Liburutegi Zerbitzua

Familien Euskal Behatokia sortzea eta Behatokiaren antolamenduari eta funtzionamenduari buruzko erregimena arautzea da Dekretu honen helburua.

Familien Euskal Behatokia azterlanerako, ebaluaziorako, lankidetzarako eta aholkularitza teknikorako organoa da eta familia-politikako arloan eskumena duen Sailari atxikita dago, gai horretan eskuduna den Zuzendaritzaren bidez.

1. Familien Euskal Behatokiaren helburua Euskal Autonomia Erkidegoko familien errealitatea, egoera eta problematika eta Familiei Laguntzeko abenduaren 12ko 13/2008 Legea aplikatuta garaturiko politiken inpaktua etengabe aztertzea da.

2. Helburu hori lortzeko, Familien Euskal Behatokiak honako eginkizun hauek garatuko ditu:

   1. Familia-errealitatea etengabe aldatzen ari denez, eta familiek askotariko eginkizunak hartzen dituztenez beren gain, horren guztiaren inguruko jakintza kuantitatiboki nahiz kualitatiboki behar bezalakoa izan dadin bermatzeko azterketa- eta ikerketa-ildo bat bultzatzea eta sustatzea; bereziki, adingabeko seme-alaben mantenuarekin eta zaintzarekin eta mendetasun-egoeretan dauden pertsonen zaintzarekin lotutako ildoa izango da, kalteberatasun handiko egoeretan dauden familiei arreta berezia eskainiz.

   2. Etxeko indarkeriako egoeren errealitatea eta bilakaera ezagutzea, zerbitzu- eta prestazio-eskaintzan hobekuntzak txertatzeko gomendioak eta proposamenak egite aldera, emakumeen aurkako indarkeriaren inguruko ikerketak egiteko Emakunde Emakumearen Euskal Erakundeak dituen ahalmenen laguntzarekin.

   3. Autonomia-erkidegoan, Estatuan, Europan eta nazioartean gai honi lotutako literatura zientifikoa biltzen duen dokumentazio-funts espezializatua eratu eta etengabe eguneratzea, baita araudiei buruzko dokumentazio-funtsa ere, Autonomia Erkidegoan, gainerako autonomia-erkidegoetan, Estatuan eta Europar Batasunaren esparruan indarrean dauden araudiak eskura izatea ahalbidetzeko.

   4. Aurreko paragrafoan aipatutako bibliografia- eta araudi-funtsak ustiatuta lortutako dokumentu-azterketak egitea eginkizunak hobeto eta arinago betetzeko lagungarri izan daitezkeen gai espezifikoen inguruan.

   5. Familiei Laguntzeko Legean eta familiei laguntzeko erakunde arteko dagokion planean azaltzen diren neurriak benetan aplikatzen ote diren eta neurri horiek eragiten duten inpaktu soziala zein den jakiteko jarraipena egitea.

   6. Eskatzen duten administrazio publikoei aholkularitza ematea familiak babesteko, arreta emateko eta laguntzeko jardunen inguruan.

   7. Ordenamendu juridikoa familien premietara egokitzeari buruzko informazioa ematea administrazio eskudunei, eta araudi berriak ezarri edo daudenak aldatzeko proposatzea.

   8. Aldian behin Familiaren Euskal Kontseiluari informazioa ematea, lantzen dituen azterlan eta txostenak igorrita, betiere Behatokiak garaturiko jardueren urteko txosten bat emanez.

   9. Familia-politikaren arloan eskuduna den sailburuari helaraztea aurreko idatz-zatiak aipatzen duen txostena, Eusko Legebiltzarrean aurkezteko, Jaurlaritzak familiari buruzko erakunde arteko planak aurkeztu aurretik gutxienez ere.

   10. Familia-arloan eskuduna den Saileko pertsona titularrak bere eskumenen arloan eslei diezazkiokeen beste guztiak.

1. Behatokiaren zuzendaritza familia-politikaren arloan eskuduna den zuzendariari dagokio, hari baitagokio helburu eta zereginak definitzea, baita horiek burutzeko beharrezkoak diren norabide eta aginduak ematea ere.

2. Honako hauek egingo dituzte Familien Euskal Behatokiari dagozkion lanak:

   1. Enplegu eta Gizarte Gaietako langileek berek, haiek arduratuko baitira Sailak familien premia eta eskariei buruz duen informazioa prozesatzeaz, baita bere eginkizunak egikaritzean lor ditzakeen beste informazio batzuk ere, bere helburuak betetzeko erabilgarriak badira betiere.

   2. Familiekin loturiko azterlan eta ikerketak egiteko egiaztaturiko eskumena dute erakunde laguntzaileek, horretarako sinaturiko aldez aurreko lankidetza-hitzarmena tarteko.

3. Familien Euskal Behatokiaren lana koordinatuta egin da gizarte-gaietako arloan eskuduna den Sailean dauden gainerako behatokiek egindakoarekin eta Behatokiak funtziona dezan ezinbesteko lankidetza ematen duten beste agente batzuek egindakoarekin.

4. Familien Euskal Behatokiak urteko funtzionamendu-plan bat landuko du eta informazioa emango dio Familien Euskal Kontseiluari egindako jardunei eta lorturiko helburuei buruz.

5. Behatokiaren arduradunak eta Behatokiaren lanetan esku hartzen duten pertsona guztiek sekretua gorde beharko dute intimitaterako eskubidea eraginpean hartzen duten informazio guztiei eta haien konfidentzialtasunari buruz, Izaera Pertsonaleko Datuen Babesari buruzko abenduaren 13ko 15/1999 Lege Organikoari jarraiki.

6. Familien Behatokiaren azterlan eta estatistikak Emakumeen eta Gizonen Berdintasunerako otsailaren 18ko 4/2005 Legearen 16. artikuluak xedaturikoaren arabera egingo dira. Artikulu horretan xedaturikoaz gain, Behatokiaren lanak egiteko lankidetza-hitzarmenak sinatzen dituzten erakunde pribatuei Lege horretako 3. artikuluan eta 18. 4. eta 23. artikuluetan bilduriko printzipioak aplikatuko zaizkie.

7. Familien Euskal Behatokiak pertsona fisiko eta juridiko guztiei bermatuko die erakundearekin euskaraz zein gaztelaniaz harremanetan jartzeko eskubidea, eta bakoitzak hautatzen duen hizkuntza erabiltzeko eta hizkuntza hartan artatua izateko eskubidea, euskararen erabilera normalizatzeko azaroaren 24ko 10/1982 Oinarrizko Legean xedaturikoaren arabera.

Familien Euskal Behatokiaren finantzaketa berariazko aurrekontu-esleipenen bidez egingo da, familia-politikaren arloan Zuzendaritza eskudunarentzat Autonomia Erkidegoaren Aurrekontu Orokorretan bilduta daudenen bidez.