Donostiak nazioarteko Kongresuari ekin dio; bertan, osasun arreta integratuaren ereduan sakonduko da
2019.eko apirilak 01
Osasun sailburuak, Gizarte Politika diputatuak eta Donostia-San Sebastiángo alkateak topaketa irekitzeko ekitaldian parte hartu dute; bertan, asteazkenera arte, gaiaren inguruko mila aditu baino gehiago batuko dira
Kursaal Jauregian izan da, gaur, ICIC19 San Sebastián-Basque Country Arreta Integratuaren Nazioarteko Konferentzia irekitzeko ekitaldia. Kongresuaren izenburua “Kultura partekatu bat aldaketaren alde: pertsonetan oinarritutako zerbitzu integratuen ereduak ebaluatzen eta ezartzen” da, eta Eusko Jaurlaritzako Osasun Sailak, Gipuzkoako Foru Aldundiak eta Donostia-San Sebastiángo Udalak bultzatu dute, International Foundation for Integrated Care (IFIC) erakundearekin batera. Nekane Murga Osasun sailburuak “norabide horretan aurrera elkarrekin egiteko” beharra nabarmendu du, egungo erronka nagusi batzuei erantzuteko, besteak beste, biztanleen zahartzeari, kronikotasunari eta mendekotasunari.
Ekitaldia, zalantzarik gabe, aukera ona da, euskal erakundeek nazioarteko eragileekin azken urteotan Euskadin garatutako asistentzia-koordinaziorako eredua partekatzeko. Gaurtik asteazkenera arte, lehen mailako mila adituk baino gehiagok parte hartuko dute topaketa horretan, arreta integratuaren inguruko ezagutza partekatu eta sortzeko, Osasun Sailaren ardatz estrategiko nagusietako bat dela aintzat hartuta. Konferentzia osasun-arloko eta gizarte-zerbitzuetako kudeatzaileei, profesionalei, pazienteei eta erabiltzaileei, hirugarren sektoreko erakundeei eta ikertzaileei zuzentzen zaie. Osasun sailburuak espero du bertako ekarpenek Euskadin ezarritako eredua hobetzen jarraitzen laguntzea, asistentzia-prozesuari erantzun globalagoa eskaintzea bilatzen baitu.
Sailburuak osasun-arreta integratuak pertsonen osasunean eta osasun-sistemaren jasangarritasunean dituen onurak nabarmendu ditu. Horrela, Euskadin lehen mailako arretaren eta ospitaleko arretaren arteko banaketa gainditzeko hasi duen bidea defendatu du, pertsona osasun-sistemaren ekintzaren erdigune izateko. Sailburuak esan duenaren arabera, eredu horrek bilatzen du osasun-zaintzak “hain zatikatuta ez egotea, koherentzia, jarraitutasun, efizientzia eta, azken batean, kalitate handiagoa izatea”.
Bestalde, Maite Peña Gizarte Politika diputatuak honako hau nabarmendu du: zahartzearen erronkari arrakastaz egin ahal izateko aurre, funtsezkoa da koordinazio soziosanitarioa. “Gehiago bizi garenez, hobeto bizi nahi dugu, eta, horretarako, ahaleginak batu behar ditugu”. Hori horrela esan du Gipuzkoan badugula “berrikuntza teknologikoaren” aldeko apustua eta “zaintzetan berrikuntzen” aldekoa egiten duen “estrategia”. Eta esan du Adinberri, Pasaiako zahartzerako erreferentzia-zentroa, “erabakigarria” izango dela; izan ere, Osasun Sailarekin “koordinazio- eta lankidetza-adibide” izango da, “pertsona erdigune duen” arreta integraleko eta berritzaileko ereduarekin.
Irekiera-jardunaldian Eneko Goia Donostia-San Sebastiángo alkateak ere hitz egin du, eta esan du espero duela arreta integratuaren inguruko esperientzien trukea parte-hartzaile guztientzat aberasgarri izatea, “kontuan hartuta, betiere, osasun-sistemaren erdigunea erabiltzailea eta bere ongizatea dela”.
ICIC19 Kongresua eta edukia
ICIC19 Kongresua arreta integratuko nazioarteko konferentzia nagusia da, eta urtero egiten da, Europako hiri batean.
Edizio hau Donostia-San Sebastiánen izango da eta, bertan, goi-mailako hizlariak izango dira, 1.100 aditu baino gehiago. Honako hauek nabarmendu behar dira: Henry Mintzberg, irakaslea eta erakunde-teoriari buruzko hainbat libururen egilea (AEB); Michael Marmot, Osasunerako eta Gizarterako Nazioarteko Zentroko zuzendaria (Erresuma Batua); Stephen Shortell, Berkeleyko Unibertsitateko Osasun Publikoko Eskolako irakaslea (AEB); Mª Ángeles Durán, Espainiako Ikerketa Zientifikoen Goi Kontseiluko (CISC) Soziologiako irakaslea; eta Julio Mayol, Madrilgo Unibertsitate Konplutentseko Kirurgiako irakaslea eta San Carlosko Osasuneko Ikerketa Institutuko Berrikuntza Unitateko zuzendaria.
Zer da arreta integratua?
Arreta integratua lehen mailako arreta eta ospitale-arreta fusionatzen dituen sistema da, eta gizarte-zerbitzuen eremuarekin koordinatzen da, pertsonei arreta etengabea eta koherentea emateko.
Euskadiko egungo osasun-mapak 14 Erakunde Sanitario Integratu (ESI) ditu eta, horietan, arreta pertsonaren inguruan antolatzen da, asistentzia-jardueraren zentroa baita. Eusko Jaurlaritzak sistema horren aldeko apustua egin zuen 2011n, biztanleriaren zahartzeak eragindako egoerari eta, ondorioz, horrek dakarren osasun-zaintzen beharrizan handiagoari erantzuteko.
Donostia-San Sebastián, 2019ko apirilaren 1a
