Liburutegi Zerbitzua

Dekretu honen helburua da Osakidetza-Euskal osasun zerbitzua Ente Publikoko karrerako funtzionarioak eta lan-kontratudun langile finkoak estatutupeko langile finko gisa integratzeko prozedura zehaztea.

Berezko eremua Osakidetza-Euskal osasun zerbitzua Ente Publikoaren zerbitzu-erakundeek eratzen eta mugatzen dute, Euskal Autonomia Erkidegoko osasun-administrazioaren barnean.

1. Osakidetza-Euskal osasun zerbitzua Erakunde Autonomoa desagertu zen unean hari atxikirik zeuden karrerako funtzionarioek eta lan-kontratudun langile finkoek izango dute integratzeko aukera, baldin eta gaur egun Osakidetza-Euskal osasun zerbitzua Ente Publikoari atxikita badaude, zerbitzu aktiboan egon edo lanpostua gordeta badute, indarrean dagoen legerian ezarritako arrazoiren batengatik.

2. Era berean, eszedentzian dauden langileek ere eskatu ahal izango dute integrazioa, baldin eta horien egoera arautzen duen legerian aurreikusitako zerbitzu aktibora itzultzea eskatzeko epea igaro ez bada, eta, betiere, eszedentzia aitortu aurretik gaur egun Osakidetza-Euskal osasun zerbitzuaren mendeko diren zerbitzu-erakundetan ematen ari baziren zerbitzua. Suposizio horietan eskatzailea eszedentzia egoera horretan bertan dagoela integratuko da, eta zerbitzu aktibora itzuli, itzultzea tokatzen den unean aplikagarri den estatutu-arautegiak ezarritakoa betez itzuliko da. Eszedentzian dauden langileek zerbitzu aktibora itzultzea eskatzen duten unean ere izango dute integratzeko aukera. Kasu horretan, zerbitzu aktibora itzultzeko ebazpenean erabakiko da integratzea, eta eraginkortasun-data zein duen ere adieraziko da.

3. Estatutu-araubidean borondatezko integrazioa burutu nahi ez duten karrerako funtzionarioak zerbitzu aktiboan egongo dira beren jatorrizko kidegoan, 8/1997 Legea, ekainaren 26koa, Euskadiko Antolamendu Sanitarioarenaren eta hura garatzen duten arauen araubidea oso-osorik aplikatzeari kalterik egin gabe.

4. Integrazioa hautatu ez duten lan-kontratudun langileek aurretik zuten egoeran jarraituko dute, lan-araubideari atxikitako eskubide eta betebeharrak edukiz, aplikagarri izan eta indarrean duden lege-xedapenen arabera.

1. Orokorrean, hauek dira borondatez estatutupeko langile finko gisa integratzeko bete beharrekoak:

   1. Lan-kontradun langile finkoa edo karrerako funtzionarioa izatea, Euskal Autonomia Erkidegoko Administrazioko kidego eta eskaletakoa, edo beste administrazio publiko batzuetatik transferitua.

   2. Integratu nahi den kategoriaren baliokide den kidego edo kategoriakoa izatea. Lan-kontratudun langile finkoak estatutupeko araubide juridikoan integra daitezke, duten titulazioaren, lanbide-kategoriaren, lanbidearen edo ogibidearen arabera, hau da, beren lan-kontratuan onartutakoaren arabera, baldin eta zerbitzua ematen ari badira edo lanpostua gordeta badute, indarrean dagoen legerian ezarritako arrazoiren batengatik.

   3. Kasu bakoitzean aplikagarri den legeria orokorrak eta dena delako lanbidean jardutea arautzen duen legeria espezifikoak eskatutako tituluaren jabe izatea, kasu honetan izan ezik: Esparru-estatutuaren abenduaren 16ko 55/2003 Legeak zazpigarren xedapen gehigarrian aurreikusitako baimena edo lege-gaikuntza eta arauzkoa izatea.

      Dena den, administrazioan sartzeko, gaur egun indarrean dagoen estatutu izaerako arautegian ezarritako titulu akademikoa eskatu ez, eta baimenik edo lege-gaikuntzarik ez duten kidego, eskala edo kategoria jakinetako karrerako funtzionarioek edo lan-kontratudun langile finkoek ere integratzeko aukera izango dute, duten tituluen araberako sailkapen-taldearen kategorian edo beheragokoan.

   4. Estatutupeko langile izateko gainerako betekizunak betetzea.

2. Eskatutako betekizunak integrazio-deialdian ezarritako eskabideak aurkezteko epea bukatzen denerako bete behar dira.

1. Hau da karrerako funtzionarioak eta lan-kontratu finkoko langileak estatutupeko langile bihurtzeko integrazio-prozedura:

   1. Integrazio-prozesua deitzea.

      Osakidetza-Euskal osasun zerbitzuaren Zuzendaritza Nagusiaren ebazpen bidez deituko da integrazio-prozesua, Euskal Herriko Aldizkari Ofizialean argitaratuta.

   2. Bideratzea eta amaiera.

      Eskabideak jaso ondoren, Osakidetza-Euskal osasun zerbitzuaren Giza Baliabideen Zuzendaritzak bideratuko du prozedura. Horretarako, beharrezko bideratze-egintzak egin ondoren, behin-behineko integrazio-proposamena aurkeztuko du ebazpen bidez, eta Euskal Herriko Aldizkari Ofizialean argitaratuko da. Era berean, interesdunei entzuteko aldia zabalduko da, ez hamar egun baino gutxiagokoa eta ez hamabost egun baino gehiagokoa ere. Epe horretan, egoki irizten diotenek arrazoibideak eta dokumentazioa aurkeztu ahal izango dituzte. Aurkeztutako guztia Giza Baliabideen Zuzendaritzak aztertu egingo du, eta behin betiko integrazio-proposamena egin. Proposamen hori Ente Publikoko Zuzendaritza Nagusiak onetsi, eta ebazpen bidez, Euskal Herriko Aldizkari Ofizialean argitaratuko da. Ebazpen horrek administrazio-bidea agortzen duenez, interesdunek aukerako berraztertzeko errekurtsoa aurkeztu ahal izango diote Zuzendaritza Nagusi horri berari, edo zuzenean aurka egin, administrazioarekiko auzien jurisdikzioan.

2. Integrazio-ebazpenean interesduna integratuko den lanbide-taldea eta kategoria jaso behar da, bai eta adskribatuta geratuko den zerbitzu-erakundean esleitutako eginkizunen araberako lanpostua eta integrazioaren eraginkortasun-data ere.

3. Integrazioa eskatu baina beharrezko baldintzak betetzen ez dituzten langileei ukatu egingo zaie eskaera, eta borondatez ez integratzea hautatu duten haien baldintza beretan utziko dira.

Estatutupeko langile gisa integratutako langileei neurri hauek aplikatuko zaizkie:

1. Integrazioaren bidez Osakidetza-Euskal osasun zerbitzua Ente Publikoaren estatutupeko langile finko bilakatuko dira integratutako langileak, eta erakunde horren araubide juridiko eta ekonomikoaren mende geratuko dira. Dena den, ezingo dute integratu aurretik jasotzen zituzten ordainsariak baino gutxiago jaso, urte osoko zenbatekoa kontuan hartuta.

   Dekretu honetan aurreikusitakoaren arabera, estatutupeko bilakatzen diren langileek integratutako lanpostu funtzionalari atxikitako eskubide eta betebeharrak izango dituzte; errespetatu egingo dira beren funtsezko lan-baldintzak, eta, ondorio guztietarako, baita integrazio hori izan den egunera bitarte onartutako antzinatasuna ere.

2. Estatutupeko langile finko bilakatu ondoren, Euskal Autonomia Erkidegoko Administrazio Orokorraren karrerako funtzionarioa eszedentzia-egoeran aitortuko da, arlo publikoan zerbitzua emateagatik. Era beran, Osakidetzako lan-kontratudun langile finko zirenak, eszedentzia-egoeran dauden lan-kontratudun langiletzat aitortuko dira ofizioz, arlo publikoa zerbitzua emateagatik.

3. Erakunde autonomoa desagertzen den unean lanpostua jabetzan izan eta horretan lanean ari den langileak, Osakidetza-Euskal osasun zerbitzua zuzenbide pribatuko Ente Publikoan lanpostu funtzionalak arautzen dituen uztailaren 19ko 186/2005 Dekretuaren arabera, izendapen askeko sistemaren bidez betetzeko kalifikazioa merezi badu, lanpostuaren titulartasunari eutsi egingo dio eta, bereziki, ad personam mantenduko du mugiarazteko araubidea, eta ezingo da lanpostu horretatik baztertu, Euskadiko Osasun Antolamenduaren 8/1997 Legean aurreikusitako mekanismo orokorren bidez ez bada.

4. Integrazioaren ondorioz, une horretara bitarte egiaztatutako ordainsariak baino gutxiago ateratzen zaizkienei, osagarri pertsonal bat onartuko zaie aldea berdintzeko, baina aldi baterako. Osagarri hori ekitaldi honetan edo gerokoetan izango diren edonolako ordainsari hobekuntzak hartuko du, lanpostu edo kategoria aldaketagatik eratorritakoak barne. Aldi baterako osagarri pertsonala kalkulatzeko, ez dira kontuan hartuko etengabeko arretan, txandetan, gauetan, jai egunetan edo ospitalizazioan lan egiteagatik jasotako kopuruak, ez eta horien antzeko beste edozer ere, eta ez antzinatasunagatik edo onartuta izan ditzaketen lanbide-garapenagatik kobratzen dituzten kopuruak ere.

5. Integratutako langileei, ondorio juridiko eta ekonomiko guztietarako, onartuta duten antzinatasuna mantenduko zaie, eskabideak aurkezteko epea amaitzen den egunean indarrean dauden zenbatekoetan. Integrazioak ondorioak izan ondoren onartutako hirurtekoak Estatutupeko Langileen Esparru-estatutuaren 55/2003 Legeak 42. artikuluan ezarritako eran egingo dira. Dena den, hirurteko edo antzinatasun gisa sailkapen-talde bakoitzerako aurreikusitako kopuruak baino gutxiago jasotzen dituztenei, erregularizatu egingo zaizkie kopuru horiek, integratzen diren sailkapen-taldearen arabera.