Liburutegi Zerbitzua

Agindu honen bitartez, ondoren aipatzen diren erakundeek antolatutako prestakuntza-jarduerak homologatzeko eskakizunak eta prozedura arautu nahi dira. Hona hemen erakundeok: Euskal Autonomia Erkidegoko Administrazio Orokorra eta foru eta toki administrazioak eta horien erakunde autonomiadunak; Eusko Legebiltzarra; Batzar Nagusiak; Lan Harremanetarako Kontseilua; Herri Kontuen Euskal Epaitegia; Euskal Herriko Unibertsitatea; Arartekoa eta Datuak Babesteko Euskal Agentzia.

1. ¿ IVAPek prestakuntza-jarduera bat homologatu ahal izateko, nahitaezkoa izango da hartzaileak euskal herri-administrazioen zerbitzura diharduten herri-langileak izatea.

   Ondorio horietarako, jarduera baten hartzaileak euskal herri-administrazioetako herri-langileak direla onartzeko, nahitaezkoa izango da langile horiek ikastaroa egiten duten ikasle guztien % 70 izatea, gutxienez.

2. ¿ Berariaz baztertuta daude hartzaile hauei zuzendutako jarduerak:

   • Hezkuntzaren alorreko eskumena duen saileko unibertsitatez kanpoko irakaskuntzako irakasleei.

   • Justizia Administrazioaren zerbitzura diharduten funtzionarioei.

   • Euskal Herriko Unibertsitateko irakasleei.

   • Euskal Autonomia Erkidegoko polizia-kidegoetako langileei.

   • Osakidetza-Euskal Osasun Zerbitzuko langileei.

     Jarduera bat baztertutako kolektibo horiei zuzenduta dagoela ulertuko da baldin eta langile horiek ikastaroa egiten duten ikasle guztien % 70 badira, gutxienez.

Homologagarriak izateko, prestakuntza-jarduerek baldintza hauek bete behar dituzte:

1. Edukia: interesgarriak izan behar dute herri-langileen prestakuntza eta hobekuntzarako.

   Hizkuntza-gaitasuna lortzeko ikastaroak ez dira inoiz homologagarriak izango.

2. Iraupena: hamar irakastordu edo gehiago izan behar dute.

3. Mota: presentzialak izan behar dute.

1. ¿ Homologatzeko eskabidea Herri Arduralaritzaren Euskal Erakundeko zuzendariari egingo zaio agindu honen I. eranskinean agertzen den eredu ofizialean.

2. ¿ Hiru aldi egongo dira, urte naturalaren barruan, homologatzeko eskabideak aurkezteko: urtarrila, maiatza eta iraila.

   Otsaila eta maiatza bitartean egingo diren prestakuntza-jarduerak homologatzeko eskabidea urtarrilean aurkeztuko da; ekaina eta iraila bitartean egingo diren prestakuntza-jarduerak homologatzeko eskabidea maiatzean aurkeztuko da, eta urria eta hurrengo urteko urtarrila bitartean egin nahi diren prestakuntza-jarduerak homologatzeko eskabidea irailean aurkeztuko da.

   Edozein modutan, eskabideak dena delako prestakuntza-jarduera egin baino hogei egun natural lehenago aurkeztu behar dira gutxienez.

   Epeak zenbatzeko orduan, eskabideari IVAPeko erregistroan sarrera eman zaion eguna hartuko da kontuan edo Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legeko 38.4 artikuluan ezarritako edozein jardunbidea erabiliz eman zaion sarrera. Hala ere, Agindu honek ezarritako epeak zenbatzeko orduan ez da sekula ere kontutan hartuko homologazioa eskatzen duen organo edo erakundearen erregistroan irteera eman zaion eguna.

3. ¿ Homologazio-eskabidearekin batera, II. eranskineko ereduaren araberako deskribapen-fitxa bat ere aurkeztuko da. Bertan, prestakuntza-jardueraren datu hauek agertuko dira:

   1. Ikastaroaren Izena.

   2. Helburu zehatzak.

   3. Hartzaileak.

   4. Ikasle-kopurua.

   5. Programa.

   6. Egiaztagirien kalifikazioa: bertaratzea edo aprobetxamendua.

   7. Irakastordu-kopurua.

   8. Zenbatgarren edizioa den.

   9. Irakasleak.

   10. Noiz egingo den.

   11. Tokia eta ordutegia.

1. ¿ Eskabidea aztertu ondoren, IVAPeko Prestakuntza Zerbitzuak jarduerak homologatzeko baldintzak betetzen dituela jakinaraziko dio eskabidea egin duen erakundeari, betiere, agindu honetan ezarritakoa betetzen badu.

   Eskabidean zuzen daitekeen akatsik egin bada, IVAPeko Prestakuntza Zerbitzuak 10 eguneko epea emango dio eskabidea egin duen erakundeari akatsak zuzentzeko edo beharrezko agiriak aurkezteko. Epe horretan zuzenketarik egin ez bada, IVAPeko zuzendariak ebazpen bat emango du eskatutako homologazioa ukatzeko.

   Eskabideak ez baditu homologatzeko eskakizunak betetzen, IVAPeko zuzendariak ebazpen bat emango du eskatutako homologazioa ukatzeko.

2. ¿ Bai aurreko paragrafoan aipatutako komunikazioa, bai eskatutako homologazioa ukatzen duen ebazpena, prestakuntza-jarduera hasi baino lehen jakinaraziko dira.

3. ¿ Prestakuntza-jarduera amaitu ondorengo bi hilabeteetan zehar, antolatzaileak agiri hauek bidaliko ditu IVAPera:

   • Prestakuntza-jardueraren garapenari buruzko txostena, III. eranskineko ereduaren arabera.

   • Prestakuntza-jarduerara joan diren ikasleen zerrenda, bakoitzaren bertaratze-portzentajea adierazita. IV. eranskineko ereduaren arabera aurkeztuko da.

   • Ikasleen sinaduren jatorrizko orriak, prestakuntza-jarduera egin den egun eta saio guztietakoak, V. eranskineko ereduaren arabera.

   • Ikasleek egindako aprobetxamendu-probaren eredua, horrelakorik egin bada.

   • Aprobetxamendu-proba egin duten ikasleen zerrenda (horrelakorik egin bada), ebaluazioaz arduratu diren irakasleek sinatuta. Bertan, ikaslea gai den ala ez adieraziko da, eta VI. eranskineko ereduaren arabera aurkeztuko da.

     Dokumentazioak zuzendu daitekeen akatsik badu, IVAPeko Prestakuntza Zerbitzuak 10 eguneko epea emango dio eskabidea egin duen erakundeari akatsak zuzentzeko edo beharrezko agiriak aurkezteko. Epe horretan zuzenketarik egin ez bada, IVAPeko zuzendariak ebazpen bat emango du eskatutako homologazioa ukatzeko.

4. ¿ Aurreko paragrafoan adierazitako dokumentazioa aurkeztu ondoren, IVAPeko zuzendariak ebazpen arrazoitua emango du, bi hilabeteko epean, eskatutako homologazioa onartzeko edo ukatzeko.

5. ¿ Homologazioak bakarrik izango du balioa eskatutako jarduerarako edo jardueretarako eta ebazpenean adierazitako edizioetarako. Prestakuntza-jardueraren hurrengo edizioetarako, homologazioa eskatu beharko da berriro.

1. ¿ Homologatutako prestakuntza-jarduerari dagozkion egiaztagiriak IVAPeko zuzendariak ikasleei emango die. Zein egiaztagiri-mota dagokion, berriz, homologazio-ebazpenean zehaztuko da.

2. ¿ Prestakuntza-jardueran irakasleek ebaluatu beharreko proba bat gainditzea eskatzen ez bada, egiaztagirietan bertaratze-kalifikazioa jasoko da.

   Hortaz, gutxienez irakastorduetako % 80an egon diren irakasleei baino ez zaie egiaztagiririk emango.

3. ¿ Egiaztagiriek aprobetxamendu-kalifikazioa izango dute baldin eta prestakuntza-jardueretan ikasleek edukiak bereganatu dituztela egiaztatzeko azterketak egitea aurreikusten bada.

   Edozein modutan, egiaztagiria jaso ahal izateko, nahitaezkoa izango da irakastorduen % 80ra joatea.

   Irakastorduen % 80ra joan arren, azterketa gainditu ez duten ikasleek, ez dute inolako egiaztagiririk jasotzeko eskubiderik izango.

IVAPek egoki iritzitako jarduerak burutu ahal izango ditu prestakuntza-jardueraren garapena ikuskatzeko. Ildo horretatik, jarduerari buruzko informazioa eskatzeaz gain, bisitak egin ahal izango ditu saioetara.

Antolatzaileek homologazio-eskabidean ezarritako moduan burutu behar dituzte prestakuntza-jarduerak. Programan, iraupenean, tokian edo egunean eragina duen aldaketaren bat egin behar bada, aldaketa horren berri eman beharko zaio IVAPi. Aldaketaren jakinarazpena prestakuntza-jarduera egin baino lehen egin beharko da.

Vitoria-Gasteiz, 2007ko otsailaren 1a.

Ogasun eta Herri Administrazio sailburua,

IDOIA ZENARRUTZABEITIA BELDARRAIN.