Lehenengoa. Aplikatu beharreko araudia.

2022-2023 ikasturterako, Hezkuntza Sailaren mendeko ikastetxe publikoetan, eta itunpeko ikastetxe pribatuetan, Haur Hezkuntzako bigarren zikloan, Lehen Hezkuntzan eta Derrigorrezko Bigarren Hezkuntzan, ikasleak onartzea Hezkuntzari buruzko 2/2006 Lege Organikoaren II. tituluaren III. kapituluan, aurreko Legea aldatzen duen abenduaren 29ko 3/2020 Lege Organikoak emandako idazkeran, urtarrilaren 9ko 1/2018 Dekretuan eta Hezkuntzako sailburuaren 2022-2023. ikasturterako izena emateko eskaerak aurkezteko egutegi komuna, onarpen-epea eta ikasleak onartzeko jarraibideak ezartzen dituen Aginduan xedatutakoaren arabera egingo da. Era berean, urtarrilaren 9ko 1/2018 Dekretuaren lehenengo xedapen gehigarrian xedatutakoaren arabera, 2 urteko gelei aplikatuko zaie:

Hezkuntza Sailaren mendeko ikastetxe publikoetan.

Haur Hezkuntzako lehen zikloa baimenduta duten eta etapa horretako bigarren zikloa ere ematen duten itunpeko ikastetxe pribatuetan eta.

Haur Hezkuntzako lehen zikloa soilik ematen duten eta urtarrilaren 9ko 1/2018 Dekretuaren Lehen Xedapen Gehigarrian xedatutakoaren arabera ikasleak onartzen dituzten ikastetxe pribatu baimenduak.

Bigarrena Onarpen-bermeetarako batzordeak.

1. Ikasleak onartzen direla bermatzeko egun diren lurralde-batzordeek haien egitekoak betetzen jarraituko dute irailaren 5era arte; izan ere, egun horretan berrituko dira. Hezkuntzako lurralde-ordezkariek beharrezkotzat joz gero, ikasleak onartzen direla bermatzeko beste batzorde batzuk eratu ahal izango dira, maila eta/edo esparru geografiko zehatz batean. Hori erabakiz gero, ikasleak onartzen direla bermatzeko lurralde-batzordeek dagokion batzordearen esku utziko dituzte geografia-eremu eta/edo -maila horietako funtzioak.

2. Onarpen-bermetarako batzorde bakoitzak gizonen eta emakumeen ordezkaritza orekatua izango du, eta honako hauek osatuko dute:

   1. Hezkuntza Administrazioko bi ordezkari; horietako bat batzordeko burua izango da eta bestea idazkaria.

   2. Ikastetxe publiko bateko zuzendari bat, dago(z)kion etap(et)akoa, zozketaz hautatua.

   3. Itunpeko ikastetxe pribatu bateko zuzendari bat, dago(z)kion etap(et)akoa, zozketaz hautatua.

   4. Batzordeari dagokion esparru geografikoko udalen ordezkari bat.

   5. Lau guraso, bi ikastetxe publikoetakoak eta beste bi itunpeko ikastetxeetakoak, dago(z)kien etap(et)akoak. Dagokion lurraldean edo etapan ordezkaritza handiena duen Guraso Elkarteen Federazioek proposatuko dituzte guraso horien izenak. Ordezkatuta egoteko eskubidea duten sektoretakoren batean Guraso Elkarteen Federaziorik ez balego, zozketa-bidez hautatutako bi ikastetxetako Eskola Kontseiluko bi guraso izendatuko dute hango gurasoek.

   6. Lau irakasle, bi ikastetxe publikokoak eta beste bi itunpeko ikastetxekoak, dago(z)kien etap(et)akoa. Dagokion lurraldean edo mailan ordezkaritza handiena duten irakasleen ordezkaritzako sindikatuek proposatuko dituzte haien izenak.

   7. DBHko bi ikasle, bata Hezkuntza Sailaren mendeko ikastetxe publiko batekoa eta bestea itunpeko ikastetxe batekoa, Ordezkaritza Organo Gorenaren edo Eskola Kontseiluaren ordezkariek beren artean aukeratuak. Bi ikastetxe horiek zozketa bidez izendatuko dira, dagozkien ikastetxeen artean.

3. Onarpen-bermetarako batzordeek honako eginkizun hauek izango dituzte:

   1. Ikasleen onartze-prozesua ikuskatzea, dagokion esparru geografikoko ikastetxe publiko eta pribatu itunduetan, eta araudia betetzen dela bermatzea, hezkuntzako ikuskaritzaren eskumenei kalterik egin gabe.

   2. Hezkuntzako lurralde-ordezkariei aholku ematea, ikastetxe bakoitzaren inguruko eragin-eremua eta haren mugakideak zehazteko.

   3. Hezkuntzako lurralde-ordezkariei aholku ematea eskaera bat baino gehiago aurkeztu duten ikasleen eskolatzeari buruz eta eskatzaileak aurkeztutako dokumentazioan faltsutasuna egiaztatzen duten ikasleen eskolatzeari buruz.

4. Onarpen-bermeetarako batzordeak eratzeko (Onarpena Bermatzeko Batzordeak eratzeko), Hezkuntzako lurralde-ordezkariak eskatuko die lurralde eta etapa bakoitzean ordezkaritza handiena duten udalen elkarteei, gurasoen elkarteei eta lurraldean eta dagokien etapetan ordezkaritza handiena duten irakasleen sindikatuei haien ordezkariak izenda ditzatela batzorde horietarako. Organizazio horiek hamar eguneko epean jakinarazi beharko dituzte ordezkarien izenak. Hala egingo ez balute, Batzordeak balio osoz eratuko dira, izendatu gabe geratu diren ordezkarien parte-hartzerik gabe.

5. Era berean, Hezkuntzako lurralde-ordezkariek hezkuntza-administrazioak onarpen-bermeen batzorde bakoitzean izango dituen ordezkariak izendatuko dituzte, eta halaber zozketa publikoa egingo dute. Zozketan aukeratu izango dira:

   Ikastetxe publikoetako eta itunpeko ikastetxe pribatuetako zuzendariak.

   Bi Ikastetxeak, bata publikoa eta bestea pribatu itundua, zeinen Ordezkaritza Organo Gorenak eta Eskola Kontseiluak batzorde horietako kide izango diren ikasleak izendatuko baitituzte.

   Denbora nahikoaz jakinaraziko zaie ikastetxe guztiei zozketa horiek noiz eta non egingo diren.

   Hirugarrena. Eragin-eremuak.

1. Ikastetxeen eragin-eremuak eta eremu mugakideak zehaztuko dituzte, ebazpen baten bidez, hezkuntzako lurralde-ordezkariek; hala, bizileku guztiak sartuko dira gutxienez ikastetxeren baten eragin-eremuan. Mugapen hori egiteko, Onarpen-bermeetarako Batzordeek aztertu beharko dute gaia lehendabizi, eta eragindako ikastetxeei eta udalei entzun beharko zaie; horrez gain, kontuan izan beharko da ikastetxe bakoitzak baimenduta duen edukiera eta haren ingurunean eskolatzeko adinean dagoen biztanleria.

2. Eragin-eremuak eta horien mugak zehaztuko dira ikastetxeetan ematen diren etapa bakoitzerako eta hizkuntza-eredu bakoitzerako. Eremuen zehaztapenak jendearentzat eskuragarri egongo dira kasuan kasuko Hezkuntzako Lurralde Ordezkaritzetan.

3. Hezkuntzako lurralde-ordezkariek jarraibide honetan xedatutakoa ezartzeko, Udalbatzei laguntza eskatzeko ahalmena dute, eta horiek eskatutako laguntza eman behar dute.

4. Hezkuntzako sailburuordeak lurralde historiko bateko lurralde-eremua gainditzen duten eragin-eremuak ezarri ahal izango ditu, ikastetxeren batean ematen diren irakaskuntzak oso bereziak direnean edo bestelako salbuespen-egoerak tarteko.

   Laugarrena. Eskola-toki kopuruaren zehaztapena.

   Hezkuntzako lurralde-ordezkariek Haur Hezkuntza, Lehen Hezkuntza eta Derrigorrezko Bigarren Hezkuntzako ikastetxe publiko eta itunpekoei jakinaraziko dizkiete maila eta hizkuntza-eredu bakoitzean matrikula daitezkeen talde kopuruak eta gehieneko ikasle kopuruak.

   Bosgarrena. Plazak gordetzea.

1. Hezkuntza-laguntzako premia espezifikoak dituzten ikasleak ikastetxe publikoen eta itunpeko ikastetxe pribatuen artean modu orekatuan banatzea lortzeko, hezkuntza-sisteman txertatzen laguntzeko baldintzetan, Hezkuntzako lurralde-ordezkariek zehaztu ahal izango dute zenbat plaza gorde behar dituzten Hezkuntza Sailaren mendeko ikastetxe publikoek eta itunpeko ikastetxe pribatuek ikasturte eta hizkuntza-eredu bakoitzean aurreinskripzio- eta matrikulazio-aldia amaitu arte ikasle horiek eskolatzeko.

2. Hezkuntzako lurralde-ordezkariek eskaerak egiteko epea hasi baino lehen jakinaraziko dizkiete erabaki horiek ikastetxeei.

   Seigarrena. Atxikitako ikastetxeetan ikasleak onartzeko lehentasunak.

1. Haur Hezkuntzako lehen zikloa bakarrik ematen duten eta ikasleak 1/2018 Dekretuaren arabera onartzen dituzten itunpeko ikastetxe pribatuetako ikasleek lehentasuna izango dute beren ikastetxea atxikita dagoen Haur Hezkuntzako bigarren zikloko ikastetxean edo ikastetxeetan sartzeko, eta bermatuta izango dute ikastetxe horretarako sarbidea, baldin eta plaza nahikoa badago (1/2018 Dekretua, urtarrilaren 9koa, Euskal Autonomia Erkidegoan hezkuntzaren eskumena duen sailaren agindupeko ikastetxe publikoetan eta Haur Hezkuntza, Lehen Hezkuntza, Bigarren Hezkuntza, Batxilergo eta erdi-mailako eta goi-mailako Lanbide Heziketako itunpeko ikastetxe pribatuetan, baita oinarrizko lanbide heziketa ematen den udalaren ikastetxe publikoetan ere, ikasleak onartzea nahiz eskolatzea arautzekoa).

2. Haur Hezkuntzako ikastetxeetako ikasleak zein ikastetxetan dabiltzan, ikastetxe horri atxikitako Lehen Hezkuntzako ikastetxeetan izango dute lehentasuna, eta ikastetxe horietan onartuak izango direla bermatuko da baldin eta bertan plaza nahikoa badago.

3. Lehen Hezkuntzako ikastetxeetako ikasleek lehentasuna izango dute beren ikastetxea atxikita dagoen Derrigorrezko Bigarren Hezkuntzako ikastetxera edo ikastetxeetara sartzeko, eta ikastetxe horretan onartuak izango direla bermatuko da behar adina plaza badaude.

4. Musika eta dantzako ikasketa arautuak eta derrigorrezko bigarren hezkuntzako ikasketak batera ikasten dituzten ikasleek edo errendimendu handiko kirol-programak jarraitzen dituztenek lehentasuna izango dute onartuak izateko Hezkuntza Sailak zehazten dituen Derrigorrezko Bigarren Hezkuntzako ikastetxeetan; gainera, bermatuta izango dute horietara joateko aukera, baldin eta horietan nahikoa plazarik bada. Berdin jokatuko da errendimendu handiko kirol-programak egiten dituzten ikasleekin. Atal honetan jasotako ikasleek lehentasun-eskubideaz baliatzeko, ikasleentzat aurreko atalean jasotzen diren eskubideak bete behar dira. Paragrafo horretan aipatzen diren zentroak aginduaren III. eranskinean agertzen dira. Ikaslea EAEko Musikako ikastetxe arautu batean matrikulatuta badago, ez da justifikazio-agiririk aurkeztu beharko.

5. Lehentasunak kontuan hartuko dira baldin eta zentro eta eredu atxikiak lehentasunezko eskabideak badira. Ondorioz, eskubide horri uko egingo zaio zentro eta eredu atxikietan egindako eskaeretan, atxiki gabeko zentroetan edo ereduetan egindako eskaerak baino lehentasun-maila txikiagoa dutenean, aurreko apartatuan aipatzen diren ikasleak izan ezik, baldin eta III. eranskinean agertzen diren zentroak eskatzen badituzte.

6. Aurreko ataletan jasotako ikasleek ez dute baremoko atalei buruzko dokumentaziorik aurkeztu beharko. Derrigorrean barematu behar denean, eskatuko diete ikastetxeek dokumentazio hori aurkezteko.

   Zazpigarrena. Ikasleak onartzeko prozesuari buruzko informazioa.

   Onarpen-eskabideak aurkezteko epea ireki baino lehen, ikastetxe publiko eta pribatu itundu guztiek ondoko informazioa emango diete argibideak eskatzen dituzten ikasleen guraso edo tutoreei, eta ikastetxeko iragarki-taulan ere honako informazio jarriko dute:

   1. Ikasleak ikastetxe publiko eta pribatu itunduetan onartzeko araudia.

   2. Ikastetxearen eragin-eremua eta haren mugakideak.

   3. Eskabideak egiteko epeak.

   4. Prozesuaren egutegia, eta, horren baitan, besteak beste, onartuta eta baztertutako ikasleen zerrendak argitaratzeko egunak, erreklamazioak jartzeko epeak eta eskabideari uko egiteko epea.

   5. Ikastetxearen Eskola Kontseiluak eta Ordezkaritza Organo Gorenak emandako puntuazioa zehazteko irizpideak. Eskabideak aurkezteko epea hasi baino lehenago Hezkuntzako lurralde-ordezkaritzari irizpideok jakinarazteko bidalitako idazkiaren kopia jarriko da iragarki-taulan.

   6. Eskabideak aurkezteko epean ikastetxeko idazkaritzak jendeari erantzuteko duen egutegia eta ordutegia.

   7. Onarpen-prozesuari buruzko galdera ohikoenei erantzuteko dokumentua.

      Zortzigarrena. Eskatzaileak eta eskabidea bideratzeko erak.

      1. Eskabidea ikaslearen aitak, amak, edo tutoreak aurkeztuko du.

      2. Honako bi moduetako batean izapidetu beharko da eskabidea:

         On-line, Hezkuntza Sailak hartarako gaitutako aplikazio informatiko baten bitartez.

         Hautaturiko ikastetxeko idazkaritzan lehenik, zeinak aplikazio informatikoan eskatzaileak eskabidean emandako datuak sartzeko ardura izango baitu.

      1. Online eskabidea.

         Online eskabidea urtarrilaren 28ko 24:00etara arte aurkeztu ahal izango da; ordutik aurrera, aplikazioa ez da aktibo egongo. Aplikazioan sartzeko, «Ikasgunea» ataria (https://ikasgunea.euskadi.eus) erabili beharko da.

         Eskabidearekin batera, beharrezkoak diren dokumentuak erantsiko dira, bai nahitaezkoak, bai baremazio-prozesuan puntuak egiaztatzen dituztenak.

         Eskabidea bete eta gorde ondoren, aplikazio informatikoak lehenengoan eskatutako zentroaren eskura jarriko du lehenik, eta horrek bideratuko du. Eskatzaileak nahi duenean jaso ahal izango du eskabidearen frogagiria, eta zirriborrotzat hartuko da ikastetxeak izapideak egin arte.

         Behin eskabideari alta emanda eskatzaileek urtarrilaren 28ra arte aukera izango dute grabatutako datuak aldatu edo zuzentzeko aplikazioaren bitartez. Aukera hori egin ezean, lehen eskatutako ikastetxea eskaera izapidetzen hasi delako, berarekin jarri beharko dute harremanetan.

      2. Aurrez aurreko izapidetza.

         Eskatzailea lehen tokian eskatutako zentrora joango da, idazkaritza-orduetan, urtarrilaren 28ra arte egun hori barne hartuta, eta aurkeztu nahi duen dokumentazioa eramango du.

         Eskabidearen datuak sartu eta dokumentazioa egiaztatu ondoren, zentroak eskatzaileari inprimaki bat erakutsiko dio; bertan, honako datu hauek jasoko dira: datu pertsonalak, egindako eskaerak, baremaziorako argudiatu diren arrazoiak, eta eman diren dokumentuak zeintzuk diren.

         Eskatzaileak, berriz, sartutako datuak aztertuko ditu, eta, konforme baldin badago, inprimakia sinatuko du. Ikastetxeak, orduan, eskatzaileak sinatutako inprimakia zigilatu eta lehen sartutako datuak balioztatuko ditu. Inprimaki hori, sinatuta eta zigilatuta dagoenean, eskatzaileak egindako eskaeren frogagiria eta egiaztagiria izango da.

         Eskatzaileek urtarrilaren 28ra arte (egun hori barne) izango dute aukera gordetako daturen bat aldatzeko edo zuzentzeko. Eskabidea zer ikastetxetan entregatu, ikastetxe horrek egin beharko ditu aldaketak. Data horretatik aurrera ez da zuzenketarik onartuko.

         Dagokion zuzenketa egiteko, ezinbestekoa izango da aldez aurretik eman zitzaion jatorrizko inprimakia, sinatuta eta zigilatuta, aurkeztea. Egin beharreko zuzenketak egin ondoren beste inprimaki bat emango zaio, sinatuta eta zigilatuta; orduan zaharra apurtu, eta datu berriak baliozkotuko dira.

      3. Eskabideak baldintza guztiak betetzen ez baditu edo eskatutako nahitaezko agiriak berekin ez baditu, eskatzaileari eskatuko zaio hamar eguneko epean hutsa zuzentzeko edo nahitaezkoak diren dokumentuak aurkezteko; eta adieraziko zaio, hala egin ezean, eskaera bertan behera utziko zaiola, Herri Administrazioetan Administrazio Prozedura Komunaren urriaren 1eko 39/2015 Legean ezarritakoaren arabera.

      4. Eskabidea sistema informatikoan grabatuta egonez gero, horren tramitazioa bi erara jarraitu ahal izango da: aurkeztu den zentroan, edo online.

         Bederatzigarrena. Izapideak egitea.

      1. Onartzeko eskabidea bakarra izango da eta, bat baino gehiago aurkezten badira zentro batean edo hainbat zentrotan, eskatzailearen aukeratzeko eskubidea galduko da. Dena den, hori gertatuko da interesdunarekin nahitaezko entzunaldia izan ondoren. Ondorioz, bikoiztutako eskabideak azkenak izango dira izapidetzen, gainerako eskabideei plazak esleitu eta gero.

      2. Epez kanpo ez da eskabiderik onartuko. Zentroek epean aurkezten diren matrikula-eskabide guztiak onartu eta izapidetu beharko dituzte, eskatutako mailan eta ereduan eskola-plaza nahikoak egon ala ez, eta, dagokienean, baremoa ezarriko dute.

      3. Haur Hezkuntzako maila bat egin nahi duten ikasleek ikasturtea hasi den urtean duten adinari dagokion maila eskatu beharko dute. Ikasle eskatzailea Haur Hezkuntzako bigarren zikloko hirugarren maila edo Lehen Hezkuntzako edo Derrigorrezko Bigarren Hezkuntzako maila bat egiten ari bada, une horretan egiten ari dena baino maila bat gorago onartzeko eskatu behar du. Azken kasu horretan sartzen diren eta Euskal Autonomia Erkidegoa ez den beste leku batetik datozen ikasleek egindako ikasketen ziurtagiria aurkeztu behar dute, argi eta garbi adieraziz zer maila egiten ari diren une horretan.

      4. Eskabidean, gehienez, hamabi eskaera egin ahal izango dira, lehentasunaren arabera antolatuta. Eskaera bakoitzean, ikastetxe eta hizkuntza-eredu bana aukeratuko dira, zentroak eredu hori eskaini ala ez.

      5. Ikastetxe batek ez badu eskaintzen eskakizuneko hizkuntza-eredu lehenetsia, Hezkuntzako Lurralde Ordezkaritzak aztertuko du maila eta eredu horretako taldea sortzeko aukerarik baden ikastetxean bertan edo inguruan, betiere behar adina eskabide badaude eta plangintzak posible egiten badu. Dena den, ikasleak parte hartuko du onartzeko prozesuan, eskaintzen diren ereduetan egin dituen gainerako eskaerekin.

      6. Halaber, Lurralde Ordezkaritzek kudeatu beharko dituzte ematen ez diren ikasketak edo hizkuntza-ereduak bakarrik eskatzen dituzten eskabideak. Horretarako, eskabide horiek erregistratu diren zentroei eskatuko diete eskabide horiek beraiek bidaltzea, eskabidean adierazitako zentroek eskabide bera barematu dutela egiaztatuta aplikazio informatikoan.

      7. Eskabidearekin batera, ondorengo dokumentazioa aurkeztu beharko da, nahitaez:

         Ikaslearen familia-liburuko fotokopia, edo jaiotza-ziurtagiria.

         Eskaera egiten duen pertsonari dagokion familia-liburuko fotokopia: aita, ama; edo ikaslearen legezko tutorea dela ziurtatzen duen agiria.

         Eskabidea egiten duen lagunaren NANaren edo AIZren fotokopia: aitarena edo amarena, edo legezko tutorearena. Izapidea on-line egiten bada eta nortasun-datuak kontsultatzeko zerbitzuak dokumentu hori baliozkotzen badu, ez da beharrezkoa izango agiri hori aurkeztea.

         Familiaren bizilekuaren ziurtagiria (ikaslearena, aitarena, amarena, edo tutorearena), gehienez hiru hilabeteko antzinatasunekoa eta Udalak egindakoa.

         EAEtik kanpo eskolatutako ikasleen kasuan, egindako ikasketen ziurtagiria, argi eta garbi adieraziz zer maila egiten ari diren une horretan.

         Ikaslea familia-harreraren egotekotan, egoera hori egiaztatzen duen ziurtagiri ofiziala.

         Banandutako edo dibortziatutako familien kasuan, Hezkuntza Sailak ezarritako protokoloa betetzen dela egiaztatzen duen dokumentua (esate baterako, ezkontide ohiaren baimen-idazkia, eskaera bermatzen duen ebazpen judiziala edo behin-behineko neurria, etab.).

         Beheko maila batean onartzeko eskaera egiten bada jaiotze goiztiarrengatik edo jaiotze oso goiztiarrengatik, bederatzigarren jarraibidearen 4. paragrafoan adierazitako baldintzetan, eskaera hori bermatzen duen txosten medikoa.

         Halaber, baremoko edozein apartaturen puntuazioa eskatzen denean, behar diren egiaztagiriak aurkeztu beharko dira.

         Aurrez aurreko tramitazioan, dokumentazio guztia (bai nahitaezkoa bai baremazioan puntuak lortzeko beharrezkoa dena) lehenengo eskatu den zentroan aurkeztuko da, beste edozein zentrok eman behar dituen baremazio-puntuak egiaztatzen duen dokumentazioa izan ezik. Hori zentro bakoitzaren idazkaritzan aurkeztu beharko da, lehenengo eskatu den zentroan eskabidea erregistratu ondoren. Horretarako, eskabidean adierazita egon behar dira puntuazioa eskatzen den zentro bakoitzaren baremoko apartatuak.

         Familia egoitzari edo lantokiari dagozkion puntuak egiaztatzeko, dagozkion ziurtagiriak lehenengo eskaeran aukeratutako zentroan aurkeztea aski izango da, eta eskaera guztietarako baliagarriak izango dira, puntuazioa guztietan alda daitekeen arren. Aplikazio informatikoak, eskaera bakoitzeko, puntuazio hoberena esleituko du ziurtagiriak kontuan hartuta.

         Internet bidezko tramitazioan, dokumentazio guztia eskaneatuko da eta, ondoren, eskabidearekin batera bidali beharko da Hezkuntza Sailak abian jarritako aplikazio telematikoaren bitartez.

         Eskabideak onartzeko epea amaitu ondoren ez da beste agiririk onartuko. Atal edo azpiatal batean puntuatzeko balio duten agirietako bat aurkezten ez bada, batere punturik gabe geratuko da atal edo azpiatal hori. Horrek ez du eskaera baliogabetzen, ez eta gainerako ataletako edo azpiataletako puntuazioak ere.

         Hezkuntza Administrazioak noiznahi egiaztatu ahal izango du ekarri zaizkion dokumentuen benetakotasuna.

      8. Hezkuntza-premia bereziak dituzten ikasleek, matrikulatzea eta eskolatzea ekainaren 23ko 118/1998 Dekretuaren 7. artikuluan zehaztuta dagoena, egoera horren berri eman beharko diote ikastetxeari eskabidea aurkeztean, dagokien plaza eta behar dituzten laguntzak bideratzeko.

      9. Euskal Autonomia Erkidegoko ikastetxe publiko zein itunpeko ikastetxe pribatuetan ikasleen onarpena arautzen duen urtarrilaren 9ko 1/2018 Dekretuaren 25. artikuluak, baremazioan egon litezkeen berdinketak hausteko, ausazko prozedura bat egitea agintzen du, hezkuntzako eskumena duen sailak zehaztuko duena.

         Xedapen hori betetzeko, eskabidearen datuak balioztatzeko unean, aplikazio informatikoak ausazko hurrenkera-zenbaki bat esleituko dio eskabideari: 1 eta 999999ren arteko zenbaki oso bat, alegia. Zenbaki hori erabiliko da egon litezkeen berdinketak hausteko; betiere, gainerako irizpide guztiak aplikatuta ere berdinketak bere horretan badirau. Kasu horretan, aplikazio informatikoak eskabide guztiak txikienetik nagusienera ordenatu, eta txikienari emango dio lehentasuna.

         Familia berekoak ikastetxe berera joan ahal izatea ez oztopatzeko, bi neba-arreba hezkuntza-maila berean daudenean eta baremo-puntuazio berdina dutenean, ausazko prozeduran emaitza okerragoa lortu duen neba-arreba emaitza hobea atera duenaren ondoan jarriko da zerrendan, hurrengo postuan.

         Eskabideko datuak aldatuta ere, inoiz ez da aldatuko hurrenkera-zenbaki hori, hots, eskabidea lehenengo aldiz egin zenean ausaz esleitu zitzaiona.

      10. otsailaren 15ean, argitaratuko dira eskatzaileen zerrendak, etapa, kurtso eta hizkuntza-ereduen arabera antolatua. Zerrenda horretan Derrigorrezko Bigarren Hezkuntzako 1. mailara pasatzeko bermea duten Lehen Hezkuntzako 6. mailako ikasleak sartuko dira, agindu honen 2. artikuluaren hirugarren paragrafoan ezarritakoari jarraituz.

          Gardentasuna eta onartzeko prozesuaren parte-hartzaileen datu pertsonalen babesa batzeko asmoz, zerrenda Hezkuntza Sailaren atarian jakitera emango da, «Ikasgunea» (https://ikasgunea.euskadi.eus). Bertan, nortasuna egiaztatuta, eskatzaileek eskura izango dituzte eskabidean adierazitako ikastetxe, kurtso eta hizkuntza-ereduen zerrendak.

          Ikastetxeek ez dute publikoki erakutsiko zerrenda, baina eskatzaileek banako sarbidea izango dute, behin-behineko zerrendak argitaratzen diren egunaren bezpera arte.

      11. Onartzeko prozesuan atzera egin ahal izango da martxoaren 15era arte. Atzera egiteko idazkiak eskaera guztietan izango du eragina. Eskaera online egin bazen, era berean egingo da «Ikasgunea» atarian sartu eta gero. Ikastetxean bertan egin bazen, eskatzaileak egindako atzera egitearen idazkia aurkeztu behar da eskabidea aurkeztu zuen zentroan. Ondoren zentroak idazki hori artxibatuko du, bere garaian egindako eskaerarekin batera.

          Hamargarrena. Baremazioa.

          Ikastetxeak ez ditu eskabideak nahitaez baloratu beharko, horien lehentasun-ordena edozein dela ere, maila eta hizkuntza-eredu jakin batean jasotako eskaeren kopurua plaza eskuragarriena baino handiagoa ez bada.

          Maila eta hizkuntza-eredu jakin batean jasotako eskaeren kopurua, horien lehentasun-ordena edozein dela ere, plaza eskuragarrien kopurua baino handiagoa bada, ordea, ikastetxe publikoen Ordezkaritza Organo Gorenak edo itunpeko ikastetxeen titularrak, zentroaren eskola-kontseiluak gainbegiratuta, jaso dituen eskaerak barematuko ditu, urtarrilaren 9ko 1/2018 Dekretuan aipatzen diren baremoaren eta hori aplikatzeko arauen zein jarraibide hauen arabera.

          Lehenengo eskatu den zentroak apartatu guztiak barematu beharko ditu. Bestalde, eskabidean aipatu diren beste zentroek agindu honen IV. eranskinean agertzen diren b), c), g), eta h) apartatuak barematuko dituzte.

          Hamaikagarrena. Eskatutako zentroan ikasten edo lan egiten duten senideak izateari dagokion baremoko apartatua aplikatzeko arauak.

      1. Atal honi dagokion puntuazioa IV. eranskinean jasotako bi kasuetako batek emango du, baldin eta eskatzaileak neba-arreba bat edo gehiago matrikulatuta baditu eskatutako ikastetxean edo atxikitako ikastetxe batean, edo amak, aitak edo legezko tutoreak eskatutako ikastetxean edo atxikitako ikastetxe batean lan egiten badu. Bi zirkunstantzia horiek gertatzen badira ere, horietako bakar batengatik emango da puntuazioa. Atal honen ondorioetarako, Hezkuntza Sailak araututako onarpen-prozesuaren pean dagoen maila batean matrikulatutako anai-arrebak bakarrik hartuko dira kontuan.

      2. Apartatu honetako puntuak lortu ahal izateko, egoera hau 2021-2022 ikasturtean gertatu behar izan da.

      3. Anaia edo arreba, aita edo ama dela egiaztatzeko, familia-liburuaren kopia aurkeztuko da. Ikaslearen legezko tutorearen izaera egiaztatzeko, berriz, sententziaren kopia edo dagokion ziurtagiri ofiziala aurkeztu beharko da.

      4. Atal honi dagokion puntuazioa ematean, anai-arrebatzat hartuko dira familia-unitatean legezko tutoretza-egoeran edota behin betiko nahiz adopzio aurreko familia-harreran dauden adingabeak.

      5. Halaber, ikaslearen zaintza gurasoetako batek bakarrik badu, guraso horren legezko bikotekidea ere ikaslearen aitatzat edo amatzat joko da. Pertsona horren seme-alabak ere neba-arrebatzat hartuko dira ikaslearekin batera bizi badira. Egoera hori dagokion errolda-agiriaren bidez egiaztatu beharko da.

      6. Ikaslearen zaintza duen gurasoaren bikotekidea dela ziurtatzeko, guraso horri zaintza ematen dion epaiaren kopia aurkeztu behar da, eta biak elkarrekin ezkonduta daudela egiaztatzen duen familia-liburua edota izatezko bikote direla adierazten duen ziurtagiri ofiziala ere aurkeztu behar da.

         Hamabigarrena. Bizitokiaren gertutasunari, edo aitaren, amaren edo legezko tutorearen lantokiaren gertutasunari dagokion baremoko apartatua aplikatzeko arauak.

      1. Atal honi dagokion puntuazioa agindu honen IV. eranskinean agertzen diren bost azpiataletatik bakar batek emango du. Eskatzaileek azpiapartatu bat aukeratu beharko dute puntuazioa lortu ahal izateko.

      2. Ikaslea aitarekin, amarekin edo lege-tutorearekin bizi den lekua izango da familiaren bizilekua. Familia-bizilekua egiaztatzeko, ikaslea aitarekin, amarekin edo lege-tutorearekin bizi dela egiaztatzen duen errolda-ziurtagiria aurkeztu beharko da.

         Aita edo ama dela egiaztatzeko, familia-liburuaren kopia aurkeztuko da. Ikaslearen legezko tutorearen izaera egiaztatzeko, berriz, sententziaren kopia edo dagokion ziurtagiri ofiziala aurkeztu beharko da.

         Bizilekuaren gertutasunari dagozkion puntuak errolda-ziurtagirian ageri den bizilekuari esleituko zaizkio, betiere hezkuntza-administrazioak ebazten ez badu -jarraian adieraziko dena aplikatuta- puntu horiek ez direla eman behar.

         Errolda-ziurtagiriak, aurkako frogarik ezean, bizilekuaren presuntzio balioa du. Badira froga-elementuak presuntzio hori hutsaldu dezaketenak, hala nola ur-, elektrizitate-, gas- edo telefono-horniduren titulartasuna eta kontsumoak, erroldaren datu historikoak, elkarrekin bizi diren pertsonak, dokumentu fiskalak, adierazitako bizilekua jasotzen duten banketxeetako edo zerbitzu-hornitzaileen dokumentuak, beste etxebizitza batzuk jabetzan izatea eta erabiltzea, eta egiazko bizilekua eta errolda-ziurtagirian adierazitakoa bat ez datozela ondorioztatzera eraman diezaguketen bestelako dokumentu publiko edo pribatuak.

         Zentro edo maila bateko onartzeko prozesuan parte hartzen duen pertsona batek erreklamazio bat aurkezten badu hezkuntza-administrazioaren aurrean beste parte hartzaileren batek bizitokiaren gertutasunaren apartatuan jasotako puntuazioarengatik, erreklamazioan adieraziko ditu hori jartzeko arrazoiak edo zantzuak. Ondoren, hezkuntza-administrazioak, puntuazioan zalantzak dituenean, eskatzaileari dokumentuak edo bestelako elementuak aurkezteko eskatuko dio, bizitokia egiaztatzeko.

         Errekerimendua jaso duen pertsonak ez badu aurkezten dokumentazio edo froga-elementu osagarririk horretarako emandako epean, hau da, eskatzailearen frogatze-jarduera osagarririk ez badago, nahikoa arrazoi izango da aipatutako puntuak ez esleitzeko, betiere, errekerimenduaren jakinarazpena jasota geratu bada espedientean. Horrelako egoeretan, edo aurkeztutako dokumentuak ez badira nahikoak froga modura, hezkuntza-administrazioak berariazko ebazpena emango du bizilekuaren gertutasunari dagozkion puntuak ezin direla esleitu adierazteko.

         Ebazpen horren aurka gora jotzeko errekurtsoa aurkeztu ahal izango da, eta zein arrazoi zehatzetan oinarritzen den adierazi beharko du.

      3. Eskatutako ikastetxearen eragin-eremuan dagoenean aitaren, amaren edo legezko tutorearen lantokia, eskabidea aurkeztean, bizitokiaren gertutasunaren ordez, egoera hori baloratzea eskatu ahal izango da.

         Horrela egiten bada, besteen konturako langileen kasuan, aitak, amak edo legezko tutoreak lan egiten duen enpresako titularrak edo arduradunak ziurtagiria egin beharko du, egoera hori egiaztatzeko.

         Jarduera norbere kontura egiten bada, lantokia egiaztatuko da Jarduera Ekonomikoen Zergan altan egotearen ziurtagiriaren bidez. Indarreko araudiari jarraikiz, Jarduera Ekonomikoaren Zergan altan egotea nahitaezkoa ez bada, dagokion udalak egindako irekitze-baimenaren fotokopia konpultsatua aurkeztu beharko da.

      4. Lantokiak ikastetxearen eragin-eremuaren barruan duen kokapenari dagokion puntuazioa aplikatzeko, zaintza duen gurasoaren legezko bikotekidea den pertsona ere hartuko da ikaslearen aitatzat edo amatzat.

         Ikaslearen zaintza duen gurasoaren bikotekidea dela ziurtatzeko, guraso horri zaintza ematen dion epaiaren kopia aurkeztu behar da, eta biak elkarrekin ezkonduta daudela egiaztatzen duen familia-liburua edota izatezko bikote direla adierazten duen ziurtagiri ofiziala aurkeztu behar da.

      5. Eskatutako ikastetxearen eragin-eremu mugakidean dagoenean aitaren, amaren edo legezko tutorearen lantokia, ez da kontuan hartuko.

      6. Aitaren, amaren edo legezko tutorearen lantokia ikastetxetik gertu egoteagatik lortutako puntuazioa ez da bateragarria izango bizitokiaren gertutasunari dagokionarekin, ez eta ikaslearen aitak, amak edo legezko tutoreak eskatu den ikastetxean lan egiteagatik lortutako puntuazioarekin ere.

      7. Eragin-eremuaren kontzeptu horietako bakar bategatik ere punturik lortu ez dutenek, baldin eta ikastetxea kokatuta dagoen udalerrian bizi badira, atal honetan puntu bat lortzeko eskubidea izango dute. Bizilekua EAEn badute, baina ikastetxea dagoen udalerritik kanpo, puntu erdi emango zaie.

         Hamahirugarrena. Familia-unitatearen urteko errentei dagokien baremoko apartatua aplikatzeko arauak, eta seme-alaben kopuruaren eragina.

      1. Urtarrilaren 9ko 1/2018 Dekretuaren eranskinean adierazitako puntuak lortzeko behar diren diru-sarrera konputagarriak izango dira familia-unitateko kide guztiek 2020ko zerga-ekitaldian izandako zerga-oinarri orokorrari eta aurrezkiaren zerga-oinarriari dagozkionak. Baremoko atal honetan punturik lortzeko, zerga-oinarriak ez du 13.300,00 euroko muga gainditu beharko. 2020ko lanbide arteko gutxieneko soldatari dagokio kopuru hori. Horren ondorioz, puntu horiek lortu nahi dituzten eskatzaileek hezkuntza-administrazioari baimena eman beharko diote dagokion foru-ogasunean hori egiaztatu dezan.

      2. Euskal Autonomia Erkidegoan bizi ez diren eskatzaileek familia-unitateko diru-sarreren puntuak lortzeko eskubidea eskuratu nahi badute, familia-unitateko kide guztien 2020ko banakako errenta-aitorpenen kopia aurkeztu beharko dute edo, hala badagokie, baterako aitorpena. Familia-unitateko kideren batek, zerga-araudiari jarraituz, urte horretan errenta-aitorpena egin ez badu, ogasunak egindako ziurtagiria aurkeztu beharko da aitorpena egin ez dela egiaztatzeko.

      3. Jarraibide honen aurreko ataletan ezarritakoaren ondorioetarako, familia-unitatetzat hartuko da pertsona fisikoen errentaren gaineko zerga arautzen duten kasuan kasuko foru-arauetan ezarritakoa. Horretaz gainera, familia-unitatetzat hartuko da onarpen-eskaeraren helburu den adingabea, familia-liburuan ageri diren gurasoekin batera, non eta ez den egiaztatzen, hitzarmen arautzaile bidez, adingabearen zaintzaren gaineko ardura banatuta dagoela.

         Ezkontza-deuseztasuna, banantzea edo dibortzioa gertatuz gero, edo izatezko bikotearen bizikidetza deseginez gero, baremoa aplikatzerakoan, ikaslearen jagoletza ebazpen judizial irmo bidez edo hitzarmen arautzaile bidez esleitua duenaren errenta baino ez da aintzat hartuko. Berdin jokatuko da tutoretza judizialaren, familia-harreraren edo antzeko babes-neurrien kasuan, halakoetan gurasoak ez diren beste pertsona fisiko batzuen esku geratzen baita ikasle adingabearen jagoletza. Edozein administrazio publikok tutoretza badauka, irizpide horretan, gehieneko puntuazioa ezarriko da.

      4. Neba-arreben kopurua familia-liburuaren, jaiotza-agiriaren edo harreman hori egiaztatzen duten bestelako dokumentuen kopiarekin egiaztatuko da. Bakarrik adingabeko neba-arrebak hartuko dira kontuan.

         Hamalaugarrena. Familia ugariko kide izateari dagokion baremoko apartatua aplikatzeko arauak.

      1. Eskatzailea EAEn bizi bada eta familia ugaria dela adierazten badu, bere kategoria eskuratuko da, Berdintasun, Justizia eta Gizarte Politiketako Sailari kontsulta eginez, eta ondoren dagokion puntuazioa emango zaio. Adierazpena egiaztatzea ezinezkoa bada, eskatzaileak, ezarritako epearen barruan, eta «Ikasgunea» atarian sartu ondoren, egiaztagiria aurkeztu beharko du, eskabidea on-line izapidetu bazen, edo lehen eskatutako ikastetxean, eskabidea aurrez aurre izapidetu bazen.

      2. EAEn bizi ez diren eskatzaileen kasuan, bizi diren autonomia-erkidegoak emandako titulu ofizialaren bidez egiaztatuko da familia ugariaren izaera.

         Hamabosgarrena. Erditze anizkoitzean jaiotako ikasleei buruzko baremoaren atala aplikatzeko arauak.

      1. Atal honi dagokion puntuazioa emango da erditze anizkoitzean jaiotako anai-arreben kasuan, betiere aukera berberak eta ordena berean eskatzen badira.

      2. Egoera hori egiaztatzeko, familia-liburuaren kopia, jaiotza-agiriak edo hori egiaztatzen duten beste atzeko agiri ofizial batzuk aurkeztu beharko dira.

         Hamaseigarrena. Guraso bakarreko familia bateko kide izateari buruzko baremoaren atala aplikatzeko arauak.

      1. Agindu honen ondorioetarako, guraso bakarreko familiatzat hartuko da ikaslearen guraso-ahala pertsona bakar batek egikaritzen duenean, edo, bi pertsonak egikaritzen dutenean, ikaslearekin bizi den beste gurasoarekiko urruntze-agindua duenean, betiere ikaslearekin bizi den guraso-ahala duen gurasoa ez badu legezko bikotekidea den beste hirugarren pertsona batekin lotura berririk.

      2. Egoera hori egiaztatuko da familia-liburuaren kopia, Erregistro Zibilaren ziurtagiria, urruntze-aginduaren kopia edo egoera hori egiaztatzen duten beste agiri ofizial batzuen bidez.

         Hamazazpigarrena. Bazkide kooperatibista izateari buruzko baremoaren atala aplikatzeko arauak.

      1. Atal honi dagokion puntuazioa emango da eskatzailearen aita edo ama, edo legezko tutorea, eskatutako ikastetxeko bazkide kooperatibista izateagatik.

      2. Egoera hori egiaztatzen duen ziurtagiriaren bidez egiaztatuko da.

         Hemezortzigarrena. Ordezkaritza Organo Gorenak edo zentroaren eskola-kontseiluak ezarri duen beste edozein egoerari dagokion baremoko apartatua aplikatzeko arauak.

      1. Ikastetxe publikoen Ordezkaritza Organo Gorenek eta itunpeko ikastetxe pribatuetako eskola-kontseiluek irizpide bat edo bat baino gehiago ezarri ahal izango dute, hala nahi izanez gero, eskatzaileei gehienez puntu osagarri bat emateko.

      2. Puntuazio osagarria emateko bete behar diren irizpideak objektiboak izan behar dira. Irizpideak eta egiaztatzeko baldintzak zentroaren organo eskudunak onartu, eta jakitera emango dira eskabideak bidaltzeko epea hasi baino lehen.

         Era berean, ikastetxe bakoitzak dokumentu bat sartu beharko du aplikazio informatikoan urtarrilaren 14ra arte. Dokumentu horretan zehaztuko ditu puntuazioa emateko irizpideak. Hala, eskabidea bide telematikotik egiten dutenek informazio hori eduki ahal izango dute eskura. Dokumentu horren beraren kopia erakutsiko da zentroko iragarki-oholean.

      3. Puntuazioa kontzeptu batengatik edo bat baino gehiagorengatik emango da. Hainbat kontzepturengatik ematen denean, horien artean banatu ahal izango da, edo zuzenean eman horietako bat betetzen bada.

      4. Puntuazio osagarri hau emateko irizpideak desberdinak izan daitezke kurtsoko edo hezkuntza-mailako.

      5. Apartatu honen puntuazioa emateko bete behar diren irizpideen artean, baremoaren beste apartatuei dagozkien kontzeptu bat edo bat baino gehiago sar daitezke. Horrela, horien puntuazioak gora egingo du nahi den neurrian, kontuan hartuta, guztira, apartatu horrengatik ezin dela puntu osagarri bat baino gehiago eman.

      6. Apartatu horretarako onartu diren irizpideen artean ezin dira ezarri jaiotzan, arrazan, sexuan, erlijioan, iritzian, edo beste egoera edo baldintza pertsonal edo sozial batzuetan oinarritutako irizpide baztertzaileak. Gainera, ezingo da puntuaziorik eman horretarako antolatutako proben edo azterketen ondorioz.

      7. Ikastetxe publikoen Ordezkaritza Organo Gorenek eta itunpeko ikastetxe pribatuen eskola-kontseiluek ezarri behar dituzte bete behar diren baldintzak, apartatu honetan ezarri diren irizpide guztiak bete direla onartu ahal izateko.

      8. Instrukzio edo jarraibide honetan ezarritakoa betetzen ez duten zentroek ezin izango dute baremoaren puntuazio hau aplikatu: zentroko ordezkaritza-organo gorenak edo eskola-kontseiluak zehazteko beste inguruabarrei dagokiena.

         Hemeretzigarrena. Ikaslearen desgaitasunari, edo aita, ama edo legezko tutorearen, edo anai edo arrebaren baten desgaitasunari dagokion baremoko apartatua aplikatzeko arauak.

      1. Atal honi dagokion puntuazioa IV. eranskinean jasotako bi kasuetako batengatik emango da.

      2. Atal horri dagokion puntuazioa emango da, baldin eta desgaitasuna % 33koa edo hortik gorakoa baldin badu. Bi pertsona edo gehiago desgaituak badira eta puntuazioa jasotzeko eskubidea badute, puntuak emango dira bakarrik pertsona batengatik.

      3. Lurralde historikoko foru-aldundiko gizarte-ekintzako departamentuak edo Estatuko organo baliokideak emandako ziurtagiri bidez egiaztatuko da desgaitasuna. Bertan legez onartuko da eragindako pertsonak % 33ko desgaitasuna edo handiagoa duela.

      4. Anaia edo arreba, aita edo ama dela egiaztatzeko, familia-liburuaren kopia aurkeztuko da. Ikaslearen legezko tutorearen izaera egiaztatzeko, berriz, sententziaren kopia edo dagokion ziurtagiri ofiziala aurkeztu beharko da.

      5. Atal horri dagokion puntuazioa ematean, anaia edo arrebatzat hartuko dira familia-unitatean legezko tutoretza-egoeran edota behin betiko nahiz adopzio aurreko familia-harreran dauden adingabeak.

      6. Halaber, atal honetan ematen den puntuazioa zenbatzean, ikaslearen zaintza guraso bakar batek badu, guraso horren legezko bikotekidea ere ikaslearen gurasotzat hartuko da. Pertsona horren seme-alabak ere neba-arrebatzat hartuko dira ikaslearekin batera bizi badira. Egoera hori dagokion errolda-ziurtagiriaren bidez egiaztatuko da.

      7. Ikaslearen zaintza duen gurasoaren bikotekidea dela ziurtatzeko, guraso horri zaintza ematen dion epaiaren kopia aurkeztu behar da, eta biak elkarrekin ezkonduta daudela egiaztatzen duen familia-liburua edota izatezko bikote direla adierazten duen ziurtagiri ofiziala ere aurkeztu behar da.

         Hogeigarrena. Familia-harreraren egoerari buruzko baremoaren atala aplikatzeko arauak.

      1. Atal honi dagokion puntuazioa emango da eskatzailea harrera-familia batekin bizi denean.

      2. Dagokion Foru Aldundian gizarte-politiken eskumena duen sailaren ziurtagiriaren bidez egiaztatuko da baldintza hori.

         Hogeita batgarrena. Genero-indarkeriaren biktima izateari buruzko baremoaren atala aplikatzeko arauak.

      1. Atal honi dagokion puntuazioa emango zaio eskatzailea edo ikaslearen ama edo legezko tutorea genero-indarkeriaren biktima denean.

      2. Izaera hori Genero Indarkeriaren aurkako Babes Osorako Neurriei buruzko abenduaren 28ko 1/2004 Lege Organikoaren 23. artikuluan jasotako moduren baten bidez egiaztatuko da: genero-indarkeriako delitu batengatiko kondena-epaia, babes-agindua edo biktimaren aldeko kautelazko neurri bat adosten duen beste edozein ebazpen judizial; Fiskaltzaren txostena, eskatzailea genero-indarkeriaren biktima dela adierazten duen zantzua dagoela adierazten duena; edo halaber administrazio publiko eskudunean diren gizarte-zerbitzuen, zerbitzu espezializatuen edo genero-indarkeriaren biktimentzako harrera-zerbitzuen txostenaren bidez.

         Hogeita bigarrena. Terrorismoaren biktima izateari buruzko baremoaren atala aplikatzeko arauak.

      1. Atal honi dagokion puntuazioa emango zaio eskatzailea edo haren aita, ama edo legezko tutorea terrorismoaren biktima denean.

      2. Berdintasun, Justizia eta Gizarte politiketako Saileko Biktimen eta Giza Eskubideen Zuzendaritzaren edo Estatuko edo beste autonomia-erkidego bateko antzeko erakundearen ebazpenaren bidez egiaztatuko da izaera hori.

         Hogeita hirugarrena. Errentari dagozkion datuen egiaztapena.

         Eskabideak barematu behar dituzten zentroek jaso diren datuak ere egiaztatu behar dituzte. Egiaztapen horren emaitzak lortzean, horrela jokatu beharko da:

      1. Eskatzaileen aitorpenak egiaztatu arte, puntuazioa egiaztapena baimendu duten pertsonei dagokiela ulertuko da, baina, egiaztapen hori egin ondoren, onartutako eta baztertutako ikasleen zerrendak osatzeko, aldaketak egin ahal izango dira.

      2. Egiaztapenen emaitzak jaso ondoren, Ogasunaren ziurtagiriak ontzat emango dira errentaren balioesteko.

      3. Egiaztapenen emaitzak behin-behineko zerrendak argitaratu ondoren jasotzen badira, egoera hau kontuan hartuko da behin betiko zerrendak egitean.

         Hogeita laugarrena. Onartutako eta baztertutako ikasleen zerrenden esleipena eta argitalpena.

      1. Barematu behar ziren eskaerei baremoa ezarri ondoren, zentro bakoitzean jaso diren eskaera guztiak horrela ordenatuko dira:

         1. Lehenik, agindu honen seigarren jarraibidean ezartzen diren lehentasunak betetzen dituztenak.

         2. Ondoren, beste eskaera guztiak.

            Aurreko bi taldeetako bakoitzaren barruan, eskabideak lortutako guztizko puntuazioaren arabera ordenatuko dira, eta, berdinketarik izanez gero, baremoko irizpideetan lortutako puntuaziorik altuena hartuko da kontuan, banan-banan konparatuz eta ordena honetan:

            Ikastetxean matrikulatutako anai-arreben atalean edo ikastetxean lan egiten duten aita, ama edo legezko tutorearen atalean puntu gehien lortu dituena.

            Puntuazio altuena ikaslearen edo eskatzailearen beraren edo haren aita, ama edo legezko tutorearen bizilekuaren edo lanpostuaren hurbiltasunari buruzko atalean.

            Ikaslearen edo haren aitaren, amaren, legezko tutorearen edo anai-arrebaren baten desgaitasunen baten konkurrentziari buruzko atalean puntuazio handiagoa lortzea.

            Ikasle eskatzailearen familia-harrerako egoeraren atalean puntuazio handiagoa lortzea.

            Puntuaziorik handiena familia ugariaren atalean.

            Familia-unitatearen urteko errentaren atalean lortutako puntuaziorik altuena.

            Erditze anizkoitzean jaiotako ikasleen atalean puntu gehien lortu dituena.

            Puntuazio handiagoa lortu da guraso bakarreko familia bateko ikasleen atalean.

            Genero-indarkeriaren biktima izateari buruzko atalean puntu gehien lortu dituena.

            Terrorismoaren biktima izateari buruzko atalean puntu gehien lortu dituena.

            Puntu gehien lortu duena ikastetxeko bazkide kooperatibista izatearen atalean.

            Ikastetxeko Eskola Kontseiluak edo Ordezkaritza Organo Gorenak askatasunez zehaztutako irizpideen atalean lortutako puntuazio altuena.

            Antolaketa horri jarraikiz, Hezkuntza Sailak esleipen orokorra egingo du, eta horren arabera esleituko dira plaza eskuragarriak. Esleipen horretan, jasotako eskaera guztiak aztertuko dira, zentro, maila eta hizkuntza-ereduen konbinazio guztietan, eta puntuazioaren arabera ordenatuko dira. Gehienez plaza bat esleituko da eskatzaile bakoitzeko, eskabidean agertzen diren eskaeren ordena errespetatuz.

      2. Esleipena amaitutakoan, onartutako eta onartu gabeko ikasleen behin-behineko zerrendak eta behin betiko zerrendak argitaratuko dira. Barematu behar izan den kasuetan, ikasle bakoitzak baremoko kontzeptu guztietan lortutako puntuazioa jasoko da zerrendetan.

         Zerrenda horiek jakitera emango dira sailaren interneteko atarian, «Ikasgunea» (https://ikasgunea.euskadi.eus). Bertan, nortasuna egiaztatuta, eskatzaileek eskura izango dituzte eskabideko eskaeretan adierazitako ikastetxeen, kurtsoaren eta hizkuntza ereduen zerrenda. Ikastetxeek ez dute publikoki erakutsiko zerrenda, baina eskatzaileek banako sarbidea izango dute.

         Behin-behineko esleipen-zerrendak erreklamazioak aurkezteko epea amaitu arte kontsultatu ahal izango dira, eta behin betiko esleipen-zerrendak, berriz, gora jotzeko errekurtsoak aurkezteko epea amaitu arte.

      3. Onartutako ikasleek zuzenean galduko dute jatorrizko zentroan zeukaten plaza. Egoera hau kontuan hartuko da esleipen-prozesuan.

      4. Prozesua amaitu ondoren, Hezkuntzako lurralde-ordezkariak, Onarpen-bermeetarako Batzordea entzun eta gero, zentroa ikastetxea esleituko du:

         1. Dokumentuen bina ale aurkezteagatik baliogabetutako eskabideak dituzten ikasleentzat.

         2. 1/2018 Dekretuaren 2. artikuluak eskolatze-bermea ziurtatzen duen mailetan baztertu diren ikasleentzat (Haur Hezkuntzako bigarren zikloa, Lehen Hezkuntza, eta Derrigorrezko Bigarren Hezkuntza), eta 2022-2023 ikasturterako ikastetxerik gabe edo haien zentroan jarraitzeko bermerik gabe daudenei.

      5. Maila eta hizkuntza-eredu jakin batean plaza eskuragarririk ez dagoen ikastetxeetan, eskatutako plazarik lortu ez duten ikasleak edo lehentasun gutxiagoko plaza lortu dutenak itxarote-zerrendan sartuko dira. Beraz, plazarik lortu ez dutenek itxarote-zerrendan sartuko dira eskaera guztietarako, eta plaza lortu dutenek lehentasun handiagoko eskaeretan jarritako zentroetako eta ereduetako itxarote-zerrendetan sartuko dira. Itxarote-zerrendaren iraunaldia amaituko da agindu honen 3. artikuluan ezarri den datan.

      6. Geroago egiten den edozein aldaketa Hezkuntzako Lurralde Ordezkaritzak baimendu beharko du.

      7. Prozesu horren ondorioz eskola-tokia lortu eta gero, eta ikasturteko lehen egunetan absentzia luzea gertatzen bada, gurasoek edo legezko tutoreek zentroari aurretik jakinarazi eta ziurtatu beharko diote egoera hori.

         Horrela egiten ez badute, eta absentzia luzatzen bada beharrezko den justifikazioa gabe, irailaren 9an zentroak Hezkuntzako Lurralde Ordezkaritzari horren berri emango dio, eskolatze-beharra betetzen dela egiaztatu ondoren eta eskatzailearekin entzunaldia izan eta gero. Ondoren, zentroak eskola-plaza eskuratuko du, eta hutsik geratuko da ondore guztietarako.

         Hogeita bosgarrena. Erreklamazioak.

         Behin-behineko zerrenden aurka erreklamazioa aurkeztu ahal izango zaio ikastetxearen Ordezkaritza Organo Gorenari edo eskola-kontseiluari, agindu honetako 3. artikuluan xedatutako epeetan. Erreklamazio hori Hezkuntza Sailak gaitutako aplikazioaren bidez edo aurrez aurre egin ahal izango da. Aurrez aurreko erreklamazioaren kasuan, izapidea lehenengo eskaeran eskatutako zentroan (baremoaren edozein apartaturako) egin ahal izango da, edo eskatutako beste edozein zentrotan (horri dagozkion baremoko apartatuetarako). Hori horrela izan arren, erreklamazioa justifikatzeko aurkezten den dokumentazioa ebazpena egin den zentroan entregatu beharko da.

         Behin betiko zerrendaren aurka gora jotzeko errekurtsoa jarri ahal izango zaio hezkuntzako lurralde-ordezkariari, zerrendak argitaratu eta hilabeteko epean. Ebazpenak administrazio-bidea agortuko du.

         Aurkeztutako erreklamazioak ebazteko beharrezkotzat jotzen dituen dokumentu guztiak bildu ahalko ditu Administrazioak.

         Prozesu hauek amaitu ondoren, ikasleak esleitu zaizkien ikastetxe, etapa, maila eta ereduan matrikulatuta egongo dira.

         Hezkuntzako lurralde-ordezkariak ikaslea behar bezala eskola daitekeela bermatzeko moduko epean eman beharko du ebazpena, eta azken horrek amaiera emango dio administrazio-bideari.

         Hogeita seigarrena. Hezkuntza-premia bereziak dituzten ikasleak.

         Hezkuntza-premia bereziak dituzten ikasleen onarpena dagokien mailako ikastetxeetarako ezarri diren prozeduraren eta egutegiaren mende egongo da, eta lurralde-ordezkaritzak izango dira horiek gauzatzen eta betetzen diren ziurtatuko dutenak.

         Hogeita zazpigarrena. Ezarpena.

         Jarraibide hauek Euskal Herriko Agintaritzaren Aldizkarian argitaratu eta hurrengo egunean izango dituzte ondorioak.

         (Ikus .PDF)

1. Ikastetxean ikasten edo lan egiten duten senideak izatea (kontzeptu meta ezinak). Gehienezko puntuazioa: 6,5 puntu.

   Neba-arreba bat edo gehiago matrikulatuta daude eskatutako ikastetxean edo hari atxikitako ikastetxeren batean: 6,5 puntu.

   Aitak, amak edo legezko tutoreak: eskatutako ikastetxean edo ikastetxe atxiki batean egiten du lan 5 puntu (puntuazio hori bateraezina da ikaslearen aitak, amak edo legezko tutoreak eskatutako ikastetxearen eragin-eremuan lan egiteagatik ematen denarekin).

2. Bizilekuaren edo lantokiaren gertutasuna (kontzeptu meta ezinak). Gehienezko puntuazioa: 6 puntu.

   Eskatutako ikastetxearen eragin-eremuan dago ikaslearen bizilekua: 6 puntu.

   Eskatutako ikastetxearen eragin-eremu mugakide batean dago ikaslearen bizilekua: 2 puntu.

   Eskatutako ikastetxearen udalerrian dago ikaslearen bizilekua, baina haren eragin-eremutik eta eremu mugakideetatik kanpo: 1 puntu.

   Ikasleak bizilekua Euskal Autonomia Erkidegoan izatea, baina ikastetxea kokatuta dagoen udalerritik eta eragin-eremu zein eremu mugakideetatik kanpo: 0,5 puntu.

   Eskatutako ikastetxearen eragin-eremuan dago aitaren, amaren edo legezko tutorearen lantokia: 2 puntu (puntu horiek bateraezinak dira ikaslearen aitak, amak edo legezko tutoreak eskatu den ikastetxean edo ikastetxe atxiki batean lan egiteagatik ematen diren puntuekin).

3. Familia-unitatearen urteko errenta (kontzeptu metagarriak). Gehieneko puntuazioa: 3 puntu.

   2020ko errenta-aitorpenaren zerga-oinarri orokorraren eta aurrezkiaren zerga-oinarriaren baturak ez baditu 13.300,00 euroak gainditzen: 2 puntu.

   2020ko errenta-aitorpenaren zerga-oinarri orokorraren eta aurrezkiaren zerga-oinarriaren baturak zenbateko hori gainditzen badu: 0 puntu.

   Horrez gain, aurreko kasuetan, 0,25 puntu gehituko dira eskatzailea ez den seme-alaba adingabe bakoitzeko.

4. Familia ugariko kide izatea.

   Maila orokorreko familia ugariko kide izateagatik: 1 puntu.

   Maila bereziko familia ugariko kide izateagatik: 1,5 puntu.

5. Erditze anizkoitza.

   Ikaslea erditze anizkoitzean jaio delako: puntu 1.

6. Guraso bakarreko familia izatea.

   Ikaslea guraso bakarreko familia batekoa izateagatik: puntu 1.

7. Kooperatiba-bazkide izatea.

   Familia unitateko kideren bat eskatutako ikastetxeko kooperatiba-bazkide izateagatik: 0,5 puntu.

8. Ordezkaritza Organo Gorenaren edo eskola-kontseiluaren ustez garrantzitsuak diren bestelako arrazoiak.

   Ikastetxeko eskola-kontseiluak edota Ordezkaritza Organo Gorenak ezarritako baldintzengatik, aurretik esandakoak izan daitezkeenak. Horiek irizpide publiko eta objektiboei jarraikiz eta jaiotza-, arraza-, sexu-, erlijio-, iritzi-arrazoiengatik edo beste edozein egoera edo baldintza pertsonal edo sozialengatik inor baztertu gabe ezarri dira: 1 puntu gehienez (baldintzak jakitera eman beharko dira, eta dagokion Hezkuntzako lurralde-ordezkariari jakinarazi, eskabideak aurkezteko epea hasi baino lehen).

9. Beste batzuk:

   1. Desgaitasuna. Gehieneko puntuazioa: 2 puntu.

      Ikasle eskatzailearena: 2 puntu.

      Aitarena, amarena, legezko tutorearena edo anai-arrebetako batena: puntu 1.

   2. Familia-harreraren egoera.

      Ikasle eskatzailearen familia-harrera egoeragatik: puntu 1.

   3. Genero-indarkeriaren biktima izatea.

      Ikasleak, aitak, amak edo legezko tutoreak genero-indarkeriaren biktima izateagatik: puntu 1.

   4. Terrorismoaren biktima izatea.

      Ikasleak, aitak, amak edo legezko tutoreak terrorismoaren biktima izateagatik: puntu 1.