Familia eta Haurrak

Agindu honen xedea da 14 urtetik beherako seme-alabak zaintzeko langileak kontratatzeko laguntzei buruzko irailaren 7ko 102/2022 Dekretuaren 8.1 artikuluan aurreikusitako laguntzak eskuratzeko eskakizunak betetzen direla egiaztatzeko dokumentazioa eta laguntza-eskabideen inprimaki normalizatuak onartzea.

Agindu honetan aurreikusitako laguntza eskuratzeko eskakizunak betetzen direla egiaztatzeko dokumentazioa eta laguntza-eskabideen inprimaki normalizatuak aplikatuko zaizkie 14 urtetik beherako seme-alabak zaintzeko langileak kontratatzeko laguntzei buruzko irailaren 7ko 102/2022 Dekretua indarrean jartzen denetik aurrera aurkezten diren laguntza-eskabideei.

1. Laguntzak eskuratzeko eskakizunak dokumentazio honen bidez egiaztatu ahal izango dira:

   1. Familia-unitatea osatzen duten gurasoen identitatea: Europar Batasuneko estatukide bateko edo Europako Esparru Ekonomikoari buruzko Akordioan parte den estatu bateko nazionalitatea dutenen kasuan, titularraren nazionalitatea jasotzen duen nortasun-agiri ofizial baten bidez edo pasaportearen bidez, eta, gainerako herrialde batetako nazionalitatea dutenen kasuan, Atzerritarren Identifikazio Txartelarekin (AIT) edo pasaportearen, edo, hala dagokionean, duten bizileku-baimenaren bidez.

   2. Erroldatzea: eskatzailearen errolda-agiriaren bidez, non jasoko baita bizilekuan bizi diren pertsona guztien zerrenda, eta adieraziko baita eskatzailea noiztik dagoen udalerrian erroldatuta.

      Erroldatua egotea eskatzen den aldian zehar, eskatzailea Euskal Autonomia Erkidegoko hainbat udalerritan bizi izan bada, eskabidean zehaztu beharko du hori, eta eskakizun hori betetzen duela egiaztatzen duten dokumentazioa aurkeztu.

      Ez da onartuko eskabidearen formulatze-eguna baino hilabete lehenagoko antzinatasuna duen errolda-ziurtagiririk.

      Laguntzaren eskatzaileak aurkeztutako dokumentazio eta informazio multzoak zalantzan jartzen badu eskatzaile hori benetan Euskal Autonomia Erkidegoan bizi den edo ez, baldintza hori betetzen dela egiaztatzeko ziurtagiriak eska ditzake laguntzak kudeatzen dituen organoak.

   3. Gizarte Segurantzari ordaintzea etxeko langilearen kotizazioak, eskatzen diren hilabeteei dagozkienak, dagozkion ordainagirien bidez.

   4. Familia-unitatea osatzen duten gurasoak besteren konturako langileak badira, Gizarte Segurantzako alta-egoera eta egiten duten lanaldia Gizarte Segurantzaren kotizazio-datuen txostenaren bidez egiaztatuko dira delako IDC agiria.

      Familia-unitatea osatzen duten gurasoak norberaren konturako langileak badira, Gizarte Segurantzan kotizatu izanaren ordainagiriak aurkeztu beharko dituzte beren jarduera egiaztatzeko.

      Familia-unitatea osatzen duten gurasoek ezintasun absolutu iraunkorra, lan egiteko ezintasun osoa edo ezintasun handia aitortua badute, egoera hori aitortzen duen administrazio-ebazpena aurkeztuko dute.

   5. Ebazpen judizial edo administratibo baten bidez egiaztatu ahal izango da laguntzaren eskatzailearen eta seme-alaben zeinak zaintzeko kontratatzen baita langilea arteko filiazioko, adoptatzeko edo harrera iraunkorra egiteko tutoretza- edo zaintza-egoerako harremana.

   6. Diru-sarrera fiskalak, hauen bidez:

      1. Dagokion administrazioak egindako likidazioa, familia-unitatea osatzen duten gurasoen Pertsona Fisikoen Errentaren gaineko Zergaren aitorpenari dagokiona (baterako aitorpena edo bakoitzaren aitorpen indibiduala), laguntza eskatu baino bi urte lehenagoko zergaldikoa.

      2. Familia-unitatea osatzen duten gurasoek Pertsona Fisikoen Errentaren gaineko Zergaren aitorpena egin ez badute, dagokion administrazioak emandako ziurtagiria, laguntza eskatu baino bi urte lehenagoko zergaldiari dagozkion errenta guztiak eta Pertsona Fisikoen Errentaren gaineko Zergari egotz dakizkiokeen errenta eta errendimendu guztiak adierazten dituena.

   7. Erantzukizunpeko adierazpenaren bidez, hauek egiaztatu ahal izango ditu eskatzaileak:

      1. Ez dela inolako laguntzarik jasotzen ari 14 urtetik beherako seme-alabak zaintzeko langileak kontratatzeko.

      2. Ez zaiola ezarri dirulaguntza edo laguntza publikoak lortzeko aukera galtzea dakarren zigor- edo administrazio-arloko zigorrik, eta ez dagoela hartarako ezgaitzen duen legezko debekuren baten eraginpean.

      3. Ez dagoela Euskal Autonomia Erkidegoko Administrazio Publikoak emandako laguntzen edo dirulaguntzen esparruan hasitako itzultze- edo zehapen-prozeduraren batean. Erantzuna baiezkoa bada, zein prozedura den edo diren adieraziko da.

      4. Ez dagoela Dirulaguntzei buruzko azaroaren 17ko 38/2003 Lege Orokorraren 13.2 artikuluan aurreikusitako egoera batean.

      5. Egiazkoak direla eskabidean eta eskabideari erantsitako dokumentazioan emandako datuak.

   8. Halaber, kasu hauetan:

      1. Laguntzaren eskatzailea genero-indarkeriaren biktima bada, genero-indarkeriaren egoera egiaztatu beharko du Familia-politiken esparruan familia-errenta estandarizatzeko sistemari buruzko uztailaren 24ko 154/2012 Dekretuaren 4.3 artikuluan ezarritako bitartekoren baten bidez familia-politiken eremuan familia-errenta estandarizatzeko sistema erregulatzen duen dekretua aldatzeko martxoaren 17ko 32/2015 Dekretuaren bidez aldatutako artikulua edo hura ordezkatzen duen arauaren bidez, familia-errenta estandarizatua zehazteko.

      2. Familia-unitatea osatzen duten pertsonetako batek desgaitasun edo mendetasunen bat badu aitortuta, egoera hori egiaztatzen duen administrazio-ebazpena aurkeztu beharko du, familia-errenta estandarizatua zehazteko.

      3. Epailearen ebazpen baten bidez ezarri bada seme-alaben zaintza eta jagoletza zeinak zaintzeko kontratatzen baita langilea, eskatzaileak dokumentu hori aurkeztu beharko du.

      4. Familia-unitatea guraso bakarrekoa bada, familia-errenta estandarizatua zehazteko, eskatzaileak egiaztatu beharko du seme-alabak zeinak zaintzeko kontratatzen baita langilea bere mende daudela ekonomikoki.

         Hori honela egiazta daiteke, besteak beste:

         Adingabea berak bakarrik aitortua bada, hori egiaztatzen duen dokumentu administratiboaren bidez.

         Bi gurasoek aitortu badute semea edo alaba, beste gurasoak ez duela mantenu-pentsioa ordaintzen egiaztatzen duen dokumentu judizial edo administratiboaren bidez.

      5. Familia ugaria bada, eskatzaileak familia ugariaren txartela aurkeztuta egiaztatuko du.

2. Eskatzaileak eskubidea du ez aurkezteko jadanik administrazio jardulearen esku dauden dokumentuak edo beste administrazio orok egindakoak. Laguntzak kudeatzen dituen organoak aurreko apartatuko a), b), f) eta h) letretan mendekotasuna eta familia ugariak adierazitako dokumentuak kontsultatu edo eskatu ahal izango ditu, interesdunak horren aurka egin ezean.

   Aurka eginez gero edo, kontsulta egin ostean, dokumentazioa lortu ezin bada, arrazoia zeinahi dela ere, eskatzaileak berak aurkeztu beharko du dokumentazio hori.

3. Hasierako eskabidearen jarraipena diren kotizazio-aldietako eskabideak inprimaki sinplifikatuan egingo dira, eta artikulu honetako 2. apartatuko c) eta d) letretan jasotako dokumentazioa soilik aurkeztu beharko da; halaber, aldaketaren bat gertatuz gero aurretik egiaztatutako egoerarekin alderatuta, aldaketa horiei buruzko dokumentazioa ere aurkeztu beharko da.

   Jarduketa diruz lagungarria eten eta berriz abiarazi bada, inprimaki sinplifikatuaren bidez eskatuko da, eta, horrekin batera, artikulu honetako 2. apartatuko b), c) eta d) letretan adierazitako dokumentazioa aurkeztu beharko da; halaber, aldaketaren bat gertatuz gero aurretik egiaztatutako egoerarekin alderatuta, aldaketa horiei buruzko dokumentazioa ere aurkeztu beharko da.

4. Laguntzak kudeatzeko ardura duen zuzendaritzak ofizioz egiaztatuko du eskatzaileak egunean dituela zerga-betebeharrak eta Gizarte Segurantzarekikoak, dirulaguntza esleitu eta ordainketa egin baino lehen egiaztatu ere. Eskatzailea era arrazoituan aurka agertu ezean, bat etorriz azaroaren 11ko 1/1997 Legegintzako Dekretuaren bidez onartu zen Euskal Autonomia Erkidegoko Ogasun Nagusiaren Antolarauei buruzko Legearen testu bateginaren 50.3 artikuluan xedatutakoarekin.

   Aurka egonez gero, eskatzaileak kasu bakoitzean eskumena duen organoak emandako administrazio-egiaztagiri positiboak aurkeztu beharko ditu.

5. Aurkezten diren atzerriko dokumentuek, hala badagokio, euskarara edo gaztelaniara modu ofizialean itzulita egon behar dute. Halaber, atzerriko dokumentu publikoek behar bezala legeztatuak egon beharko dute.

   Europar Batasuneko beste estatukide bateko nazionalitatea dutenei Europako Parlamentuaren eta Kontseiluaren 2016ko uztailaren 6ko 2016/1191 Erregelamendua (EB) aplikatuko zaie, zeinaren bidez errazten baita herritarren zirkulazio librea, dokumentu publiko jakin batzuk Europar Batasunean aurkezteko eskakizunak sinplifikatuta, eta zeinaren bidez aldatzen baita 1024/2012 Erregelamendua (EB).

1. Jarraian adierazten diren laguntza-eskabideen inprimaki normalizatuak onesten dira, eta agindu honi eransten zaizkio:

   14 urtetik beherako seme-alaba adingabeak zaintzeko langileak kontratatzeko eskatzen diren dirulaguntzak Z HASIERA izeneko inprimaki normalizatua beteta eskatu beharko dira.

   14 urtetik beherako seme-alaba adingabeak zaintzeko langileak kontratatzeko eskatzen diren dirulaguntzak jarraipeneko inprimaki sinplifikatuaren bidez eskatuko dira, eta Z JARRAIPENA izeneko inprimaki normalizatua dagokie.

2. Inprimaki normalizatuak eta horiek nola bete jakiteko jarraibideak «https://euskadi.eus» webgunean daude eskuragai. Zehazki:

   14 urtetik beherako seme-alaba adingabeak zaintzeko langileak kontratatzeko eskatzen diren dirulaguntza-eskabideak Z HASIERA izeneko inprimaki normalizatuari dagozkio, eta hemen daude: www.euskadi.eus/servicios/0079104

   14 urtetik beherako seme-alaba adingabeak zaintzeko langileak kontratatzeko eskatzen diren dirulaguntzak jarraipeneko eskabide sinplifikatuaren bidez eskatuko dira, eta Z JARRAIPENA izeneko inprimaki normalizatua dagokie, eta hemen daude: www.euskadi.eus/servicios/0079104

Dirulaguntzen eskabideak aurrez aurre aurkez daitezke Eusko Jaurlaritzako Zuzenean-Herritarrentzako Zerbitzuaren bulegoetan edo Administrazio Publikoen Administrazio Prozedura Erkidearen urriaren 1eko 39/2015 Legearen 16.4 artikuluan aurreikusitako organoen aurrean edo, bestela, elektronikoki ere bai.

AZKEN XEDAPENETAKO LEHENENGOA. Errekurtsoak.

Agindu honek amaiera ematen dio administrazio bideari, eta haren aurka, aukerako berraztertze-errekurtsoa aurkeztu ahal izango zaio Enpleguko eta Gizarte Politiketako sailburuari, hilabeteko epean, agindua Euskal Herriko Agintaritzaren Aldizkarian argitaratu eta hurrengo egunetik aurrera; bestela, zuzenean administrazioarekiko auzi-errekurtsoa aurkeztu ahal izango da Euskal Autonomia Erkidegoko Auzitegi Nagusiaren Administrazioarekiko Auzietarako Salan, bi hilabeteko epean agindua Euskal Herriko Agintaritzaren Aldizkarian argitaratzen den egunaren hurrengo egunetik aurrera.

AZKEN XEDAPENETAKO BIGARRENA. Ondorioak.

Agindu honek Euskal Herriko Agintaritzaren Aldizkarian argitaratu eta hurrengo hilabeteko lehen egunean jarriko da indarrean.

Vitoria-Gasteiz, 2022ko irailaren 20a.

Berdintasun, Justizia eta Gizarte Politiketako sailburua,

BEATRIZ ARTOLAZABAL ALBENIZ.

(Ikus .PDF)

(Ikus .PDF)