Liburutegi Zerbitzua

Hona Dekretu honen xedea: helduek Berariazko Lanbide Heziketa Teknikari eta Goi Mailako Teknikari tituluak ateratzeko egin behar dituzten probek arau izango dituzten baldintzak erregulatzea; orobat, proba horiek egiteko bi erak erregulatzea.

1. Probak egin ahal izateko, eskatzaileek hogei urte izan beharko dituzte, goi-mailako heziketa-zikloen probetarako, eta hemezortzi, erdi-mailako heziketa-zikloen probetarako. Proba egingo den urte naturalean bete beharko dituzte urteak.

2. Aurreko paragrafoan esandako adin-betebeharraz gain, eskatzaileek ondoko betebeharretakoren bat bete beharko dute:

   1. Gutxienez bi urteko lan-esperientzia egiaztatzea, dagokion lanbide-modulua edo aintzatetsi nahi den gaitasun-unitatea zer hezkuntza-ziklotakoa den, horren ekoizpen-sektorearekin lotuta. Ondoko agirien bidez egiaztatuko da hori:

      1. Gizarte Segurantzako Diruzaintzaren edo lan-mutualitatearen ziurtagiria, zeinean enpresa, lanbide kategoria (kotizazio taldea) eta kontratazio aldia, edo, betiere, Langile Autonomoen Araubide Bereziko kotizazio aldia adieraziko baitira. Zuzenbidean onartutako beste edozein frogabide ere onartuko da.

      2. Lan-esperientzia zer enpresatan hartu duen, horren ziurtagiria, datu hauekin: kontratuaren iraupena, egindako lana eta zenbat denbora egin duen lan horretan. Beren kontura ari diren langileen kasuan, Jarduera Ekonomikoen gaineko Zergan alta emanda egotearen ziurtagiria eta zerga hori ordaindu izanaren frogagiriak.

   2. Interesatuak dagokion lanbide-sektorearekin zerikusia duen lanbide-irakaskuntza lehenago ere hartu izana egiaztatu beharko du, ziurtagiriaren bitartez.

1. Proba hauetarako matrikula azaroaren bigarren hamabostaldian egingo da. Heziketa-ziklo oso bakar baterako egin ahal izango da matrikula, edo bestela zikloa osatzen duten lanbide-moduluetakoren baterako. Probak deialdika egingo dira: ohiko deialdia maiatzaren azken hamabostaldian izango da; eta ohiz kanpokoa, ekainaren azken hamabostaldian.

2. Matrikulazioa ikastetxe publikoetan egingo da, ikastetxeak baimenduta dituen heziketa-zikloetan, baldin eta ikasturte horretan ematen badira.

3. Ikastetxe bakoitzeko ikasketa-buruak proben egutegia prestatu, eta iragarki-oholean argitaratuko du, probak egin baino lehenago; hain zuzen ere, 20 egun lehenago, gutxienez. Egutegi horretan honako hauek jasoko dira: proben egunak, orduak eta modulu bakoitzari dagozkion probak egiteko gehienezko denbora. Planifikazioak, ahal dela, proben kontzentrazioa saihestuko du.

4. Ikasturte berean, ikasle batek ezin izango du titulu bat lortzeko irakaskuntzetan matrikulatuta egon, eta aldi berean, arau honek erregulatzen dituen probetan, baldin eta proba horiek titulu bera lortzeko badira. Orobat, ikasturte berean, eta proba hauetarako, ikasle batek ezin izango du bi ikastetxetan matrikulatu heziketa-ziklo berean.

1. Proben edukiek ondoko oinarriak izango dituzte, funtsean: indarreko heziketa-zikloen curriculumak eta horiei dagozkien lanbide-gaitasunak. Probek eduki teorikoak eta praktikoak izango dituzte, proba horiek ebaluatzeko eta egiteko irizpideetan oinarrituta egiaztatu ahal izateko eskatzen zaizkien ahalmen eta gaitasunak dituztela izangaiek. Heziketa-zikloak osatzen dituzten lanbide-moduluetako bakoitzerako proba bana prestatuko da, lantokiko prestakuntzarako modulurako izan ezik.

2. Berariazko Lanbide Heziketa ebaluatzeari buruzko indarreko xedapenen arabera egingo da lanbide-modulu bakoitzaren kalifikazioa, eta hala bada, zikloaren azken kalifikazioa.

1. Agindu honetan ezarritako probetarako matrikulatuta dauden pertsonei ondokoa aplikatuko zaie: lanbide-moduluak baliozkotzeari eta Lantokiko Prestakuntza Moduluaren exentzioari buruz indarrean dagoen arautegia.

2. Matrikula egiterakoan aurkeztu beharko da lanbide-moduluak baliozkotzeko edo Lantokiko Prestakuntza Moduluaren exentziorako eskaria. Lantokiko Prestakuntza Moduluaren exentzioa eskatuz gero, dena den, gainerako lanbide-moduluak gainditu ondoren ere aurkeztu ahal izango dira egiaztagiriak, exentzio-eskarian jasota utziz gainerako lanbide-moduluak gainditu egin direla

   Lantokiko prestakuntza modulua presentziazko erregimenean egin beharko da, dagokion heziketa-zikloaren oinarrizko curriculum-garapenak iraupen finkotzat ezarri duen ordu kopuruaren arabera. Ondorio horietarako, eskatzaileak lantokiko prestakuntza modulurako matrikula zein ikastetxetan egin duen, ikastetxe horrek eskuratuko dio edo dizkio modulu hori egiteko enpresa edo enpresak, eta moduluaren jarraipena eta ebaluazioa ere egingo ditu.

1. Ebaluazio-batzorde bakoitzak ondoko kideak izango ditu, gutxienez: batzordeburua, idazkaria eta hiru batzordekide, probak egingo dituen ikastetxeko zuzendariak izendatuak. Nolanahi ere, honako hau bermatu beharko da: batzordekide batek gutxienez lanbide-modulu bakoitzerako irakaskuntza-atribuzioa izango duela. Profesional kualifikatuak aholkulari gisa sartu ahal izango dira ebaluazio-batzordeetan, hala egokitzen bada.

2. Ebaluazio-batzordeak epaituko ditu emaitzak, halako moldez non ezarritako probak gainditzeak eskatzaileei honako hau ekarriko dien: dagokion moduluan azaldutako gaitasun nahikoa lortzea. Emaitzak akta batean jasoko dira, eta batzordeko kide guztiek izenpetuko dute. Akta hori ikastetxeko idazkaritzan gordeko da.

1. Helduei prozedura malgu eta pertsonalizatu batez errazteko euren lan-esperientzia eta ikaskuntza ez-formalak kapitalizatzeko aukera, Teknikari eta Goi Mailako Teknikari tituluak osatzen dituzten moduluak gainditze aldera, eta baita horiei lotutako lanbide-gaitasuna aitortzeko ere, lanbide-gaitasuna ebaluatzeko prozedura bat ezarri da, bi fase edo aldi izango dituena: aholkularitza-laguntzaren aldia, eta gaitasun-probak egiteko aldia.

   Aholkularitza-laguntzaren aldia irakasleek burutuko dute; hain zuzen ere, prestakuntza-ikastaroa behar bezala egin ondoren, horretarako izendatuko diren irakasleek.

   Gaitasun-proben aldia egiteko, ebaluazio-batzorde edo ebaluazio-talde bat egongo da gutxienez, lanbide-alor bakoitzeko. Batzordeak ondoko kideak izango ditu, gutxienez: batzordeburua, idazkaria eta hiru batzordekide, Lanbide Heziketako zuzendariak horretarako izendatuak. Nolanahi ere, honako hau bermatu beharko da: batzordekide batek gutxienez lanbide-modulu bakoitzerako irakaskuntza-atribuzioa izango duela. Profesional kualifikatuak aholkulari gisa sartu ahal izango dira ebaluazio-batzordeetan, hala egokitzen bada. Ebaluazio-batzordeetako bakoitza Euskal Autonomia Erkidegoko hiru lurralde historikoetan aritu ahal izango da.

2. Aurreko paragrafoan esandako prozedura malgu eta pertsonalizatua arian-arian abiarazteko asmoz, Gaitasuna Ebaluatu eta Aitortzeko Sistemaren bidezko probak I. eranskinean ezarritako lanbide-alorretan eta heziketa-zikloetan egingo dira.

3. Sistema honen bidezko probak egiteko matrikulazioa eta inskripzioa martxoaren eta urriaren 1aren eta 15aren bitartean egingo da. Matrikulatu eta probak egin bitarteko aldia ez da lau hilabete baino gehiago izango, eta II. eranskinean zehazturiko zentroetan egingo da matrikulazio hori.

4. Lanbide-kualifikazioak osatzen dituzten lanbide-moduluei dagozkien prestakuntza-kredituak egin dituztenek, baldin eta modulu edo gaitasun-unitateren bat osatu badute Hezkuntza, Unibertsitate eta Ikerketa sailburuaren 2000ko maiatzaren Aginduaren babesean, eta bide horretatik lortutako lanbide-modulu edo gaitasun-unitateak egiaztatu nahi badituzte, artikulu honetan arautzen den prozedurara bil daitezke, eta dagokion lanbide-alorra baimenduta duten ikastetxe publikoetan matrikulatu ( Agindu horretako IV. eranskina).

   Dekretu honetako I. eranskinean agertzen ez diren alorretako lanbide-kualifikazioen moduluak ebaluatzeko, Lanbide Heziketako zuzendariak ebaluazio-batzordeak izendatuko ditu, eta horiek arduratuko dira ebaluazio- eta aitorpen-prozeduraz.

1. Heziketa-ziklo bereko lanbide-modulu guztiak gainditzen dituzten interesatuek honako hau egiaztatu beharko dute dagokien titulua eman dakiela eskatu baino lehen: Hezkuntzaren Kalitateari buruzko 10/2002 Lege Organikoak, abenduaren 23koak, bere 38. artikuluan ezarri dituen baldintza akademiko guztiak betetzen dituztela.

2. Gaitasun-unitate bati lotutako lanbide-moduluak gainditzeak hura kreditatzeko eskubidea emango du.

3. Hezkuntza, Unibertsitate eta Ikerketa Saila arduratuko da gaitasun-unitateak kreditatzeaz.

4. Gaitasun-unitateen kreditazioen, eta hala bada, lanbide-kualifikazioen erregistroa honela egingo da: 733/1995 Errege Dekretuak, maiatzaren 5ekoak, titulu akademikoak eta profesionalak emateari buruzkoak, ezarri duen prozeduraren arabera.

2003/2004 ikasturtean, Teknikari eta Goi Mailako Teknikari tituluak ateratzeko probak egin nahi dituztenek, hain zuzen ere dekretu honetako 3.1 artikuluan zehazten direnak, maiatzaren 24a eta 28a bitartean, biak barne, egingo dute matrikula. Ohiko proba, berriz, ekainaren bigarren hamabostaldian egingo da, eta ohiz kanpokoa, iraileko bigarren hamabostaldian.