      1. – Isolamendu-neurria -portaera arazo larriak dituzten nerabeei laguntza intentsiboa emateko programa espezializatuaren esparruan soilik aplikatu ahal izango da, eta, hala badagokio, premiazko harrera-programen esparruan- honako hau izango da: bereziki neurri hori aplikatzeko izango den gelan egongo da adingabea, eta ezin izango da hortik atera.

      2. – Neurri hori aplikatuko da adingabeak bere portaeraren kontrola nabarmen galdu duenean, eta hezitzaileen oharrei erantzuten ez dienean, eta adingabearen edo hartutako gainerako pertsona batzuen, edo zentroko langileen edo bisitarien osotasun fisikoa arriskuan dagoenean. Honako baldintza hauek bete behar izango ditu:

         1. iraupena ez da hamabi ordutik gorakoa izango, eta egoitza-harrerako baliabideko arduradun-lanak egiten dituen pertsona izango da une horretan erabakiko duena adingabea zenbat denbora egongo den isolamendu-aretoan eta adingabea noiz itzul daitekeen berriz ere taldera, betiere irizpide pedagogikoak nahiz segurtasunekoak kontuan hartuta;

         2. horretara bideratutako, diseinatutako eta altzariz jantzitako espazioan bete behar izango da, adingabeak bere buruari kalterik ezin izango diola egin bermatuz, artikulu honetako 5. idatz-zatian aurreikusitakoarekin bat etorriz;

         3. adingabeak berekin dituen eta bere burua lesionatzeko tresna gisa erabil litzakeen gauza guztiak kenduko zaizkio;

         4. isolamendua zentroko hezkuntza taldeko gutxienez kide batek gainbegiratu behar izango du, adingabearen segurtasuna bermatuko duten denbora-tarteetan;

         5. adingabeari azalduko zaio zein izan den isolamenduaren arrazoia eta helburua, baita bere portaeraren kontrola berreskuratzen duenean amaituko dela ere;

         6. isolamenduak irauten duen bitartean, adingabeak behar den medikuaren edo langile espezializatuen bisita izango du;

         7. isolamenduak irauten duen bitartean, adingabeak bere elikadura-premiak eta premia fisiologikoak beteta edukiko dituela bermatuko da.

      3. – Isolamendu-neurria ezin izango da erabili gaixo dauden edo gaixotasun larri baten eriondo diren edo menpekoak diren adingabeekin, salbu eta adingabeen jardunak beren osotasunarentzako edo gainerakoen osotasunerako hur-hurreko arriskua eragin balezake.

      4. – Adingabe bat isolamendu-aretoan sartzen den bakoitzean, une horretan egoitza-harrerako baliabideko arduradun-lanak egiten ari denak inprimaki bat bete behar izango du, eta han honako datu hauek jarri behar izango ditu:

         1. adingabearen filiazio-datuak;

         2. isolamendu-aretoan sartu den eguna eta ordua;

         3. isolamendu-aretoan sartzea eragin duten gertakarien azalpen zehatza;

         4. kendu zaizkion ondasun, objektu eta arropa pertsonalak;

         5. hala badagokio, aretoan gertatutako gorabeherak;

         6. irteera-eguna eta -ordua;

         7. adingabeari bere ondasunak itzuli zaizkiola.

            Inprimaki horren kopia bat bidaliko da berehala Haurrak eta Nerabeak Babesteko dagokion Lurralde Ordezkaritza Espezializatura, eta horrek, kopia bat bidali beharko du, informazio gisa, Fiskaltzara. Adingabearen espedientean ere kopia bat erantsiko da.

      5. – Isolamendu-neurria jartzeko erabiltzen den gela portaera-arazo larriak dituzten nerabeei laguntza intentsiboa emateko programa espezializatua aplikatzera bideratuta dauden egoitza-zentroetan soilik izango da. Nahitaezkotzat hartzen bada neurri hori aplikatzea premiazko harrera-programaren esparruan, adingabeak bizi diren egoitza-harrerako baliabideko arduradunak eskatu ahal izango du isolamendu-gela erabiltzeko baimena eta adingabea lekuz aldatuko da. Lurralde Historiko batean ez badago portaera-arazo larriak dituzten nerabeei laguntza intentsiboa emateko programa espezializatua aplikatzera bideratuta dagoen egoitza-zentrorik, isolamendu-gela adingabeentzako harrera-programak aplikatzen dituen/dituzten egoitza-zentroan/egoitza-zentroetan kokatu ahal izango da.

         Isolamendu-gela Haurrak eta Nerabeak Babesteko dagokion Lurralde Zerbitzu Espezializatuko teknikariek gainbegiratu behar izango dute gela hori martxan jarri aurretik, eta, ondoren, aldizka-aldizka.

         Honako ezaugarri hauek izango ditu:

         1. Gainerako aretoetatik aldenduta egongo da.

         2. Sartzeko segurtasun-ate bat izango du, metakrilatozko leihatila edo behatxulo egokitu bat izango du, eta hortik eusteko gela osoa ikusi ahal izango da.

         3. Nahitaezkoak diren gutxieneko altzariak izango ditu: aulki bat edo sofa bat zoruari edo hormei lotua.

         4. Ez da izango jaurti daitekeen edo eraso egiteko edo nork bere burua lesionatzeko erabil daitekeen objekturik.

         5. Instalazio elektrikoak honako ezaugarri hauek izango ditu:

            • argiztapena sabaian sartuta egongo da eta metakrilatozko pantaila batez babestuta;

            • kanpotik piztuko da;

            • ez da entxuferik izango;

            • kanpoan ez da inolako kablerik izango.

         6. Hormek ez dute nork bere burua lesionatzeko erabil litezkeen koskarik edo puntarik izango.

         7. Era berean, hormak ez dira paperez, baldosaz edo bestelako zeramikaz apainduta egongo, eta ahaleginak egingo dira material biguingarriz apainduta egon daitezen, baita atearen barnealdea ere.

            102. artikulua.– Arau-hausteen eta horiei aplika dakizkiekeen zigorren araubidea.

            1. – Egoitza-harrerako esparruan, haurrei eta nerabeei eskaintzen zaien zaintzan esku hartzen duten profesionalen arau-hausteen eta horiei aplika dakiekeen araubidea Haurrak eta Nerabeak Zaintzeko eta Babesteko otsailaren 18ko 3/2005 Legearen VIII. tituluan aurreikusten dena izango da.

            2. – Arau-hausteak egitearen ondoriozko administrazio-erantzukizuna arau-haustea gauzatzen duen pertsona fisikoari edo juridikoari egotziko zaio, eta, solidarioki, erakundearen, egoitza-harrerako baliabidearen, edo, hala badagokio, zaintzeko betebeharra urratu duelako ardura duen zerbitzuaren titularra den pertsona fisikoari edo juridikoari.

            3. – Administrazio-erantzukizuna eragin duten gertakariak, gainera, Zigor Kodean delitu edo hutsegite gisa tipifikatu baldin balitezke, zehapen-espedientearen izapidea bertan behera utzi behar izango da dagokion ebazpen judiziala eman arte.

1. – Lurralde Historikoetako Foru Organoek Dekretu honetako 6. artikuluan arautu diren egoitza-harrerako baliabideak ez diren beste baliabide batzuk prestatu ahal izango dituzte babesik gabeko egoeran dauden adingabeek behar duten zaintza berehala emateko, baldin eta adingabe horien premiak errealitate berrietan edo sortzen ari diren fenomeno sozialetan sartuta badaude, eta horien dimentsioa dela medio, gaur egun dagoen baliabide-sarearen esparruan erantzun ezin bazaie.

2. – Prestaketa hori salbuespenezkoa, aldi baterakoa eta iragankorra izango da, eta idazki bidez arrazoitu behar izango da baliabide horiek martxan jarriko direla, erantzun behar dieten premiak bat-batekoak eta ugariak direlako. Adierazitako arrazoitzea salbuespenezko antolaketa-txosten baten bitartez egingo da Haurrak eta Nerabeak Zaintzeko Batzorde Iraunkor Sektorialean. Aurrekoaren berme gisa, baliabide horiek martxan egoteko gehieneko aldia urtebetekoa izango da, eta beste 6 hilabetez luzatu ahal izango da martxan jartzen diren egunetik zenbatzen hasita; denboraldi horretan, gainera, behar diren eta 6. artikuluan biltzen diren aurreikuspenetara eta baliabide motaren arabera Dekretu honek eskatzen dituen baldintzetara egokitzen diren egoitza-harrerako formulak antolatu beharko dira.

Dekretu honetan biltzen diren baldintza materialak, funtzionalak eta langile-arlokoak ezin izango zaizkie eskatu esperimentu gisa hartzen diren egoitza-ekimenei, Haurrak eta Nerabeak Zaintzeko eta Babesteko otsailaren 18ko 3/2005 Legearen lehenengo xedapen gehigarrian eta Euskal Autonomia Erkidegoko gizarte-zerbitzuen baimena, erregistroa, homologazioa eta ikuskapena arautzen duen martxoaren 10eko 40/1998 Dekretuaren bigarren xedapen gehigarrian aurreikusitakoarekin bat etorriz.

Emantzipaziorako prestatzeko zentroetarako aurreikusitako gehieneko 30 lagunentzako edukiera gainditzen duten egoitza-harrerako baliabideek -dekretu hau indarrean jartzean jada zeudenek- ez dituzte honako baldintza material hauek bete behar izango:

1. gehieneko edukiera, baliabide horietan ez da 5 modulutik gorakoa izango.

2. gelen gehieneko edukiera plaza kopuruari dagokionez.

   Gainera baldintza materialak, moduluen gehieneko edukiera eta bainugelen eta komunen ratioa barne, emantzipaziorako prestatzeko zentroetan aplikatzen direnak izango dira. Halaber, egoitza-harrerako baliabide mota horretarako aurreikusitako baldintza funtzional eta langile-arloko baldintza guztiak aplikatuko zaizkie.

1. – Egoitza-harrera ez diren alojamendu-formulak, ostatuak eta gaueko zentroak, batik bat, ez dira Dekretu honen babespean egongo; hortaz, kendu egin behar izango dira eta horien ordez 6. artikuluan azaltzen diren egoitza-harrerako baliabideak jarri behar izango dira.

   Foru Aldundiek bi urteko epea izango dute, Dekretu hau indarrean jartzen denetik aurrera zenbatzen hasita, ordezkapen hori egiteko. Epe hori hiru urtera bitarte luzatu ahal izango da erabat ordezteko zailtasun bereziak daudela egiaztatzen bada.

2. – Aurrekoa ulertu behar izango da bigarren xedapen gehigarrian aurreikusitako zerbitzu esperimentalen esparruan alojamendurako formula alternatiboak antolatu ahal izateko aukera alde batera utzi gabe.

1. – Eusko Jaurlaritzak eta Foru Aldundiek, horretarako sortutako Batzorde Mistoaren esparruan, 10. artikuluaren 2. idatz-zatian azaltzen diren lankidetzan jarduteko eta koordinatzeko protokoloak egin eta onartuko dituzte.

2. – Haurrak eta Nerabeak Babesteko Lurralde Zerbitzu Espezializatuek ezinduak zaintzeari eta gizarteratzeari eta laneratzeari dagokionez eskumena duten foru-zerbitzuekin lankidetzan jarduteko eta koordinatzeko formulak ezarriko dituzte.

Eusko Jaurlaritzak eta Foru Aldundiek, beren Sail eskudunen bitartez, inoren kargura ez dauden adingabe atzerritarren premiazko harrerarako jardun-protokolo komun bat adostuko dute esku hartzen duten gainerako erakundeekin, fiskaltzekin eta segurtasun-indarrekin bereziki. Protokolo hori Euskal Autonomia Erkidegoaren lurralde osoan esku hartzeko baldintzak, pertsona horien eskubideen errespetua bermatuko duten baldintzak, aplikatzeko izango da.

Eusko Jaurlaritzak, Barne Sailaren bitartez, eta Foru Aldundiek, Haurrak eta Nerabeak Babesteko Lurralde Zerbitzu Espezializatuen bitartez, eta Udalek, Udal Gizarte Zerbitzuen bitartez, jardun-protokolo komun bat ezarriko dute, Dekretu hau indarrean jartzen denetik zenbatzen hasita urtebeteko epean, adingabeak hartuta dauden egoitza-harrerako baliabideetako adingabeen baimenik gabeko absentzien kasuetarako, betiere 84. artikuluan aurreikusitakoarekin bat etorriz.

106. artikuluaren 2. idatz-zatian aurreikusitakoaren ondorioetarako, hezkuntza-langileei -hezitzaileei nahiz hezkuntza-langile auxiliarrei- eskatzen dizkieten titulazioak haurrak eta nerabeak babesteko sarean beren jarduera profesionala gauzatzen Dekretu hau indarrean sartu ondoren hasten diren profesionalei soilik eskatu ahal izango zaie.

ALDI BATERAKO XEDAPENAK

1. – Babesgabetasun-egoeran dauden haur eta nerabeentzako egoitza-harrerako baliabideen titular diren erakunde pribatuek, Dekretu hau indarrean jartzean jada martxan daudenek, Administrazio eskudunari eskatu behar izango diote, adierazitako data horretatik zenbatzen hasita urtebeteko epean, martxan jarduteko baimena. Adierazitako baimena behin-behinekoa izango da kasu bakoitzari dagozkion baldintza materialak, funtzionalak eta langile-arlokoak betetzen ez diren bitartean, eta erakundeek 4 urteko epea izango dute, Dekretu hau indarrean jartzen denetik aurrera zenbatzen hasita, baldintza horiek betetzeko.

   Ordura arte, eta beren eskabidea ebatzi arte, baliabide horiek beren ohiko funtzionamenduarekin jarraituko dute.

2. – Lehenengo paragrafoan ezarritako lau urteko epea igaro ondoren harrera-baliabideen titular diren erakundeek aplikatu behar diren baldintzak bete ez badituzte, edota bete arren aginduzko funtzionamendu-baimena eskatu ez badute, baliabidea itxi egingo du Administrazio eskudunak.

3. – Xedapen honetan aurreikusitakoa ez da aplikatuko hirugarren xedapen gehigarrian azaltzen den salbuespenaren helburu diren baldintzei dagokienez.

Haurrak eta nerabeak egoitzan hartzeko Administrazio Publikoekin jada sinatutako itunak edo, hala badagokio, hitzarmenak ezartzeko, titulartasun pribatuko baliabideek funtziona dezaten emandako baimenak homologazioaren balioa izango du.

1. – Babesgabetasun-egoeran dauden haur eta nerabeentzako egoitza-harrerako baliabideen (Dekretu hau indarrean jartzean martxan daudenak) titularrak diren erakunde publikoek lau urteko epea izango dute data horretatik aurrera 6. artikuluan ezarritako sailkapenarekin bat etorriz aplika daitezkeen baldintza materialak, funtzionalak eta langile-arlokoak betetzeko.

2. – Xedapen honetan aurreikusitakoa ez da aplikatuko hirugarren xedapen gehigarrian azaltzen den salbuespenaren helburu diren baldintzei dagokienez.

Dekretu hau garatzeko eta aplikatzeko beharrezkoak diren xedapenak emateko ahalmena eman zaio Etxebizitza eta Gizarte Gaietako sailburuari.

Dekretu hau Euskal Herriko Agintaritzaren Aldizkarian argitaratzen den egunetik aurrera zenbatzen hasita, hogei egunera jarriko da indarrean.

Vitoria-Gasteizen, 2008ko uztailaren 8an.

Lehendakaria,

JUAN JOSΙ IBARRETXE MARKUARTU.

Etxebizitza eta Gizarte Gaietako sailburua,

JAVIER MADRAZO LAVΝN.