URAk Beasaingo Ezkiaga auzoa Oria ibaiaren uholdeetatik babesteko lanak amaitu ditu, ibaitik 300 metrora, CAFen aurreko zati batean. Lanen artean, Oria ibaiaren ibilguaren gaineko bi zubi kendu eta eraitsi dira, ibilguaren eta Jose Miguel Iturrioz kalearen arteko lau eraikin eraitsi dira, eta ibilguaren ezkerreko ertza atzeraeman egin da tarte horretan. Jarduketa horiek 2.4 Helburu Espezifikoaren barruan daude: "Klima-aldaketara egokitzea, hondamendien arriskua prebenitzea eta erresilientzia sustatzea, ekosistemetan oinarritutako ikuspegiak kontuan hartuta".
CAF faktoriaren eta Beasaingo udalerriaren garapena zuzenean baldintzatzen zuen soluzio hidraulikoa ezagutzeko egindako bisitan, honako hauek parte hartu dute: Mikel Jauregi, Industriako, Trantsizio Energetikoko eta Jasangarritasuneko sailburua eta URAko presidentea; Leire Artola, Beasaingo alkatea; Javier Martínez Ojinaga, CAFeko kontseilari delegatua; eta Gorka Zabalegi, CAFeko giza baliabideen zuzendaria. Bertan izan dira, halaber, Josu Bilbao, Ingurumen Jasangarritasuneko sailburuordea, eta Antonio Aiz, URAko zuzendari nagusia, obraren xehetasunak eman dituena.
Obrei esker, 1.250 beasaindar baino gehiagoren etxebizitzek utzi egin diote T100eko uraldi bat (100 urteko errepikatze-denbora; hau da, 100 urtetik behin gertatzeko probabilitatea duen uraldia) sortzen duen uholde-orbanaren eraginpean egoteari, baita CAF fabrikaren eta inguruko 120 establezimendu edo jarduera ekonomiko baino gehiagoren eraginpean egoteari ere.
Jarduera osoa 2024ko irailean amaitu da, eta 7,8 milioi euroko inbertsio publikoa egin behar izan da, BEZa barne. Uholdeengatiko kalteak urtean 900.000 € inguru murriztuko dira, batez beste.
Beasainen egindako jarduketen bidez, Oriaren emariak ubide batean edo T100eko uraldi batean ubidean sartzea lortu da, eta, gainera, T500eko uraldiko ur-geruzan 90 cm inguru jaistea ahalbidetu da, eta horrek nabarmen murriztuko lituzke izan ditzakeen kalteak.
Beasaingo CAF eremuan, non jardun den, Beasaingo UAPGG osoko (Uholde Arrisku Handiko Eremua) kalte potentzialen % 70 pilatzen zen, eta, beraz, inguru horretako uholdeek eragin zitzaketen kalteak nabarmen murriztuko dira.
Lan horiek erakundeen arteko hitzarmen estua behar izan dute. Alde batetik, URA-Uraren Euskal Agentziak, eraikuntza-proiektu osoa aurkeztu du, bai eraikinak eraisteko bai egin beharreko obra hidraulikoak egiteko. Obrak kontratatu eta gauzatzeaz, zuzendaritza fakultatiboaz eta horiek finantzatzeaz arduratu da (6,1 milioi euro).
Bestalde, Udalak beharrezko hirigintza-dokumentuak onartu zituen CAFen lursailetan eta jabetzetan aurreikusitako obra hidraulikoetatik eratorritako afekzioak erregularizatzeko (adibidez, eraikigarritasunaren gehikuntza eraitsitako eraikinen galera konpentsatzeko beharrezko baldintzetan), eta obren benetako kostuaren 1,6 milioi euro finantzatu zituen.
Azkenik, CAFek Uraren Euskal Agentziaren esku jarri ditu obrek eragindako bere jabetzako lursail eta eraikinak, eta bulego berriak gaitzeko obrez arduratu da.
Proiektu honek Eskualde Garapeneko Europako Funtsaren, EGEF, 2021-2027 Programa finantzaketa du.
