Euskal Sagardoa jatorri deitura duten sagardoen kontsumoa sustatzeko "Terraza garaia, Euskal Sagardo garaia" promozioa hasi da gaur

2018.eko apirilak 27

Gipuzkoa osoko berrogeita bost taberna eta jatetxek hartuko dute parte maiatzaren 13ra arte iraungo duen egitasmo honetan

Euskal Sagardoa Jatorri Deiturak, Gipuzkoako Ostalaritza Elkarteak eta Eusko Jaurlaritzako Ekonomiaren Garapen eta Azpiegitura Sailaren mende dagoen HAZI Fundazioak sustatutako "Terraza garaia, Euskal Sagardo garaia" promozioa aurkeztu da gaur goizean Kata 4 jatetxeko terrazan. Prentsaurrekoan Eusko Jaurlaritzaren Nekazaritza, Arrantza eta Elikagaien Politikako sailburuordea Bittor Orozek, Euskal Sagardoa Jatorri Deituraren koordinatzaile Unai Agirrek eta Ostalaritza Elkarteko lehendakariorde eragile Iñaki Illarramendik hartu dute parte.

Ostalaritza Elkartearen eta HAZI Fundazioaren Kalitatea proiektuaren barruan dagoen Terraza garaia, Euskal Sagardo garaia egitasmoak Gipuzkoa osoko ostalaritza establezimenduen terrazetan Euskal Sagardoa jatorri deitura duten sagardoen kontsumoa sustatzea du helburu. Horretarako, gaurtik aurrera eta maiatzaren 13ra arte, gure lurraldeko 45 jatetxe eta tabernek –Ostalaritza Elkarteko kide direnak- Euskal Sagardoa (edalontzia edo botila) eskainiko dute haien establezimenduetan pintxo edo errazio batekin batera.

Promozioak ikusgaitasuna izan dezan, kartelak, triptikoak, eskuorriak, kubiterak, arbelak eta beste zenbait material diseinatu dira, establezimenduen barrualdean eta terrazetan jartzeko. Gainera, kanpainak irauten duen bitartean, zozketak egingo dira eta terraza hauetan Euskal Sagardoa eskatzen dutenek bi sagardo botilako lote bat irabazteko aukera izango dute.

Gaur goizeko aurkezpena bukatu ondoren, Unai Agirrek Euskal Sagardoen dastatze txiki bat zuzendu du, hurbildu diren pertsona guztiek sagardo hau ezagutu zezaten. Dastatzearekin batera, gainera, ostrak, gildak, hegaluze-mendrezka, urte-sasoiko zainzuriak perretxiko ‘velouté’-arekin eta Idiazabal gazta irasagarrarekin zerbitzatu dira.

Zer da Euskal Sagardoa jatorri deitura duen sagardoa?

Euskal Sagardoa jatorri-deitura duen sagardoa %100 bertako sagarrarekin egina dagoena eta kalitate bermea du. Sagardoak Euskal Sagardoa Jatorri Deiturako zigilua eta numerazioa izan ditzan, analitikak eta panel organoleptiko bat pasa beharra dauzka. Prozesu osoa HAZI Fundazioak ziurtatzen du, hasi sagastitik eta botilara arte.

Euskal Sagardoen dastatzeak

‘Terraza garaia, Euskal Sagardo garaia’ promozioaz gain, ostalariei zuzendutako Euskal Sagardoen hainbat dastatze antolatu dira. Donostian, Errenterian, Ordizian eta Azpeitian ospatu dira jada eta datozen asteetarako hurrengo hauek antolatu dira:  

- Maiatzak 8: Usurbil (Sutegi kultur etxea)

- Maiatzak 22: Irun (Casino jatetxea)

- Maiatzak 29: Tolosa (Txinparta Elkartea)

‘Kalitatea’ proiektua

2013. urtean Ostalaritza Elkarteak eta HAZI Fundazioak martxan jarri zuten proiektu honek bi sektore elkarraraztea du helburu. Bi sektore horiek gure kultura eta identitatearen elementu bereizgarriak izateaz gain, aberastasun eta lan sortzaileak dira.

Alde batetik, bere produktuen kalitateagatik ezagunak diren Euskadiko lehen eta bigarren sektorea, bai EuskoLabel eta Euskal Sagardoa bezalako ekoizpen prozesuen egiaztapen sistemen apustu ausartagatik, baita sektore horien eguneroko jarduerak gure nortasunaren ezaugarriei egindako ekarpenenagatik eta gure geografiako ardatz soziodemografikoan eragindako efektu positiboagatik ere.

Beste alde batetik, Ostalaritzak azken 40 urteotan halako bilakaera izan du, gure gastronomia mundu mailako erreferente bihurtu duela eta, zehaztasun gehiagorekin, sektore honetara lotuta dagoen azpisektorea bihurtu du erreferente. Eskaintza gastronomiko bat non produktua bera eta produktua ereiteko forma ezberdinek kontsumo ohituretan eragin handia izan duten. Gainera, ostalaritza sektorea, bere baitan, lehenengo sektoreko produktuen kontsumo kanala da, lan egiten duen produktuen inguruko irudi positiboa sortzen duena.

 ‘Terraza garaia, Euskal Sagardo garaia’ egitasmoan parte hartzen duten establezimenduen zerrenda