Txorierriko geltoki gehienetan egin diren lanak, nasak, 2017ko apiriletik 3. linean eta Txorierrin zirkulatzen duten unitate berrien galiboetara egokitzeko eta kubikuluak eta markesinak berriztatzeko lanak izan dira, lur azpiko trenbide berriak duen irudiarekin parekatzeko. Orain arte, geltokiak desberdinak ziren eta ez zioten diseinu eta funtzionaltasun irizpide berari erantzuten.

Derioko geltokian egin da jarduketa garrantzitsuena, 5,5 milioi euroko aurrekontuarekin. Euskal Trenbide Sarea euskal trenbide kudeatzaileak handitu egin du bertan dagoen lur azpiko ataria. Horrez gain, egokitu du hiri ingurunetik datorren oinezkoentzako sarbidea, igogailu bat instalatuz, eta baita industrialdetik datorrena ere, nasa erdian duen geltokiaren irisgarritasuna eta funtzionaltasuna hobetzeko xedez.

Izan ere, Nasaren azalera ere handitu da, zabalera eta luzera gehiago duelarik. Ustiapena hobetzeko, trenaren bikoizketa 500 metro inguru luzatu da. Trenbidean egin den beste esku-hartze garrantzitsu bat, Txorierriko Etorbidearen eta Astintze kalearen arteko oinezkoen trenbide pasagunea kentzea izan da. Horren ordez, arrapalak eta eskailerak edukiko dituen lur azpiko igarobide bat zabaldu da.

Bestalde, Derio eta Zamudio artean, bi kilometro inguru dituen trenbidea berriztatu da.