Euskadik Europako Landa Itunarekin bat egiten du, landa-eremuen etorkizun jasangarria bermatzeko
![AdobeStock_182625249.jpeg](images/n320_AdobeStock_182625249.jpeg)
2022-06-15
Gaurtik bihar arte, Landa Itunaren aldeko Konferentzia egingo da Bruselan, orain arte egindako hausnarketen emaitzak partekatzeko eta EBko landa-eremuetarako epe luzerako ikuspegiaren helburuak lortzeko hurrengo urratsak zehazteko.
Eusko Jaurlaritzak bat egin du Landa Itun horrekin, eta konpromisoa hartu du ikuspegi horren etorkizuneko helburuak betetzeko, landa-eremu indartsuagoak, lotuagoak, erresilienteagoak eta oparoagoak biltzen baititu, gobernantza-maila desberdinen eta landa-eragileen arteko lankidetzaren bidez.
Jone Fernández, Landaren eta Itsasertzaren Garapeneko eta Europar Politiketako zuzendaria, Asier Arrese, HAZIko Lurralde Zuzendaritzako arduradunarekin eta Juanan Gutiérrez, Euromontanako presidentearekin batera, Eusko Jaurlaritzaren ordezkari dira hitzaldian.
Konferentzian, tokiko, eskualdeko eta nazioko gobernantza-maila desberdinak bilduko dira, landa-eremuen ordezkari diren eragileekin, Europako erakundeekin eta interesa duten beste alderdi batzuekin batera, Landa Ituna Komunikazioan aurreikusitako helburuak lortzea, finantzaketari laguntzea eta lankidetza erraztuko duen esparrua izan dadin, Europako landa-eremuen behar espezifikoak kontuan hartuta.
EBko landa-eremuetarako ikuspegiak landa-eremuen garapena aurreikusten du, zerbitzuak emateko irtenbide berritzaileak bilatuz, tresna digitalak aprobetxatuz, gizarte-berrikuntza sustatuz, garraio publikoko zerbitzuak eta konexioak eta azpiegitura digitalak hobetuz, bioekonomiaren eta ekonomia zirkularraren arloko jarduerak garatuz eta alfabetizazio digitala bultzatuz enpresentzako ingurune erakargarriak sortuz.
Konferentziaren helburua da, halaber, landa-eremuen ikusgarritasuna handitzea, estatu kide guztietako eta Europako erakundeetako goi-mailako gonbidatu politikoak eta landa-eremuetako eragileak inplikatuz Europako lehen landa-estrategia handiaren inplementazioan.
Konferentzia Eskualdeko Lantaldearekin, Ekonomia eta Gizarte Komitearekin, Europako Parlamentuarekin, Kontseilu Europarraren Lehendakaritzarekin eta Europako Landa Parlamentuarekin lankidetzan antolatu da.
Euromontana eragileen panelean parte hartzera gonbidatu dute, Itunari batera forma nola eman eztabaidatzeko. Panel horretan, besteak beste, Elisa Ferreira Kohesio eta Erreforma komisarioak eta Juanan Gutiérrez Euromontanako presidenteak parte hartuko dute.