Liburutegi Zerbitzua

Dekretu honen xedea Euskadiko Turismo Mahaia sortzea da. Ekonomiaren Garapen eta Lehiakortasun Sailari atxikita egongo da baina ez da haren egitura organikoan sartuta egongo. Turismo alorrean Sail horri aholku ematea izango da bere zeregina. Horrez gain, dekretu honek Euskadiko Turismo Mahaiaren osaera, antolaketa eta funtzionamendua arautuko ditu.

Euskadiko Turismo Mahaiaren eginkizunak hauek dira:

1. Turismo-politiken definizioan eta sektoreko jarduera-ildo berrien programazioan parte hartzea, sektorea indartzeko, modernizatzeko eta lehiakortasuna hobetzeko.

2. Turismo-produktu berritzaileak sortzea proposatzea.

3. Turismo-arloko proiektu arauemaile berriak eztabaidatu eta aztertzea.

4. Turismoa kudeatzeko sistema eta hortik ondorioztatuko diren prozesuak eta proiektuak ezarri eta garatzeko lanean laguntzea (kalitatea eta irisgarritasuna, besteak beste).

5. Turismo-jardueraren inguruko datuak eta estatistikak ebaluatzea.

6. Euskadiko turismoa garatu eta indartzea xedetzat duten erakunde publiko eta pribatu guztien arteko harremana eta koordinazioa hobetzeko beharrezkoak diren neurri guztiak aztertzea.

1. Euskadiko Turismo Mahaia osatzerakoan, ahaleginak egingo dira trebakuntza, gaitasun eta prestakuntza egokia duten emakumeen eta gizonen ordezkaritza orekatua izateko.

2. Euskadiko Turismo Mahaia honela osatuta dago:

   1. Lehendakaria turismo-arloan eskumena daukan sailburuordea izango da.

   2. Lehendakariordea Turismoko zuzendaria izango da. Lehendakariordearen eginkizuna izango da Turismo Mahaiko lehendakari-lanak egitea, lehendakariaren lanpostua hutsik badago, lehendakaria ez badago, gaixorik badago edota bestelako lege-kausaren bat dela-eta.

   3. Basquetour Turismoaren Euskal Agentziako zuzendaria.

   4. Merkataritzako zuzendaria.

   5. Lurralde Historiko bakoitzeko Foru Aldundiaren ordezkari bat, bakoitzari dagokion gobernu-organoak izendatua, edo horrek eskuordetutako zuzendaria.

   6. Hiru Lurralde Historikoetako hiriburuetako alkateak, edo zinegotziak edo eskuordetutako zuzendariak.

   7. Euskadiko Udalen Elkarteak (Eudel) kide gisa izendatutako pertsona bat.

   8. Merkataritza, Industria eta Nabigazioko Ganberek kide gisa proposatutako pertsona bat.

   9. Turismo-arloan lanbide-heziketako zentroak, unibertsitate-prestakuntzako zentroak eta ikerketa-zentroak ordezkatzeko kide bat.

   10. Turismo-enpresen sei ordezkari: ostalaritza-elkarteak ordezkatzeko kide bat; bidaia-agentziak eta turismo-gidariak ordezkatzeko kide bat; biltzarrak antolatzen dituzten enpresak eta erakundeak ordezkatzeko kide bat; eta ostatu-establezimenduen enpresen elkarteak ordezkatzeko hiru kide.

   11. Autonomia-esparruko kontsumitzaile-elkarte eta -federazioek proposatutako kide bat.

3. Turismo-arloan eskumena daukan sailburuak, agindu bidez, kide izendatuko ditu erakundeek proposatutako pertsonak.

Euskadiko Turismo Mahaiaren egitura organo hauek osatzen dute:

1. Osoko bilkurak.

2. Lan-batzordeek.

1. Turismo Mahaiko kide guztiek osatuko dute osoko bilkura.

2. Osoko bilkuraren eginkizunak hauek izango dira:

   1. Planteatutako gaiak aztertu, eztabaidatu eta proposatzeko behar diren batzordeak eratzea, eta, hala badagokio, turismo-arloan eskumena daukan saileko langile teknikoak edota aztertu beharreko arloko adituak organo horietara gehituko diren zehaztea. Halaber, berez osoko bilkurari dagozkion baina batzordeei esleitu ahal zaizkien eginkizunak zeintzuk diren erabaki ahal izango du.

   2. Lan-batzordeek aurkeztutako proposamenak, txostenak eta azterlanak aztertu eta, hala badagokio, onartzea.

   3. Jardueren urteko memoria onartzea.

1. Turismo Mahaiaren osoko bilkura lehendakariak aldez aurretik deituta bilduko da, gutxienez urtean bi aldiz, eta lehendakariak komenigarritzat jotzen duen aldi guztietan edo gutxienez kideen bi herenek eskatzen dutenean. Bileren deialdiari gai-zerrenda erantsiko zaio.

   Mahaiaren osoko bilkura eratuta geratuko da, honako hauek bertaratzen direnean: lehendakaria eta idazkari-lanak egingo dituena, edo horiek ordezkatuko dituztenak, eta gutxienez Turismo Mahaia osatzen duten kideen erdia.

   Quorumik ez badago, osoko bilkura bigarren deialdian eratuko da, lehenengo deialdirako ezarritako ordua baino ordu erdi geroago, betiere hitza eta botoa dituzten kideen herena bertaratzen bada; horiek artean egon beharko dute lehendakariak eta idazkari-lanak egingo dituenak.

2. Turismo Mahaiko lehendakariak izendatuko du osoko bilkuran idazkari-lanak egingo dituen pertsona. Pertsona hori turismo-arloan eskumena duen saileko abokatuen artetik izendatuko du. Hitza izango du, baina botorik ez.

Lan-batzordeak izaera iraunkorrarekin eratuko dira, edota lan-batzorde horiek helburu dituzten lanak amaitu arte.

Ez da jasoko zerbitzuari dagokion kalte-ordainik edo bidaia-saririk Turismo Mahaira joateagatik.