Liburutegi Zerbitzua

Trafikoari eta ibilgailuen zirkulazioari buruzko Estatuko legeak gauzatzea dela-eta, Estatuko zerbitzuak transferitzeko urriaren 15ean emandako 3256/1982 Errege Dekretuaren arabera, Euskal Autonomi Elkarteko lurraldean bide-hezkuntzari eta –formazioari buruz egiten diren dibulgazio-kanpainak planeatzea Euskal Autonomi Elkartearen eskumena da. Ildo horretatik, Herrizaingo Saileko egitura organikoa ezartzen duen maiatzaren 14ko 108/1996 Dekretuaren 11.2 atalak dioenez, Bidezaingo eta Ibilgailuen Zuzendaritzari dagokio bide-formazio eta -segurtasunari buruzko dibulgazio-kanpainak antolatzea eta gauzatzea. Halaber, 11.3 atalaren arabera, Bidezaingo eta Ibilgailuen Zuzendaritzaren eskumena da, besteak beste, Euskal Autonomi Elkarteko beste organo batzuekin koordinatzea eta Hezkuntza, Unibertsitate eta Ikerketa Sailarekiko elkarlana sustatzea, ikastetxeetan bide-segurtasunari buruzko berariazko programazioa egiteko.

Bestalde, Euskal Eskola Publikoari buruzko otsailaren 19ko 1/1993 Legearen 4. atalean, euskal eskola publikoak bere helburuak lortzeko dituen bitartekoak zehazten dira eta, beste batzuen artean, berariaz aipatzen da ikastetxeek beren inguru geografkiko, sozial eta kulturalarekin duten lotura estua eta elkarrekin lan egin beharra, jarduera- eta truke-plan bateratuen bitartez. Euskal Autonomi Elkarteko gainontzeko administrazio eta instituzioekin koordinatu eta lan egin beharra ere azpimarratzen da. Gainera, Lege horretako 49. atala betetzearren, Jaurlaritzak irakaskuntza-maila desberdinetako edukin curricularrak zehaztu ditu. Ildo horretatik:

– E.A.E.ko Haur Hezkuntzako curriculuma ezartzeko abuztuaren 11n emandako 236/1992 Dekretuaren 4. atalean, etapa horretan ikasleei zein helburu lortzen lagundu behar zaien zehazten da; besteak beste, ingurune gertuena arretaz eta jakinminez behatzea eta aztertzea, ingurune hori osatzen duten elementuen ezaugarri eta propietate nagusiak identifikatzea eta elementu horien artean sortzen diren harremanetako batzuk ezagutzea.

– E.A.E.ko Lehen Mailako Hezkuntzako curriculuma ezartzeko abuztuaren 11n emandako 237/1992 Dekretuaren 4. atalean, etapa horretan ikasleei zein gaitasun lortzen lagundu behar zaien zehazten da; besteak beste, bizitza eta gizakien arteko harremanak arautzen dituzten oinarrizko baloreen garrantziaz jabetzea eta horien arabera jokatzea. Horretaz gain, 6. atalaren 3. puntuan etapa horretako curriculuma osatzen duten alorrak zehazten dira eta, bertan esaten denez, edukinen antolamenduan eta trataeran zehar-lerroak hartuko dira erreferentetzat eta, etapa horretarako, bide-hezkuntza aipatzen da bereziki.

– E.A.E.ko Derrigorrezko Bigarren Hezkuntzako curriculuma ezartzeko ekainaren 21ean emandako 213/1994 Dekretuaren 4. atalean, etapa horretan ikasleei zein gaitasun lortzen lagundu behar zaien zehazten da; besteak beste, gizarteen funtzionamendua arautzen duten mekanismoak eta baloreak analizatzea —bereziki herritarren eskubideei eta betebeharrei dagozkienak—, eta horiei buruzko iritzi eta irizpide pertsonalak izatea. Horretaz gain, 6. atalaren 6. puntuan esaten denez, alor desberdinetako edukinen trataeran eta antolamenduan eta disziplinarteko planteamenduetan curriculumarekiko zeharkako lerroak hartu ahalko dira erreferentetzat eta, etapa horretarako, bide-hezkuntza aipatzen da bereziki.

Bide-hezkuntzari lotutako ohiturak hartzeari dagokionez, azken urteotan Herrizaingo Saila eta Hezkuntza, Unibertsitate eta Ikerketa Saila bat etorri dira helburuetan, eta zenbait jarduera burutu dituzte elkarrekin. Horien artean, bereziki aipatu behar da Hezkuntza, Unibertsitate eta Ikerketa Sailak parte hartu duela Euskal Autonomi Elkarteko Bide-Segurtasuneko Batzordean, zein otsailaren 9ko 22/1993 Dekretuaren bitartez sortu baitzen, eta Bide–Segurtasuneko Plan desberdinei garrantzizko ekarpenak egin dizkiela.

Bizimodu osasungarri bat sustatzeko, bide-hezkuntzako ohiturak zabaltzeko eta gure gizarteko arazorik larrienetako bati —istripu arriskuari, alegia— aurre egiteko, derrigorrezkoa da egintza–egitasmo bateratuak, zehatzak eta iraunkorrak gauzatzea. Beraz, Sail biek egitasmo horiek gauzatzeko behar diren giza- eta ekonomi-baliadeak jartzeko konpromisoa hartzen dute.

Ondorioz, bide-hezkuntzaren arloko lankidetza markoa ezartzeko asmoarekin hauxe