Liburutegi Zerbitzua

1. Dekretu honetan arauturik dauden laguntze­tarako deia urtero egingo da, Ingurumen, ­Lurralde plangintza, Nekazaritza eta Arrantza Saileko ­titularraren agindu bidez.

2. Deialdi horretan gauza hauek guztiak adierazi beharko dira:

   1. Eskabideak aurkezteko epea.

   2. Laguntza guztietarako dagoen gehienezko kopuru osoa, eta, beharrezkoa baldin bada, urteka nola banatuko den. Kapituluz kapitulu eta funts-motaz -mota zehazturik egon beharko du.

   3. Zer lagunduko den diruz. Dekretu honetako III. kapituluan jasota daude aukerak.

      III. kapituluan jasota dauden laguntzen zenbatekoa zehazteko aukeratu diren irizpide objektiboak. 38. artikuluan jasota dauden irizpideen artetik aukeratu beharko da. Beste irizpide objektiborik erabiltzekotan, fundamentuzko arrazoiak behar dira.

   4. Diruz lagundu beharreko ekintza-mota bakoitzerako aurreikusita daude agirien artetik zein aurkeztu behar diren, deialdi bakoitzean zehazturiko lehentasun-hurrenkeraren arabera.

   5. Laguntzak II. kapituluan jasota daudenak baldin badira, 2. ataleko 21. artikuluan aipatzen diren kalitate-programetako bakoitzeko pizgarri unitarioaren zenbatekoa.

   6. Laguntzak III. kapituluan jasota daudenak baldin badira, 2. ataleko 21. artikuluan aurreikusita dauden kalitate-programen baitan, beharrezkoa baldin bada, jasangarritasun-estrategiak erabiliz lehentasunez babestu beharreko inguru zehatzak.

3. Kontsumoko Prezioen Indizearen urte arteko aldaketak kontuan izatearren, deialdi horretan bada kopuruak eguneratzeko aukera: bai moduluko kopuruak, bai dekretu honetako III. kapituluko 33. artikuluko gehienezko gastu baimenduak.

Laguntza zein motatakoa izan, laguntzen kudeaketa ere ezberdina izango da.

1. II. kapituluan aurreikusitako laguntzetarako.

1. Elikagaien Kalitatearen Zuzendaritzak dauka dekretu honetako II. kapituluan jasota datozen laguntzak kudeatzeko eskumena.

2. Hau izango da Laguntza emateko prozedura: dekretu honetan eta laguntza-deialdiaren dena delako urteko aginduan aginduta datozen baldintzak eta eskakizunak betetzen baldin badituzte, eskatzen duten guztiei emango zaie laguntza.

3. Kudeaketa Batzordeak kudeatuko du deialdia. Hiru kide izango ditu, Elikagai Politika eta Industriako Sailburuordetzaren menpeko zuzendaritzetako teknikarien artetik aukeratuko dira, hizpidea eta bozka izango dute, eta Elikagai Politika eta Industriako Sailburuordetzaren titularraren ebazpen bidez izendatuko dira. Ebazpen horretan bertan erabakiko da nor izango de batzorde horretako idazkaria eta nor lehendakaria.

4. Kudeaketa Batzordeak, eskabideak hartu, eta banan-banan aztertuko ditu, ikusteko ea bete beharreko arauak betetzen dituzten, eta bakoitzari zenbateko laguntza eman behar zaion ebaluatzeko, dekretu honetako 10. artikuluko 1. paragrafoan xedaturik dagoen bezala. Eduki aldetik, ebaluaketa horretan, gutxienez, dekretu honetako 11. artikuluko 2. paragrafoko a) ataleko A itemean eta b) atalean aipatzen den informazioa azaldu beharko dira. Ebaluaketa horiek Balorazio Batzordera bidali beharko dute.

   III. kapituluan aurreikusitako laguntzetarako.

1. Elikagaien Kalitatearen Zuzendaritzak dauka dekretu honetako III. kapituluan jasota datozen laguntzak kudeatzeko eskumena.

2. Eskabideak aztertzeko eta ebaluatzeko, Balorazio Batzordea osatuko da. Hiru kide izango ditu, Elikagai Politika eta Industriako Sailburuordetzaren menpeko zuzendaritzetako teknikarien artetik aukeratuko dira, hizpidea eta bozka izango dute, eta Elikagai Politika eta Industriako Sailburuordetzaren titularraren ebazpen bidez izendatuko dira. Ebazpen horretan bertan erabakiko da nor izango den batzorde horretako idazkaria eta nor lehendakaria.

3. Balorazio Batzordeak funtzio hauek izango ditu:

   Aurkeztutako eskaeren ebaluazioa eta proiek­tuaren bideragarritasun teknikoaren eta ekonomi­koaren azterketa, gutxienez irizpide hauek aplikatuz:

   Aplikatu beharreko araudia betetzea.

   Dekretu honetan zehaztu ditugun eskakizun objektiboak eta espezifikoak betetzea.

   Elikagaien Kalitatearen Zuzendaritzaren titularrari ebazpen-proposamen bakarra egitea, balorazio-irizpide objektiboetan eta III. kapituluko laguntzen kuantifikazioan oinarriturik, eta II. kapituluko laguntzei buruzko ebaluaketa kontuan hartuz. Ebaluaketa hori Kudeaketa Batzordeak egindakoa da, eta artikulu honetako 1. atalean dago zehazturik. Proposamenak, gutxienez, dekretu honetako 11. artikuluko 2. atalak adierazten duen edukia izan beharko du.

4. Balorazio Batzordeak, bere funtzioak bete behar horretan, Elikagaien Kalitatearen Zuzendaritzako teknikariek egindako txostenak baloratu (dekretu honetako 10. artikuluan daude aipaturik), eta aurkeztutako eskabideen espedienteetan dauden agiriak aztertzeko ardura hartuko du.

   3. Artikulu honetan aurreikusitako batzordeek beren funtzionamendu-arau propioak ezartzeko aukera izango dute, eta arau horietan aurreikusi gabeko edozertarako, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legeko 22.etik 27.era bitarteko artikuluetan xedaturik dagoena beteko dute.

Laguntza zein motatakoa den, laguntza esleitzeko eta kuantifikatzeko prozedura ere ezberdina izango da.

1. II. kapituluan aurreikusitako laguntzetarako.

a) 9. artikuluko 1. ataleko Kudeaketa Batzordeak, eskabideak aztertu, eta haien azterketa tekniko bat egingo du. Horrek esan nahi du txosten bat idatzi behar duela, dena delako eskabideak dekretu honetako eta deialdi bakoitzeko eskakizunak betetzen dituen edo ez azaltzeko.

1. Dekretu honetan eta urtean urteko deialdi-aginduetan zehazturik dauden eskakizunak eta baldintzak betetzen dituzten eskari-egileek/eskabideek izango dute laguntza jasotzeko eskubidea.

2. Laguntzaren hasierako zenbatekoa kalkulatzeko, biderketa hauetakoren bat egin beharko da, eskari-egileak zein kalitate-programatan izena emanda dauden gorabeheran: urteko deialdi-aginduan zehazturik dauden pizgarrien zenbateko osoa bider edo kontseilu arautzaileek erregistraturiko eta egiaztaturiko hektarea-kopurua; edo bider esnea Idiazabal Jatorri Izendapenerako ematen duten abelburu-kopuru erregistratuak edo Nekazaritza Ekologikoaren Kontseiluan erregistraturikoak; edo bider Euskal Okelatarako hildako abelburu-kopurua.

   Aurreko araua aplikatu ostean, onuradunen zerrenda egingo da, egokituko litzaiekeen hasierako laguntza adieraziz.

   Urteko deialdian II. kapitulurako jarrita datorren dirua nahikoa baldin bada hasierako kopuru horiek ordaintzeko, kalkulatutako kopuru horiek ordainduko dira laguntza modura.

4. Baina urteko deialdi-aginduan II. kapitulurako jarrita datorren gehieneko diru-horniketa osoa ez bada nahikoa aurkeztutako eskabide guztiei erantzuteko, eskakizunak betetzen dituzten eskabide guztien artean banatuko da, osorik ordaintzeko beharrezko kopurutik proportzio berean, eta bakoitzerako hasieran kalkulatutako zenbatekoa hartuta oinarri modura.

   III. kapituluan aurreikusitako laguntzetarako.

1. Batzordeak egin beharreko balorazioak egin baino lehenago, eskabideak Elikagaien Kalitatearen Zuzendaritzako teknikariek aztertuko dituzte. Proiektuaren azterketa teknikoa eta ekonomikoa egingo dute, dekretu honetako III. kapituluko irizpide objektiboetan oinarriturik, eta horrek esan nahi du txosten bat idatzi beharko dutela, adierazteko ea proiektuak betetzen dituen dekretu honetan eta deialdi bakoitzean jasota datozen eskakizunak, eta txosten hori Batzordean aurkeztuko dute.

2. Aurreko artikuluko Batzorde horrek aztertuko ditu dekretu honetan eskatzen diren eskakizun eta baldintzak betetzen dituzten eta deialdi bakoitzean urtez urte aurreikusten diren ekintzen araberako proiektuak dituzten eskabide guztiak.

3. Dekretu honetan eta urtean urteko deialdi-aginduetan zehazturik dauden eskakizunak eta baldintzak betetzen dituzten eta, dekretu honetako 39. artikuluaren arabera, laguntza jasotzeko eskubidea izateko gutxieneko puntuazioa badaukaten proiektuek izango dute laguntza jasotzeko eskubidea.

4. Eskari-egile bakoitzari hasiera batean zenbateko laguntza eman kalkulatzeko, deialdi-aginduan urte bakoitzean aukeratutako irizpide objektiboak eta dekretu honetako 39. artikuluan xedaturik dagoena aplikatuko da. Aurreko araua aplikatu ostean, onuradunen zerrenda egingo da, egokituko litzaiekeen hasierako laguntza adieraziz.

   Urteko deialdian III. kapitulurako jarrita datorren dirua nahikoa baldin bada hasierako kopuru horiek ordaintzeko, kalkulatutako kopuru horiek ordainduko dira laguntza modura.

5. Baina urteko deialdi-aginduan III. kapitulurako jarrita datorren gehieneko diru-horniketa osoa ez bada nahikoa aurkeztutako eskabide guztiei erantzuteko, eskakizunak betetzen dituzten eskabide guztien artean banatuko da, osorik ordaintzeko beharrezko kopurutik proportzio berean, eta bakoitzerako hasieran kalkulatutako zenbatekoa hartuta oinarri modura.

   3. Kapituluren baten ezer sobran geratzen bada, hurrengo kapitulurako izango da, eta gero hurrengorako eta hurrengorako, harik eta agortu arte, baina hurrenkera honetan: II. kapitulua eta III. kapitulua.

1. Aurkeztu diren eskabideak eta agiriak aztertuta, eta dekretu honetako 9. artikuluan jartzen duen moduan, iritsi zaion proposamena ikusita, Elikagaien Kalitatearen Zuzendaritzako titularraren ardura izango da deialdia ebaztea. Ebazpen-proposamenarekin ados ez badago eta beste zerbait ebatzi nahi badu, arrazoitu egin beharko du.

2. Ebazpenak arrazoituta egon behar du, eta informazio hau jaso behar du, gutxienez:

   1. Aintzat hartutako eskabideei buruz:

      II. kapituluko laguntzei buruz:

      Onuradunaren izena edo baltzu-izena.

      Laguntzaren xedea.

      Guztira zenbat jaso behar duen, eta, kopuru horretatik, zenbat Feader funts komunitariotik eta zenbat Euskal Autonomia Erkidegoko aurrekontutik.

      III. kapituluko laguntzei buruz:

      Onuradunaren izena edo baltzu-izena.

      Laguntzaren xedea.

      Diruz lagundu daitezkeen gastuen zenbatekoa.

      Dirulaguntzaren zenbatekoa, eta, kopuru horretatik, zenbat Feader funts komunitariotik eta zenbat Euskal Autonomia Erkidegoko aurrekontutik.

      Dena delako ekintza zein epetan egin behar den, eta urtekako banaketa.

   2. Aintzat hartu ez diren eskabideei buruz:

      Eskari-egilearen izena edo baltzu-izena, IFK edo NAN.

      Zergatik ez den eskabidea onartu.

3. Dekretu honetako 8. artikuluan aipaturik dagoen aginduak ondorioak eragiten dituenetik, gehienez ere sei hilabeteko epea egongo da ebazpena hartzeko eta jakinarazteko. Epe hori amaitu eta oraindik ez badago berariazko ebazpenik, interesdunek ulertu beharko dute ez zaiela eskabidea onartu, hala jartzen baitu Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legeko 44. artikuluan.

4. Laguntza emateko edo ukatzeko emandako ebazpenaren aurka interesdunak gora jotzeko errekurtsoa aurkeztu ahal izango dio Elikagai Politika eta Industriako Sailburuordetzako titularrari eta horretarako hilabeteko epea izango du ebazpenaren jakinarazpena jaso eta biharamunetik aurrera edo hiru hilabeteko epea administrazio-isiltasunak ondorioak izan eta biharamunetik aurrera, Herri Administrazioen Araubide Juridikoaren eta Administrazio Prozedura Erkidearen azaroaren Legearen 114. eta 115. artikuluetan xedatuarekin bat etorriz.

5. Aurreikusitako laguntzei buruzko ebazpena ­banan-banan jakinarazi behar bada ere, publizitate-­premiak betetzearren, dekretu honen babespean laguntza jasoko duten pertsonen zerrenda EHAAn argitaratuko da Elikagai Industrien Zuzendaritzako titularraren ebazpen baten bidez; bertan, emandako kopuruak ere adieraziko dira.

1. Eskainitako laguntzaren gastuaren justifikazioa, 40. artikuluan aurreikusitako berariazko justifikazioari kalterik egin gabe, Elikagaien Kalitateko Zuzendaritzari agiri hauek aurkeztuz egingo da:

   Burututako ekintzak justifikatzeko memoria bat.

   2. kapitulua dela-eta, dagokion kontrol-erakundeak bidalitako ziurtagiria, hektarea eta abelburuen kopurua jasotzen duena, horrela kalkulatu ahal izango baita laguntzaren hasierako zenbatekoa, dekretu honen 10. artikuluaren 1. puntuko c) atalean ezartzen denez.

   3. kapituluan jasotako laguntzei dagokienez egindako gastuak direla-eta, fakturak eta ordainketaren banku-ziurtagiriak.

2. Agiri originalak edo, horrelakorik ezean, fotokopia konpultsatua baino ez dira onartuko.

3. Dekretu honetan aurreikusitako laguntzen kudeaketa eta ordainketa egokia bermatzearren:

   2. kapituluan aurreikusitako laguntzetarako aurkeztutako eskabideekin batera, artikulu honen 1. puntuko b) atalean aurreikusitako ziurtagiria aurkeztu beharko da.

   3. kapituluan jasotako laguntzei dagozkien proiektuen gastua egin izana ziurtatzeko agiriak entregatzeko gehienezko epea honako hau izango da:

      Urteko proiektuetarako: dagokion deialdiaren hurrengo urteko otsailaren 28a. Baina 16. artikuluan xedatutakoari jarraiki luzapena eskaini bada, epe hori luzapenaren hurrengo urteko abenduaren 15era arte luzatuko da.

      Urte anitzeko proiektuetarako: hasieran aurreiku­sitako urtearen hurrengotik kontatzen hasita, bigarren urteko abenduaren 15a.

4. Elikagaien Kalitateko zuzendariak, eskaera arrazoitu bidez, egoki deritzon edozein agiri gehigarri eskatu ahal izango du.

Urteroko zuzeneko pizgarri gisa emango zaio laguntza nekazariari, 21.artikuluko 2. paragrafoan adierazitako Kalitate Programaren batean izena eman eta parte hartzen badu.

1. Laguntza eskatu dutenek, kapitulu honetan arautzen den laguntza jasoko badute, eskabidea egiteko unean, dekretu honetako 6. artikuluak xedatzen duena betetzeaz gain, EAEko Nekazaritza Ustiategien Erregistroan izena emanda dagoen nekazaritza-ustiategi baten titular izan behar dute, eta 21. artikuluko 2. paragrafoak aipatzen dituen Kalitate Programetakoren batean inskribatuta egon edo inskribatuta egoteko konpromisoa hartu (gutxienez, bost urtez).

2. Baldin eta laguntza jasoko dutenak ondasun-elkarteak badira, idatzizko akordio bat eduki beharko dute, zehazten duena elkargoko kide bakoitzak proiektuaren exekuzioan zenbateko parte-hartze kuota daukan, bakoitzak zehazki zer lan egingo duen, eta elkargoaren ordezkari zein izendatu duten.

Kapitulu honetako laguntza eskatu nahi duen bakoitzak, dekretu honetako 7. artikuluan zehaztutako dokumentazio orokorraz gain, honako hau ere aurkeztu beharko du:

Agindu honetako I. eranskinean datorren eredua erabiliz egindako eskabidea. Webgunean dago eskura: www.nasdap.ejgv.euskadi.net.

Memoria xehakatua. Gutxienez, informazio hau eman behar du: ustiategiaren deskribapena, kokalekua, lantzen duten dena delako produktuaren eraldaketa-, ekoizpen- edo elaborazio-prozesua, aplikatu diren edo aplikatuko diren kontrol-ekintza guztien deskribapen xehea, eta ekintza zein epetan burutuko den.

Titularitate-pean daukan nekazaritza-ustiategia EAEko Nekazaritza Ustiategien Erregistroan inskribatuta dagoela egiaztatzen duen dokumentazioa.

Dekretu honetako 21. artikuluan jasotako kalitate-programetakoren batean izena emanda dagoela egiaztatzen duen dokumentazioa.

Izena emanda dagoen kalitate-programan, gutxienez, bost urtez inskribatuta egon izana edo, gutxienez, bost urtez izena emanda egongo dela egiaztatzen duen dokumentazioa.

Dena delako kalitate-programan atxikitako hektarea eta abelburuen kopurua egiaztatzen duen dokumentazioa; dokumentazio horren bidez kalkulatuko da laguntzaren hasierako zenbatekoa (dekretu honen 10. artikuluko 1. puntuko c) atalak dioenaren arabera).

Ondasun-elkargoak formalizatutako idatzizko akordioaren kopia. Akordio horrek zehaztuko du elkargoko kide bakoitzak proiektuaren exekuzioan zenbateko parte-hartze kuota daukan, bakoitzak zehazki zer lan egingo duen, eta elkargoaren ordezkari zein izendatu duten.

1. Pizgarri unitarioa zenbatekoa izango den finkatzeko, programetan parte hartzeak eragiten dituen kostu finko onargarriak hartzen dira kontuan. Kostu finko onargarriak dira, hain justu ere, programako zehaztapenak betetzen direla ziurtatzeko beharrezko diren kontrolek eragindako kostuak.

2. Urteko pizgarri unitarioaren gehieneko zenbatekoa, dekretuko 21. artikuluko 2. paragrafoko kalitate-programetatik izena emanda dagoen programen arabera, ezingo da izan handiagoa hemen ezarritakoa baino:

   Programa Pizgarri unitarioa

   euro/ hektarea edo buruko

   g.p. Euskal Okela 60

   Idiazabal Gazta Jatorri-Izendapena 1

   Getariako Txakolina Jatorri-Izendapena 108

   Arabako Txakolina Jatorri-Izendapena 226

   Bizkaiko Txakolina Jatorri-Izendapena 185

   Nekazaritza ekologikoa 138 hektarea/17 buru

3. Urtero-urtero, 8. artikuluak xedatuta deialdi-agindua ateratzen denean, honakoa zehaztuta utziko du:

   Azalera motaren eta abere motaren araberako pizgarri unitarioaren zenbatekoa, produktu bakoitzeko kalitate-programa bakoitzaren kontrol- eta ziurtapen-gastuak kontuan hartuta aterata.

   Pizgarri unitarioa kalkulatzeko beharrezko hektarea edo abelburuak kontatzeko kontuan hartuko den eguna edo epea. Egun edo epe hori zein izango den, dagokion kalitate-programaren arabera zehaztuko da.

4. Nekazari bakoitzak ezingo du inola ere 3.000 euro baino gehiago jaso urtean.

Honako gastu hauentzat ez da dirurik emango:

1. Ferietan erakustera joandakoan, Ingurumen, Lurralde Plangintza, Nekazaritza eta Arrantzako Sailaren, sektoreko elkarteen, Merkataritza, Industria eta Nabigazioko Merkataritza Ganberen edo ekoizle-elkarteen alde jokatzen duten halako erakundeen standak egonik, euskal ekoizleen elkarteei leku utzi dioten ferietako gastuak. Arau honetatik kanpo geratzen dira lekua eskatuta ere, berei ez dagozkien arrazoiengatik, lekurik gabe geratu diren ekoizle-elkarteak. Kasu horretan, laguntza emateko, stand-aren m2 bakoitzeko kostu efektiboa Sailarekin doazen ekoizle-elkarteen kostuaren arabera doituko da. Edonola, kostu hori ezingo da izan handiagoa dekretu honetan ezarritako gehienekoa baino.

2. Zuzeneko misioetako eta produktuen aurkezpenetako gastuak, baldin eta erakusketa hori batera gertatzen bada Ingurumen, Lurralde Plangintza, Nekazaritza eta Arrantzako Sailaren, sektoreko elkarteen, Merkataritza, Industria eta Nabigazioko Merkataritza Ganberen edo ekoizle-elkarteen alde jarduten diren halako erakundeek antolatutako besteren batekin.

3. BEZa, non eta benetan laguntza jasoko duenak ezin duen zerga hori jasanarazi, eta aldi berean pertsona fisiko edo juridiko pribatua bada.