Eskabideak aurkeztea. Eskabidea telematikoki aurkeztea, epeak eta dokumentazioa.

Eskabideak aurkezteko, eta deialdi hau arautzen duen dokumentazioa izapidetzeko atari gisa, hau izango da webgunea: https://hezigunea.euskadi.eus/ (aurrerantzean, Hezigunea). Prozedura honetan parte hartzeko, izangaiek aipatutako atariaren bidez egin beharko dute eskabidea. Bertan, gehienez ere, 3 ikastetxe eskatu ahal izango dituzte, lehentasun-ordenaren arabera hautatu ere, agindu honen VI. eranskinean zerrendatzen direnetatik.

Hezigunea atarira sartzeko, beharrezkoa izango da aldez aurretik eskatzailea identifikatzea (NAN/AIZ + pasahitza, edo XLNets erabiltzailea, lehendik izanez gero). Eskabidea betetzeko, «Zuzendariak hautatzea» bannerrera sartu behar da, eta sistemak identifikazio-zenbaki bat sortuko du, prozedurari balioa eta bakartasuna emango diona.

Hainbat arrazoi direla medio, izangaiek parte hartzeko eskabide telematiko bat baino gehiago aurkezten badute, aurkeztutako azken eskabidea bakarrik hartuko da kontuan; hots, parte-hartzaile bakoitzeko eskabide telematiko bakarra baino ez da onartuko.

Ez dira kontuan hartuko bide horretatik aurkeztutako eskabideak, baldin eta ezarritako aurkezpen-prozesua osatzen ez badute. Prozesu horretatik, eskabide-zenbaki bat lortuko da pdf formatuan deskargatu daitekeen dokumentu batean, eta interesdunak gorde egin beharko du epean eta behar bezala aurkeztu izana egiaztatzeko.

Eskabidean, 6. artikuluan aipatutako dokumentazioa jaso behar da.

VI. eranskinean jasotako ikastetxeek, agindu hau argitaratu eta hurrengo egunetik aurrera, aukera emango diete ikastetxearen dokumentuak kontsultatzeko, hala eskatzen dutenei; batez ere honako hauek: hezkuntza-proiektua, antolamendu- eta funtzionamendu-araudia eta datu pertsonalik ez duten urteko planeko elementuak. Horretarako, espazio eta ordutegi bat prestatuko dute, oztoporik jarriko ez diona ikastetxeko jardueren garapen normalari. Kasu guztietan, ikastetxeetako idazkaritzak zainduko du ea kontsulta-prozesu horrek betetzen duen datuak babesteari buruz indarrean dagoen araudia.

Eskabideak aurkezteko epea 2025eko urtarrilaren 13tik 24ra bitartekoa izango da, biak barne.

Izangaiak onartzea.

Informazioa eskatzea, izangaiek baldintzak betetzen dituztela egiaztatzeko.

2025eko urtarrilaren 27tik 28ra bitartean, biak barne, Hezkuntzako lurralde-ordezkariek Langileak Kudeatzeko Zuzendaritzako lurralde-zerbitzuei eskatuko diete, batetik, egiaztatzeko ea izangai guztiek betetzen dituzten agindu honen 3. artikuluan ezarritako eta prozesuan parte hartzeko eskatzen diren baldintzak, eta bestetik, izangaiek ikasketaburua eta/edo idazkaria zerbitzu-eginkizunetan izendatzeko proposamen arrazoitua egin duten kasuetan, baliozkotzeko ea betetzen diren agindu honen lehen xedapen gehigarrian (zerbitzu-eginkizun hori arautzen duena) jasotako egoerak.

Baldintzak egiaztatzeko, Lehen Hezkuntzako ikastetxe osatugabetzat hartuko da lehen hezkuntzako etapako maila bakoitzeko gutxienez unitate bat ez duena.

Hezkuntzako lurralde-ordezkariek zer datu eskatu, datu horiek eman beharko dituzte Hezkuntza Saileko Langileak Kudeatzeko Zuzendaritzako lurralde-zerbitzuek. Datu horiek emateko epea 2025eko urtarrilaren 29an amaituko da.

Behin-behineko ebazpenak, eskabideak onartzeari ala ezesteari buruzkoak eta Ikaskuntzaren eta Hezkuntza Berrikuntzaren Zuzendaritzarena, Berariazko Prestakuntza Programako zenbait jarduera egitetik eta ebaluatzetik salbuesteari buruzkoa, zuzendaritza-eginkizunean hasteko (PEFI_EFD).

Dagokion lurralde historikoko Hezkuntzako lurralde-ordezkariak, eman zaizkion datuak kontuan hartuta, behin-behineko ebazpenak emango ditu aurkeztutako eskabideak onartzeko ala ezesteko. Ebazpen horiek emateko epea 2025eko urtarrilaren 30ean amaituko da. Ebazpenetan zehaztuko da izangaiak zer ikastetxetan onartu diren, eta, baztertuak izan badira, baztertzeko arrazoiak ere adieraziko dira.

Ebazpen horretan bertan, proposamen arrazoitu bat egin badu izangaiak ikasketaburu eta/edo idazkari zerbitzu-eginkizunetan izendatzeko, jaso beharko da zer emaitza lortu den proposamen horren behin-behinekoz baliozkotzean, agindu honen lehen xedapen gehigarrian ezarritakoaren arabera.

Egun berean, Ikaskuntzaren eta Hezkuntza Berrikuntzaren Zuzendaritzak behin-behinean ebatziko ditu izangaiek PEFI_EFD prestakuntza-programako prestakuntza-jarduera jakin batzuk egitetik eta ebaluatzetik salbuesteari buruz egin dituzten eskaerak, Ikaskuntzaren eta Hezkuntza Berrikuntzaren zuzendariaren 2024ko ekainaren 6ko Ebazpenak ezarritakoari jarraituz.

Ebazpen horiek Hezkuntza Sailaren web-orrian argitaratuko dira:

Prozesuan onartutako hautagaitzen behin-behineko ebazpenerako: «Irakaskuntzak eta ikastetxeak» lan-arloaren barruan «Unibertsitateaz kanpoko ikastetxeen antolamendua. Gobernu-organoak» «Ikastetxe publikoak» «Zuzendarien hautaketa-prozesuaren deialdia».

Izangaiek PEFI_EFD prestakuntza-programako prestakuntza-jarduera jakin batzuk egitetik eta ebaluatzetik salbuesteari buruz egin ahal izan dituzten eskaerak behin-behinean ebazteko: «Hezkuntza-berrikuntza» lan-arloaren barruan «Jarduera-eremuak» «Zuzendaritzen prestakuntza».

Haiek ere Hezigunea atarian argitaratuko dira.

Argitalpen horiekin, egintzat joko dira interesdunei egin beharreko jakinarazpenak.

Bermatzeko hezkuntza-komunitateak zuzendaritzarako hautagaitzak ezagutu ahal izango dituela, Hezkuntzako lurralde-ordezkari bakoitzak dagokion ebazpena jakinaraziko dio eragindako ikastetxe bakoitzeko zuzendariari, argitaratu dadin ikastetxeko iragarki-taulan.

Behin-behineko ebazpenei erreklamazioak, eta zuzendaritza-proiektua edo -proiektuak eransteko gehieneko epea.

Aurreko ebazpenen aurka, interesdunek erreklamazioa aurkeztu ahal izango diote dagokion Hezkuntzako lurralde-ordezkariari edo, hala badagokio, Ikaskuntzako eta Hezkuntza Berrikuntzako zuzendariari. Erreklamazio horiek Hezigunea atariaren bidez egingo dira, eta aurkezteko epea 2025eko otsailaren 6an amaituko da, egun hori barne.

Hala ere, zuzendaritza-proiektua aurreko puntuan ezarritako epean aurkezten ez bada, ez da zuzenduko, eta prozeduratik kanpo geratuko da.

Eskabideak onartzeari eta ez onartzeari buruzko behin betiko ebazpenak, eta Ikaskuntzaren eta Hezkuntza Berrikuntzaren Zuzendaritzaren behin betiko ebazpena, zuzendaritza-eginkizunean hasteko Berariazko Prestakuntza Programako zenbait jarduera egitetik eta ebaluatzetik salbuesteari buruzkoa (PEFI_EFD).

Dagokion lurralde historikoko Hezkuntzako lurralde-ordezkariak ebatziko ditu aurkeztutako erreklamazioak, eta prozeduran parte hartzeko eskabideak onartzeko edo ez onartzeko behin betiko ebazpenak emango ditu.

Ebazpen horiek emateko epea 2025eko otsailaren 13an amaituko da.

Ebazpen horietan zehaztuko da izangaiak zer ikastetxetan onartu diren, eta, baztertuak izan badira, baztertzeko arrazoiak ere adieraziko dira.

Ebazpen horretan bertan, proposamen arrazoitu bat egin badu izangaiak ikasketaburutzako eta/edo idazkaritzako zerbitzu-eginkizunetan izendatzeko, jasoko beharko da zer emaitza lortu den proposamen horren behin betiko baliozkotzean, agindu honen lehen xedapen gehigarrian ezarritakoaren arabera.

Egun berean, Ikaskuntzaren eta Hezkuntza Berrikuntzaren Zuzendaritzak behin betiko ebatziko ditu izangaiek PEFI_EFD prestakuntza-programako prestakuntza-jarduera jakin batzuk egitetik eta ebaluatzetik salbuesteari buruz egin dituzten eskaerak.

Ebazpenak behin-behineko ebazpenen antzera argitaratuko dira.

Onartutakoen zerrendan agertzeak ez du esan nahi aitortzen zaionik agindu honen 3. artikuluan ezarritako baldintzak betetzen dituela. Prozesuaren edozein unetan, lortu nahi duen karguaren baldintzak betetzen dituela egiaztatzeko balio duen dokumentazioa eskatu ahal izango zaio. Berrikuspenetik ondorioztatzen bada izangairen batek ez duela betetzen baldintzaren bat, interesdunari entzun ondoren, galdu egingo ditu hautaketa-prozesuan parte hartzeagatik izan ditzakeen eskubide guztiak.

Onartutakoen zerrendan agertzeak ez du esan nahi aitortzen zaienik PEFI_EFD prestakuntza-programa gainditu izanaren ziurtagiria izatea.

Onartutako izangaitzak eta aurkeztutako proiektuak jakinaraztea eragindako ikastetxeetako hezkuntza-komunitateei.

Bermatzeko hezkuntza-komunitateak ezagutu ahal izango dituela aurkeztutako proiektuak eta zuzendaritzarako hautagaitzak, Hezkuntzako lurralde-ordezkariek dagokion ebazpena jakinaraziko diote eragindako ikastetxe bakoitzeko zuzendariari, argitara eman dadin dagokion ikastetxeko iragarki-taulan. Aldi berean, ikastetxeari dagokion zuzendaritza-proiektuaren edo -proiektuen ale bana bidaliko die Hezkuntzako lurralde-ordezkariak ikastetxe bakoitzari, 2025eko otsailaren 20ra arteko epean. Epe hori amaituta, eta hezkuntza-komunitateak proiektu horietarako sarbidea izango duela bermatzeko, ikastetxeko zuzendaritzak 24 orduko epean jakinaraziko du zer espazio fisiko edo birtualetan egongo diren eskuragarri dokumentu horiek.

Hautagaitzarik aurkeztu ez den edo onartu ez den ikastetxeetan esku hartzea.

2025eko otsailaren 24tik aurrera, Hezkuntza Ikuskaritza agindu honen 4.9 artikuluan aipatzen diren nahitaezko txostenak egiten hasiko da, zuzendaria izendatzeko, izangai-zerrendarik aurkeztu ez den edo onartu ez den ikastetxeetan. Txosten horiek amaituta beharko dute 2025eko apirilaren 30a baino lehen.

Eskola Kontseiluari entzun ondoren, ikuskaritzaren nahitaezko txostenak, besteak beste, zuzendaritzaren egoera eta ikastetxean egindako esku-hartzea jasoko ditu, zuzendariei hezkuntza-lidergo egonkorra lortzen laguntzeko.

Hautaketa-batzordeak.

Hautaketa-batzorde bat eratuko da hautaketa-prozesua egin behar den eta gutxienez hautagaitza bat onartu den ikastetxe bakoitzean.

Hautaketa-batzordeetako kideak.

Ikastetxe bakoitzeko hautaketa-batzordea honako kide hauek osatuko dute:

1. Hezkuntzako ikuskari bat. Ikuskari nagusiak proposatuko duena, eta batzordeko lehendakari gisa jardungo duena.

2. Lau kide, ikastetxearen ordezkari:

   1. Bi kide irakasleak izango dira, klaustroak horretarako egindako ezohiko bilkuran aukeratuak. Kiderik gazteenak idazkari gisa jardungo du.

   2. Eskola Kontseiluko kideek beste bi kide aukeratuko dituzte, irakasle ez diren Kontseiluko kideen artean, lehendakariak horretarako deitutako bilkuran.

3. Zuzendari bat, bokal gisa, hezkuntza-administrazioaren ordezkaritzan, honako baldintza hauek betetzen dituena:

   1. Zuzendaria jardunean izatea, hautaketa-prozedura garatzen den ikastetxearen irakaskuntza berdinak ematen dituen ikastetxeren batean, edo, hala badagokio, antzeko ezaugarriak dituen ikastetxeren batean.

   2. Zuzendariak egindako lanaren ebaluazio positiboa izatea ekitaldi batean edo gehiagotan. Hori ziurtatu ezin den kasuetan, beren eginkizunak betetzean gutxienez hiru urteko ezohiko izendapena duten zuzendariak izendatuko dira.

Hautaketa-batzorde hori, kide anitzeko organo gisa, Sektore Publikoaren Araubide Juridikoaren urriaren 1eko 40/2015 Legearen 16. artikulutik 18. artikulura xedatutakoak arautuko du, eta urriaren 1eko 40/2015 Legearen 23. eta 24. artikuluetan ezarritako abstentzio- eta errekusazio-arrazoiak aplikatuko zaizkie batzordekideei. Erabakiak hartzean berdinketarik badago, ikuskariak ebatziko ditu, kalitatezko botoarekin.

Izangaien hizkuntza-eskubideak errespetatzeko eta Euskararen Erabilera Normalizatzeko azaroaren 24ko 10/1982 Oinarrizko Legean ezarritakoa betetzeko, bermatuko da Euskal Autonomia Erkidegoko hizkuntza ofizialen nahikoa ezagutza duten kide nahikoa egongo dela hautaketa-batzordeko kideen artean. Baldintza hori hautaketa-batzordeko kide guztiek bete beharko dute, Eskola Kontseiluko ordezkariek izan ezik, haientzat gomendio bat izango baita.

Batzorde horien osaerak, ahal den heinean, emakume eta gizonen ordezkaritza orekatua izango du, Euskal Funtzio Publikoari buruzko ekainaren 6ko 6/1989 Legearen 31. artikuluak (Emakumeen eta Gizonen Berdintasunerako otsailaren 18ko 4/2005 Legeak aldatua) arautzen duenaren arabera.

Hautaketa-batzordeen eginkizunak.

Hautaketa-batzordeak honako funtzio hauek izango ditu:

1. Ikastetxeko zuzendaritza aukeratzeko prozesua egiteko prozedurak antolatu eta garatzea.

2. Dagozkion prozedurak gauzatzeko egutegia ezartzea eta argitaratzea, agindu honetan ezarritako epeen arabera.

3. Izangaiei deialdia egitea zuzendaritza-proiektua ahoz defenda dezaten.

4. Izangaiek aurkeztutako zuzendaritza-proiektuak era arrazoituan balioestea.

5. Izangaiek aurkeztutako merezimendu akademikoak, prestakuntzakoak eta profesionalak barematzea.

6. Erreklamazioak ebaztea, beren eskumenen esparruan.

7. Onartu eta argitara ematea zuzendaritza-proiektuari emandako kalifikazioa eta, hala badagokio, izangaiek merezimendu-baremoan eskuratutako behin-behineko puntuazioa ere bai.

8. Aurkeztutako izangaien behin betiko zerrenda onartu eta argitaratzea, apartatu bakoitzean lortutako puntuazioa zehaztuta.

9. Amaierako guztizko puntuazio handiena eskuratu duen ikastetxe bakoitzeko izangaia aukeratzea.

10. Dagokion lurralde historikoko Hezkuntzako lurralde-ordezkariari helaraztea aukeratutako pertsonaren izena, ikastetxeko zuzendari izendatzeko proposamenarekin batera.

11. Dagokion Hezkuntzako lurralde-ordezkaritzan entregatzea aurkeztutako dokumentazioa eta hautaketa-prozesutik eratorritakoa, izangaia aukeratu ondoren.

Beren eginkizunak betetze aldera, hautaketa-batzordeek behar duten informazioa bildu ahal izango dute Hezkuntzako lurralde-ordezkaritzetatik, izangaiei bidezko dokumentazioa eskatu ahal izango diete, eta, halaber, ikastetxean eskuragarri dauden baliabide eta bitarteko telematikoak erabili ahal izango dituzte hezkuntza-komunitateari zuzendaritzaz arduratuko den pertsonaren hautaketa-prozesuari buruzko alderdi guztiak jakinarazteko eta beren eskumenetatik eratorritako ekintza guztiak deialdian zehaztutako epeetara egokitzeko.

Hautaketa-batzordean klaustroa eta Eskola Kontseilua ordezkatuko dituzten pertsonak aukeratzea.

2025eko otsailaren 24tik martxoaren 4ra bitartean, biak barne, zuzendariak deialdia egingo du klaustroaren ezohiko bilkura bat egiteko; ondoren, beste deialdi bat egingo du Eskola Kontseiluaren beste bilkura bat egiteko, onartutako hautagaitzen berri eta dagozkien zuzendaritza-proiektuen berri emateko, dagozkien aktak eman ditzaten (ikus VII. eta VIII. eranskinak).

Deialdi horretan, ikastetxeko zuzendaritzak jakinarazi beharko du zer espazio fisiko edo birtualetan egongo den eskuragarri izangai bakoitzak aurkeztutako zuzendaritza-proiektua, kide anitzeko organo horietako kideek kontsultatu ahal izan ditzaten. Bilkura horretan, bi organoei dagozkien bokalak eta bokal bakoitzeko ordezko bat aukeratuko dira, zeinak hautaketa-batzordeko kide izango baitira.

Eskola Kontseiluaren ezohiko bileraren kasuan, ez zaie deialdia egingo irakasleen klaustroko ordezkariei.

Klaustroaren zein Eskola Kontseiluaren buru ikastetxeko zuzendaria edo haren ordezkoa izango da, irizpide hauek aplikatuz:

Beren ikastetxeko zuzendaritza aukeratzeko merezimendu-lehiaketara aurkezten diren jarduneko zuzendariek ezin izango dituzte bete hautaketa-prozesuan ikastetxeko zuzendariari esleitutako eginkizunak. Eginkizun horiek ikastetxeko zuzendariordeak eta/edo zuzendaritzako ondokoak beteko ditu, edo, ondoren, ikasketaburuak, ikasketaburuaren ondokoak, ikastetxeko idazkariak edo idazkariaren ondokoak, baldin eta dagokion pertsonak ere bere hautagaitza aurkeztu ez badu, betiere.

Baldin eta arestian aipatutako karguak betetzen dituzten pertsona guztiek ere hautagaitza aurkeztu badute ikastetxeko zuzendari izateko, irakaskuntza-sektoreko kide ordezkari zaharrena izango da kide anitzeko organoaren buru.

1. Nola hautatu nork ordezkatuko duen klaustroa hautaketa-batzordean:

   Hautaketa-batzordean klaustroa ordezkatuko dutenak aukeratzeko, isilpeko bozketa egingo da, eta, bertan, boto-eskubidea duen pertsona bakoitzak pertsona bati eman ahal izango dio botoa. Izen bat baino gehiago duten botoak baliogabeak izango dira. Ikastetxeko zuzendaritzarako hautagaitza aurkeztu duten irakasleek ezohiko klaustro horretan egoteko, parte hartzeko eta botoa emateko eskubidea izango dute. Zuzendaritza-taldeko kide gisa aurkeztutako zuzendaritza-proiektuetan agertzen diren pertsonekin ere berdin jokatuko da.

   Boto baliodun gehien lortzen dituzten bi pertsonak aukeratuko dira. Berdinketa badago, bigarren bozketa bat egingo da, eta, behar izanez gero, hirugarren bat. Bozketa horietan, berdinduta geratu direnei baino ezingo izango zaie botoa eman. Hirugarren bozketa egin ostean, berdinketak bere horretan badarrai, zozketa publikoa egingo da.

   Klaustroaren bi ordezkariak aukeratu ondoren, ordezkoen zerrenda osatuko da. Botoren bat jaso duten pertsonek osatuko dute zerrenda hori, boto gehien jaso duenetik hasi eta boto gutxien jaso duenera ordenatuta. Ordezkoen zerrendan berdinketarik badago, zozketa publiko bidez erabakiko dira.

2. Hautatzea nork ordezkatuko duen Eskola Kontseilua hautaketa-batzordean:

   Eskola Kontseiluan ikasleen ordezkaritza duten ikastetxeetan, Derrigorrezko Bigarren Hezkuntzako hirugarren kurtsotik gorako ikasleei baino ez zaie deialdia egingo bilkura horretara joateko. Klaustro ordezkariei ere ez zaie deialdirik egingo bilkura horretara joateko.

   Eskola Kontseiluaren ordezkariak aukeratzeko, bozketa bat egingo da, eta, bertan, pertsona bakar bati eman ahal izango diote botoa Eskola Kontseiluko kideek. Izen bat baino gehiago duten botoak baliogabeak izango dira. Boto baliodun gehien lortzen dituzten bi pertsonak aukeratuko dira. Berdinketarik badago, bigarren bozketa bat egingo da, eta, behar izanez gero, hirugarren bat. Bozketa horietan, berdinduta geratu direnei baino ezingo izango zaie botoa eman. Hirugarren bozketa egin ostean, berdinketak bere horretan badarrai, zozketa publikoa egingo da.

   Eskola Kontseiluaren bi ordezkariak aukeratu ondoren, ordezkoen zerrenda osatuko da. Botoren bat jaso duten pertsonek osatuko dute zerrenda hori, boto gehien jaso duenetik hasi eta boto gutxien jaso duenera ordenatuta. Ordezkoen zerrendan berdinketa badago, zozketa publiko bidez erabakiko dira.

   Botoa zuzena eta isilpekoa izango da, eta ezingo da eskuordetu.

   Irakasle-klaustroak edo Eskola Kontseiluak hautaketa-batzordean izango dituzten ordezkariak aukeratu edo izendatu ez izanak ez du eragotziko haiek eratzea.

   2025eko martxoaren 6an, ikastetxeko zuzendariak edo, apartatu honetan ezarritakoa aplikatuz, haren ordezkoak dagokion lurralde historikoko Hezkuntzako lurralde-ordezkariari igorriko dio aipatutako partaidetza-organo bakoitzaren bilkuraren aktaren kopia, Hezigunea aplikazioaren bidez («Nire egunerokoa» apartatua. Ikastetxeko Hezkuntza Ikuskaritzaren informazioa. Dokumentuak). Ikus VII. eranskina, klaustroaren akta-eredua, eta VIII. eranskina, Eskola Kontseiluaren akta-eredua.

Izendatzea zer ordezkari izango dituen Hezkuntza-administrazioak hautaketa-batzordeetan.

Hezkuntza ikuskari nagusiak dagokion Hezkuntzako lurralde-ordezkariari proposatuko dio Hezkuntzako ikuskari izango diren hautaketa-batzordeetako lehendakari (izen-abizen eta guzti). Proposamen horiek egiteko epea 2025eko martxoaren 3an amaituko da.

Era berean, dagokion hezkuntza-ordezkariak zuzendari-talde bat izendatuko du hautaketa-batzordeetan parte hartzeko, eranskin honetako 3.2.c) apartatuan jasotzen den bezala.

Pertsona horiek Euskal Autonomia Erkidegoko hizkuntza ofizialak behar bezala ezagutzen dituztela bermatzeko moduan egingo dira proposamen eta izendapen horiek.

Hautaketa-batzordeetako kideak izendatzea.

Hezkuntzako lurralde-ordezkariek izendatuko dituzte dagokion lurralde historikoan eratu behar diren hautaketa-batzordeetako kide guztiak. Izendapen horiek egiteko epea 2025eko martxoaren 10ean amaituko da.

Dagokion lurralde historikoko Hezkuntzako lurralde-ordezkariak hautagaitza bat baino gehiago onartu den ikastetxeetako batzorde bakoitzeko burutzari emango dizkio hautagaitza onartu zaion pertsona bakoitzaren lehiaketako bigarren faseko merezimenduak egiaztatzeari buruzko datuak. Datu eta dokumentu horiek emateko epea 2025eko martxoaren 11n amaituko da.

Hautaketa-batzordeen funtzionamendua.

Hautaketa-batzordeen egoitza ofiziala zentro berean egongo da, edo, hala badagokio, horretarako ezarritako beste administrazio-bulego batzuetan, egoerak hala gomendatzen badu eta prozeduran interesa duten pertsonei inolako kalterik eragiten ez bazaie, eta horiek eratzeko prozedura amaitzen denean amaituko da haien jarduna.

Hautaketa-batzordearen eraketa eta funtzionamendua baliozkoa izan dadin, ezinbestekoa izango da bertan egotea kideen erdia gehi bat, baldin eta haien artean batzordeburua eta idazkaria badaude. Erabakiak gehiengoz hartuko dira.

Hautaketa-prozesuaren lehenengo fasea.

Lehenengo fasean, zuzendaritza-proiektua balioetsiko da, zeinetan jasoko baitira, ikastetxeko hezkuntza-proiektuarekin lotuta, izangaiaren helburuak eta jardun-ildoak. Zuzendaritza-proiektuak ikasle guztien eskola-arrakasta lortzea izan beharko du helburu, eta, besteak beste, hezkuntza-inklusioari, gizonen eta emakumeen berdintasunari eta diskriminaziorik ezari eta genero-indarkeriaren prebentzioari buruzko edukiak jaso beharko ditu, baita hizkuntza-normalizazioari buruzko edukiak ere.

Zuzendaritza-proiektuak klaustroari eta Eskola Kontseiluari aurkeztea.

Eranskin honetako 3.8 apartatuan aipatutako irakasle-klaustroko ezohiko bilkura berean, izangai bakoitzak bere zuzendaritza-proiektua aurkeztu ahal izango du, eta horri buruz egiten zaizkien galderei erantzungo die. Jarraian, akta egingo da, eta, hor, egindako esku-hartzeak jasoko dira (VII. eranskina).

Era berean, eranskin honetako 3.8 apartatuan jasotako Eskola Kontseiluaren ezohiko bilkuran, izangaiek beren proiektua azalduko dute, eta egiten zaizkien galderei erantzungo. Jarraian, akta egingo da, eta, hori, egindako esku-hartzeak jasoko dira (ikus VIII. eranskina).

Klaustroaren eta Eskola Kontseiluaren ezohiko bilkuretako buruak zuzendaritza-proiektuak helaraziko dizkie hautatutako ordezkariei, bileran bertan.

Hautaketa-batzordeak zuzendaritza-proiektua balioestea.

Hautaketa-batzordeak balioetsiko du, lehenik eta behin, 2024-2025 ikasturtean hautagaitza aurkeztu duten ikastetxean destinoa duten izangaien zuzendaritza-proiektua. Hautagaitzarik ez badago edo pertsona horietako batek ere ez badu prozeduraren lehenengo fasea gainditzen, hautaketa-batzordeak destinoa beste ikastetxe batean duten izangaien proiektuak balioetsiko ditu.

Bilkura berean, hautaketa-batzordea eratuko da, eta izangaiek aurkeztutako eta defendatutako zuzendaritza-proiektuak balioetsiko dira, agindu honen III. eranskinean jasotako ebaluazio-irizpideak aplikatuz. Lan hori egiteko epea martxoaren 17tik 21era bitartekoa izango da, egun biak barne.

Apartatu honetan aipatutako zuzendaritza-proiektua aurkeztu ez bada edo frogatzen bada osorik edo zati batean plagiatu dela, 0 puntu emango zaizkio.

Hautaketa-batzorde bakoitzak, alfabetikoki, ikastetxeko zuzendaritzarako izangaiak zitatuko ditu, zuzendaritza-proiektua azaldu eta defendatzeko. Zitazioa bakarra izango da izangai guztientzat, eta ikastetxeko iragarki-taulan eta web-orrian argitaratuko da, gutxienez 48 ordu lehenago, izangaiak non, noiz eta zer ordutan aurkeztu behar diren adierazita.

Izangaiek beren burua identifikatu beharko dute hautaketa-batzordearen aurrean, beren nortasuna egiaztatzen duen agiria aurkeztuz: nortasun-agiri nazionala edo pasaportea eta, hala badagokio, atzerritarraren nortasun-txartela.

Ekitaldi horretan agertzen ez diren izangaiak prozeduratik kanpo geratuko dira, behar bezala justifikatutako eta hautaketa-batzordeak aintzat hartutako ezinbesteko kasuetan izan ezik. Alegatutako arrazoia baiesten bada, presidenteak beste egun eta ordu bat ezarriko du eragindako izangaiaren bigarren eta azken deialdirako, eta batzordearen egoitzako iragarki-taulan eta ikastetxearen webgunean argitaratuko du.

Izangaiak gehienez 30 minutu izango ditu proiektuaren ezaugarri garrantzitsuenak azaltzeko. Ondoren, eta gehienez 15 minutuz, izangaiak proiektua defendatuko du, galderei erantzunez eta batzordeko kideek eskatzen dizkioten argibideak emanez.

Zuzendari izateko izangaiek azaldu eta defendatuko dute zuzendaritza-proiektua. Zuzendaritza-taldeko beste kargu batzuetarako proposatutako pertsonek ere parte har dezakete ekitaldian.

Ahozko azalpena egiteko, izangaiari ordenagailu bat eta proiektagailu bat utziko zaizkio, eta Interneteko konexioa jarriko zaio. Bere aldetik, izangaiak aukera izango du egokitzat jotzen duen material osagarria erabiltzeko.

Hautaketa-batzordeko kide bakoitzak balioetsiko du zuzendaritza-proiektua, 0 eta 70 puntu artean emanez. Kide bakoitzak emandako puntuazioak zenbaki oso bat izan beharko du. Batzordeko kide bakoitzak emandako puntuazioaren batezbesteko aritmetikoa atzemanez lortuko da proiektuaren puntuazioa. Hala ere, proiektu horren guztizko kalifikazioan batzordekideek emandako puntuazioen artean 15 puntu oso edo gehiagoko aldea badago, gehieneko eta gutxieneko kalifikazioak baztertu egingo dira, eta puntuazioak baztertzen jarraituko da harik eta alde hori desagertu arte. Azkenik, gainerako kalifikazioen batez besteko puntuazioa kalkulatuko da.

Lehenengo fase honetan, izangaiek, gutxienez, 35 puntu lortu beharko dituzte. Gutxieneko puntuaziora iristen ez diren izangaiak hautaketa-prozesutik kanpo geratuko dira.

Beraz, zuzendaritza-proiektuak kalifikatu ondoren haietako bakarra balioesten bada gutxienez 35 punturekin, izangaia hautagai hautatu gisa proposatuko da. Zuzendaritza-proiektu batek baino gehiagok lortzen badute 35 puntu edo gehiagoko kalifikazioa, kasuan kasuko izangaien merezimenduak barematuko dira prozeduraren bigarren fasean.

Hautaketa-prozesuaren bigarren fasea.

Zuzendaritza-proiektuaren balioespena amaitu ondoren, lehen fasea gainditu duten hautagaitza bat baino gehiago dagoen ikastetxeetan, hautaketa-batzordeak merezimenduen balioespena gehituko dio izangai bakoitzari (IV. eranskina).

Merezimenduen balioespenaren gehieneko puntuazio orokorra ez da, inola ere, 30 puntutik gorakoa izango.

Balioespen hori egiteko epea 2025eko martxoaren 28an amaituko da.

Ebaztea zer puntuazio lortzen duen hautagaitza bakoitzak eta proposatzea zer pertsona hautatzen den zuzendari-lanposturako.

Hautaketa-batzordeak puntuazioa aterako du; horretarako, batu egingo dira zenbat puntu lortu diren zuzendaritza-proiektuaren balioespenean eta zenbat merezimenduen ebaluazioan. Berdinketa badago, irizpide hauek aplikatuko dira, bata bestearen ostean:

1. Puntuaziorik handiena zuzendaritza-proiektuan.

2. Merezimendu-baremoko apartatu bakoitzean lortutako puntuaziorik handiena, agindu honen IV. eranskinean agertzen den hurrenkeraren arabera.

   2025eko martxoaren 28an, batzordeetako idazkaritzek argitara emango dute behin-behinean zenbat puntu lortu duten izangaiek merezimendu-lehiaketaren fase bakoitzean. Informazio horren berri izangaiek hautagaitza aurkeztu duten ikastetxeetan emango da. Argitalpen honekin, egintzat joko da interesdunei egin beharreko jakinarazpena.

   2025eko martxoaren 31tik apirilaren 2ra bitartean, izangaiek egoki irizten dieten erreklamazioak aurkeztu ahal izango dituzte, esleitu zaien puntuazioari buruz, dagokien ikastetxeko idazkaritzetan; horretarako, idazki bat idatzi, eta hautaketa-batzordeari zuzendu beharko zaio.

   Behin aztertuta zer erreklamazio jarri diren behin-behineko puntuazioen aurka, hautaketa-batzordeek ebatziko dituzte, eta argitara emango dituzte behin betiko puntuazioak, behin-behinekoekin egin duten modura. Argitalpen honekin, egintzat joko da interesdunei egin beharreko jakinarazpena. Argitalpen hori egiteko epea 2025eko apirilaren 9an amaituko da.

   Izangai batek ikastetxe baterako baino gehiagorako lortzen badu puntuaziorik handiena, parte hartzeko eskabidean lehenengo jarri duen ikastetxerako proposatuko da.

   2025eko apirilaren 9an bertan, batzordeburuak behin betiko puntuazioak helaraziko dizkio dagokion lurralde historikoko Hezkuntzako lurralde-ordezkariari, eta jakinaraziko dio, hala badagokio, nor proposatzen duen zuzendari-lanposturako.

   Hautaketa-batzordeetako jarduketa guztiak 2025eko apirilaren 10a baino lehen egin eta amaitu beharko dira.

Hezkuntzako lurralde-ordezkarien ebazpenak.

Hautaketa-batzordeek egindako proposamenak ikusita, eta haiekin bat etorriz, prozedura urratu ezean, hautatutako pertsonak adierazteko ebazpenak emango eta argitaratuko ditu dagokion lurralde historikoko Hezkuntzako lurralde-ordezkariak. Ebazpen horiek emateko eta argitaratzeko epea 2025eko apirilaren 16an amaituko da.

Aurreko paragrafoan aipatzen diren ebazpenak Hezkuntza Sailaren webgunean argitaratuko dira («Irakaskuntzak eta Ikastetxeak» lan-arloaren barruan «Unibertsitateaz kanpoko ikastetxeen antolamendua. Gobernu-organoak» «Ikastetxe publikoak» «Zuzendariak hautatzeko prozesuaren deialdia» eta «Hezigunea» atarian. Argitalpen honekin, egintzat joko da interesdunei egin beharreko jakinarazpena.

Ebazpen horien aurka, interesdunek gora jotzeko errekurtsoa aurkeztu ahal izango diote Hezkuntzako sailburuordeari.

Izendatutakoak ez badu destinorik zuzendari hautatua izan den ikastetxean, dagokion lurralde-ordezkariak 2025eko apirilaren 30a baino lehen eman beharko dio horren berri irakasleen arloan eskumena duen zuzendaritzari, eta hark ebazpen bat onartuko du ikastetxe horretan zerbitzu-eginkizunak emateko, izendapenak irauten duen artean.

Atzera egitea eta uko egitea.

Atzera egitea da bertan behera uztea eskabidea eta hasitako prozedura. Izan ere, 39/2015 Legearen 94. artikuluaren arabera, hautaketa-prozesuan parte hartzeari uko egin ahal izango zaio prozeduraren edozein unetan, betiere prozesua amaitzeko ebazpena eman aurretik. Atzera egiteko eskaera idatziz aurkeztuko zaio dagokion lurralde-ordezkariari.

Halaber, dagokion lurralde historikoko Hezkuntzako lurralde-ordezkariak hautatutako pertsonek deklaratzen dituzten ebazpenak eman eta argitaratu ondoren, esleitutako lanpostuari uko egiteko eskatu ahal izango dute honako kasu hauetan:

1. Uko arrazoitua, dagokion lurralde historikoko hezkuntza-ordezkariak onartua.

2. Gerora sortutako ezintasun fisiko edo psikikoa.

Hautatutako izangaien izendapena.

9,1. Dagokion lurralde historikoko hezkuntzako lurralde-ordezkariak izendatuko du ikastetxeko zuzendari hautatutako pertsona, baldin eta zuzendaritza-eginkizuna betetzeko konpetentziei buruzko prestakuntza-programa espezifikoa gainditu badu (programa hori Ikaskuntzaren eta Hezkuntza Berrikuntzaren zuzendariaren 2024ko ekainaren 6ko Ebazpenean dago jasota).

Hautatutako izangaien kasuan, 2025eko ekainaren 2tik 6ra bitartean egun biak barne, Hezkuntza Saileko Ikaskuntzaren eta Hezkuntza Berrikuntzaren Zuzendaritzak ofizioz emango du ziurtagiri bat, egiaztatzen duena izangaiek gainditu dutela zuzendaritza-eginkizunean hasteko prestakuntza-programa espezifikoa.

Ikaskuntzaren eta Hezkuntza Berrikuntzaren Zuzendaritzaren behin-behineko ebazpen baten bidez jakinaraziko zaie horren berri interesdunei. Ebazpen horretan, honako hauek zehaztuko dira:

1. Zer zuzendarik lortu duten PEFI_EFD prestakuntza-programa gainditu izanaren ziurtagiria.

2. Hautatutako zer zuzendarik ez duten gainditu prestakuntza-programa espezifikoa eta zergatik ez duten gainditu.

   Aurreko ebazpenaren aurka, interesdunek erreklamazioa aurkeztu ahal izango diote Ikaskuntzaren eta Hezkuntza Berrikuntzaren zuzendariari. Erreklamazio horiek Hezigunea atariaren bidez egin beharko dira, eta aurkezteko epea 2025eko ekainaren 11n amaituko da, egun hori barne.

   Ikaskuntzaren eta Hezkuntza Berrikuntzaren Zuzendaritzak ebatziko ditu aurkeztutako erreklamazioak, eta behin betiko ebazpena emango du. Ebazpen hori emateko epea 2025eko ekainaren 20an amaituko da.

   Behin betiko ebazpenaren arabera prestakuntza-programa espezifikoa gainditu ez duten zuzendarien kasuan, dagokion lurralde historikoko Hezkuntzako lurralde-ordezkariak egindako izendapenak ezohiko izaera izango du automatikoki.

Izendapenak eta karguaz jabetzeak 2025eko uztailaren 1etik aurrera izango dituzte ondorioak. Zuzendari kargua betetzen ari zenak eta zuzendaritza-taldeko gainerako kideek aurreko egunean utziko dute beren kargua, ondore guztietarako.

9,4. Agintaldia lau urtekoa izango da, ezohiko izendapenen kasuan izan ezik; kasu horretan, agintaldia urtebetekoa izango baita.