- AZTI zentro teknologikoak lideratutako urteko kanpaina zientifikoaren arabera batez besteko historikoaren “oso gainetik” dago
- Urte amaieran lortuko da behin betiko zifra, JUVENA eta PELGAS kanpainen eta flotaren harrapaketen datuak batera aztertzen direnean
- Eusko Jaurlaritzak eta Europako Batzordeak, Arrantza Idazkaritza Nagusiaren laguntzaz, finantzatutako ikerketa-lan hau funtsezkoa da espeziaren iraunkortasuna bermatzeko
VG 2024 07 13
Antxoa itsasoko baliabiderik garrantzitsuenetako bat da arrantzarako eta ekonomiarako, eta egoera onean dago. AZTI zentro teknologikoak lideratuta urtero egiten den BIOMAN izeneko kanpaina zientifikoaren behin behineko emaitzen arabera, espezie horren biomasa 143.000 tonakoa da Bizkaiko Golkoan, eta batez besteko historikoaren oso gainetik dago.
“AZTIren datuen arabera, baliabidearen iraunkortasuna ziurtatuta dago, larregi gainditzen baitute populazioaren muga biologikoa markatzen duen 21.000 tonen zifra. Are gehiago, azkenaldiko datuek nabarmen gainditzen dute kanpaina honek 1987an hasi zenetik dokumentatu duen 80.000 tonako batez besteko historikoa”, ziurtatu du Amaia Barredok, Elikadura, Landa Garapen, Nekazaritza eta Arrantzako sailburuak.
“Albiste bikaina da, eta urtetan ingurumenaren eta Euskadiko arrantza-sektorearen jasangarritasunaren alde egin dugun apustua balioesten du, Euskadin 3.500 pertsona baino gehiagori lana ematen dion baliabide bat izanik”, azpimarratu du sailburuak. “Datu hauekin datorren denboraldiko kostera ziurtatzen degu. Emaitzak oso positiboak dira, baina biomasaren behin betiko zifra izateko eta kudeatzaileei aholkua emateko, urtearen amaierara arte itxaron beharko dugu, orduan izango baititugu beste kanpainetako eta arrantzako flotaren harrapaketetako datuak”.
AZTIren zuzendariak urteko kanpainak aipatu ditu: JUVENA, euskal zentro teknologikoak lideratzen duena eta urtebete baino gutxiagoko antxoen ugaritasuna eta banaketa zehazten dituena, eta PELGAS, Frantziako Ifremer institutuak koordinatzen duena eta antxoaren populazioaren egoera eta Frantziako eremu atlantikoko ekosistemaren funtzionamendua ezagutzeko dena.
Analisi hori Madrilen egingo da Itsasoa Esploratzeko Nazioarteko Kontseiluaren (CIEM) antxoaren, sardinaren eta txitxarroaren lantaldearen esparruan, eta horren ondorioak oinarrizkoak izango dira 2025erako Harrapaketen Guztizko Onargarria (TAC) zehazteko.
“Analisi oso horrekin, zehatzago jakingo dugu udaberri honetan jaiotako antxoa-aleetatik zenbat iristen diren udazkenean jubenilak izatera, eta hori ingurumeneko eta ekosistemetako faktoreen mende dago: tenperatura, elikagaien eskuragarritasuna edo harrapariak”, erantsi du Amaia Barredo´k.
Kanpaina hau Eusko Jaurlaritzako Elikadura, Landa Garapen, Nekazaritza eta Arrantza Sailaren eta Europako Batzordearen finantza-laguntzari esker izan da bideragarria, duela ia lau hamarkada egin baitzuten horren aldeko apustua. Gainera, oinarrizkoa izan da Nekazaritza, Arrantza eta Elikadura Ministerioko Arrantza Idazkaritza Nagusiaren lankidetza ere, bere Emma Bardán eta Vizconde de Eza ontzi ozeanografikoak erabili ahal izan baitira.
Itsasoen jasangarritasuna
- urteaz geroztik ohikoa den moduan, BIOMAN 2024 kanpaina ikuspegi ekosistemikoarekin egin da, ingurumena eta baliabide biziak modu orekatuan kontserbatzea eta erabiltzea sustatuko duen kudeaketa integratua lortzeko helburuarekin. Horrela, espeziearen biomasaren estimazioa egiteaz gainera, beste faktore batzuetan ere jarri da arreta, hala nola sardinaren biomasan, antxoaren elikagaian, harraparien eta beste itsas organismo batzuen presentzian, ugaritasunean eta portaeran, baldintza ozeanografikoetan, gizakiaren jardueretan eta itsas hondakinetan.
Informazio gehiago Irekia atarian (Leiho berrian irekiko da)
