Joko eta Ikuskizunak

Laguntzak emateko nahitaezko ebazpena eman edo hitzarmena sinatu ostean, zeinetan, besteak beste, emandako dirulaguntzaren zenbateko osoa eta horren urte anitzeko banaketa aurrekontu-ekitaldien arabera finkatu behar baitira, agindu honen babesean ematen diren laguntzak honela ordainduko dira, betiere onuradunak eskatuta:

1. Finantzaketa kualifikatuaren, banku-deskontuaren eta interes-tasen subsidiazioaren kasuan, zein kreditu-establezimendurekin formalizatzen den eragiketa, haren bidez egingo da ordainketa, baldin eta establezimendu horrek berariazko finantza-hitzarmena sinatua badu Euskal Autonomia Erkidegoko Administrazioarekin.

   Kreditu-establezimenduan, dokumentazio hau aurkeztu beharko da hura lortzeko:

   1. Babes ofizialeko etxebizitzen sustapenaren kasuan, behin-behineko kalifikazioa.

   2. Gainerako sustapenetarako, obra-lizentzia eta laguntzak ematen dituen ebazpena.

   3. Etxebizitzak eskuratzen badira errentamendu babestuan jartzeko eta zuzkidura-bizitokiak eta cohousinga sustatzeko, laguntzak ematen dituen ebazpena.

2. Itzuli beharrik gabeko dirulaguntzak ordaintzeko, erakunde onuradunak Eusko Jaurlaritzaren datu-basean agertu beharko du. Alta emateko edo hirugarren interesdun gisa dagozkion datuak aldatzeko, Eusko Jaurlaritzak eskainitako hirugarrenen erregistro elektronikora jo beharko du interesdunak, honako helbide honetan: https://www.euskadi.eus/hirugarrenak

   1. Sustapenaren urbanizazio-kostuari dagozkion laguntzen kasuan, ordainketa partzialak egingo dira, dagokion lurralde-ordezkaritzan obra-ziurtagiriak aurkeztuta. Ordainketa horiek obra ziurtatuaren exekuzioaren proportzioan egingo dira.

   2. Ordainsari teknikoen kostuari dagozkion laguntzen kasuan, dagokion lurralde-ordezkaritzan ordainsari-minutak aurkeztutakoan ordainduko da.

   3. Errentamendurako pizgarriei buruzko laguntzen kasuan:

      1. Errentamendu babesturako etxebizitzen sustapenerako:

         1. % 20ra arte, laguntza finantzarioen esleipen-ebazpena jakinarazi ondoren.

         2. % 40ra arte, obraren % 50 egiaztatu ondoren.

         3. % 20ra arte, obra osoa jaso ondoren.

         4. Gainerako ehunekoa, lehenengo erabilera-kontratua sinatu dela egiaztatu ondoren.

      2. Etxebizitzak hirugarren bati besterentzeko sustatzen direnean, errentamendu babestura bideratzen dituena bada: Salerosketa-kontratua aurkeztu ondoren emandako laguntzen % 50, gehienez, salerosketa-eskritura publikoa aurkeztu ondoren emandako laguntzen gainerako ehunekoa.

      3. Etxebizitza erosteko eragiketak, errentamendu babestuan jartzeko. Salerosketako eskritura publikoa aurkeztu ondoren emandako laguntzen % 50, gehienez, eta lehenengo errentamendu-kontratua aurkeztu ondoren emandako laguntzen gainerako ehunekoa.

      4. Zuzkidura-bizitokien sustapenaren kasuan, dirulaguntza honela ordainduko da, dagokion lurralde-ordezkaritzan egiaztatu ondoren:

         1. A motako zuzkidura-bizitokien sustapenean, lehen erabilera-kontratua egiaztatzen den egunean.

         2. B motako zuzkidura-bizitokien sustapenean:

         1. % 20ra arte, laguntza finantzarioen esleipen-ebazpena jakinarazi ondoren.

         2. % 40ra arte, obraren % 50 egiaztatu ondoren.

         3. % 20ra arte, obra osoa jaso ondoren.

         4. Gainerako ehunekoa, lehenengo erabilera-kontratua sinatu dela egiaztatu ondoren.

      5. Alokairu programari atxikitako etxebizitzen sustapenaren kasuan, errenta bermatuaren ordainketa inbertitzaile instituzionalak etxebizitza-gaietan eskumena duen sailari lagatako etxebizitzak benetan eskuragarri jartzen dituenean hasiko da, eta ordainketa erregulartasunez eta aldizka egingo da, lagapenak indarrean dirauen bitartean.

      6. Landa-ingurunean eta despopulazioak eragindako landaguneetan etxebizitzak birgaitzeko eta errentan jartzeko laguntzen kasuan, obrak exekutatzeagatiko dirulaguntzak honela ordainduko dira, dagokion lurralde-ordezkaritzan egiaztatu ondoren:

         1. % 20ra arte, laguntza finantzarioen esleipen-ebazpena jakinarazi ondoren.

         2. % 40ra arte, obraren % 50 egiaztatu ondoren.

         3. % 20ra arte, obra osoa jaso ondoren.

         4. Gainerako ehunekoa, lehenengo errentamendu-kontratua sinatu dela egiaztatu ondoren.

      7. Despopulazioak eragindako landaguneetan alokairua ordaintzeko laguntzen kasuan: Salerosketako eskritura publikoa aurkeztu ondoren emandako laguntzen % 50, gehienez, eta lehenengo errentamendu-kontratua aurkeztu ondoren emandako laguntzen gainerako ehunekoa.

      8. Cohousinga sustatzeko laguntzen kasuan, dirulaguntza jasotzeko eskubidea duen bazkide bakoitzari honela ordainduko zaio, aldez aurretik behar bezala egiaztatuta:

         1. % 50era arte, jarduketa-proiektuari obra-lizentzia eman ondoren.

         2. Gainerako ehunekoa, lagapen-kontratua sinatu dela egiaztatu ondoren.