Apirilaren 1eko 46/2014 Dekretuaren 8. artikuluan adierazitakoarekin bat etorriz, hezkuntzaren arloko eskumena duen sailaren menpe egon eta lanbide-heziketako irakaskuntzak eskaintzen dituzten institutuak (dekretu honen eranskinean daude jasota) lanbide-heziketako ikastetxe integratu bihurtuko dira, 2017ko uztailaren 1etik aurrera. Lehengoak eraldatuz sortutako ikastetxe berriek izen generiko hau izango dute: Lanbide Heziketako Ikastetxe Integratua.

Titulartasun publikoko lanbide-heziketako ikastetxe integratuen sarearen barnean sartzen dira aipatu ikastetxeak.

1. Lanbide-heziketako ikastetxe integratu eraldatuek irakaskuntza hauek eskainiko dituzte prestakuntza-jardueren barruan: hasierako lanbide-heziketari dagozkionak; langileen laneratzeko eta birlaneratzeko ekintzei dagozkienak eta etengabeko prestakuntzari dagozkionak, lanean dabiltzan langileentzat direnak. Irakaskuntza horiek finkatzerakoan, ekoizpen-ingurunearen eskaerak hartuko dira aintzat, eta sail edo erakunde eskudunak baimenduta beharko dute.

2. Apirilaren 1eko 46/2014 Dekretuaren 2. artikuluaren 3. paragrafoan adierazitakoarekin bat etorriz, lanbide-heziketako ikastetxe integratu eraldatuek, baimenduta dituzten lanbide-familiei edo -arloei dagokien prestakuntza-eskaintzaz gainera, lanbide-informazioko eta -orientazioko zerbitzuak eskainiko dituzte, eta, hala badagokio, berariazko araudian zehazten denaren arabera, baita beste ikaskuntza ez-formal batzuen bidez edo laneko eskarmentuaren bidez kualifikazioen eta lanbide-heziketaren sistema nazionalaren esparruan lortutako gaitasuna ebaluatzeko prozesuak ere. Ikastetxe horiek, era berean, zenbait jarduera garatuko dituzte berrikuntzaren eta ekintzailetzaren arloan.

1. Hezkuntza, Hizkuntza Politika eta Kultura Sailak ezarriko ditu dekretu honen 1. artikuluan aipatzen diren ikastetxe eraldatuen plantillak, eta, halaber, giza baliabideak egoki banatzeko beharrezkoak diren administrazio-jardunak sustatuko ditu, lanpostuak betetzeko ezarritako arauekin bat etorriz.

2. Aurreko paragrafoan adierazitakoaren ondorioetarako, Hezkuntza Sailak argitara emango ditu, dekretu bidez, dekretu honen 1. artikuluan aipatzen diren ikastetxe eraldatuen lanpostu-zerrendak. Dekretu horretan, zehaztuko da zein diren eraldatutako ikastetxeen lanpostuak eta zein diren ikastetxe eraldatuetan sartzen direnak.

3. Ondorio berberetarako, prozesu bat jarriko da abian, eraldatzen diren ikastetxeetan behin betiko destinoa duten langileak ikastetxe eraldatuei atxikitzeko. Atxikitze hori arau hauek oinarri hartuta egingo da:

   1. Apirilaren 1eko 46/2014 Dekretuaren lehen xedapen gehigarria; dekretu horrek Euskal Autonomia Erkidegoko Lanbide-Heziketako Ikastetxe Integratuak arautzen ditu.

   2. Apirilaren 16ko 86/2002 Dekretua, Lanpostu Zerrendak, ikasturtez ikasturte, Bigarren Hezkuntzako institutuetako eta Goi Mailako Lanbide Heziketako Berariazko institutuetako zein irakaslerengan duen eragina zehazteko irizpideak ezarri eta irakasleak euren ikastetxeei berriro atxikitzeko prozesua arautzen duena.

4. Apirilaren 1eko 46/2014 Dekretuaren lehenengo xedapen gehigarrian ezarritakoarekin bat etorriz, Bigarren Hezkuntzako Katedradunen Kidegoko, Bigarren Hezkuntzako Irakasleen Kidegoko eta Lanbide Heziketako Irakasle Teknikoen Kidegoko langileek ikastetxe eraldatuetan sartzea hauta dezakete, jatorrizko ikastetxean zituzten eskubideak galdu gabe, edo, bestela, lanpostua ezabatu zaienen egoerara iragan daitezke, horrek dakartzan eskubide eta obligazioekin.

5. Eraldatzen diren ikastetxeetako lanpostuei atxikitako Administrazio Orokorreko langileak ikastetxe eraldatuko lanpostuei atxikiko zaizkie, herri-administrazioetako langile funtzionarioentzat horretarako ezarritako prozedurei jarraituz.

   LEHENENGO XEDAPEN GEHIGARRIA. Ikastetxe eraldatuetako zuzendariak kargutik kentzea.

   Ikastetxea lanbide-heziketako ikastetxe integratu bihurtu aurreko egunean utziko dute kargua eraldatzen diren ikastetxeetako zuzendariek, hala ezarrita baitago otsailaren 3ko 22/2009 Dekretuaren 20. artikuluan, apirilaren 1eko 46/2014 Dekretuaren azken xedapenetatik lehenengoaren bidez emandako idazkeraren arabera (22/2009 Dekretua, Hezkuntza, Unibertsitate eta Ikerketa Sailaren menpeko Euskal Autonomia Erkidegoko unibertsitateaz kanpoko ikastetxeetako zuzendariak aukeratzeko eta pertsona bakarreko gainerako gobernu-organoak izendatzeko eta kargugabetzeko prozedura arautzen duena). Lanbide Heziketako sailburuordeak izendatuko ditu zuzendari berriak, 46/2014 Dekretuaren bigarren xedapen gehigarrian ezarritakoarekin bat etorriz.

   BIGARREN XEDAPEN GEHIGARRIA. Kontseilu Soziala eratzea.

   Irakasleen klaustroa eratu ondoren, ikastetxeko zuzendaritzaren ekimenez Kontseilu Soziala eratzeko jarduerak gauzatu beharko dira. Horretarako, gehienez urtebeteko epea egongo da, ikastetxe integratua jardunean hasten denetik hasita. Lanbide Heziketako sailburuordeak behar diren jarraibideak emango ditu ikastetxeetako hauteskunde-prozesuak burutu daitezen. Kontseilu Soziala bi urtetik behin berrituko da, eta, horretarako, Euskal Eskola Publikoa osatzen duten ikastetxeetarako oro har aurreikusitako prozedurak aplikatuko dira.