Liburutegi Zerbitzua

Gobernu Kontseiluaren 2010eko apirilaren 13ko Erabakiaren bitartez eta ondoren Ekonomia eta Ogasuneko sailburuaren apirilaren 21eko Aginduaren bitartez, sektore estrategikoetako enpresei finantza-laguntza emateko berariazko programa onartu zen, eta hedatu egin zen horrela aurreko urtean garatutako programa.

Krisi honen iraupenak eta intentsitateak finantza-programa hartan definitzen zen hasierako esparrua aldatu beharra ekarri du, maileguen epeak malgutzeak errazagoa bihur dezan maileguok itzultzea eta enpresa-ingurunea une honetan jasaten ari den ingurune atzerakor luze honetara egokitzea. Malgutze hori ez da mugatzen, gainera, aurtengo programaren babesean formalizatuko diren mailegu berrietara; aitzitik, 2009. urteko programaren indarraldian zehar formalizatutako maileguak ere barne hartzen ditu.

Hori guztia dela eta, Ekonomia eta Ogasuneko sailburuak proposatuta, eztabaidatu ondoren Gobernu Kontseiluak erabaki hau hartu du:

ERABAKIA

«Lehenengoa. Gobernu Kontseiluaren 2010eko apirilaren 13ko Erabakian eta Ekonomia eta Ogasuneko sailburuaren 2010eko apirilaren 21eko Aginduan adierazitako bermeak eta finantzaketa-lerroak eskuratu ahal izango dituzte, bi arau horietako bigarren idatz-zatian eta 7. artikuluan hurrenez hurren jasotzen diren enpresek ez ezik, 2009ko otsailaren 10eko Erabakiak eta Ekonomia eta Ogasuneko sailburuaren 2009ko martxoaren 3ko Aginduak (aurreko urteko programaren baliokidea antolatzen zutenek) gaitutako finantzaketa lortu zuten enpresek ere, beti ere oraingo finantzaketa-lerroan finkatzen diren gainerako baldintzak betetzen badituzte.

Nolanahi ere dela, bermatu beharko da eragiketa horien birfinantzaketak, behin gauzatuta, ez duela berekin ekarriko enpresakako edo taldekako gehienezko mugak gainditzea (muga horiek sektore estrategikoei 2010. urterako finantza-laguntza emateko programa garatu eta haren deialdia argitara ematen zuen Ekonomia eta Ogasuneko sailburuaren 2010eko apirilaren 21eko Aginduaren 7. artikuluan finkatzen ziren). Birfinantzaketa hori ezin izango da 2009. urteko programaren kontura formalizatutako zenbatekoaren % 50 baino altuagoa izan, Ekonomia eta Ogasun Sailaren aurrean behar bezala justifikatutako salbuespen puntualetan izan ezik.

Bigarrena. Mailegu-eragiketen epea luzatu egiten da: hiru edo bost urtetarako izan ahal izango dira, eta zenbateko nagusia amortizatzeko urtebeteko aukerako gabealdia izan ahal izango dute.

Kreditu Ofizialeko Institutuaren (KOI) funtsekin finantzatzen diren eragiketek KOIren lagapen-tasa finkoa gehi % 1 aplikatuko dute azken enpresa onuradunarentzat, finantza-erakundeen eta Kreditu Ofizialeko Institutuaren artean sinatutako esparru-kontratuetan adierazita agertzen denez.

Hirugarrena. Gobernu Kontseiluaren 2010eko apirilaren 13ko Erabakiaren eta ondoren Ekonomia eta Ogasuneko sailburuaren apirilaren 21eko Aginduaren babesean eta honako aldaketa hau indarrean sartu aurretik formalizatutako mailegu-eragiketen finantza-baldintzak Erabaki honetan biltzen diren baldintza berrietara egokitu ahal izango dira, baldin eta halakorik eskatzen badute maileguaren onuradunak, elkarrekiko berme-baltzu abal-emaileak eta finantzaketa ematen duen finantza-erakundeak

Bigarrena. Jaurlaritzaren Idazkaritzak aginduko du Euskal Herriko Agintaritzaren Aldizkarian argitaratzea erabaki honen testua».