Liburutegi Zerbitzua

1. – Hiru helburu nagusi ditu agindu honek: batetik, Euskal Autonomia Erkidegoaren eremuan, beltzarantze artifizialeko aparatuen titularrek aparatuen instalazio, mantenimendu eta instalazio berri nahiz lehendik daudenei dagokienez egin beharreko egiaztapen teknikoak direla-eta gauzatu beharreko izapide administratibo eta teknikoak zehaztea; bestetik, erakunde egiaztatzaile baimenduek bete beharreko betekizun eta baldintzak ezartzea; eta, azkenik, egiaztapen teknikoak egiteko prozedura ezartzea.

2. – Agindu hau honakoei aplikatuko zaie:

   1. Erradiazio ultramoreen bidez beltzarantzeko aparatuen salmenta eta erabilera arautzen duen irailaren 27ko 1002/2002 Errege Dekretuaren 2. artikuluak erreferentzia egiten dien beltzarantze artifizialeko aparatuei.

   2. Txartelekin edo erabiltzaileak erabiltzeko moduko gailuekin dabiltzan aparatuei.

   3. Etxebizitza partikularretan eta bestelako edozein lokaletan, errentan edo bestelako erregimenen batean, aldi baterako erabiltzen diren aparatuei.

Agindu honetako 1. artikuluan aipatutako aparatuen titular eta errentatzaileek baldintza hauek bete beharko dituzte:

1. Ziur egon beharko dute aparatuak baduela fabrikatzaileak edo merkaturatzaileak emandako derrigorrezko dokumentazioa. Agiri horien artean egongo dira Identifikazio Txartela (I. eranskina), Erregistro Liburua (II. eranskina), ezaugarrien plaka eta ikusteko moduko lekuan jarrita egongo den EE marka.

2. Aparatu berriak instalatzekotan, aparatuaren instalazioa egin duen laguntza teknikoko zerbitzuari Identifikazio Txartela egin dezala eskatu beharko diote.

   Erakunde egiaztatzailearen egiaztapen teknikoa ez da beharrezkoa izango Identifikazio Txartela egiten edo elementu kontsumigarriak konpondu edo aldatzen direnetik urtebete pasatu arte. Baina, horretarako, fabrikatzailearen adostasun-agiriak UNE-EN 60335-2-27 arau bateratua betetzen dela adierazi beharko du. Hala egiten ez badu, erakunde baimenduaren egiaztapen teknikoa exijituko da.

3. Erabilitako aparatu bat beste leku batean instalatu edo erabiltzeko moduan jartzen bada, aparatuak egiaztapen tekniko eguneratua daukala ziurtatu beharko dute. Aparatua lekuz aldatu dela antzematen denean, erakunde egiaztatzaileak Erregistro Liburuan idatziko du kokaleku berria.

4. Aparatu bakoitzeko Erregistro Liburu bat eduki beharko dute. Bertan, titularra, establezimendua eta titulartasun- nahiz kokaleku-aldaketak identifikatuko dira, eta elementu kontsumigarrien aldaketak adieraziko dira, aldaketa egin duen enpresa erantzulea zein den adierazita.

5. Aparatua eta bere instalazioa behar bezala zaindu behar dute, eta egiaztapen-etiketak txukun eta aparatuan itsatsita eduki, erabiltzaileek ikusteko moduko lekuan.

6. Erakunde egiaztatzaile baimenduei zera eskatu behar diete: aldian behingo egiaztapenak urtean behin edo konponketak edo elementu kontsumigarrien aldaketak egiten direnean egin ditzatela.

7. Egiaztapena gainditzen ez duten aparatuak zerbitzuz kanpo utzi beharko dituzte, konpondu edo doitu ondoren egiaztapena gainditu arte.

1. – UNE-EN 60335-2-27 arauko 32.101 kapituluan ezarritakoa izango da egiaztapen-prozedura, Kontsumo eta Industria Segurtasuneko zuzendariak emandako ebazpenaren bidez onartuko diren neurketa-irizpideekin osatuta.

2. – Irradiantzia efektiboaren balioa, UNE-EN 60335-2-27 arauko 32.101 kapituluaren arabera neurtuta, ez da izango 0,30 W/m2-tik gorakoa 295 nm-tik 400 nm-ra arteko uhin-luzerarentzat. 295 nm-tik beherako uhin-luzeretan ez da erradiazio nabarmenik igorri behar. 0,03 W/ m2–ra arteko balioak onartuko dira 250 eta 295 nm arteko uhin-luzeretan. Irradiantziaren neurriek aipatutakoak baino balio altuagoak ematen badituzte, egiaztapenaren emaitza aurkakoa izango da.

1. – Agindu honetan adierazitako aparatuen egiaztapen teknikoa egingo duten erakundeak industria-segurtasunaren arloan eskumena duen zuzendaritzak baimenduko ditu.

2. – Baimen-eskaerak zuzendaritza horretara bidali behar dira, industria-arloko eskumena duen sailaren lekuan lekuko lurralde-bulegoaren bidez. Eskabidearekin batera dokumentazio hau aurkeztu beharko da:

   1. Euskal Autonomia Erkidegoko Industria Establezimenduen Erregistroan inskribatzeko eskaera, kasu honetan beltzarantzeko aparatuen egiaztapen-jarduerari dagokiona.

   2. Larruazala erradiazio ultramoretan edukitzeko aparatuen entsegu-laborategia edo kontrol-erakundea dela frogatzen duen enpresa-egiaztapena, elkarrekiko aitorpenaren akordioa sinatu duen eta European Cooperation for Acreditation-eko kide den erakunde egiaztatzaileak emana.

   3. Langileen zerrenda, prestakuntza eta enpresan daukaten antzinatasuna. Jarduera honetan parte hartzen duten langileak gaituta daudela egiaztatu beharko da jasotako prestakuntzaren egiaztagiri edota justifikagirien bidez.

   4. Etengabe erabilgarri dauden bitarteko teknikoen zerrenda. Ezaugarriak, kalibrazio-plana eta azken kalibrazioaren ziurtagiriaren kopia adierazi beharko dira. Gutxienez ekipo hauek eduki behar dira:

      • Termometro digitala.

      • Espektro-erradiometro kalibratua, 10-3 W/m2 sentsibilitateduna eta prozeduran definitutako neurketak egiteko behar diren osagarriak dauzkana. Urtero birkalibratuko du nazioarte-mailan kreditatu edo aitortutako laborategi batek.

      • Flexometroa edo kalibraketaren luzera-neurri gauzatua.

   5. Euskal Autonomia Erkidegoko Administrazioak onetsitako egiaztapen-prozedura aplikatzeko konpromisoa.

   6. Enpresak aparatuen fabrikazio, konponketa edo merkaturatzearekin zerikusirik ez duela egiaztatzen duen agiria.

   7. Erantzukizun zibileko asegurua, gutxienez 60.000 eurokoa. Kontsumo-prezioen indize orokorraren arabera, aldian behin eguneratuko da.

   8. Aplikatu nahi diren gehieneko tarifen zerrenda.

Industria-gaietako eskumena duen saileko lurralde-bulegoek, euren zerbitzu teknikoek egiaztatzen dutenean agindu honetan ezarritako betekizun eta baldintzak betetzen direla, jasotako eskabideak zuzendaritza eskudunari igorriko dizkiete, dagokion txosten teknikoarekin batera. Txosten horretan adieraziko dute baimena ematea zilegi den edo ez den.

1. – Eskabidea baimentzeko nahiz ukatzeko, industria-segurtasuneko eskumena duen zuzendariak ebazpena emango du. Baimen edo uko hori behar bezala arrazoituko da eta interesdunari jakinaraziko zaio, eta jakinarazpena egiten den unetik aurrera izango du eragina.

2. – Ebazpena Euskal Herriko Agintaritzaren Aldizkarian argitaratuko da, eta erakundea egiaztapenak egiteko dagokion erakundeen erregistroan inskribatuko da (III. eranskina).

1. – Baimendutako erakunde guztiek Euskal Autonomia Erkidegoko edozein lurraldetan jardun dezakete. Erakundeak gutxienez establezimendu bat izan behar du erkidego honetan.

2. – Egiaztapenetarako baimena 5 urterako emango da, eta mugaeguna baino lehen berritu beharko da. Berritzeak ere bost urtekoak izango dira, eta mugaeguna baino hiru hilabete lehenago eskatu beharko dira.

3. – Erakundeak, baimendua izateko bete behar izan zituen baldintzak betetzen jarraitu beharko du, eta onartu zitzaion egiaztapen-prozedura berbera erabiltzen jarraitu beharko du.

4. – Tarifak eguneratu behar direnean, erakunde baimenduak zuzendaritza eskudunari jakinarazi eta beharrizan hori justifikatzen duen azterlan ekonomikoa aurkeztuko dio. Azterlana ez da beharrezkoa izango urteko igoera kontsumo-prezioen indizea besterik ez denean. Ezingo dira tarifak aldatu aurretik zuzendaritza eskudunari jakinarazi gabe.

1. – Erakunde baimenduen jarduera guztiak industria-gaietako eskumena daukan sailaren menpeko zerbitzu teknikoen esku-hartze eta kontrolpean egongo dira.

2. – Erakunde baimenduek, Euskal Autonomia Erkidegoan egindako jarduera guztiak erregistratuko dituzte. Dokumentazioa industria-gaietako eskumena daukan saileko zerbitzuen eskura egongo da.

3. – Sei hilero, erakunde egiaztatzaileek industria-gaietako eskumena daukan saileko lurralde-bulego bakoitzari bidaliko diote lurralde bakoitzean egiaztatutako aparatuen zerrenda osoa, V. eranskinean adierazitako datuekin batera.

4. – Egiaztatutako aparatuen zerrendan, instalatu berriak zein diren eta baja emandakoak zein diren adieraziko da. Euskal Autonomia Erkidegoko leku batetik bestera eraman diren aparatuei dagokienez, kokagune berriaren datua besterik ez zaie aldatuko.

1. – Erakunde egiaztatzaileak baimentzeko oinarritzat hartutako edozein betekizun edo baldintza aldatuz gero, erakundeek une horretan bertan eman beharko dute aldaketaren berri. Jakinarazpena egin eta dagokion espedientea izapidetu ondoren, baimena aldatu edo, hala badagokio, ondoriorik gabe utziko da.

2. – Baimena emateko oinarritzat hartutako datuak gezurrezkoak direla edo baimenerako baldintzak ez direla bete antzematen bada, eta ekintza horiek arau-hauste oso larritzat jotzen badira, dagokion espedientea izapidetu ondoren baimena ondoriorik gabe utzi ahal izango da.

Erakunde egiaztatzaileek honako betebeharrak izango dituzte beraien jardunean:

1. Egiaztapen-eskabideei lehenbailehen erantzutea, betiere 14 eguneko gehieneko epean.

2. Erregistro-liburuko egiaztapen-agiria betetzea.

3. Agindu honetako 11. artikuluaren arabera jarri beharreko egiaztapen-etiketa itsastea.

4. Aparatu guztien erregistro-liburua prestatzea.

1. – Ezarritako egiaztapen-frogak gainditzen dituzten aparatuetan, erakunde egiaztatzaileak IV. eranskinaren araberako etiketa itsaskorra jarriko du, ikusteko moduko lekuan; eta baliotasun-epearen mugaegunaren hilabete eta urteari dagozkion laukitxoak zulatuko ditu.

2. – Frogak gainditzen ez dituzten aparatuetan, ikusteko moduko lekuan "zerbitzuz kanpoko aparatua" dioen etiketa itsasgarria jarriko du IV. eranskin berberaren arabera, eta aparatuaren titularrari idatziz jakinaraziko dio egiaztapena gainditu arte aparatua zerbitzuz kanpo eduki beharko duela.

3. – Egiaztapena gainditu ez duen aparatuari geroago egin beharreko egiaztapena lehenengo egiaztapena egin zuen erakunde berberak egingo du. Erabiltzaileak behar bezala justifikatutako arrazoiak baldin baditu, bigarren egiaztapena beste erakunde baimendu batek egiteko baimena eskatuko ahal izango dio lurralde-bulegoari.

4. – Erabiltzaileari jakitera eman beharko zaio ezaugarrien plakarik ez badago, ikusteko moduko lekuan itsatsita ez badago edo ondo irakurtzen ez bada, plaka hori jarri egin beharko duela (fabrikatzaileak, merkaturatzaileak edo laguntza teknikoko zerbitzuak emango dio).