- Ahaleginak zentratuz zerbitzu publikoen hobekuntzan, kalitatezko enpleguan, etxebizitza-politiketan eta gizonen eta emakumeen arteko berdintasunean
- Ikasturte berri honetarako helburuen artean nabarmentzen dira, halaber, Euskadiren aurrerapen sozioekonomikoa, Ikerketa eta garapen teknologikoko inbertsioa eta Arku Atlantikoaren aldeko apustua.
- Lehendakariak Euskadiren egungo egoerari eta asmoei erantzungo dien estatu-eredu baten alde egin du, Konbentzio Konstituzionala herreminta gisa erabiliz
Eusko Jaurlaritzak Miramar Jauregian egin ohi duen bileraren ondoren, Iñigo Urkullu Lehendakariak, ikasturte hasierarekin batera, egindakoari eta etorkizuneko erronkei buruzko hausnarketa egin du, eta ziurtatu du Eusko Jaurlaritzak helburuak garbi dituela eta helburu horiek lortzeko gogoz lanean jarraituko duela, etengabeko hobekuntza aplikatuz eta errealismoaren printzipiotik aldendu gabe.
Gizaki gisa egonkortasuna bilatzen dugula argi izanda, eta oinarri horretatik abiatuta, Lehendakariak azpimarratu du Jaurlaritzaren helburua dela gure bizi-kalitatea egunero pixka bat gehiago hobetzea.
Ildo horretan, lehenik eta behin, zerbitzu publikoak hobetzeko lanean jarraitzeko beharra azpimarratu du Urkulluk: Osasun Publikoa, Segurtasuna, Gizarte Zerbitzuak eta Hezkuntza. "Hobetzeko lan egingo dugu. Inbertitzen jarraituko dugu. Beti errealismoaren printzipioa aplikatuz. Gure etorkizuna hipotekatu gabe. Izan ere, urrats faltsu batek guztiok pairatuko ditugun ondorioak izan ditzake eta izango ditu. Zorroztasuna eta seriotasuna, atzerapausorik eman gabe. Gure konpromisoa da eta izaten jarraitzen du", adierazi du.
Ikasturte berriari begira, halaber, Lehendakariak azpimarratu du Gizarte Segurantzan afiliatutako milioi bat pertsona gainditu eta finkatu nahi direla, kalitatezko enplegua sortzen jarraituz. "Gure lan-merkatuak gure gazteei irteera onak eskaintzea lortu behar dugu. Gizarte gisa aurre egin behar diogu horri. Lan-baldintza onak izatea da aplika dezakegun gizarte-politikarik onena. Zenbat eta hobeak izan, orduan eta erraztasun gehiago izango dituzte emantzipatzeko eta nahi duten etorkizuna eraikitzeko. Bakarrik, bikotean edo familia bat sortuz ", adierazi du. Ildo horretan, Euskadi ekosistema aproposa izaten jarraitzearen alde agertu da Eusko Jaurlaritza, "pausoa ematera ausartzen diren pertsonentzat eta enpresek behar dituzten aukerak aurkitzeko lekua izan dadin. Inbertitzen, berritzen eta esportatzen duten enpresak ".
Bestalde, Iñigo Urkulluk esan du Jaurlaritzak bere etxebizitza-politikaren aldeko apustua egiten jarraituko duela, etxebizitza publikoen sustapena areagotuz eta eskubide subjektiboa bermatuz, baita gizonen eta emakumeen arteko berdintasun erreal eta eraginkor baten alde borrokatuz ere. “Tamalez, uda honetan berdintasun hori finkatzetik urrun dagoela ikusi dugu, inoiz gertatu behar ez diren jokabide onartezinak betiko baztertzen saiatuko gara".
Eusko Jaurlaritzak, gainera, Euskadiren aurrerapen sozioekonomikoan aurrera egiten jarraitzeko borondatea erakutsi du, "iraunkortasun ekonomikoaren, ingurumenekoaren eta sozialaren ikuspegitik", Giza Garapen Iraunkorraren ereduan sakonduz, Nazio Batuen 2030 Agendarekin eta haren 17 helburuekin lerrokatuta. "Izan ere, argi daukagu: ez dago B planetarik, eta gure konpromisoak argia izan behar du zentzu horretan", gaineratu du Urkulluk.
Bere hitzaldiaren beste une batean, Lehendakariak nabarmendu du Jaurlaritzak ikerketa eta garapen teknologikoko inbertsio publikoa handitzen jarraituko duela, 2030eko Zientzia, Teknologia eta Berrikuntza Planaren konpromisoarekin bat etorriz, "Jaurlaritzak kalitatezko zientzian sinesten duelako eta zientzia hori sustatzen jarraituko duelako, gure talentua sustatzeko eta kanpokoa erakartzeko baldintzarik onenak sortuz".
Horrekin guztiarekin batera, Eusko Jaurlaritzak Arku Atlantikoaren aldeko apustuari eusten dio, "Euskadi ezin baita Europako erabakien mahaitik kanpo geratu", eta, beraz, beste behin ere indarrak batzeko deialdia egin da, Makro-Eskualde Atlantikoa modu eraginkorrean eratzeko.
Bere hitzen amaieran, Lehendakariak aukera aprobetxatu du, beste behin ere, Euskadiren egungo egoerari eta asmoei erantzungo dien estatu-ereduaren alde egiteko. "Euskal erakundeei garrantzi eta gaitasun handiagoa emango dien eredua. Erabakiak hurbilagotik hartu ahal izateko, errealitatea hobeto ezagutzen den eremutik. Hala dago jasota gure Gobernu Programan, eta legegintzaldi honetarako Euskadiko autogobernua zabaltzeko eta hobetzeko konpromisoa berresten dugu ", azpimarratu du. Ildo horretan, duela 6 urte egin zuen bezala, Konbentzio Konstituzional baten beharra planteatu du, alderdi politikoek Espainiako Konstituzioaren esparruko egungo eztabaiden inguruan hitz egin ahal izateko tresna gisa.
