• Jardunaldia Koldo Goitiak, HAZItik, zuzentzen du Eusko Jaurlaritzako Elikadura, Landa Garapen, Nekazaritza eta Arrantza Saila eta Itsas Garapen Elkartearekin batera
• Europar Batasunean ekonomia urdin jasangarriaren ezarpenean inplikatuta dauden erakunde eta pertsonentzako hedapena eta topaketa
• Esperientziak, proiektu arrakastatsuak eta jardunbide egokiak trukatzea
"Itsasertzeko guneetako ekonomia urdina" da EHUren udako ikastaroaren gaia. Uztailaren 19an, ostirala, Donostiako Miramar jauregian, arrantza-komunitateen bizi-kalitatearen hobekuntzari eta haren dibertsifikazio ekonomikoari helduko zaie. Amaia Barredo Eusko Jaurlaritzako Elikadura, Landa Garapen, Nekazaritza eta Arrantza sailburuak emango dio amaiera HAZIko Koldo Goitiak zuzentzen duen topaketari.
Eusko Jaurlaritzako Elikadura, Landa Garapen, Nekazaritza eta Arrantza Sailak, HAZI, GALP (Tokiko Arrantza-ekintzako Taldea – Itsas Garapen Elkartea) eta "Ekonomia Urdin Iraunkorrerako Trantsizioan" inplikatutako eragileek definitutako eta onartutako estrategiaren bidez, Euskadiko 16 udalerri arrantzaleetan ekonomia urdin jasangarrirako trantsizioa bultzatu nahi da, lurraldearen hazkunde urdina ekarriko duten jarduera ekonomikoak babestuz, arrantza-sektoreari, haren dibertsifikazio ekonomikoari eta haren iraunkortasunaren hobekuntzari arreta berezia jarriz.
Kontzeptu-esparrutik praktikora, jardunaldi honetan itsasertzeko eremuetako ekonomia urdin iraunkorrean adituak diren pertsonak bilduko dira eta arrantza-komunitateen bizi-kalitatea hobetzen eta haien dibertsifikazio ekonomikoa hobetzen lagunduko duten proiektu arrakastatsuak sustatzen dituzten pertsonak ere.
Ekimen honen bidez, arrantza komunitateak sentsibilizatu eta ahaldundu nahi dira, ekonomia urdin baterako trantsizioan protagonista izan daitezen, aldaketaren benetako eragile bihurtuz.
Jardunaldia Donostiako Miramar Jauregian egingo da, uztailaren 19an, ostirala. Bertan, arrantza komunitateko ordezkariek, gaian adituak direnek eta ekonomia urdina sustatzen duten eragileek hartuko dute parte.
Ekonomia urdina
Europar Batasuna eraldaketa arautzailea eta estrategikoa egiten ari da trantsizio ekologikorantz eta ekonomiaren deskarbonizaziorantz, funts publikoekin babestuta. Eraldaketa horrek eragin nabarmena izango du eremu guztietan, batez ere, balio ekologiko, kultural, sozial eta ekonomiko handia duten itsasoko eta kostaldeko ekosistemetan. Ekosistema horietan jarduera ekonomiko ugari daude, eta ezinbestekoak dira ekonomia urdinerako edo blue economy´rako.
Ekonomia urdin jasangarriak ozeanoen eta kostaldeen potentziala aprobetxatu nahi du, epe luzera birsortzeko duten gaitasuna errespetatuz. Horrek esan nahi du giza jarduerak modu iraunkorrean kudeatu behar direla, hainbat erronkari aurre eginez, hala nola neutraltasun klimatikoari, deskarbonizazio industrialari, zero kutsadurari, energia berriztagarriei, ekonomia zirkularrari, klima-aldaketara egokitzeari eta biodibertsitatearen babesari.
Ekonomia urdina funtsezkoa da oparotasun ekonomikorako eta gizarte-ongizaterako, 3.000 milioi pertsona baino gehiago itsasoko eta kostaldeko biodibertsitatearen mende baitaude. Munduko Bankuak Ekonomia Urdina, honela definitzen du: baliabide ozeanikoen erabilera jasangarria hazkunde ekonomikorako, bizibideen eta enpleguaren hobekuntzarako, ekosistema ozeanikoen osasuna zaintzen den bitartean.
Munduko biztanleria gero eta handiago baten erronkaren aurrean, 2050erako 9.700 milioitan estimatua, funtsezkoa da hazkunde ekonomikoa ekosistema naturalekiko errespetuarekin orekatzea. EBren Hazkunde Urdinaren estrategiak itsas sektoreen hazkunde jasangarria babesten du, itsasoek eta ozeanoek Europako ekonomiaren eragile gisa duten garrantzia aitortuz, berrikuntzarako eta hazkunderako ahalmen handia dutelako.
Programa, informazio gehiago eta izen-emateak: https://www.uik.eus/eu/jarduera/europa-hacia-una-economia-azul
Informazio gehiago Irekia atarian (Leiho berrian irekiko da)
