- Honako hauek saritu dituzte: Beata Praska, Carolina Rodríguez, Inma Puig, Maider Unda, María Ángeles Martín Prats, María José San Roman, Mila García, Sara García Alonso eta Isabel Iturbe,
Bilbo, 2023-06-22
Nerea Melgosak, gaur arratsaldean, Guggenheim Museoan parte hartu du ‘Emakume Liderren WITH gala'n; hartan, zenbait geografia eta sektoretatik datozen hainbat lanbide-eremutako emakume erreferenteen ibilbideak aintzatesten dituzte, eta haiek inspirazio-iturri dira emakumeen talentua sustatzeko. Melgosak esan duenaren arabera, “gaur saritu den emakume bakoitza gure gazteria osoarentzako etorkizuneko eredu onena da: mutilentzat eta neskentzat".
Topaketan honako hauek aintzatetsi dituzte: Beata Praska, argazkilaria; Carolina Rodríguez, Enisako sustapen-arduraduna; Inma Puig, psikologo klinikoa eta enpresa-aholkularia; Maider Unda, emakumeen borroka libreko aitzindaria, olinpikoa, abeltzaina eta Idiazabal jatorri-deiturako AtxetaGaztako komertziala; María Ángeles Martín Prats, SkylifeEngineering-eko sortzailea eta presidentea; María José San Roman, Alacanteko Monastrell jatetxeko chefa eta sortzailea; Mila García, dantzaria eta Pedro García Calzadoko CEOa; Sara García Alonso, biologo molekularra, eta Isabel Iturbe, Surne Bilbao Basket-eko presidentea eta Bizkaiko Emakume Enpresaburu eta Zuzendarien elkarteko presidenteordea. Melgosak azken horri eman dio saria
Ekitaldia WITHek (lehen #WomenInTechSpain) antolatu du, inspirazioa eragiten duen ereduaren eta emakumezkoen talentua sustatzearen bidez lidergo-eredu berria sustatzen duen emakume exekutiboen eta zuzendarien taldeak. WITHek xede hori “konektatzeko, pentsatzeko eta egiteko modu berri baten” bidez sustatzen du. Topaketan 250 pertsona bertaratu dira, besteak beste, erakundeetako ordezkariak, agintariak, emakume liderrak, sektore sozialak, korporazioak, inbertitzaileak eta unibertsitateak.
WITHek Bilbon du egoitza. Toki-eremuko enpresa eta korporazioetako 125 emakume exekutibo eta zuzendari baino gehiago ditu, honako hauetakoak, besteak beste: Nazio Batuak, 3M, Bupa, Repsol, Zscaler, MerzAesthetics, Telefónica, WIZink eta ABB. WITHek elkarri lagunduta eta konexioaren bidez mundu anitzagoa eta konektatuagoa sustatuko duen Europako eta Latinoamerikako emakume lider eta exekutiboen talde handiena bilakatzea du xede. Gaur egun, 250 emakume exekutibo baino gehiago daude proiektuari batzeko hautaketa-prozesua osatzeko zain.
Beste erakunde batzuek ez bezala, WITHek bere metodologia garatu du, berrikuntza irekiaren eremutik hartu duena, ‘Connect-Think-Do’ izenekoa, eta hark zenbait eremutako sare tematikoak sortzea du erdigune, hala nola honako eremu hauetakoak: berrikuntza, osasuna, bioteknologia, zibersegurtasuna, fintech-a, ekintzailetza, giza baliabideak, marketina edo moda eta edertasuna. Sare horiek gehienez 10 emakumek eratzen dituzte; emakume horiek beren eta sarearen beraren ahalik eta hazkuntza handiena lortzeko hautatzen dira. WITHek www.we-with.com sustatzen du, haien artean konektatzeko eta kanpora zabaltzeko dinamizazio bat.
